Cristodeerã sãga p'anapataadaipia bù
12
1 Âpemaarã, mùa nãga ûraait'ee: Tachi Ak'õrepa eperãarã chupùria k'awaapari perã, at'ãri chok'ai p'anù misa, oopítù Tachi Ak'õremaa irua k'inia bùk'a pù ome. Mãgá pãchi p'ek'au k'achia ooyaa bù k'ap'ùa p'oyaadai, p'anapataadait'ee Ak'õrepa k'inia bùk'a. Ichiaba mãgá ak'ùpidai parãpa wãara Tachi Ak'õre k'inia iru p'anù. 2 Oonáatù na p'ek'au eujãdepema ijãadak'aa beerãpa oopatak'a. Mãùrãpa k'îsiapata ãchia oo k'inia p'anùdepai. Parã jõdee, k'îsiadaipia bù Ak'õrepa k'inia bùk'a. Mãgá k'awaadait'ee Ak'õrepa k'inia bù ne–inaa pia, k'achia wêe; ne–inaa irua pia ak'ùpari.3 Tachi Ak'õrepa mù pia ooji mù jùrùt'erak'ãri parãmaa jarateemerã. Maperã mùa ûraait'ee parãdepema apidaapa k'îsianaadamerã: “Mù pipùara bù awaraarã k'ãyaara”. Ma k'ãyaara k'îra jîp'a jùrùipia bù Ak'õrepa oopi k'inia bù mãik'aapa t'ãripa mãga ooipia bù, ùt'aa iidi bù misa irua k'aripamerã. 4 Tachi k'ap'ùade nãgee ne–inaa chok'ara iru bù; bùùrù t'ùait'ee; jua ne–inaa jitait'ee; mãgee ne–inaa. Ma chaachaa ne–inaa awara–awaraa oopari. Auk'a oodak'aa. 5 Mãga pùk'a bù tachi Cristode ijãapataarã. Tachi jõma araa p'anù iru ome. Mapa auk'a araa p'anù apemaarã ijãapataarã ome k'ap'ùa apai bùk'a.
6 Mamîda Tachi Ak'õrepa k'aripak'ãri, ne–inaa awara–awaraa oopata, irua oopi k'inia bùk'a tachi chaachaa.
Ichi ûraa jarapiru pùrã tachidepema abaamaa, mãgùpa mãga ooipia bù t'ãripa, Ak'õremaa k'aripa iidi bù misa. 7 Awaraamaa ijãapataarã k'aripapiru pùrã, mãga ooipia bù. Awaraamaa jarateepiru pùrã, ichiaba mãga ooipia bù. 8 Awaraa k'ariparu pùrã chîara t'ãri o–îapiit'ee, mãga ooipia bù. Awaraamaa p'arat'arapiru pùrã, t'ãri pia p'arat'a waibùa teeipia bù chupùria beerã k'aripait'ee. Awaraamaa eperã waibùa papiru pùrã, pia ak'ùipia bù ijãapataarã ichi jua ek'ari p'anùùrã. Awaraa k'ariparu pùrã chîara chupùria k'awaamerã, t'ãri o–îa mãga ooipia bù.
Cristode ijãapataarã<R>chik'inia p'anapataadaipia bù
9 Awaraarã t'ãri jîp'a k'inia iru p'anadaipia bù. Ne–inaa k'achia k'îra t'ãdoo oodaik'araa bù. Mãgee ne–inaa unuamaa iru p'anapatáatù. Pia aupaita jùrùdaipia bù oodait'ee. 10 Chik'inia p'anapataadaipia bù, tachi ëreerã ome p'anapatak'a. Audua p'anadaik'araa bù. Ma k'ãyaara awaraa ijãapataarã pipùara ak'ùdaipia bù tachi k'ãyaara.
11 K'oo–idaa p'anadaik'araa bù. T'ãripa oodaipia bù Ak'õre Jaurepa oopi bùk'a. Mãgá oodait'ee Tachi Waibùa Jesucristopa oopi k'inia bùk'a.
12 O–îa p'anadaipia bù nù p'anù misa Tachi Ak'õre eujãdee wãdait'ee. Choodaipia bù nepùrade baaidak'ãri. Ichita #Tachi Ak'õremaa* ùt'aa t'âpataadaipia bù.
13 Awaraa ijãapataarã chupùria k'awaadaipia bù mãik'aapa ne–inaa wêe p'anù pùrã, ãramaa teedaipia bù. Awaraarã pãchi t'ãide p'asia chedak'ãri, t'ãri pia auteebaidaipia bù. K'ãidait'ee wêe p'anù pùrã, pãchi tede k'ãipítù.
Awaraarã ome k'ãiwee p'anapataadaipia bù
14 Awaraarãpa parã jùrùdak'ãri ne–inaa k'achia oodait'ee, ùt'aa iidítù Ak'õrepa ãra chupùria k'awaamerã mãik'aapa bendiciamerã. Iidináatù Ak'õrepa ãra maldiciamerã.
15 Awaraarã o–îa p'anadak'ãri, auk'a o–îa p'anadaipia bù. Jõdee t'ãri p'ua p'anadak'ãri, auk'a jêedaipia bù.
16 T'ãri auk'a p'anadaipia bù awaraa ijãapataarã ome. Jîp'a jùrùdaipia bù Ak'õrepa parãmaa oopi k'inia bù. K'îsiadaik'araa bù parã awaraarã k'ãyaara pipùara p'anù. Auk'a k'õp'ãyo meraadaipia bù chupùria beerã ome mãik'aapa p'arat'ara beerã ome. Audua p'anadaik'araa bù.
17 Awaraarãpa parã k'achia oodak'ãri, auk'a oonáatù. Ichita ne–inaa pia óotù awaraarãpa unudamerã Cristo k'aurepa parãpa ne–inaa pia oopata. 18 Awaraarã nepùra jùrùyaa p'anù mîda, parã jõdee k'ãiwee p'anapatáatù chîara ome. 19 Âpemaarã k'iniarã, k'îra jõ–ee p'ananáatù. Ma k'ãyaara ichiak'au bàtù, Tachi Ak'õrepa ãrapa oodap'edaa ak'ùmerã mãik'aapa miapimerã ichia k'inia bùk'a. Mùa mãga jara bù Ak'õre Ûraa p'ãdade jara bairã:
‘Mùa aupaita eperãarãpa oopata ak'ùpari jarait'ee pia wa k'achia. Mùata p'ek'au k'achia oopataarã miapiit'ee.’(Deuteronomio 32.35)
20 Awara ãi ichiaba jara bù:
‘Eperãpa pù k'îra unuamaa iru bù pùrã, nãgá ooipia bù. Mãgà jarrapisia bak'ãri, nek'opíji mãik'aapa opisia bak'ãri, ne–inaa topíji. Mãgá ooru pùrã, iru k'îra nejasiapiit'ee mãik'aapa irua pùmaa k'achia oo k'inia bù oo–e pai.’(Proverbios 25.21-22)
21 K'îrak'aupai ne–inaa k'achia oodai. Ma k'ãyaara k'achia p'oyáatù ne–inaa pia oo p'anùùpa.