Pablopa Rey Agripamaa jarada
26
1 Mãpai Agripapa Pablomaa mãgaji:—Pedéeji pùchi k'ap'ùa pari.
Pablopa ichi jua ùt'aa ùaji mãik'aapa mãgaji:
2 —Tachi Rey Waibùa Agripa, mù o–îa bùda aji, idi pù k'îrapite pedeeru perã. Wãarata jarait'ee mùchi k'ap'ùa pari, judiorãpa mù ãpùte seewa jara jõnapata perã. 3 O–îa bù pedeeit'ee pù k'îrapite, pùa k'awa bairã tai judiorã p'anapata mãik'aapa k'îsiapata. Mapa pùmaa chupùria iidiit'ee ûrimerã mù pedeeru misa.
Pablo bapata Cristode ijãai naaweda
4 —Judiorã jõmaarãpa k'awa p'anù mù bapata ãra ome mùchi tode mãik'aapa Jerusalende. 5 Ichiaba k'awa p'anù mù k'ûtrãaweda fariseorã eerepema paji, mãùrãpa jõmaarã k'ãyaara pipùara oopata perã Tachi Ak'õre Ûraa p'ãdade jara bùk'a. Ãrapa mãga jara k'inia p'anù pùrã, wãarada adai. 6 Maperãta mù parã k'îrapite anee p'anù, ijãa bairã Tachi Ak'õrepa jaradade tai chonaarãmaa. 7 Tai Israeldeepa uchiadap'edaa ëreerã docedepemaarãpa nù p'anù Tachi Ak'õrepa oomerã ichia jaradak'a. Maperãta ewari chaa tai Tachi Ak'õremaa ùt'aa t'âpata mãik'aapa oopata iru ley p'ãdade jara bùk'a. Mùa auk'a ijãa bù mîda, mù ùmùatee p'anù judiorãpa, ¡mùchi auk'aarãpa pida! 8 ¿K'ãata k'îsia p'anùma? ¿Eperã piup'eda, Tachi Ak'õrepa p'oyaa p'irabaipi–e paik'ã?
Pablopa nepùrùda ichia Cristode ijãapataarã peepida
9 —Naaweda mùa pida k'îsia baji judiorãpa k'îsia p'anùk'a. Mapa Jesús Nazaretdepema t'âde ijãapataarã miapipachi. 10 Mãga oopachi Jerusalende. Ijãapataarã chok'ara carcelde t'ù nâbùpachi, p'aareerã poroorãpa mãga oopidap'edaa perã. Ma awara ãrapa ijãapataarã peepidak'ãri, mù o–îa beepachi. 11 Ichiaba at'apai mùa ijãapataarã miapipachi Cristode ijãa amaadamerã. Mãga oopachi Tachi Ak'õre Ûraa jarateepata te chaa, ãra unuamaa p'e iru bada perã. P'uuru t'ùmà beemaa, judio–eerã t'ãide paara, ãra jùrù nipapachi.
Pablopa waya jarada ichia sãga Cristode ijãada
12 —Mãga ooit'ee paji mù wãk'ãri Damasco p'uurudee, p'aareerã poroorãpa mù k'aripadap'eda. 13 Mamîda ode wãde imat'ùpa unuji ùt'ariipa âdaa jêra t'îudaru ak'õrejîru k'ãyaara âdaara, mù ârù mãik'aapa mù ome wãdap'edaarã ârù. 14 Tai jõmaweda eujãde baainajida. Mãpai mùa ûriji tai hebreo pedeede pedeeru: “Saulo, Saulo ¿sãap'eda mùchideerã jùrù nima? aji. Pùchi k'îradoopa k'achia oomaa bù, p'ak'apa ooparik'a ãpùtee t'ùak'ãri chipari nek'ida misuamaa.”
