Jesucristo piup'eda, chok'ai p'irabaida
15
1 Ârá âpemaarã, k'irãpapiit'ee mùa naaweda jarateeda; jõma Jesucristopa ooda tachi k'aripait'ee atuanaadamerã. Parãpa mãgà jarateeda ijãajida; mãgùta at'ãri ijãa p'anù. 2 Ma jarateeda k'aurepa Tachi Ak'õrepa parã o k'achiadeepa k'aripa ata wã. Mapa aùde ijãapataadaipia bù. Mãga–e pùrã, pãchi k'inia ijãajida.3 Ma jarateeda k'awaap'eda, mùa parãmaa jarateeji, jarateeda pipùara bairã. Nãga bù: Cristo piuji tachia p'ek'au k'achia oopata wêpapiit'ee, Tachi Ak'õre Ûraa p'ãdade jara bùk'a. 4 Ma piuda t'êepai, mãu te uriade ùajida mãik'aapa ewari õpeemaa chok'ai p'irabaiji, Tachi Ak'õre Ûraa p'ãdade jara bùk'a. 5 Ma t'êepai ichia unupiji Pedromaa, maap'eda chi apemaarã k'õp'ãyoorãmaa, ichi ome nipapatap'edaa na p'ek'au eujãde bù misa. 6 Aù t'êepai unupiji quinientos audú see nâbada ijãapataarãmaa. Mãgùdepema ûk'urupai jai–idaa p'anù, mamîda chi apemaarã at'ãri chok'ai p'anù. 7 Aù t'êepai unupiji Santiagomaa. Maap'eda unupiji ichia ûraa jarateede pëida eperãarãmaa.
8 Maap'eda, jõmaarã t'êe, mùmaa ichiaba unupiji, aù naaweda mù k'achia baji mîda. 9 Mãga ooji mù jõmaweda apemaarã pëida k'ãyaara ek'ariara bù mîda. Mù–it'ee piara bak'aji Tachi Ak'õrepa mù jùrùt'era–e pada paara, mùa Cristode ijãapataarã miapipachi perã. 10 Mamîda Tachi Ak'õre t'ãri pia bapari perã, mù k'aripaji. Maperã mù apemaarã pëida k'ãyaara mimiara bapari. Mimiak'aa mùchi k'îradoopa. Jîp'a Tachi Ak'õrépata mùmaa nãgà mimia oopipari Cristo–it'ee. 11 Mù ãra k'ãyaara audú mimiapari mîda, taipa auk'a jarateepata, ma–it'ee Cristopa tai pëida perã. Mãgà jarateedata parãpa ijãajida.
Tachi Ak'õrepa piudap'edaarã chok'ai p'irabaipipari
12 Parãpa k'awa p'anù Tachi Ak'õrepa Cristo chok'ai p'irabaipiji, taipa mãga jarateedap'edaa perã. Mãga bùta, ¿sãap'eda ûk'uru parã t'ãide p'anùùrãpa jara p'anùma eperãarã piudap'eda chok'ai p'irabaidak'aa? 13 ¡K'îsíatù! Tachi Ak'õrepa eperãarã p'oyaa p'irabaipi–e pùrã, mãgara Cristo jida p'irabaipi–e pak'aji. 14 Mãgara páripù taipa jarateepata Jesucristopa ooda eperãarã k'aripait'ee. Parãpa pida pãchi k'inia irude ijãa p'anù. 15 Ma awara mãùrãpa jara p'anù wãara pùrã, tai seewa–idaa p'anù, parãmaa jarateedap'edaa perã Tachi Ak'õrepa Cristo p'irabaipiji. 16 Mãùrãpa k'îsia p'anùk'a Tachi Ak'õrepa eperãarã p'oyaa p'irabaipi–e pùrã, mãgara Cristo jida p'oyaa p'irabaipi–e pak'aji. Mãgara Cristo at'ãri piu bak'aji. 17 Ma awara Tachi Ak'õrepa Cristo p'irabaipi–e paji pùrã, mãgara parãpa páripù ijãa p'anù Cristo piuda k'aurepa Tachi Ak'õrepa pãchia p'ek'au k'achia oopata wêpapii. 18 Mãgara awaraa Cristode ijãapataarã jai–idaadap'edaarã auk'a atuak'ajida. 19 Ma jõma wãara pùrã mãik'aapa na p'ek'au eujãdepai Cristode ijãa p'anù pùrã, ¡tachi jõmaarã k'ãyaara chupùriara p'anù!
