Pablo Malta islade
28
1 Tai jõma ipude panadak'ãri, k'awaajida ma isla t'âjarapata Malta. 2 Ariipema eperãarãpa tai pia ak'ùjida. K'oi che nâbada perã mãik'aapa jîsua nâbada perã, t'ùpùtau oro jira bùjida. Maap'eda taimaa jarajida t'ùpùtau ik'aawa k'ara p'ai chedamerã. 3 Pablopa t'ùpù jua p'ûasaa p'e atap'eda, t'ùpùtaude oromaa baji. Mãga nùde t'ùpù wãsiapa taama uchiadaip'eda, Pablo juade k'aa jira ba cheji. 4 Mãga unudak'ãri, ma isladepema eperãarãpa ãchi pitapai mãgajida:—¿Na eperã chîara peepari–ek'ã? ajida. P'usa jãdeepa uchiaji mîda, tachi eperãarãpa oopata ak'ùparipa chok'ai bapi–e pajida ajida.
Mãga jarajida Pablo piudariit'ee jîak'aapa. 5 Mamîda Pablopa taama t'ùpùtaude jîap'et'aaji mãik'aapa k'ãiwee beeji. 6 Jõmaarãpa nù jõnapachida sãapaita Pablo jua oorodarii maa–e pùrã piudarii. Mamîda maarepida mãga p'asa–e pak'ãri, k'îsia awara k'îsiadachida. Jarajida Pablo ak'õre waibùak'a.
7 Tai p'anadap'edaa k'ait'a baji ma isladepemaarã poro waibùa eujã. Mãgà poro waibùa t'âjarapachida Publio. Mãgùpa tai pia ak'ùji ichi tede k'ãima õpee. 8 Tai mama p'anùde Publio ak'õre k'ayaa baji k'ùamiapa mãik'aapa amipa. Mapa Pablopa ak'ùnak'ãri, ùt'aa t'âji mãik'aapa ichi jua bùji ma k'ayaa bada ârù. Mãgá jùpa beeji. 9 Mãga k'awaadak'ãri, ma isladepemaarãpa ãchi k'ayaa beerã p'e ateejida mãik'aapa Pablopa jõma jùpak'ooji. 10 Mãgá jùpa p'aneedap'edaa perã, mãpema eperãarãpa tai pia ak'ùjida mãik'aapa ne–inaa tee chejida tai–it'ee. Ichiaba mamãik'aapa barcode uchiadak'ãri, net'aa jõmaata taimaa teejida ateedamerã.
Pablo Romade panada
11 Atane õpee ma islade p'anadap'eda, bataujida barco p'usa t'ojara wãyaapimaa badade. Mãgà barco Alejandría p'uurudepema paji. Ma barco k'âmaa baji santok'a, Romadepemaarã ak'õre waibùarã Cástor mãik'aapa Póluxa apatap'edaa. 12 Ma barcode wãjida Siracusa p'uurudee. Mama k'ãima õpee p'aneejida. 13 Ma p'uurudeepa wãjida to i k'ait'a. Mata wiibainajida Regio p'uurude. Aù norema tai ãpùteik'a eereepa nãu p'ua nâbeeji. Mapa ma norema wiibainajida Poteoli p'uurude. 14 Mama unujida ijãapataarã. Mãùrãpa tai ãchi temaa ateejida p'anade tomia aba. Maap'eda, wãjida Romadee. 15 Romadepema ijãapataarãpa k'awa p'anajida tai wã nidá. Mapa tai k'îrachuu chejida Romadeepa, ûk'uru Foro de Apio apatap'edaamãi, jõdee ûk'uru Tres Tabernas apatap'edaamãi. Pablopa ãchi unuk'ãri, Tachi Ak'õremaa ùt'aa t'âp'eda, o–îadachi. 16 Roma p'uurude panadak'ãri, Pablo te jîp'aade bùjida jâapari abaa ome.
