10
1 Âpemaarã Cristo k'aurepa, t'ãripa mùa k'inia bù judiorãpa Cristode ijãadamerã. Ùt'aa t'âpari Tachi Ak'õremaa ãra chupùria k'awaamerã, mãgá o k'achiadeepa uchiadamerã. 2 Mùchi taupa unu bù ãrapa Ak'õre net'aa k'awa k'inia p'anù. Mamîda wãara iru k'awadak'aa. 3 K'awa k'iniadak'aa Ak'õrepa Cristode ijãapataarã p'ek'au k'achia wêe beepipari. K'îsiapata ne–inaa pia oo p'anùùpa Tachi Ak'õrepa ãchi pia ak'ùit'ee. Maperã Cristode ijãa k'iniada–e. 4 Mamîda Cristópata ichideerã uchiapipari Tachi Ak'õre Ûraa p'ãdade jara bù jua ek'ariipa, oopataadamerã irua jara bùk'a. Maperã Tachi Ak'õrepa Cristode ijãapataarã p'ek'au k'achia wêe ak'ùpari.5 Moisepa p'ãdade jara bù:
‘Eperãpa ook'ãri jõmaweda Ak'õre Ûraade jara bùk'a, ichita bapariit'ee ma ûraade jara bùk'a.’ (Levítico 18.5)
6 Mamîda p'ek'au k'achia wêe beerã Cristode ijãa p'anù k'aurepa, mãgùùrãpa auk'a jaradai Moisepa jaradak'a Tachi Ak'õre k'awa k'inia p'anadap'edaarãmaa:
‘K'îsianáatù pãchi t'ãridepai: “¿K'aita wãima Ak'õre eujãdee irua k'inia bù k'awaade?” ’(Deuteronomio 30.12)
‘ “¿K'aita piudap'edaarãmaa wãima Ak'õrepa k'inia bù k'awaade?” ’ (Deuteronomio 30.13)
(pia jarait'eera, Cristo chemerã iru ùadap'edaamãiipa.) 8 Mãga k'îsiadai k'ãyaara, jaradaipia bù Ak'õre Ûraade jara bùk'a:
‘Nãgaweda Tachi Ak'õrepa jara pëida k'awa p'anù, mãgà pãchi it'aideepa jarapata perã mãik'aapa pãchi t'ãride k'awapata perã.’ (Deuteronomio 30.14)
Mãgà pedee Moisepa p'ãdadepemak'a ichiaba taipa jarateepata jõmaarãmaa: t'ãripa Cristode ijãapataadamerã. 9 Eperãpa jara bù pùrã: “Jesucristo Mùchi Waibùa” mãik'aapa t'ãripa wãara ijãa bù pùrã Tachi Ak'õrepa Cristo chok'ai p'irabaipiji, Tachi Ak'õrepa ma eperã wãpiit'ee ichi truadee. 10 T'ãripa Cristode wãara ijãadak'ãri, p'ek'au k'achia wêe p'aneepata Ak'õre k'îrapite. Ma awara tachi it'aideepa jaradak'ãri, “Jesucristo Mùchi Waibùa”, ak'ùpipata irua tachi o k'achiadeepa k'aripa ataji.
11 K'irãpátù Ak'õre Ûraa p'ãdade ichiaba jara bù:
‘Eperã Cristode ijãa bù k'îra pia–ee ba–e pait'ee Ak'õre k'îrapite.’(Isaías 28.16)
12 Mãga jara bairã k'awa p'anù judiorã, judio–eerã ome auk'a p'anù Tachi Ak'õre k'îrapite, Cristode ijãadak'ãri. Iruta Jõmaarã Waibùa. Auk'a k'aripapari chi chupùria iidirutaarã ichimaa, ãchi auk'a k'inia iru bapari perã. 13 Maperã k'awa p'anù na Ak'õre Ûraa wãarata jara bù:
‘Tachi Ak'õrepa ichimaa chupùria iidirutaarã k'aripa atait'eeda aji, atuanaadamerã.’ (Joel 2.32)
14 Mamîda ¿sãga chupùria iididaima, irude ijãada–e p'anù pùrã? Ichiaba ¿sãga irude ijãadaima, irua ooda ãchi–it'ee ûrida–e p'anù pùrã? Ma awara ¿sãga ûridaima irua ooda ãchi–it'ee, eperãpa #ãchimaa mãga jarana–e* pùrã? 15 Mãgà eperã, ¿sãga wãima jarateede, awaraarãpa iru pëida–e p'anù pùrã? Tachi Ak'õre Ûraa p'ãdade jara bù:
‘Eperãarã o–îadaipata awaraarãpa pedee pia ãchimaa jara chedak'ãri.’ (Isaías 52.7)
16 Mamîda jõmaarãpa ûri k'iniada–e p'anù, Ak'õre pedee pia jara chedak'ãri. Mãga k'awa p'anù Tachi Ak'õre pedee jarapari Isaiapa p'ãdade jara bairã:
‘Tachi Ak'õre, ¿k'aipa ijãajima aji, taipa jarateedap'edaa?’ (Isaías 53.1)
17 Ma jõma jara aupadade k'îsiadak'ãri, k'awa p'anù eperãarãpa ûridak'ãri Cristopa ooda ãchi–it'ee, mãgá irude ijãapata.
18 Mãga pùrã, ¿sãgap'eda judiorãpa ijãada–e paji? ¿Ûrida–e pajik'ã Cristopa ooda ãchi–it'ee? ¡Ûrijidapù! Ak'õre Ûraa p'ãdade jara bù:
‘Tachi Ak'õrepa ooda jarateepachida jõmaarãmaa; na p'ek'au eujãdepema t'ùmà beerãmaa paara k'awapijida irua ooda.’ (Salmos 19.4)
19 Mãga pùrã, waya iidiit'ee: ¿sãgap'eda ijãada–e pajima? ¿K'awada–e pajik'ã ãchia ûridap'edaa? ¡K'awajidapù! Naapùara mùa k'irãpapi k'inia bù Moisepa p'ãdade jara bù:
‘Tachi Ak'õrepa nãga jara bù ichi eperãarãmaa: Mùa parã k'îra unuamaa iru p'anapiit'ee mùchi eperãarã–eerãmaa, ãra mùde ijãa k'inia p'anadairã. Ma awara parã k'îraupiit'ee mãgùùrã ome, chi parãpa k'îsiapata k'îsia k'awa–ee beerã.’(Deuteronomio 32.21)
20 Ichiaba Isaiapa p'ãdade jîp'a jara bù:
‘Mù jùrùda–e p'anadap'edaarãpa mù unujida. Mùa unupiji mù k'awa k'iniada–eerãmaa.’ (Isaías 65.1)
21 Jõdee israelitaarã ãpùte jara bù:
‘Ichita mùa israelitaarã k'aripa k'inia baji. Mamîda ãchia oodaamaa p'anapachida mùa jara bùk'a, mùde ijãa k'iniada–e p'anadap'edaa perã.’ (Isaías 65.2)