Tachi Ak'õrepa israelitaarã jùrùt'erada
11
1 Israelitaarã mãgá p'anadap'edaa perã, ¿Tachi Ak'õrepa ichi eperãarã yiaraa iru bùk'ã? ¡Mãga–e! ¡Mùta israelita, Abrahamdeepa uchiada, Benjamindeepa uchiadap'edaarãdepema! Tachi Ak'õrepa mù yiaraa–e bù. 2 Irua israelitaarã naaweda jùrùt'eraji ichi eperãarã papiit'ee. ¿Ârá sãga ãchi yiaraa iru baima? ¿K'irãpa p'anù–ek'ã Ak'õre Ûraa p'ãdade jara bù iru pedee jarapari Elías it'aideepa? Israelitaarã ãpùte mãgùpa Tachi Ak'õremaa jaraji:3 ‘Ak'õre, tai poro waibùarãpa pù pedee jarapataarã peepachida. Ichiaba pùa altar oopida ãrik'oojida. Mù aupai pùde ijãapari mãik'aapa ârá mù jida jùrù p'anù peedait'ee.’(1 Reyes 19.10, 14)
4 Mamîda Tachi Ak'õrepa Eliamaa p'anauji:
‘Mù jua ek'ari eperãarã siete mil iru bù, at'ãri mùmaa aupai ùt'aa t'âpata. Pùk'a, ãra jida bedabaidak'aa jã ne–inaa juapa ooda Baal k'îrapite.’ (1 Reyes 19.18)
5 Tachi Ak'õrepa ichi eperãarã ûk'uru ichi jua ek'ari iru badak'a Elías na p'ek'au eujãde bak'ãri, auk'a ârapema Cristode ijãa p'anùùrã jùrùt'eraji ichi jua ek'ari iru bapariit'ee. Mãga oopari ãchi k'inia iru bapari perã. 6 Maperãpù ma ijãapataarã jùrùt'eraji. Eperãarã jùrùt'erada paara ãchia ne–inaa oopata k'aurepa, ãchia Tachi Ak'õremaa jùrùt'erapik'ajida ma ne–inaa oo p'anù pari. Mamîda mãga–e. Irua ãchi jùrùt'erapari ãchi k'inia iru bapari perã.
7 Mãgara ¿k'ãata k'îsiadaima Israelde? Jõmaweda israelitaarãpa unuda–e paji ãchia jùrùdap'edaa. Jùrùpachida Tachi Ak'õrepa ãchi pia ak'ùmerã, p'ek'au k'achia wêe. Mamîda ûk'urupai, chi Tachi Ak'õrepa jùrùt'eradaarã Cristode ijãadamerã, wãara mãga p'aneejida iru k'îrapite. Jõdee chi apemaarã k'ùùrù k'isua p'aneejida. 8 Mapa Ak'õre Ûraa p'ãdade jara bù:
‘Tachi Ak'õrépata ãchi t'ãri chaareepiji. Tau iru p'anajida mîda, unuda–e paji Tachi Ak'õrepa ãchimaa unupida. Ichiaba k'ùùrù iru p'anajida mîda, ûrida–e paji Tachi Ak'õrepa ãchimaa jarapida. At'ãri mãga p'anapata.’ (Deuteronomio 29.4)
9 Ichiaba Ak'õre Ûraa p'ãdade Rey David it'aideepa jara bù:
‘Ak'õre Waibùa, pù eperãarãpa k'îsiapata Ak'õre ewari ùa p'anùùpapai pùa ãchi pia ak'ùpariit'ee. Mãga k'îsia p'anadairã, taawa pùa ãchi k'achiade baaipii mãik'aapa miapii. 10 Ichita ne–inaa oopata pù–it'ee ãchia k'îsia p'anùk'a, pùa wãara oopi k'inia bù k'ãyaara. Maperã taawa pùa ãchi tau p'ãriu pùk'apii ununaadamerã pùa oo bù mãik'aapa ãchi eburuk'uk'ua pùk'adaidamerã ãchia ne–inaa k'achia oopata k'aurepa.’ (Salmos 69.22-23)
Tachi Ak'õrepa judio–eerã k'aripada
11 Waya iidiit'ee: ¿Tachi Ak'õrepa ichi eperãarã yiaraa iru bùk'ã? ¡Mãga–e! Wãara ijãada–e pada perã Tachi Ak'õrepa k'inia badak'a, k'achiade baaijida. Mamîda ãchia mãgá ijãada–e pada k'aurepa judio–eerã Cristode ijãa p'aneejida mãik'aapa Ak'õre ode t'îujida. Ak'õrepa mãgá judio–eerã o k'achiadeepa k'aripa ataji. Mãga ooji judiorãpa mãùrã ijãa p'anù unudak'ãri, auk'a Cristode ijãadamerã mãik'aapa ichi ode t'îudamerã. 12 Judiorã Cristode ijãadaamaa p'anadap'edaa perã, na p'ek'au eujãdepemaarãpa k'awaadai Cristopa ooda eperãarã k'aripait'ee mãik'aapa judio–eerãpa iru p'anadai jõma Tachi Ak'õrepa k'îsia iru bù Cristode ijãapataarã–it'ee. Judiorãpa auk'a Cristode ijãadak'ãri, ijãapataarã jõmaweda audupùara o–îa p'anadait'ee.