15 +Mãpai mùa iidiji: “¿Pù, k'aima?” aji. P'anauji: “Mù Jesupù, pùa eperãarã jùrù ni poro waibùa. 16 P'irabaipáde aji, mù mimiapari pait'ee perã. Eperãarã k'îrapite pùa jarait'ee mù idi unuda mãik'aapa ichiaba jarait'ee mùa ne–inaa na ewari ak'ùpiit'ee pùmaa. 17 Ma–it'ee pù pëiit'eeda aji, judiorãmaa mãik'aapa judio–eerãmaa. Mamîda pù k'aripa atait'ee ãchi juadeepa. 18 Ãchimaa pëiit'eeda aji, k'awaadamerã sãga uchiadai o k'achia p'ãriu pùk'a bùdeepa mãik'aapa Satanás juadeepa. Mãgá nipadai âdaa pùk'a bùde Tachi Ak'õre juade. Mùde ijãa p'anù pùrã, Tachi Ak'õrepa ãchi p'ek'au k'achia wêpapiit'eeda aji, mãik'aapa ãchia ùt'ari iru p'anadait'ee jõma Tachi Ak'õrepa k'îsia iru bù ichia awara bùdaarã–it'ee.”
Pablopa ooda Tachi Ak'õrepa oopi k'inia bùk'a
19 —Mapa Rey Agripa, mùa ooji mù ome pedee badapa jaradak'a. 20 Naapùara jaranaji Damasco p'uurude, maap'eda Jerusalende mãik'aapa Judea eujãde. Ichiaba judio–eerãmaa jarateeji. Ma jõmaarãmaa jaraji k'achia oo amaadamerã mãik'aapa oodamerã Tachi Ak'õrepa oopi bùk'a, mãgá awaraarãmaa ak'ùpidait'ee wãara Tachi Ak'õrede ijãa p'anù. 21 Maperãpù judiorãpa mù jita atajida mãik'aapa perá peejida Tachi Ak'õre tede. 22 Tachi Ak'õrepa mù k'aripapari perã, at'ãri nama ak'ùnâ bù jarateeit'ee k'îra jîp'aarãmaa mãik'aapa waibùarãmaa. Mùa jarateepari Tachi Ak'õre pedee jarapataarãpa jaradap'edaa mãik'aapa Moisepa jarada, mãgà aupai. 23 Ãrapa jarajida Cristo piuit'ee mãik'aapa naapùara chok'ai p'irabaiit'ee. Mãgá p'irabaik'ãri, ak'ùpiji judiorãmaa mãik'aapa judio–eerãmaa ãchi ichiaba ùt'aa wãdai, mãgá ãchi uchiadamerã p'ãriu pùk'a bùdeepa âdaa bùdee.
Pablopa Rey Agripamaa jarada Cristode ijãamerã
24 Pablopa at'ãri mãga jaramaa bùde, Festopa golpe pedeeji:
—Pablo, pù k'îra k'awa–ee baibùda aji, audú estudia bùpa.
25 Mãpai Pablopa p'anauji:
—¡Mãga–epù, tachi poro waibùa Festo! Mù k'îra pia bùda aji. K'îra jîp'a nepùrùmaa bù mãik'aapa wãarata jara bù. 26 Rey Agripapa pia k'awa bù mùa jara bù. Mapa waawee–ee mùa nepùrùmaa bù ichi k'îrapite, k'awa bairã nãgà net'aa merã ooda–e paji. 27 Tachi Rey Waibùa Agripa, pùa ijãa bùda aji, Tachi Ak'õre pedee jarapataarãpa jaradap'edaa. ¿Mãga–ek'ã?
28 Mãpai Agripapa mãgaji:
—¿Taarã–eweda mù Cristode ijãapi k'inia bùk'ã? aji.
29 Pablopa p'anauji:
—Taarã pedeerupa maa–e pùrã mak'ùara pedee–eepa, Tachi Ak'õremaa mùa chupùria iidi bù pù pari mãik'aapa nama jõma see nâbù pari, parã mùk'a papimerã, mamîda na cadena wêe.
30 Mãpai Rey Agripa mãik'aapa eujã ak'ùpari Festo p'irabaidap'eda, uchiajida Berenice mãik'aapa awaraa mama su–ak'ù p'anadap'edaarã ome. 31 Maap'eda ãchi pitapai mãgapachida:
—Na eperãpa k'achia oo–e bù piumerã maa–e pùrã carcelde bamerã.
32 Mãpai Rey Agripapa mãgaji Festomaa:
—Iru carceldeepa uchia pëik'ajida aji, César k'îrapite wã k'inia–e bùda ada paara.