Pablo Romadee pëida
27
1 Pedeeteedap'eda, tai pëijida Italiadee. Pablo awaraa presoorã ome bùjida soldaorã poro juade, Julio apatap'edaa. Mãgà baji soldaorã batallonde t'âjarapatap'edaa Reyrã Poro Waibùadeerã. 2 Bataujida Adramitio p'uurudepema barcode, mãgà wãit'ee pada perã Ásia eujãdee, p'usa ide p'uuru bee chaa. Tai ome ichiaba nipaji Aristarco, Tesalónica p'uurudepema. Mãgà p'uuru Macedonia eujãde bù. 3 Tai uchiadap'edaa norema Sidón p'uurude wiibainajida. Mama soldaorã poro Juliopa Pablo chupùria k'awaap'eda, ichiak'au chi k'õp'ãyoorãmaa p'asiapiji, ãrapa iru ak'ùdamerã mãik'aapa k'aripadamerã. 4 Waya bataudak'ãri, uchiajida Sidón p'uurudeepa. Mata Chipre isla ãpùte wãyaajida, taimaa nãu p'ua nâbada perã. 5 P'usa jãde wãyaajida Cilicia mãik'aapa Panfilia eujã k'îrapite. Mata panajida Mira p'uurude. Mãgà p'uuru Licia eujãde bù.6 Mama soldaorã poropa unuji barco Alejandría p'uurudepema wãru Italiadee. Mapa tai jõma ma barcode bataupiji. Mãgá wãjida tai wãdap'edaa ode. 7 Mamîda nãu golpe p'ua nâbada perã, taarãjida piak'ãa wãdapa. Mata panajida Cnido p'uuru k'îrapite. At'ãri nãu taimaa p'ua nâbada perã, Creta isla ãpùte wãdade wãyaajida punto Salmona k'îrapite. 8 Mãgá isla k'ait'a piak'ãa wãdapa, t'îujida Buenos Puertos bahiade. Mãgà Lasea p'uuru k'ait'a baji.
9 Maapai judiorã fiesta nek'odak'aa ewari wãyaa baji. Ewari chok'ara atuadai baji nãu k'aurepa. Maperã k'achia baji p'usa jãde wãyaadait'ee, p'usa t'ojara pait'ee nâbada perã. Mapa Pablopa ûraaji:
10 —K'õp'ãyoorã, âraweda uchiaruta pùrã namãik'aapa, k'achia wãdait'eeda aji. Net'aa, barco mãik'aapa eperãarã paara atuadariita unu bùda aji.
11 Mamîda ma soldaorã poropa Pablo pedee ûri k'inia–e paji. Ma k'ãyaara barco chipari pedee mãik'aapa barco p'erapari pedeeta ûriji. 12 Ãchi panadap'edaamãi pia–e bada perã p'usa t'ojara wãyaait'ee, perá jõmaarãpa k'îsiajida wãyaanadait'ee Fenice p'uurude. Mãgà puerto baji Creta islade. Mãgùdeepa unupachi nordeste mãik'aapa suroeste.
Nãumiapa p'usa jãde atuapit'aada
13 Ewari aba baarek'aapa nãu p'ua nâbeeji. Mapa ancla jira atajida mãik'aapa uchiajida, ãchia k'îsia p'anadap'edaak'a. *Creta* Isla k'ait'a wãjida tok'esaa wãdaamaapa. 14 Mamîda taarã–e nùde nãumia golpe p'uaji barcomaa, nok'ooreepa mãik'aapa ak'õrejîru uchiapari eereepa. 15 Mapa barco t'ùmà atadachi. Chi p'erapataarãpa p'oyaa k'îrapa nãumaa bùda–e paji. Maperã ichiak'au nãumaa ateepijida. 16 Mãgá wãdapa Cauda isla ãpùte wãyaajida. Mãpai waa nãu golpe p'ua–e pak'ãri, barco ãtauwaare japa jâ ateedap'edaa, ùt'à barcode jidiu atajida ãripiamaapa. 17 Mãgà japa ùt'à jira atadap'eda, barcode mimiapataarãpa barco ek'ari p'ùrrabai jâ nâbùjida jâk'arapa, barco t'oop'eipiamaapa. Ma awara waawee p'anajida, p'oonù p'ananadai jîak'aapa p'usa jãde ipu t'âjarapatap'edaa Sirte ârù. Maperã chi vela pùrat'aajida. Maap'eda, ichiak'au nãumaa ateepijida. 18 Aù norema at'ãri p'usa waapùara t'o nâbada perã nãumiapa, barcode mimiapataarãpa net'aa nâbada bat'amaa p'aneejida. 19 Aù norema k'ãima õpeemaa ma nãumia p'ua nâbùde, vela, jâk'ara, pak'uru paara toidaa ãchi juadoopa bat'amaadachida. 20 K'ãima chok'ara ak'õrejîru mãik'aapa lucero unuda–e paji, eu k'achia nâbada perã. Mapa k'îsia p'anajida tai k'iniidait'ee.