20 Mamîda mãga–e. ¡Tachi Ak'õrepa wãara Cristo chok'ai p'irabaipiji! Cristo naapùara ichita chok'ai bapariit'ee, piup'eda mãik'aapa p'irabaip'eda. Ma awara Tachi Ak'õrepa mãga ooda perã Cristo ome, k'awa p'anù tachi jida ichiaba chok'ai p'irabaipiit'ee, Cristode ijãapata perã. 21 K'îsiadáma nãgùde. Eperãpa k'achia ooda k'aurepa, na p'ek'au eujãdepemaarã jõmaweda piupata. Jõdee Tachi Ak'õrepa awaraa eperã chok'ai p'irabaipida k'aurepa, jõmaweda irude ijãapataarã auk'a chok'ai p'irabaipiit'ee. 22 Pia jarait'eera, Adán k'aurepa jõmaarãta piupata. Jõdee Cristo k'aurepa jõmaweda irude ijãapataarã jai–idaadap'eda, chok'ai p'irabaidait'ee. 23 Mamîda p'irabaidait'ee Tachi Ak'õrepa k'îsia iru bùk'a. Cristo naapùara p'irabaipiji. Maap'eda Cristo cheru ewate irude ijãapataarã auk'a p'irabaipiit'ee. 24 Ma t'êepai na p'ek'au eujã jõit'ee. Cristopa netuaraarã mãik'aapa Tachi Ak'õre k'îra unuamaa iru p'anùùrã, chi na p'ek'au eujãdepema poro waibùarã jõmaweda p'oyaak'ãri, mãgùùrã ichi Ak'õre jua ek'ari bùit'ee. 25 Mãga pait'ee Cristo na eujã poro waibùa pait'ee perã, Tachi Ak'õre k'îra unuamaa iru p'anùùrã jõma bùrumaa ichi Ak'õre jua ek'ari. 26 Mãgá ook'ãripù, eperãarã waa piuda–e pait'ee. 27 K'awa p'anù Cristota na p'ek'au eujã poro waibùa, Tachi Ak'õrepa ichi ley p'ãdade jara bairã:
‘Ne–inaa jõmaweda pù jua ek'ari bùji: eperãarã, angeleerã mãik'aapa netuaraarã paara.’ (Salmos 8.6)
Tachi Ak'õre aupaita Cristo jua ek'ari ba–e. 28 Mãgá Tachi Ak'õre k'îra unuamaa iru p'anùùrã p'oyaap'eda, Tachi Ak'õre Warrapa ooit'ee ichi Ak'õrepa oodak'a ichi ome, nejõmaata iru jua ek'ari bùk'ãri. Irua nejõmaata bùit'ee ichi Ak'õre jua ek'ari, ichi k'ap'ùa paara, Tachi Ak'õre jõmaarã k'ãyaara waibùara beemerã.
29 Ichiaba nãga k'awa p'anù Cristode ijãapataarã jai–idaadap'eda, chok'ai p'irabaidait'ee. P'irabaida–e pùrã, ¿sãap'eda eperãarã ûk'uruurãpa poro choopipatama ijãapataarã jai–idaadap'edaarã pari, chi araada–e padap'edaarã poro choopidait'ee jai–idaadai naaweda? ¡Mãgà jai–idaadap'edaarã p'irabaida–e pùrã, páripù ãra pari poro choopipata! 30 Ma awara ijãapataarã p'irabaida–e pùrã, ¿sãap'eda tai jarateede wãpatama, chi wãrutamaa tai k'îra unuamaa iru p'anù mîda? 31 Wãara ewari chaa mù peedait'ee iru p'anù, jarateepari perã Cristopa ooda jõmaarã k'aripait'ee. Mamîda wãara mù o–îa bù k'awa bairã parãpa Jesucristode ijãa p'anù. 32 Ma awara Cristode ijãapataarã p'irabaida–e pùrã, páripù mù perá piuji Éfeso p'uurudepemaarã juapa. Mãgùùrã ne–animalaarã k'achiaråk'apù p'anù. Wãara chok'ai p'irabaida–e pùrã, mãgara p'anadáma nãgà jarapatak'a:
‘Nek'odáma, ne–inaa todáma mãik'aapa tachia oo k'iniata oodáma, taarã–e perã jõdait'ee.’ (Isaías 22.13)
33 ¡Mãga–e! Apidaamaa k'ûrapináatù. Wãara jara p'anù nãga jaradak'ãri: “K'õp'ãyo meraa bù pùrã k'achia oopataarã ome, auk'a oodai.” 34 ¡Pia k'îsíatù mãik'aapa ak'àtù k'îsia k'awaa pùk'a p'anùùrã parã t'ãide! P'ek'au k'achia oonáatù ãchia oo p'anùk'a jaradak'ãri Cristode ijãapataarã p'irabaida–e pait'ee. ¡Mãga jaratee p'anùùrãpa waide Cristode ijãada–e p'anù! Mùa mãga jara bù parã k'îra nejasiapiit'ee.
