Pablopa salude pëida
16
1 Mùa k'inia bù parãpa auteebaidamerã tachi âpewêra Cristo k'aurepa, t'âjarapata Febe. Irua Cencrea p'uurudepema ijãapataarã ak'ùpataarã k'aripapari. 2 Iru parã t'ãide panak'ãri, pia óotù Cristopa oopi bùk'a jõmaweda ichideerãmaa. Febe k'aripátù parãmaa ne–inaa iidiru pùrã, irua ijãapataarã chok'ara k'aripadoo perã, mù paara.3 Mùa salude pëiru Priscilamaa mãik'aapa Aquilamaa. Mù ome ãra auk'a mimiapata Jesucristo–it'ee. 4 Perá piujida mù k'aripadait'ee. Maperã mùa gracias jara k'inia bù ãramaa mãik'aapa ijãapataarã jõmaweda judio–eerã t'ãidepemaarãpa pida.
5 Ichiaba salude pëiru jõmaweda ijãapataarãmaa, ãra tede ùt'aa t'â chepata. Salude pëiru mù k'õp'ãyo k'inia, Epenetomaa. Iru awaraarã k'ãyaara naapùara Cristode ijãaji Ásia eujãde.
6 Salude pëiru Mariamaa. Pia oopari Cristopa oopi bùk'a parã t'ãide.
7 Salude pëiru mùchi auk'aarã Andronicomaa mãik'aapa Juniamaa. Ãra carcelde p'anajida mù ome. Ãrapa mù k'ãyaara naapùara ijãajida. Jõmaweda Cristopa jùrùt'eradaarãpa ãra pia t'o p'anù, pia mimiapata perã Cristo–it'ee.
8 Salude pëiru mù k'õp'ãyo k'inia Ampliatomaa. Tachi ome auk'a ijãa bù Cristode.
9 Salude pëiru Urbanomaa. Irua tachi jõma k'aripapari mimia p'anù misa Cristo–it'ee. Ichiaba salude pëiru mù k'õp'ãyo k'inia, Estaquimaa.
10 Salude pëiru Apelemaa. Nepùrade baaiji mîda Cristode ijãapari perã, choopari ijãa bùde. Ichiaba salude pëiru Aristóbulo te pidaarãmaa, ãra ichiaba Cristode ijãapata perã.
11 Salude pëiru mùchi auk'aa Herodionmaa mãik'aapa Narciso tedepema ijãapataarãmaa.
12 Salude pëiru Trifenamaa mãik'aapa Trifosamaa. Ma wêraarãpa pia oopata Cristopa oopi bùk'a. Ichiaba salude pëiru mù âpewêra Cristo k'aurepa Persidemaa. Mùa iru k'inia iru bù. Irua ichiaba pia oopari Cristopa oopi bùk'a.
13 Salude pëiru Rufomaa. Ak'õrepa iru jùrùt'eraji parã t'ãide waibùa papiit'ee. Auk'a salude pëiru iru nawemaa. Mãgà wêrapa mù ak'ùpari mùchi nawek'a.
14 Salude pëiru Asincritomaa, Flegonte, Hermes, Patrobas, Hermas, mãgùùrãmaa mãik'aapa apemaarã âpemaarãmaa, ãra ome ùt'aa t'â chepata.
15 Ichiaba salude pëiru Filologomaa Julia ome, Nereamaa iru âpewêra ome, Olimpamaa mãik'aapa apemaarã ijãapataarãmaa, ãra ome ùt'aa t'â chepata.
16 Salude tee para bátù pãchi pitapai ak'ùpidait'ee chik'inia p'anapata Cristopa k'inia bùk'a. Nãpema ijãapataarãpa parãmaa auk'a salude pëiruta.
