Awaraa ijãapataarã ãpùte<R>pedee k'achia jaradaik'araa bù
14
1 Cristode ijãapari auk'a parãk'a ijãa–e bù pùrã, pia ak'àtù, awaraa ijãapataarã ak'ùpatak'a. ¿Irua mãgá ijãa–e bùpaa at'ãri Ak'õre Ûraa pia k'awa–e bairã? Mapa iru ome aupedeedaik'araa bù. 2 Abaapa ijãai chik'o k'îra t'ãdoo k'oipia bù. Jõdee chi pia k'awa–e bùpa k'îsiai nechiara k'oik'araa bù, ma k'aurepa Tachi Ak'õrepa iru pia ak'ù–e pai jîak'aapa. 3 Maperã ma chik'o k'îra t'ãdoo k'oparipa pia–ee ak'ùik'araa bù ma nechiara k'ok'aa bù. Jõdee ma nechiara k'ok'aa bùpa k'achia pedeeik'araa bù chi apema ãpùte. Mãga oodaik'araa bù Tachi Ak'õrepa ãchi auk'a pia ak'ùpari perã Cristode ijãa p'anù k'aurepa. 4 ¿K'aipa pù bùjima chîara mimiapari ak'ùmerã jarait'ee irua oopata pia wa k'achia? Mimia chiparipapai ichi jua ek'ari mimiapataarã mãgá ak'ùipia bù. Mãga pùk'a bù Cristo ichideerã ome. Tachi Waibùa Cristópata ichideerãpa oopata ak'ùpari jarait'ee pia wa k'achia. Ichiata ichideerãmaa ne–inaa pia oopipari.5 Ne–inaa awaraa jarait'ee parãpa aùde k'îsiadamerã. Ijãapari abaapa ijãai ewari aba ùaipia bù apema k'ãyaara. Jõdee awaraapa ijãai ewari chaa auk'a bù. Tachi ijãapataarã chaachaa jùrùdaipia bù tachi t'ãride ijãa p'anù, k'awaadait'ee wãara mãga ijãa p'anù wa mãga–e. 6 Ma ewari aba ùaparipa apema k'ãyaara, mãga oopari Tachi Ak'õre–it'ee. Ichiaba ma chik'o k'îra t'ãdoo k'oparipa mãga oopari Tachi Ak'õre–it'ee, gracias jarapari perã Ak'õremaa ma chik'o k'ok'ãri. Jõdee ma nechiara k'ok'aa bùpa auk'a mãga oopari Tachi Ak'õre–it'ee, ichiaba gracias jarapari perã Ak'õremaa nek'ok'ãri.
7 Tachi ijãapataarã apida ituaba p'anadak'aa tachia oo k'iniata oodait'ee. Ichiaba apida ituaba piudak'aa, ak'ùpari wêe. 8 Chok'ai p'anù misa, p'anapata oodait'ee Cristopa oopi bùk'a, irua tachi ak'ùpari perã. Mamîda jai–idaaruta pùjida, at'ãri Cristopa tachi ak'ùpari. Mapa jaradai tachi chok'ai p'anù misa, Cristo Tachi Waibùa. Ichiaba jai–idaa p'anù misa, Cristo Tachi Waibùa. 9 Ma–it'ee Cristo piuji mãik'aapa chok'ai p'irabaiji, jõmaweda ijãapataarã Ak'õre Waibùa pait'ee; chi chok'ai p'anùùrã, jai–idaadap'edaarã paara.
10 Mãga bùta ¿sãap'eda pùa, Ak'õre Ûraa pia k'awa–e bùta, pedee k'achia pedee bùma awaraa ijãapataarã ãpùte? Maa–e pùrã, ¿sãap'eda pùa, Ak'õre Ûraa k'awa bùta, pia–ee ak'ùparima ma ijãapari pia k'awa–e bù? Tachi jõmaweda p'anadait'ee Tachi Ak'õre k'îrapite Ak'õre ewari waibùa ewate. 11 Mãga k'awa p'anù Tachi Ak'õre Ûraa p'ãdade jara bairã:
‘Mù ichita chok'ai baparida a bù Tachi Ak'õrepa. Eperã chaa bedabaidait'ee mù k'îrapite mãik'aapa jaradait'ee: “Pùta Jõmaarã Ak'õre Waibùa.” ’ (Isaías 45.23)
12 Mapa k'awa p'anù tachi chaachaa panadait'ee Tachi Ak'õre k'îrapite mãik'aapa jaradait'ee tachia k'îsiadap'edaa, jaradap'edaa mãik'aapa oodap'edaa na p'ek'au eujãde p'anù misa.