Sãga Tachi Ak'õrepa piudap'edaarã p'irabaipiit'ee
(2 Corintios 5.1-5)
35 ¿Nãga iidi k'inia p'anù–ek'ã? “¿Sãga Tachi Ak'õrepa piudap'edaarã p'irabaipiit'eema? ¿Sãga baima chi k'ap'ùa p'irabaida?” 36 Wãara mãga iidi k'inia p'anù k'îsia k'awada–e p'anadairã. ¿Parãpa nãgà k'awada–e p'anùk'ã? Trigo tau maa–e pùrã awaraa net'a tau uudak'ãri, eujãde beraudaipari, t'ono wãru misa. 37 Chi k'arra uudak'aa. Jîp'a chi tauta uupata, trigodee wa awaraa net'a taudee. 38 Mãgà uup'eda, Tachi Ak'õrepa t'onopipari trigo k'arra wa ne–inaa awaraa, ichia k'îsia iru badak'a net'a tau k'îra t'ãdoo ewaa ook'ãri. 39 Mãga ooji awaraa ne–inaa chok'ai bee ome ichiaba. Ichia k'îsia iru badak'a k'ap'ùa k'îra t'ãdoo ooji eperãarãde, ne–animalaarãde, ipanaarãde mãik'aapa chik'ode, mãgá ãchi k'ap'ùa awara–awaraa iru p'anadamerã. 40 Ichiaba bùji ne–inaa pajãde ichia k'îsia iru badak'a, na p'ek'au eujãdepema ne–inaa awara. Mãgà chaachaa ichi k'îra wãree bùji. Mamîda auk'a bù–e paji. 41 Ma k'îra wãree awara–awaraa bùji nãgá: ak'õrejîru urua awara bù atane âdaa ome mãik'aapa atane âdaa lucero âdaa ome awara bù. Ichiaba lucero chaa urua awara bee.
42 Mãgá Tachi Ak'õrepa ne–inaa awara–awaraa oodak'a na eujãdepema mãik'aapa pajãdepema, mãga pùk'a ichiaba awara ooit'ee eperã piuda k'ap'ùa chok'ai p'irabaipik'ãri. Piuda k'ap'ùa ùadak'ãri, mik'iadaipari. Jõdee chok'ai p'irabaida k'ap'ùa waa piuk'aa. 43 Ma awara mãgà piuda k'ap'ùa k'achia bapari mik'iadaipari perã. Jõdee chi chok'ai p'irabaida k'ap'ùa k'îra wãree bait'ee. Piuda k'ap'ùa p'oyaa mimik'ak'aa. Jõdee chok'ai p'irabaida k'ap'ùapa ne–inaa k'îra t'ãdoo ooit'ee, Cristopa chok'ai p'irabaida t'êe oodak'a. 44 Eperãpa k'ap'ùa iru bairã na p'ek'au eujãde bù misa, mãgara ichiaba k'ap'ùa iru bait'ee Ak'õre truade. Na eujãdepema k'ap'ùa piuk'ãri, ùapata mik'iadaimerã. Mamîda t'êepai Tachi Ak'õrepa p'irabaipik'ãri, ùt'aripema k'ap'ùa papiit'ee.