17 Âpemaarã, mùa enenee nâbù parã k'ùùrùchaa p'anadamerã, ûk'uru seewa jarateepata paraa perã. Mãùrãpa awara jarateepata Tachi Ak'õre Ûraa wãara jarateepataarãpa parãmaa jarateedap'edaa k'ãyaara mãik'aapa ijãapataarã k'îsia awara–awaraa papipata. Maperã Cristode ijãapataarã ûk'uru ijãa amaadaipata ãchi k'aurepa. Ãyaa p'anéetù mãùrã ik'aawaapa. 18 Mãgeerãpa oodak'aa Cristopa oopi bùk'a. Jîp'a ãchi–it'ee aupai mimiapata. Pedee sia, iwarraa pedee jaratee p'anùùpa k'ûrapata ijãapataarã, chi pia k'îsia k'awada–e p'anùùrã. 19 Jõmaarãpa jara p'anù parã Cristode pia ijãapata mãik'aapa p'anapata irua pëida eperãarãpa jarateepatak'a. Mãga ûrik'ãri, mù o–îadaipari. Mãgá ne–inaa pia k'awaa wãk'ãtù wåtù. Mamîda k'îrak'aupai ne–inaa k'achia oodai. 20 Parãpa ma seewa jarateepataarãpa jara p'anù ûrida–e pùrã, Tachi Ak'õrepa isapai p'oyaai Satanás, chi ãchimaa mãga oopi bù. Mãgá parã k'ãiwee p'anadai, k'îsia awara–awaraa p'anadai k'ãyaara. Mùa ùt'aa iidi bù Tachi Waibùa Jesupa made parã k'aripamerã.
21 Timoteopa parãmaa ichiaba salude pëiru. Ichia mù k'aripapari na mimia ome. Ichiaba salude pëiruta mùchi auk'aarã Luciopa, Jasonpa mãik'aapa Sosipatropa.
22 Mù, Terciopa na k'art'a p'ãmaa bù Pablo k'ap'ùa pari. Mùa pida Tachi Waibùade ijãa bù. Mapa parãmaa ichiaba salude pëi k'inia bù.
23 Gayopa parãmaa ichiaba salude pëiru. Irua tai auteebaiji ichi tede mãik'aapa tai pia ak'ùmaa bù. Mãga oopari jõma Cristode ijãapataarã ome nama chedak'ãri. Erasto, na p'uurudepema p'arat'a jâaparipa ichiaba salude pëiru. Ma awara tachi âpema Cristo k'aurepa, Cuartopa salude pëiru.
24 [Mù, Pablopa iidi bù Tachi Waibùa Jesucristopa parã pia ak'ù bapariimerã.]
25 Ârá ùt'aa t'âdáma Tachi Ak'õremaa jaradait'ee iruta jõmaarã k'ãyaara waibùara bù. Irua parã k'aripapariit'ee Cristopa oopi k'inia bùk'a oodamerã. Mùa mãga jõmaarãmaa jara bù jarateek'ãri Tachi Ak'õre Ûraa Pia jara pëida. Ma ûraade jara bù jõmaweda Cristopa ooda eperãarã k'aripait'ee. Ma pedee Ak'õrepa chonaarãweda k'awapi–e paji. 26 Mamîda Tachi Ak'õre ichita baparipa, ma k'îsia iru bada ârá k'awapimaa bù mùchi it'aideepa mãik'aapa awaraa jarateepataarã it'aideepa. Taimaa k'awaapiji ichia wãarata jara k'inia bada ichi ley p'ãdade chonaarãweda, ma pedeeta jara bairã Cristopa ooit'ee bada jõmaarã k'aripait'ee. Mãga k'awaapida perã taimaa, jõmaweda taipa jarateepata ûri p'anùùrãpa Cristode ijãadai mãik'aapa oodai irua oopi bùk'a.
27 Tachi Ak'õre aupaita wãara k'îsia k'awaa bapari. Ichia Jesucristo pëiji tachi o k'achiadeepa k'aripa atamerã. ¡Mapa ichita ùt'aa t'âdáma irumaa! Amén.
Mãgapai paji.