Tachi Ak'õrepa israelitaarã jùrùt'erada
9
1 Mù Cristode ijãadak'ãriipa, araa bù iru ome. Tachi Ak'õre Jaurepa k'awapipari mùa wãarata jararu. Ma awara mùchi t'ãripa ichiaba k'awa bù seewa jara–e nãga jarak'ãri. 2 Mù audú t'ãri p'ua nâbù mùchi auk'aarã, judiorãpa Cristode ijãadak'aa perã. 3 Piara bak'aji Cristopa mù yiaraa iru bada paara, mùchi auk'aarã atuadai k'ãyaara. 4 Ãra Israeldeepa uchiajida. Chonaarãweda Tachi Ak'õrepa ãra jùrùt'eraji ichideerã p'aneedamerã. Mãgá ichi warrarãk'a p'aneejida. Iru bapachi ãra chonaarã t'ãide. Mãga nùde iru k'îra wãree unujida. Ãra chonaarãmaa jaraji ichia ooit'ee Abrahamdeepa uchiadap'edaarã k'ap'ùa pari. Ichi ûraa p'ãpiji ãra chonaarãmaa mãik'aapa mãùrãdepema ûk'uru awara bùji mimiadamerã ichi–it'ee. Jaraji ãra chonaarãmaa sãga ùt'aa iidipataadaipia bù. Ãra chonaarãmaa jarada chok'ara jaraji ãra pia ak'ù bapariit'ee mãik'aapa eperã pëiit'ee ãra k'aripade. 5 Ãra uchiajida tai chonaarã Abrahamdeepa, Isaacdeepa, Jacobdeepa. Maap'eda Tachi Ak'õre Waibùa Jesucristo, chi ne–inaa jõmaweda ak'ùpari t'ok'ãri eperã k'ap'ùade, ãchi auk'aa paji, ichiaba ma chonaarãdeepa uchiada perã. ¡Maperã ichita gracias jaradáma irumaa! ¡Amén!6 Mãgara ¿k'ãata jaraima? ¿Tachi Ak'õrepa oo–e pajik'ã ichia ooit'eeda adak'a israelitaarã ome? ¡Mãga ooji! Mamîda ichi–it'ee jõmaweda Israeldeepa uchiadap'edaarã wãara israelitaarã–e. 7 Ichiaba ichi–it'ee jõmaweda Abrahamdeepa uchiadap'edaarã wãara Abraham warrarã–e. Tachi Ak'õre Ûraa p'ãdade jara bù:
‘Mùa Isaacdeepa uchiadait'eerã pia ak'ùit'ee, pù mùde ijãapari perã.’ (Génesis 21.12)
8 Ak'õrepa mãga jarada perã, k'awa p'anù iru–it'ee Isaacdeepa uchiadap'edaarã aupai Abraham warrarã, Abrahampa awaraa warrarã ooji mîda. Tachi Ak'õrepa Isaacdeepa uchiadap'edaarã mãga ak'ùpachi, ãra uchiadap'edaa perã irua Abrahammaa jarada k'aurepa. 9 Tachi Ak'õrepa mãgaji Abrahammaa:
‘Añomaa mù waya cheit'ee mãik'aapa Sarapa warra t'oit'ee.’ (Génesis 18.10)
10 Ma awara aù t'êepai tai judiorã chonaa Isaacpa me–iso ooji chi wêra Rebeca ome. 11 Mamîda ma me–iso t'odai naaweda, Tachi Ak'õrepa k'îsia iru baji aba jùrùt'erait'ee mãik'aapa waibùara papiit'ee chi apema k'ãyaara. Ak'õrepa mãga ooji ma warrarãpa waide ne–inaa pia wa k'achia ooda–e p'anajida mîda. Mãga ook'ãri, k'awapiji ichiata eperã jùrùt'erapari oomerã ichia oopi bùk'a. 12 Jùrùt'era–e ma eperãpa ne–inaa pia oopari perã. Jîp'a jùrùt'erapari ichia k'inia bùk'a. Mãga k'awa p'anù Ak'õrepa Rebecamaa nãga jarada perã:
‘Chi naapema chi t'êepema jua ek'ari bait'ee.’ (Génesis 25.23)
13 Tachi Ak'õre pedee jarapataarãpa p'ãdap'edaade ichiaba jara bù:
‘Jacob jùrùt'eraji. Jõdee Esaú unuamaa iru baji.’ (Malaquías 1.2-3)
14 Mãgara ¿k'ãata jaradaima? ¿Tachi Ak'õrepa pia oo–e bùk'ã, aba pipùara ak'ùpari perã chi apema k'ãyaara? ¡Mãga–e! 15 Mùa mãga jara bù Tachi Ak'õrepa Moisemaa nãga jarada perã:
‘Mùa chupùria k'awaait'ee mùa chupùria k'awaa k'inia bùùrã. Pia ak'ùit'ee mùa pia ak'ù k'inia bùùrã.’ (Éxodo 33.19)
16 Mãga jarada perã, k'awa p'anù Tachi Ak'õrepa eperãarã jùrùt'erapari k'aripait'ee, ichia ãchi chupùria k'awaa k'inia bairã. Jùrùt'era–e ãchia mãga k'inia p'anadairã maa–e pùrã ne–inaa pia wa k'achia oo p'anadairã. 17 Ichiaba Ak'õrepa ichi ley p'ãdade jaraji Egiptodepemaarã poro waibùa Faraonmaa:
‘Mùa pù rey papiji mãik'aapa pù k'îrapite ooji ne–inaa eperãarãpa p'oyaa oodak'aa ãchi juadoopa. Mãga ooji mùa pù nepùrade baaipida k'aurepa, na p'ek'au eujãdepemaarãpa k'awaadamerã Mùta, jõmaarã Ak'õre Waibùa.’ (Éxodo 9.16)
18 Mãga jarada perã, k'awa p'anù Tachi Ak'õrepa chupùria k'awaapari ichia chupùria k'awaa k'inia bùùrã mãik'aapa k'ùùrù k'isuapipari ichia mãgá oopi k'inia bùùrãmaa.
