Tachia k'aripadaipia bù Tachi Ak'õre Ûraa pia k'awada–e beerã
15
1 Tachi Ak'õre Ûraa pia k'awaa beerãpa choodaipia bù Ak'õre Ûraa pia k'awada–e#e beerã ome ne–inaa awara ijãadak'ãri. Tachia oo k'iniata oodai k'ãyaara, oodaipia bù ãrapa k'inia p'anùk'a. 2 Mãga ooruta pùrã, ãchi t'ãri ãriipida–e pait'ee. Jîp'a ãchi k'aripadait'ee waapùara k'awaadamerã Cristopa ãchimaa oopi k'inia bù. 3 Oodaipia bù Cristopa oodak'a. Ne–inaa oo–e paji *irua mãga oo k'inia bada perã. Jîp'a oopachi Tachi Ak'õrepa oopi bùk'a, nepùrade baaipachi mîda mãga ooda k'aurepa. Choopachi Tachi Ak'õre Ûraa p'ãdade jara bùk'a:‘Ak'õre, k'achia beerãpa ik'achia jaradap'edaak'a pù ãpùte, auk'a mùmaa jarajida, mùa ooda perã pùa oopidak'a.’ (Salmos 69.9b)
4 Chonaarãweda Tachi Ak'õrepa ichi ûraa p'ãpiji, ma k'aurepa tachi ârapemaarãpa irua jara pëida k'awaadamerã. Mãga k'awaa wãdak'ãri, t'ãri o–î–îadaipata tachia ijãa p'anùde, choo k'awaa wãpata nepùrade p'anùde mãik'aapa nùpata Ak'õrepa tachi k'aripamerã ichi ûraade jara bùk'a.
5 Mùa ùt'aa iidi bù Ak'õrepa parã mãgá k'aripamerã mãik'aapa choopimerã nepùrade jõnùde. Ichiaba iidi bù irua parã k'aripamerã t'ãri a–ba p'anapataadamerã apemaarã ijãapataarã ome, Jesucristopa mãga oopi k'inia bairã. 6 Mãgá t'ãri a–ba p'anadak'ãri, otau aba pùk'a parã jõmaweda o–îa ùt'aa t'âpataadait'ee mãik'aapa k'aripataadait'ee. Mãgá ak'ùpidait'ee wãara ijãa p'anù Tachi Waibùa Jesucristo Ak'õrede.
7 Maperã awaraa ijãapataarã pia ak'àtù, Cristopa parã pia ak'ùparik'a. Cristopa mãga ooda perã na eujãde bù misa, awaraarãpa pia jarapachida Tachi Ak'õre ãpùte. Auk'a pia jaradai iru ãpùte, parãpa mãga oo p'anù pùrã. 8 Tachi Ak'õrepa Cristo pëiji tai judiorã k'aripade, ichia jaradak'a tai chonaarãmaa. Mãga ooji ak'ùpiit'ee wãara ichia oopari ichia jara bùk'a. 9 Ichiaba Ak'õrepa Cristo pëiji ak'ùpiit'ee ichia judio–eerã auk'a k'aripa k'inia bù. Ichia ãchi mãgá chupùria k'awaa bapari perã, judio–eerã auk'a irumaa ùt'aa t'â k'inia p'anù, iru ley p'ãdade jara bùk'a:
‘Maperã awaraa eujãdepemaarã t'ãide mù ùt'aa t'âit'ee mãik'aapa pùmaa k'ariit'ee.’ (2 Samuel 22.50; Salmos 18.49)
10 Awara ãi Ak'õre Ûraa p'ãdade ichiaba jara bù:
‘Awaraa eujãdepemaarã, o–îa ùt'aa t'çtù Tachi Ak'õre eperãarã ome.’ (Deuteronomio 32.43)
11 Awara ãi ichiaba jara bù:
‘Parã jõmaarã eujãdepemaarã, ùt'aa t'çtù mãik'aapa k'arítù Tachi Waibùamaa.’ (Salmos 117.1)
12 Tachi Ak'õre pedee jarapari Isaiapa p'ãdade ichiaba jara bù:
‘Eperã uchiait'ee Jesedeepa. Mãgà jõmaarã ak'ùpari pait'ee. Israelitaarã–eerãpa pida ijãadait'ee irua ãchi k'aripait'ee atuanaadamerã.’ (Isaías 11.10)
13 Mùa ùt'aa iidi bù parã pari auk'a ijãadamerã. Mãgá ijãadak'ãri, Tachi Ak'õrepa parã o–îa p'anapiit'ee mãik'aapa k'ãiwee p'anapiit'ee. Iidi bù Tachi Ak'õre Jaurepa parãmaa k'awaapimerã Ak'õrepa k'îsia iru bù Cristodeerã–it'ee, t'ãri o–îa nù p'anadamerã irumaa wãrutamaa.
