Tachi poro waibùarãpa jara p'anùk'a oodaipia bù
13
1 Ârá mùa ûraait'ee parã jõmaarãpa pãchi poro waibùarã waaweedamerã. Oopatáatù charraarãpa jara p'anùk'a. Mãga oodaipia bù Tachi Ak'õrepa pãchi waibùarã papida perã parã ak'ùdamerã. Tachi Ak'õrépata eperãarã poro waibùarã jõmaweda mãgá papipari. 2 Maperã ooda–e pùrã ãrapa jara p'anùk'a, ichiaba ooda–e pai Tachi Ak'õrepa oopi k'inia bù parãmaa. Ma awara ma charraarãpa parã miapidait'ee, mãga ooda–e pùrã. 3 Tachi charraarãpa ne–inaa pia oopataarã p'erapida–e. Ne–inaa k'achia oopataarãta p'erapipata. Maperã k'ãiwee p'ana k'inia p'anù pùrã charraarã ome, pia óotù. Mãgá ãrapa parã pia ak'ùpataadait'ee. 4 Tachi Ak'õrepa ma charraarã bùji parã k'aripadamerã k'achia beerã juadeepa. Mamîda pùa ne–inaa k'achia ooru pùrã, wãara waaweedaipia bù, ma charraarãpa pù ome oodait'ee perã k'achia beerã ome oopatak'a. Ãchi jua ek'ari p'anùùrã pëidait'ee pù atade. Ma–it'ee espada anipapata. Mãpai pù atadak'ãri, miapide ateedait'ee, mãga oopi k'inia bairã Tachi Ak'õrepa k'achia oopataarãmaa. 5 Maperã óotù pãchi poro waibùarãpa jara p'anùk'a. Mãga oodaipia bù k'îsia p'ua wêe p'anadait'ee ãra k'îrapite mãik'aapa Tachi Ak'õre k'îrapite. Ichiaba mãga oodaipia bù ãrapa parã miapinaadamerã. 6 Parãpa impuesto p'aapataadaipia bù mãgà poro waibùarãmaa, ãra mimia oopata pari, Ak'õrepa mãùrã mãgá bùda perã parã k'aripadamerã. 7 Pãchi poro waibùarã jõmaweda waaweedaipia bù. Parãmaa impuesto p'aapiruta pùrã, p'áatù. Parãmaa ne–inaa aneedap'edaa pari awaraa eujãdeepa p'aapiruta pùrã, ichiaba p'áatù, aupedeeda–ee.Cristode ijãapataarã<R>chik'inia p'anapataadaipia bù
8 Tewe paraa p'ananáatù. Ma k'ãyaara, chik'inia p'anapataadaipia bù. Mãga p'anaruta pùrã, oodait'ee Tachi Ak'õre Ûraa p'ãdade jara bùk'a:
9 ‘Miak'ãi p'anùùrã k'ãináatù awaraarã ome; eperã peenáatù; chîara net'aa chùanáatù; chîara te, wêra, mimiapataarã, ne–animal wa net'aa k'âanáatù.’ (Éxodo 20.13-17)
Ûraa awaraa ichiaba paraa ak'ùpiit'ee sãga p'anapataadaipia bù chîara ome. Mamîda ma jõmaweda uchiapata ûraa abaade:
‘Awaraarã k'inia iru p'anapatáatù, pãchi k'ap'ùa k'inia iru p'anapatak'a.’ (Levítico 19.18)
Mãga ooruta pùrã, oodait'ee jõma Tachi Ak'õre Ûraa p'ãdade jara bùk'a. 10 Mãgá awaraarã k'inia iru p'anadak'ãri, maarepida ãramaa k'achia ooda–e. Maperãpù mãga oodak'ãri, oopata jõma Ak'õre Ûraa p'ãdade jara bùk'a.
Âdaa pùk'a bùde p'anapataarã
11 Ma jõma oo p'anù misa, k'irãpátù jõmasaa taarãru tachi Cristode ijãadap'edaadeepa. Ârá naawedapema k'ãyaara k'ait'aara p'anù ùt'aa wãdait'ee. Maperã k'ãi pùk'a p'ananaadáma. Ma k'ãyaara oodáma Tachi Ak'õrepa k'inia bùk'a. 12 Na p'ek'au eujãde p'anù misa, tachi p'ãriu pùk'a bùde p'anù. Mamîda taarã–ee Cristo waya chek'ãri, ewari chiwidi pùk'a unudait'ee. Mapa oo amaadáma ne–inaa k'achia k'îra t'ãdoo, na p'ek'au eujãdepemaarãpa oopata mãik'aapa soldaopa armadura jâparik'a chõode wãi naaweda, mãga pùk'a oodáma Cristopa oopi bùk'a. 13 P'anadáma Ak'õre âdaa pùk'a bùde p'anapataarã p'anapatak'a, ne–inaa k'achia ooda–ee. Oonaadáma p'ãriu pùk'a bùde p'anapataarãpa oopatak'a. Ãchi piudaipata it'uapa mãik'aapa pariatua pedee nipapata. Ichiaba pariatua wêraarã jùrùpata aù ome k'ãidait'ee. Ma awara chõo jùrùpata chîara ome mãik'aapa net'aa k'aurepa chîara k'îra unuamaa iru p'anapata. 14 Parã, jõdee, Tachi Waibùa Jesucristode ijãapata perã, p'anapatáatù iru na p'ek'au eujãde badak'a. K'îsianáatù parã p'ek'au k'achia ooyaa bù k'ap'ùapa oo k'inia bùde.