Ne–inaa k'achia oopináatù awaraa ijãapataarãmaa
13 Maperã ak'ùnaadáma awaraa ijãapataarãpa oopata pedee k'achia pedeedait'ee ãra ãpùte. Ma k'ãyaara jõma óotù awaraa ijãapataarã pipùara ijãadamerã, mãik'aapa oodamerã Cristopa oopi k'inia bùk'a. 14 Mù jida araa bù Cristo ome. Ijãa bù chik'o k'îra t'ãdoo k'oipia bù, Ak'õrepa ma chik'o k'oit'ee ooda perã. Mamîda awaraapa ijãa bù pùrã chik'o k'îra aba k'oik'araa bù, ichi–it'ee k'oik'araa bù. 15 Maperã k'îrak'aupai pù âpema Cristo k'aurepa t'ãri p'uapii. Iru k'îrapite pùa k'oru pùrã ne–inaa irua k'ok'aa, iru t'ãri ãrii beei pù ome maa–e pùrã Tachi Ak'õre ome, Cristode ijãa amaadarumaa. Cristo ichiaba piuji ma eperã k'aripait'ee. Mapa chik'inia p'anapatáatù. 16 K'îrak'aupai awaraarãpa pedee k'achia jaradai pùa ne–inaa pia oopata ãpùte, pùa ijãa bairã chik'o k'îra t'ãdoo k'oipia bù. 17 Tachi Cristode ijãada–e p'anù irua chik'o k'îra t'ãdoo k'opipari perã wa chik'o k'îra apai k'opipari perã. Ijãada–e ne–inaa topipari perã wa topik'aa perã. Jîp'a tachi Cristode ijãapata mãik'aapa iru jua ek'ari p'anapata, iru Jaurepa k'aripak'ãri, oopataadai perã Tachi Ak'õrepa k'inia bùk'a mãik'aapa k'ãiwee p'anapataadai perã. 18 Tachi Ak'õrepa pia ak'ùpari mãgá ijãa p'anùùrã, oo k'inia p'anadairã Cristopa oopi k'inia bùk'a. Mãga oodak'ãri, k'achia ooda–e p'anù. Mapa ãra ik'aawa p'anùùrãpa ichiaba ãra pia ak'ùpata.
19 Maperã ne–inaa pia oodáma k'ãiwee p'anapataadait'ee awaraa ijãapataarã ome. Chik'aripa p'anadáma, tachi jõmaweda pipùara Cristode ijãadait'ee. 20 K'îrak'aupai awaraarã t'ãri ãriipii Tachi Ak'õre ome, parãpa ne–inaa k'opata k'aurepa. K'irãpátù Tachi Ak'õrepa chik'o jõmaweda ooji k'odamerã. Mamîda pùa chik'o k'îra t'ãdoo k'o bùpa awaraa ijãapari k'achiade baaipiru pùrã, Tachi Ak'õre k'îrapite ne–inaa k'achia oomaa bù. 21 Piara bù chik'o k'îra t'ãdoo k'o–e pait'ee maa–e pùrã ne–inaa k'îra t'ãdoo to–e pait'ee maa–e pùrã ne–inaa awaraa oo–e pait'ee, ma k'aurepa k'achiade baaipii k'ãyaara pù âpema Cristo k'aurepa.
22 Maperã pùa ijãa bù pùrã chik'o k'îra t'ãdoo k'oipia bù, mãga ijãa béeji pùchi t'ãridepai. Mãpai awaraa ijãapari mãga ijãa–e bù ome nipak'ãri, jaraik'araa bù pùchi t'ãride iru bù. Tachi Ak'õrepa k'awa bù ne–inaa jõma pùa ijãa bù pùchi t'ãride. Chi mãga oo p'anùùrã o–îa p'anù Ak'õre k'îrapite, k'îsia p'ua–ee. 23 Mamîda pùa ijãa bù pùrã chik'o k'îra aba k'oik'araa bù, k'îsia p'uadarii ma chik'o k'ok'ãri. Mãgá k'îsia p'uadaik'ãri, ne–inaa k'achia oomaa bù Ak'õre k'îrapite ma chik'o k'oru pùrã. Mapa mùa ûraapari ijãaparipa k'awa–e bù pùrã ne–inaa ooi wa oo–e pai, ooik'araa bù, ichi t'ãripa ijãarumaa ooipia bù.