Pablo judio–eerã ome mimiada
14 Âpemaarã, mùa k'awa bù parã Cristode wãara ijãa p'anù. Ne–inaa pia oopata awaraarã k'aripadait'ee. Ak'õre net'aa pia k'awapata mãik'aapa ûraa para bapari, chik'aripa p'anù misa. 15 Mãga p'anapata mîda, na p'ãdade mùa ne–inaa ûk'uru jîp'a jaraji Tachi Ak'õrepa jarapidak'a. Mãgá jaraji parãpa k'irãpadamerã Ak'õrepa ichideerãmaa oopi k'inia bù. Ma–it'eepù Ak'õrepa mù jùrùt'eraji, mù chupùria k'awaap'eda. 16 Mù jùrùt'eraji judio–eerãmaa jarateenamerã Cristopa ooda eperãarã k'aripait'ee. Ma–it'ee mù Jesucristo mimiapari papiji. P'aareerã awara bùdak'a iru mimia oopataadamerã, mãga pùk'a mù awara bùji iru pedee pia jara pëida Cristode jarateepariimerã judio–eerãmaa. Mùa mãga jarateepari ãrapa ijãadak'ãri, primiciak'a p'aneedamerã Tachi Ak'õre–it'ee mãik'aapa irua ãra pia ak'ùpariimerã Cristode ijãapata k'aurepa. Mãgapù ichi Jaurepa ãra ichideerã papiit'ee.
17 Mù mãgá mimiapari perã Tachi Ak'õre–it'ee, o–îa jara bù Cristopa oomaa bù mùchi k'ap'ùa pari. 18 Ne–inaa ooda mùchi k'îradoopa jara–e. Jesucristopa mùmaa oopi bù Tachi Ak'õre Jaure k'ap'ùa pari jarait'ee; mùmaa ne–inaa jarapiru mãik'aapa ne–inaa oopiru judio–eerã ijãadamerã. 19 Ãrapa mãgá ijãajida, unudak'ãri Tachi Ak'õre Jaurepa mùmaa oopi bù ne–inaa eperãarãpa p'oyaa oodak'aa ãchi juadoopa. Mãpai iru Jaurepa mù t'ùmà wãpiji judio–eerãmaa jarateenamerã. Jerusalén p'uurudeepa Iliria eujãde parumaa, p'uuru bee chaa mùa Cristopa ooda eperãarã k'aripait'ee jaratee nipapachi, Ak'õrepa mùmaa oopidak'a. 20 Mãgá mùa jaratee k'inia bù. Wã k'inia bù Cristo at'ãri k'awada–e p'anùùrãmaa, jarateede irua ooda eperãarã k'aripait'ee. Eperãpa te chiwidi ook'ãri, oo–e awaraapa te bùùrù suda ârù. Mãga pùk'a mùa jaratee k'inia–e Cristopa ooda chi ûridap'edaarãmaa awaraa jarateepari it'aideepa. 21 Jîp'a mùa jaratee k'inia bù k'awada–e p'anùùrãmaa, ãra p'anadamerã Ak'õre Ûraa p'ãdade jara bùk'a:
‘Waide irua ooda ûrida–e p'anùùrãpa iru unudait'ee mãik'aapa waide irudé ûrida–e p'anùùrãpa iru k'awaadait'ee.’ (Isaías 52.15)
Pablo wã k'inia bada Romadepema ijãapataarã ak'ùde
(1 Corintios 16.5-9)