21 Barco pidaarã jua araadak'aa paji nek'odait'ee pida, audú mimia p'anadap'edaa perã. Mapa Pablo bainâ beep'eda ãchi esajîak'a, jõmaarãmaa mãgaji:
—K'õp'ãyoorã, mùa jarajida aji, uchiada–e pait'ee Creta isladeepa. Mù pedee ûridap'edaa paara, nãga p'asada–e pak'aji. Net'aa chok'ara ãridai wã mãik'aapa atuadai wã. 22 Mamîda k'îsia p'uanáatù. Tachi nama p'anùùrãdepema apida piuda–e. Mamîda tachi barco atuadait'ee. 23 Mùa mãga k'awa bù Tachi Ak'õrepa mùmaa jarada perã ichi ángel it'aideepa. Mãga ooji mù ichide ijãapari perã mãik'aapa ichia oopi k'inia bùk'a oopari perã. P'ãrik'ua mùmaa ichi ángel pëiji. 24 Mãgùpa mùmaa mãgaji: “Pablo, p'eranaapáde aji, ichita pù César k'îrapite wãit'ee perã. Tachi Ak'õre t'ãri pia bairã, ûriji pùa chupùria iidida na barcode p'anùùrã pari. Mapa maarepida piuda–eda” aji. 25 Maperã k'õp'ãyoorã, k'îsia p'uanáatù mùa ijãa bairã Tachi Ak'õrepa jaradak'a uchiait'ee. 26 P'usapa isla bùmaa tachi jira bat'ak'ooit'eeda aji.
27 Mãgá wãdapa k'ãima catorcemaa tai p'anajida Adriático p'usa jãde. Ma ewate p'ãrik'ua esapùte barco p'erapataarãpa k'îsiajida eujã k'ait'a pa p'anù. 28 Mapa chaajida chi nãpùa. Chaadak'ãri, juachama veinte baji chi nãpùa. Ma waapai waya chaadak'ãri, juachama quince baji. 29 Barcode mimiapataarãpa mãu ârù p'oonù p'ananadai jîak'aapa, barco ãtauwaare ancla k'îmari t'aak'oojida. Maap'eda ùt'aa t'âjida Tachi Ak'õrepa isapai ewaripimerã. 30 Mamîda k'îsia atajida barcodeepa jirabododait'ee. Mapa japa jira atajida mãik'aapa toidaa bat'at'aajida, seewata k'âmaapema ancla toidú bat'arutak'a. 31 Mamîda Pablopa mãga k'awaak'ãri, mãgaji soldaorã poromaa mãik'aapa chi soldaorãmaa:
—Jã eperãarã barcode p'aneeda–e pùrã, parã nãik'aapa chok'ai uchiada–eda aji.
32 Mapa soldaorã japa jâk'ara t'ùùt'aajida mãik'aapa toidú bat'at'aajida, eperã wêe.
33 Tap'eda pa wãk'ãri, Pablopa jaraji nek'odamerã.
—Tomia omé paruta pia nek'oda–ee, k'îsia jõnùpa. 34 Mapa nek'ótù ma–ãri pida, juatau paraadamerã. Mamîda k'îsia p'uanáatù, apida piuda–e pait'ee perã.
35 Mãga jarap'eda, Pablopa pan ichi juade atap'eda, jõmaarã taide Tachi Ak'õremaa ùt'aa t'âji mãik'aapa ma pan t'ook'oop'eda, k'oji. 36 Mãpai ma jõma barcode nipadap'edaarãpa mãga unudak'ãri, auk'a k'ojida. 37 Tai ma barcode wãdap'edaarã doscientos setenta y seis paji. 38 Jõmaweda nek'odap'eda, bi jãwaadaidak'ãri, barcode atee wãdap'edaa trigo toidú bat'ak'oojida barco wêsaatùmerã.
Barco t'oop'edarida
39 Ewarik'ãri, barco pidaarãpa ma eujã k'awada–e paji mîda, unujida ipu i joobai nâbù. Mapa k'îsiajida barco ipude p'oo atadait'ee. 40 Mãpai ancla jâ bada jõmaweda t'ùùk'oodap'eda, toida atabaibeejida. Ichiaba chi timón jâ nâbada êrat'aajida mãik'aapa chi vela k'âmaapema bainâ bùjida. Mãpai barco to idee sùrrùa nâbeeji. 41 Mamîda barco p'oo nâbanaji ipu at'ãri p'oo–ee badamãi. Barco k'â pia p'oo nâbeeji ipude, p'oyaa ãyaa mimik'a–ee. Mãpai chi tru t'odoochook'oodachi p'usapa.
42 Aramata soldaorãpa k'îsiajida presoorã jõma peek'oodait'ee, ipudee mirudaridai jîak'aapa k'ui wãdapa. 43 Mamîda ãchi poropa mãga oopi–e paji, Pablo peepiamaa bada perã. Ma k'ãyaara jaraji chi k'ui k'awaa beerã toidú jîchoodamerã, mãgá to idee naapùara panadamerã. 44 Jõdee jaraji chi k'ui atua beerã tabla ârù maa–e pùrã barco pak'uru pite ârù wãdamerã. Mãgá tai jõma pia to ide panajida.