19 Mamîda parãdepemapa mùmaa iidii: “Mãga pùrã, ¿sãgap'eda Tachi Ak'õrepa k'ùùrù k'isua p'anùùrã miapiit'eema? ¿Iru k'aurepa mãgá p'anapata–ek'ã?” 20 Mùa ma iidida nãga p'anauit'ee. Pù na p'ek'au eujãdepema. Mãga bùta, ¿Tachi Ak'õrepa ne–inaa oopari iidiipia bùk'ã?
‘Ma awara pù, Ak'õrepa ooda, iidiipia bùk'ã: “¿Sãap'eda mù nãgá oojima?” ’(Isaías 29.16; 45.9)
21 K'îsíaji nãgùde. Chok'o k'aparipa ichi yooro p'e iru bùdee chok'o k'îra t'ãdoo k'apari, ichia k'inia bùk'a. Ma yoorodee k'ai chok'o pi–ia fiestadee ateeit'ee mãik'aapa aù yoorodee k'ai chok'o jîp'aa teeda iru bait'ee.
22 Tachi Ak'õrepa mãga pùk'a oopari na p'ek'au eujãdepemaarã ome. Ichia k'îsia iru bù mîda p'ek'au k'achia ooyaa p'anùùrã jõpiit'ee, choopari ãra ome ichi ewari waibùa ewate paru misa. Mãgá choo k'inia bù pùrã, ¿k'ãata jaradaima? 23 Mãgá chooru pùrã k'îsia iru bada perã eperãarãmaa ichi k'îra wãree unupiit'ee, ¿k'ãata jaradaima? Irua mãga ooji tachi chupùria k'awaak'ãri mãik'aapa tachi k'ap'ùa ichi k'îra wãree unupik'ãri awaraarãmaa. 24 Tachi Ak'õrepa tachita jùrùji judiorã t'ãideepa mãik'aapa judio–eerã t'ãideepa, tachi jõmaweda auk'a Cristode ijãadamerã. 25 K'awa p'anù Ak'õrepa mãga k'îsia iru baji, iru pedee jarapari Oseamaa jarapida perã:
‘Mùchi eperãarã–ee p'anadap'edaarã t'âjaradait'ee “mùchi eperãarã” mãik'aapa eperãarã mùa k'inia–e badaarã t'âjaradait'ee “eperãarã mùa k'inia iru bùùrã”.’ (Oseas 2.23)
26 Awara ãi Ak'õre Ûraa p'ãdade Oseapa ichiaba jaraji:
‘Mùa eperãarãmaa jara badamãi: “parã mùchi eperãarã–e”, mãgùùrãmãi ãchideepa uchiadap'edaarãmaa “Ak'õre ichita chok'ai bapari warrarãda” adait'ee.’ (Oseas 1.10)
27 Ma awara Tachi Ak'õre pedee jarapari Isaiapa jaraji:
‘Israelitaarã ipu tau nãusaak'a p'usa ide chok'ara p'anù mîda, Tachi Ak'õrepa ãra chok'ara–ee uchiapiit'ee k'achia beerã juadeepa. 28 Taarã–e nùde Tachi Ak'õrepa eperãarã chok'ara jõpiit'ee.’(Isaías 10.22-23)
29 Mamîda aù naaweda Isaiapa ichiaba jara baji:
‘Jõmaarã Ak'õre Waibùapa tachi warrarã chok'ara–ee p'anùùrã k'aripa–e pada paara, k'iniik'ajida Sodoma pidaarãk'a mãik'aapa Gomorra pidaarãk'a.’ (Isaías 1.9)
Judiorã Cristode ijãadaamaa p'anadap'edaa
30 Tachia ¿k'ãata k'awaadaima k'îsiadak'ãri Ak'õrepa mãga oodade israelitaarã ome? K'awa p'anù judio–eerãpa Tachi Ak'õre jùrùda–e p'anajida. Mamîda ârá p'ek'au k'achia wêe p'anapata Tachi Ak'õre k'îrapite, Cristode ijãapata perã. 31 Jõdee israelitaarãpa Tachi Ak'õre jùrù p'anajida mãik'aapa oo k'inia p'anajida iru ley p'ãdade jara bùk'a, irua ãchi pia ak'ùmerã. Mamîda p'oyaa ooda–e paji jõmaweda ma ûraade jara bùk'a. 32 ¿Sãgap'eda mãga p'anajida? Cristode ijãa p'aneedai k'ãyaara Tachi Ak'õrepa ãchi pia ak'ùmerã, Ak'õre Ûraa Moisemaa p'ãpidak'a oo k'inia p'anapachida. Mamîda Ak'õrepa Cristo pëiji ichi o ak'ùpimerã. Mapa irude ijãa k'iniada–e pak'ãri, ma o atuajida. 33 Oojida Ak'õrepa jaradak'a chonaarãweda ichi ley p'ãdade:
‘Judiorã t'ãide Sión p'uurudea mùa eperã mãu pipùara bùk'a papiit'ee. Ara eperã t'îutùparik'a mãumaa, mãga pùk'a eperãarã chok'ara t'îutù pùk'adait'ee ma mãu pipùara bù k'aurepa. Mamîda chi irude ijãa bù t'ãri o–îa bapariit'ee Ak'õre k'îrapite.’ (Isaías 8.14; 28.16)