22 Mù mãgá t'ùmà wãpari perã awaraarãmaa jarateede, waide p'oyaa wã–e paji parã ak'ùde, ichita wã k'inia baji mîda. 23 Mamîda ârá, waa wê–e perã na tode at'ãri Cristopa ooda ûrida–ee mãik'aapa año chok'ara paru mù wãit'ee bada parã ak'ùde, ârá wãit'ee. 24 Españadee wãk'ãri, parãmãi wiibaiit'ee. Parãpa mù k'ariparuta pùrã, jãma panait'ee, p'asia nipap'eda parã t'ãide. O–îa bù parã unuit'ee perã, mak'ùara p'oyaa taarã ba–e mîda parã ome. 25 Mamîda wãi naaweda parã ak'ùde, mù wãit'ee Jerusalén p'uurudee. P'arat'a ateeit'ee ijãapataarã mama p'anùùrãmaa. 26 Mãga ooit'ee Macedonia eujãdepema mãik'aapa Acaya eujãdepema ijãapataarãpa k'aripa k'inia p'anadairã Jerusalendepema ijãapataarã chupùria chitoonùùrã. Ma–it'ee p'arat'a p'ejida tee pëidait'ee mù ome. 27 Judio–eerã paji mîda, ãchi k'îradoopa mãga oojida t'ãri pia p'anadap'edaa perã. Mamîda mãga ooda–e pada paara ãchi k'îradoopa, k'aripadaipia p'anak'ajida, judiorã k'aurepa ãchia Ak'õre net'aa k'awa p'anadairã. Maperãpù ãchi net'aa teedaipia bù chi wêe p'anùùrãmaa judiorã t'ãide. 28 Mãpai mùa ãchi p'arat'a p'edap'edaa Jerusalendee ateep'eda mãik'aapa teep'eda ma chupùria beerãmaa, mù wãit'ee Españadee mãik'aapa ma wãrude wiibaiit'ee parã ak'ùit'ee. 29 Mãgá unudak'ãri, mùa k'awa bù parã o–îa p'anadait'ee, mùa jarait'ee perã ne–inaa pia Cristopa oo k'inia bù ichideerãmaa.
30 Mamîda, âpemaarã, mãga paru misa, mùa k'inia bù parãpa ùt'aa t'âpataadamerã mù pari. K'îra jîp'a ùt'aa iidipatáatù Ak'õrepa mù k'aripamerã, mù unuk'ãri Cristopa ooda ûridaamaa p'anùùrã ome. Tachi Waibùa Jesucristopa k'inia bù tachi mãgá chik'aripa p'anadamerã. Mapa Ak'õre Jaurepa Cristodeerã jõmaweda chik'inia p'anapipari. 31 Maperã ùt'aa t'âpatáatù Tachi Ak'õrepa mù baaipinaamerã Judeadepema Cristode ijãadak'aa beerã juade, mãùrãpa mù k'îra unuamaa iru p'anapata perã, mùa jaratee bù k'aurepa. Ichiaba ùt'aa t'âpatáatù Jerusalendepema judiorã Cristode ijãapataarãpa t'ãri o–îa jitadamerã ma p'arat'a mùa ateeru teeit'ee ãramaa. 32 Mãgá ùt'aa t'âpatáatù mù parã t'ãide o–îa panamerã, Ak'õrepa mãga k'inia bù pùrã. Jãma panak'ãri, âiit'ee mãik'aapa pedee sia pedeeit'ee parã ome. 33 Mãga paru misa, mùa ùt'aa iidiit'ee Ak'õrepa parã jõma k'ãiwee p'anapimerã. Amén.