Pablopa Felixmaa ichia ooda nepùrùda
24
1 K'ãima joisomaa t'êepai, p'aareerã poro waibùa Ananías pacheji Cesarea p'uurude judiorã poro waibùarã ome. Ãchi ome cheji Romadepemaarã abogado t'âjarapatap'edaa Tértulo. Ma jõmaweda Roma jua ek'ari eujã ak'ùparimaa chejida Pablo ùmùateedait'ee. 2 Mãpai Pablo ma see nâbadamãi aneedak'ãri, Tertulopa jõmaarã k'îrapite Felixmaa mãgaji:—Aai, tachi waibùa, pù k'aurepa tai k'ãiwee p'anapata na eujãde mãik'aapa ârá ne–inaa pipùara jêra bù na eujãde, pù k'îsia k'awaa bairã. 3 Tai o–îa p'anù pù ome, ne–inaa jõma pipùara oo bairã. 4 Mak'ùara taarã pedee k'inia–e bairã, pù ewari atuapiamaapa, chupùria k'awáaji mù pedee ûrimerã. 5 Jãgà eperã nepùra jùrùyaa bapari ichi wãrumaa na eujãde, judiorã chõopi nipapari perã ãchi auk'aarã ome. Ma awara ichi nazareno eere p'anùùrã poro. 6 Ichiaba Tachi Ak'õre tede ne–inaa k'achia ooit'ee paji. [Mápata taipa iru jita atapijida ateedait'ee tai nepùra ak'ùpataarãmaa. 7 Mamîda soldaorã poro waibùa Lisias pachek'ãri, tai juadeepa jãri ataji, mãik'aapa jaraji pù k'îrapite chedamerã.] 8 Ârá pùa jã eperãmaa iidiipia bù k'awaait'ee taipa seewa jarada–e p'anù.
9 Judiorã arii see nâbadaarãpa wãarada ajida. 10 Maap'eda ma Roma jua ek'ari eujã ak'ùparipa Pablomaa juapa jaraji pedeemerã. Mãpai Pablopa mãgaji:
—Mù o–îa bùda aji, pù k'îrapite pedeeit'ee perã mùchi k'ap'ùa pari. Mùa k'awa bù pù taarãru na eujãdepemaarã charra. 11 Pùchia k'awa k'inia bù pùrã, iidíji sãaweda mù pache bù. Mù k'ãima docepai iru bù Jerusalende pacheda Tachi Ak'õremaa ùt'aa t'âde. 12 Judiorãpa mù unuda–e paji chîara ome aupedee pedeemaa wa eperãarã chõopimaa Tachi Ak'õre tede. Ichiaba mãga unuda–e paji Tachi Ak'õre Ûraa jarateepata tede pida, wa awara ãi. 13 Na eperãarãpa pùmaa p'oyaa ak'ùpida–e ãchia wãarata jara p'anù. 14 Wãara mùa ijãa bù Tachi Ak'õre Ode P'anùùrã apata ijãa p'anùk'a. Mù ùt'aa t'âpari tachi chonaarãwedapema Ak'õremaa mãik'aapa ijãa bù Moisepa p'ãdade jara bù, ichiaba Tachi Ak'õre pedee jarapataarãpa p'ãdap'edaade jara bù. Nata mùa k'achia ooda a p'anù nama p'anùùrãpa. 15 Mùa ijãa bù ãchik'a; Tachi Ak'õrepa piudap'edaarã chok'ai p'irabaipiit'ee, eperã t'ãri pia beerã mãik'aapa eperã t'ãri k'achia–idaa beerã. 16 Mapa mùa jõma oopari k'îsia p'ua–ee bait'ee Tachi Ak'õre k'îrapite mãik'aapa eperãarã k'îrapite.
17 +Mamîda taarã nipap'edaa to bee chaa, cheji mùchi auk'aarãmaa Jerusalende, teeit'ee p'arat'a p'edap'edaa chupùria beerã k'aripait'ee. Ma awara cheji ne–animalaarã teeit'ee p'aareerãpa peedap'eda, paadamerã Tachi Ak'õre–it'ee. 18 Mãpai jõma oop'eda Tachi Ak'õre tede t'îu pia beeit'ee, mama t'îuji. Maap'eda Tachi Ak'õre–it'ee ne–inaa teemaa bùde, Asiadepema judiorãpa mù unujida. Mamîda chîara ome pida chõo–e paji. 19 Maperã ãchita pù k'îrapite chek'ajida mù ùmùateede, wãara k'achia oo baji pùrã. 20 Maa–e pùrã nama see nâbùùrãmaa iidíji k'ãare k'achiata unujida mù wãk'ãri Junta Suprema k'îrapite Jerusalende. 21 ¿K'achia ooji–epaama aji, ãchi k'îrapite mùa golpe pedeek'ãri: “Idipema ewari parã k'îrapite mù aneeruta ijãa bairã tachi piup'eda chok'ai p'irabaidait'ee?”
22 Felixpa mãga ûrik'ãri, jaraji ma nepùra ichiak'au bùdait'ee soldaorã poro waibùa Lisias cheru misa. Mãga jaraji pia k'awa bada perã sãga p'anapata Tachi Ak'õre Ode P'anùùrã.
23 Mãpai Felixpa soldaorã poromaa jaraji Pablo jâa paraa bùdamerã, mamîda ichiak'au ak'ù chepipataadamerã chi k'õp'ãyoorãmaa.
24 Maap'eda taarãpai Félix waya pacheji chi wêra Drusila ome. Mãgà judío wêra paji. Pachedak'ãri, Felixpa Pablo t'â pëiji k'awaait'ee irua ijãada Jesucristode. 25 Mamîda Pablopa jaramaa bùde t'ãri pia nipapariimerã Tachi Ak'õre k'îrapite mãik'aapa k'îra jîp'a bapariimerã, ichiaba tachi piuda t'êepai Tachi Ak'õrepa ak'ùit'ee tachia pia oodap'edaa mãik'aapa k'achia oodap'edaa, Félix p'eradachi. Mãpai mãgaji:
—Jãgapai pia bùda aji. Na ewari jua pari bak'ãri, waya pù t'â pëiit'eeda aji.