Pablo Festo k'îrapite
25
1 Festo pachek'ãri Cesarea p'uurude ma eujã ak'ùpari bade, k'ãima õpee mama baji, Jerusalendee wãi naaweda ma p'uuru k'awade. 2 Mama bùde p'aareerã poroorãpa mãik'aapa judiorã poro waibùarãpa Pablo ãpùte pedeejida. 3 Chupùria iidijida Festomaa Pablo Jerusalendee pëimerã. Mãga oojida pedeetee p'anadap'edaa perã ode peet'aadait'ee. 4 Mamîda Festopa mãgaji:—Pablo preso bùda aji, Cesarea p'uurude. Taarã–ee mù araa wãit'ee. 5 Mapa parã poro waibùarã mù ome pïitù. Mãgá ma eperãpa ne–inaa k'achia ooji pùrã, iru k'îrapite ãchi nepùra jaradayada aji.
6 Festo Jerusalende baji tomia aba maa–e pùrã k'ãima diez. Maap'eda cheji Cesarea p'uurudee. Ma pacheda norema charra mimiapari tede su–ak'ù beeji mãik'aapa Pablo atapiji. 7 Pablo pak'ãri, judiorã Jerusalendeepa cheepurudap'edaarãpa ùmùateejida Festomaa. Mamîda ãchia jara p'anadap'edaa p'oyaa ak'ùpida–e paji. 8 Jõdee Pablopa p'anauji:
—Mùa pedee k'achia jara–e bùda aji, judiorã ûraa Moisepa p'ãdadé maa–e pùrã Tachi Ak'õre tedé. Ma awara César ãpùte pedee k'achia jara–e bùda aji.
9 Mamîda Festo, judiorãpa ichi t'o p'anadamerã, Pablomaa mãgaji:
—¿Wã k'inia bùk'ã aji, Jerusalendee, mùa jãma pù nepùra ak'ùmerã?
10 Pablopa p'anauji:
—Nama mù nepùra ak'ùdaipia bùda aji, nama mù César charra k'îrapite bairã. Pùa k'awa bù mùa judiorãmaa ne–inaa k'achia oo–e bù. 11 K'achia oo bù pùrã, mù peedaipia bù. Waawee–ee piuit'ee. Mamîda k'achia oo–e bù pùrã, apidaapa mù ãchimaa teedaik'araa bù. Mapa mùa k'inia bùda aji, Cesarpa mù nepùra ak'ùmerã.
12 Mãpai Festo pedeeji ichi ûraapataarã ome mãik'aapa mãgaji Pablomaa:
—Cesarmaa wã k'inia bairã, pù irumaa wãit'ee.
Festopa Pablo nepùra jarada Rey Agripamaa
13 Maap'eda, taarãpai Rey Agripa chi âpewêra Berenice ome Festomaa p'asiade wãjida Cesarea p'uurudee. 14 Taarã p'anadap'edaa perã, Festopa Pablo nepùra nepùrùji reymaa:
—Nama bùda aji, Felixpa preso bëida. 15 #Mù Jerusalende nipak'ãri, p'aareerã poroorãpa mãik'aapa judiorã poro waibùarãpa mùmaa jarajida Pablo ome nepùra iru p'anù. Maap'eda jarajida peepit'aamerã. 16 Mamîda mùa p'anauji Romadepema charraarãpa chîara peepidak'aa, ma presopa ichi k'ap'ùa pedee–emaa ichi ùmùateepataarã k'îrapite. 17 T'êepai ãra nama pachedak'ãri, aù norema mù charra tede wãji maap'eda aneepiji ma preso. 18 Mamîda iru ùmùateepataarãpa p'oyaa wãarada ada–e paji ma preso k'îrapite. Mùa k'îsia baji Pablopa k'achia oo bù. Mamîda mãga–e paji. 19 Jîp'a jara p'anapachida ãchia ijãa p'anù Ak'õre Waibùapa ooda mãik'aapa Jesuda a p'anù piuda; mãgùta Pablopa chok'ai bùda a bù. 20 Mùa k'awa–e pada perã sãga ooi, Pablomaa iidiji wã k'inia bù pùrã Jerusalendee, jãma mùa na nepùra waya pia ak'ùmerã. 21 Mamîda ichia chupùria iidiji Tachi Rey Waibùa Cesarpa na nepùra ak'ùmerã. Mapa mùa jaraji at'ãri preso bamerã, Romadee pëiru misa.
22 Mãga ûrik'ãri, Rey Agripapa mãgaji Festomaa:
—Mùa ma eperã pedee ûri k'inia bùda aji.
Mãpai Festopa p'anauji:
—Nu iru pedee pùa ûriyada aji.
23 Aù norema Agripa Berenice ome, reyrã chi–oo jõmaweda jâdap'eda, t'îujida eperãarã chip'edaipata tede. Ichiaba t'îujida soldaorã poroorã mãik'aapa ma p'uurudepema poro waibùarã. Mãpai Festopa Pablo aneepiji ãchi k'îrapite. 24 Festopa mãgaji:
—Rey Agripa mãik'aapa k'õp'ãyoorã nama see nâbù, pãchi k'îrapite na eperã unu p'anù. Judiorã jõmaarãpa ichi ùmùatee chepata Jerusalendeepa mãik'aapa Cesarea p'uurudeepa. Jõmaarãta biuk'adaipata mùa ichi peepit'aamerã. 25 Mamîda mù–it'ee irua k'achia oo–e bù piumerã. Ma awara ichia chupùria iidida perã Cesarpa ichi nepùra ak'ùmerã, mapa mùa mamaa pëiit'ee. 26 Ichi nepùrade mùa ne–inaa k'achia unu–e pada perã, p'ã pëiit'ee wêe bù mùchi poro waibùa Cesarmaa. Mápata mùa aneeru na eperã parã k'îrapite mãik'aapa ma k'ãyaara pù k'îrapite, Rey Agripa. Taipa k'awaadak'ãri k'ãare k'achiata oo bù, mùa p'ã pëiit'ee reyrã poro waibùamaa. 27 Mù–it'ee pia–e pùk'a bù pëiit'ee preso, jara–ee k'ãare k'achiata ooji.