13 Ârá parã judio–eerãmaa ne–inaa jarait'ee. Tachi Ak'õrepa mù jùrùt'eraji parã judio–eerãmaa jarateemerã irua pedee pia jara pëida Cristode. Mù o–îa bù ma–it'ee Ak'õrepa mù jùrùt'erada perã. 14 Na mimia oo bùpa Tachi Ak'õre–it'ee, k'inia bù mùchi auk'aarãpa parã ijãapata unudak'ãri, auk'a Cristode ijãadamerã mãik'aapa Ak'õre ode t'îudamerã. 15 Mamîda Cristode ijãada–e p'anadap'edaa perã, na p'ek'au eujãdepemaarã awaraarãpa irude ijãadai mãik'aapa t'ãri auk'a p'anapataadai Tachi Ak'õre ome. Tachi Ak'õrepa ma judiorã at'ãri p'oyaa pia ak'ù–e, mãga ijãada–e p'anadairã. Mamîda ijãadak'ãripù, Ak'õrepa ãchi pia ak'ùpariit'ee. Ak'õrepa chok'ai p'irabaipidaarãk'a p'anadait'ee.
16 K'îsiadáma nãgùde. Judiorãpa trigo naapùara ewadak'ãri, mãgà awara bùpata aùdee masa oodap'eda, pan oodait'ee Tachi Ak'õre–it'ee. Mamîda Ak'õrepa trigo jõmaweda waripipari perã, wãara ma masa jõmaweda ichi–it'ee. Mãga pùk'a Tachi Ak'õrepa judiorã chonaarãwedapema Abraham awara bùji ichi–it'ee, Abrahampa ijãa bada perã irua jarada. Mamîda wãara Abrahamdeepa uchiadap'edaarã jõmaweda ichi–it'ee, mãga ijãadak'ãri.
17 Abraham pak'uru k'arrak'a bù judiorã–it'ee. Mamîda olivo bùùrù uupataarãpa chi jua t'ùap'epatak'a ma pak'uru pipùara chaumerã, mãga pùk'a Tachi Ak'õrepa israelitaarã ûk'uru t'ùap'e pùk'aji, Cristode ijãadaamaa p'anadap'edaa perã. Mãpai pak'uru ak'ùpataarãpa ma pak'uru jua t'ùap'edap'edaamãi awaraa pak'uru jua t'ù bùpatak'a mãgee jida chaumerã, mãga pùk'a Tachi Ak'õrepa parã judio–eerã t'ù pùk'a bùji judiorã k'ãyaara, Cristode ijãapata perã. 18 Tachi Ak'õrepa parã judio–eerã ome mãgá ooji mîda, k'îsiadaik'araa bù parã pipùara p'anù judiorã k'ãyaara. Ãra parã naaweda ma pak'uru k'arradepema juak'a p'anajida. Ma pak'uru k'arrak'a bù chok'ai–e bù parã, chi jua t'ù pùk'a bùda k'aurepa. Parã chok'ai p'anù ma pak'uru k'arrak'a bù k'aurepa. Judiorã k'aurépata parãpa Tachi Ak'õre k'awa p'anù.
19 Parãdepemapa jarai: “Mamîda Tachi Ak'õrepa mù t'ù pùk'a bùji ma k'arrak'a bùde judiorã k'ãyaara.” 20 Pia bù. Mamîda k'irãpáji Ak'õrepa ma judiorã t'ùap'e pùk'aji Cristode ijãadaamaa p'anadap'edaa perã. Pù Cristode ijãapari perãta, t'ù pùk'a bùji. Audua bai k'ãyaara, jîp'a Tachi Ak'õre waaweeipia bù. 21 Tachi Ak'õrepa ichi eperãarã t'ùap'e pùk'aji pùrã Cristode ijãadaamaa p'anadap'edaa perã, audupùara parã t'ùap'e pùk'ait'ee ijãa amaadaruta pùrã. 22 Tachi Ak'õre t'ãri pia bapari Cristode ijãapataarã ome. Mamîda Cristode ijãadaamaa p'anùùrã pia ak'ù–e. Maperã pù ijãa beeru pùrã, t'ãri pia bapariit'ee pù ome. Mamîda ijãa amaaru pùrã, waa pia ak'ù–e. Pù t'ùap'e pùk'ait'ee ijãadak'aa beerã ome ooparik'a. 23 Jõdee, naaweda Cristode ijãadaamaa p'anadap'edaarãpa ijãaruta pùrã, Tachi Ak'õrepa ãchi pia ak'ùit'ee Cristodeerã ak'ùparik'a. Ãra waya t'ù pùk'a bùit'ee ãra naaweda p'anadap'edaak'a. Mãga ooi Tachi Ak'õre–it'ee ne–inaa audú chaaree wê–e perã. 24 Irua pù, judio–ee bùta, o k'achiadeepa k'aripa ataru pùrã Cristode ijãapari perã, audupùara judiorã mãgá k'aripait'ee, Cristode ijãadak'ãri. Mãga ooit'ee ãchi uchiadap'edaa perã irua eperã jùrùt'erada Abrahamdeepa.