45 Tachi Ak'õre Ûraa p'ãdade jara bù:
‘Tachi Ak'õrepa eperã ook'ãri, iru k'âde jãrap'uaji chok'ai beemerã.’ (Génesis 2.7)
Ma eperã Adán paji. Mamîda Cristo jida t'âjarapata Adán chi t'êepema, Tachi Ak'õrepa ichiaba iru chok'ai p'irabaipida perã ichi truade ichita bapariimerã. Ma awara Tachi Ak'õrepa Cristo bùji irude ijãapataarã chok'ai p'anapipariimerã. 46 Tachi k'ap'ùa naapema Adán k'ap'ùak'a bù, na p'ek'au eujãdepema perã. Jõdee tachi t'êepema k'ap'ùa bait'ee chi t'êepema Adán apata k'ap'ùak'a, Ak'õre truadepema perã. 47 Chi naapema Adán yoorodee ooda paji. Mapa na p'ek'au eujãdepema paji. Jõdee chi t'êepema Adán ùt'aripema paji. Mata cheji na p'ek'au eujãdee. 48 Na p'ek'au eujãdepemaarãpa k'ap'ùa iru p'anù naapema Adanpa iru badak'a, irudeepa uchiadap'edaa perã. Jõdee ùt'aa wãrutaarãpa k'ap'ùa iru p'anadait'ee Cristopa iru bùk'a, ichideerã perã. 49 Mãgá na eujãdepema k'ap'ùade p'anù misa, Adán bapatak'a p'anapata. Mamîda ùt'aripema k'ap'ùade p'anadak'ãri, Cristo baparik'a p'anapataadait'ee.
50 Ma jõma jara aupadade k'îsiadak'ãri, parãpa k'awaadaipia bù na p'ek'au eujãdepema k'ap'ùa p'oyaa t'îuk'aa Tachi Ak'õre eujãde, ne–inaa mik'iadaipari mama t'îuk'aa perã.
51 Mamîda ûrítù, mùa jarait'ee perã ne–inaa Tachi Ak'õrepa eperãarãmaa waide jara–e bù. Ijãapataarã jõmaweda piuda–e pait'ee. Mamîda wãara jõmaweda k'ap'ùa awara padait'ee. 52 Mãgá padait'ee isapai, tachi tau p'inaru jîak'aata. Mãga nùde ùt'aripema trompeta jîwaak'ãri, Cristode ijãa jai–idaadap'edaarã jõmaweda p'irabaidait'ee mãik'aapa tachi chok'ai p'anùùrã k'ap'ùa jida awara pak'oodaridait'ee. 53 Mãga pait'ee na p'ek'au eujãdepema k'ap'ùa p'oyaa wã–e perã Tachi Ak'õre eujãdee. Mapa mãgá ùt'aripema k'ap'ùata padait'ee, aùde uchiadamerã iru eujãde. 54 Mãgá tachi k'ap'ùa jõmaweda ùt'aripema k'ap'ùa padaik'ãri, unudait'ee Tachi Ak'õre Ûraa p'ãdade jara bùk'a:
‘Tachi Ak'õrepa jõmaweda p'oyaaji. Maperãpù ichia chok'ai p'irabaipidaarã waa piuda–e pait'ee.’ (Isaías 25.8)
55 Mapa ijãapataarãpa jõmaweda jaradaipia bù Tachi Ak'õre Ûraa p'ãdade jara bùk'a:
‘Tachi Ak'õre jõmaarã k'ãyaara waibùara bù, tachi chok'ai p'anapipari perã, waa piuda–e pait'ee. Ma awara waa k'îsia p'ua k'îsiadak'aa, waaweeda–e p'anadairã miadait'ee tachia p'ek'au k'achia oopata k'aurepa.’ (Oseas 13.14)
56 Mãga jaradaipia bù eperãarã piupata perã ãchia p'ek'au k'achia oopata k'aurepa. K'awa p'anù jõmaweda p'ek'au k'achia eperãarãpa oopata, ma jõma jara bairã Tachi Ak'õre Ûraa Moisemaa p'ãpidade. 57 Mamîda Jesucristo piuda perã tachia p'ek'au k'achia oopata wêpapiit'ee, mãik'aapa chok'ai p'irabaida perã, tachi o k'achiadeepa k'aripa ataji. Maperã ùt'aa t'âpata Tachi Ak'õremaa gracias jaradait'ee. ¡Iruta jõmaarã k'ãyaara waibùara bù, irua k'îsia iru bada perã Tachi Waibùa Jesucristo pëiit'ee tachi k'aripade!
58 Maperã âpemaarã k'iniarã, mùa jarateeda ijãa p'anapatáatù. Ma awara ichita óotù Cristopa oopi bùk'a, k'awa p'anadairã mãga oodak'ãri, pari ne–inaa ooda–e pait'ee.