Pablo judiorã ome Romade unuda
17 Mama panadap'eda, k'ãima õpeemaa Pablopa Roma p'uurudepema judiorã poroorã t'â p'eji. Jõma pachedak'ãri, mãgaji:
—Mùchi auk'aarã, maarepida mùa ne–inaa k'achia oo–e bùda aji, judiorã k'îraupiit'ee maa–e pùrã tachi chonaarãpa oodap'edaak'a oo amaadamerã. Mamîda Jerusalende mù jita atadap'eda, Romadepemaarã juade bùjida. 18 Romadepemaarãpa mùmaa iididak'ãri k'ãare k'achiata oo bù, k'ena pëidait'ee paji, maarepida k'achia oo–e pada perã mù peedait'ee. 19 Mamîda judiorãpa k'iniada–e paji mù uchia pëidamerã. Mapa mùa chupùria iidiji Cesarpa mù nepùra ak'ùmerã. Mãga ooji mùchi auk'aarã ãpùte jarai wêe bù mîda. 20 Ârá parã t'â pëiji jara k'inia bairã mù nãgá cadenapa jâ nâbù, tachi israelitaarãpa ijãa p'anù k'aurepa.
21 Mãpai ma judiorãpa p'anaujida:
—Taipa k'art'a p'ãda apida waide jitada–e p'anùda ajida, Judea pidaarãpa tee pëidap'edaa. Ichiaba araapa pache p'anadap'edaarãpa pù ãpùte maarepida k'achia jarada–e p'anù. 22 Mamîda taipa k'awa k'inia p'anùda ajida, pùa k'îsia bù, k'awa p'anadairã jõmaarãpa pedee k'achia jara p'anù pùchi eere p'anùùrã ãpùte.
23 Mãpai ewari aba bùjida Pablo pedee ûridait'ee. Ma ewate pak'ãri, eperãarã cheepurujida Pablo badamãi. Tap'edaweda k'ewara parumaa Pablopa jarateeji Tachi Ak'õrepa jarapidak'a, k'awaadamerã sãga Tachi Ak'õredeerã p'aneedai. Jarateeji k'aita Jesús, Moisepa p'ãdadeepa mãik'aapa Tachi Ak'õre pedee jarapataarãpa p'ãdap'edaadeepa. 24 Mãga ûridak'ãri, ûk'uruurãpa ijãajida Pablopa jarateeda Jesudé. Mamîda ûk'uru ijãada–e paji. 25 Ãchi pitapai k'îsia auk'a p'anada–e paji. Mãpai erreudait'ee pak'ãri, Pablopa mãgaji:
—Wãarata jarajida aji, Tachi Ak'õre Jaurepa ichi pedee jarapari Isaías it'aideepa parã chonaarãmaa jarak'ãri:
26 ‘Jã eperãarãmaa jaranapáde aji: Parãpa ûridait'ee mù pedee. Mamîda k'awada–e pait'ee k'ãata jara k'inia bù. Mùa oo bù unudai mîda, k'awada–e pait'ee. 27 Na eperãarã k'ùùrù k'isua p'anadairã, pia ûridak'aa. Ma awara tau p'ãrajâ pùk'a jêra bù ununaadamerã; k'ùùrù jida t'ap'a pùk'a jêra bù ûrinaadamerã. Maperãpù mùmaa chedak'aa, mùa ãchi t'ãri pia p'anapimerã mãik'aapa ãchi o k'achiadeepa k'aripa atamerã.’ (Isaías 6.9-10)
28 Mãpai Pablopa mãgaji:
—Idi wãara uchiajida aji, ma et'ewa jarada, parãpa ijãa k'iniada–e p'anadairã Ak'õrepa mùmaa jarapida. K'awáatù Tachi Ak'õrepa ùt'aa wãpiit'ee judio–eerã, ãrapa parã k'ãyaara ûridait'ee perã Tachi Ak'õrepa jara pëi bù.
29 [Pablopa mãga jarap'eda, judiorã uchiajida. Aupedee erreu wãjida ãchi pitapai.]