Tachi Ak'õrepa israelitaarã k'aripait'ee
25 Âpemaarã Cristo k'aurepa, ârá mùa parã judio–eerãmaa ne–inaa awaraarãpa waide k'awadak'aa k'awapi k'inia bù, k'îsianaadamerã judiorã k'ãyaara pipùara p'anù. Tachi Ak'õrepa israelitaarã ûk'uru k'ùùrù k'isuapiji judio–eerãpa irua jara pëida pia ûridap'eda, Cristode ijãadamerã mãik'aapa Tachi Ak'õre ode t'îudamerã. Mamîda ichita mãga–e pait'ee. Jîp'a mãga p'asait'ee ijãarutamaa jõma judio–eerã irua k'îsia iru bù ijãadamerã. 26 Ma t'êepai, israelitaarã chok'ara auk'a Cristode ijãadait'ee mãik'aapa Ak'õrepa ãra o k'achiadeepa k'aripa atait'ee, iru ley p'ãdade jara bùk'a:
‘Tachi K'aripapari uchiait'ee israelitaarã t'ãideepa, Sión p'uurudeepa. Jacobdeepa uchiadap'edaarã o k'achiadeepa k'aripa atait'ee. 27 Maapai mùa jaradak'a Jacobmaa, ichideerã pia ooit'ee ãchi p'ek'au k'achia wêpapik'ãri.’ (Isaías 59.20-21)
28 Parã judio–eerã k'aurepa ârá Tachi Ak'õrepa israelitaarã yiaraa iru bù, ãchi ijãada–e p'anadairã irua pedee pia jara pëida Cristo k'ap'ùa pari. Mamîda Ak'õrepa naaweda israelitaarã jùrùt'eraji. Mapa at'ãri ãchi k'inia iru bapari mãik'aapa pia ak'ù bapari. Mãga oopari mãga ooit'eeda ada perã ãchi chonaarãmaa. 29 Tachi Ak'õrépata ichita oopari ichia jara bùk'a. Mapa ichi eperãarã atabëi–e pait'ee. Ichita ãchi pia ak'ù bapariit'ee ichia jaradak'a ãchi chonaarãmaa. 30 Naaweda parã judio–eerãpa oodaamaa p'anapachida Tachi Ak'õrepa jara bùk'a. Mamîda judiorã Ak'õre Waibùapa ichi Warra pëidade ijãadaamaa p'anadap'edaa perã, Tachi Ak'õrepa parã judio–eerã chupùria k'awaaji. 31 Ârapema judiorã at'ãri oodaamaa p'anapata Ak'õrepa jara bùk'a. Mamîda Tachi Ak'õrepa parã judio–eerã chupùria k'awaadak'a Cristode ijãadak'ãri, auk'a chupùria k'awaait'ee judiorã, mãgá ijãadak'ãri. 32 Tachi Ak'õrepa na p'ek'au eujãdepemaarã judiorã mãik'aapa judio–eerã ichiak'au bùji ãchia oo k'iniata oodamerã. Mãga ooji ak'ùpiit'ee ichia chupùria k'awaapari p'ek'au k'achia oopataarã, judiorã, judio–eerã paara.
Pedee pia jarada Tachi Ak'õrede
33 ¡Wãara Tachi Ak'õre k'îsia k'awaa bapari! Jõmaweda pia oopari ichia ne–inaa jõma k'awapari perã. Tachi eperãarãpa k'awada–e irua k'îsia iru bù. Ichiaba k'awada–e sãgap'eda irua eperãarãmaa ne–inaa oopipari.
34 ¿Ak'õre Ûraa p'ãdade nãga jara bù–ek'ã? ‘¿K'aipa k'awaaima Tachi Ak'õre k'îsia mãik'aapa k'aipa iru ûraaima? Iruata ne–inaa jõma k'awapari.’ (Isaías 40.13)
35 ‘¿K'aipa ne–inaa teeima Tachi Ak'õremaa, irua jõdee ma pari ne–inaa awara teemerã?’ (Job 41.11)
36 Eperãpa mãgá p'oyaa tee–e, Tachi Ak'õre juadeepa ne–inaa jõmaweda uchiapari perã. Ichiata ne–inaa jõmaweda ak'ù bapari. Ne–inaa jõmaweda nâbù ichi–it'ee. Mapa ichita jaradaipia bù: “Ak'õre, ¡pù jõmaarã k'ãyaara waibùara bù! ¡Amén!”