Chik'aripa p'anadaipia bù<R>Tachi Ak'õre Jaurepa oopi bùk'a oodait'ee
14
1 Mãga pipùara bairã Tachi Ak'õre–it'ee, parãpa awaraarã k'inia iru p'anadaipia bù. Mãga oo p'anù misa, iididaipia bù Tachi Ak'õre Jaurepa parãmaa jarapimerã Tachi Ak'õrepa jarapi bùk'a. 2 Ma k'ãyaara, iidiruta pùrã Tachi Ak'õre Jaurepa parã pedeepimerã k'awada–e p'anù pedeede, mãgá jarateedak'ãri, chi ûrirutaarãpa k'awada–e p'anadai mãgà jarateeruta. Tachi Ak'õrepapai k'await'ee. 3 Jõdee Tachi Ak'õre Jaurepa jarapiru pùrã irua jarapi bùk'a, chi ûrirutaarãpa pia k'awaadait'ee, ãchi pedeede ûridait'ee perã. Mapa oo k'inia p'anadait'ee mãgà jarateeruta jara p'anùk'a mãik'aapa t'ãri o–îa p'anadait'ee oodak'ãri Cristopa oopi bùk'a. 4 Chi pedee bùpa ichia k'awa–e bù pedeede pia oo bù ichi–it'ee. Mamîda Tachi Ak'õrepa jarapi bùk'a jaraparipa apemaarã ijãapataarã k'aripapari.5 Parã jõmaweda pedeeda paara k'awada–e p'anù pedeede, pia bak'aji. Mamîda pipùara bù Tachi Ak'õrepa jarapi bùk'a jaradamerã, wê–e pùrã apidaapa mãgà pedee ûridamerã mãik'aapa k'awapidamerã apema ijãapataarãmaa.
6 Mapa âpemaarã, mù parãmaa wãru pùrã jarateede k'awa–e bù pedeede, parã k'aripa–e pait'ee. Jõdee wãru pùrã Tachi Ak'õrepa jarapi bùk'a jarade maa–e pùrã Cristo ûraa jarateeru pùrã, mãgá k'awaadai Cristopa oopi k'inia bù.
7 Parãpa k'awa p'anù siru chaa k'awaa beerãpa mãik'aapa arpa chaa k'awaa beerãpa pia chaapata chi ûri p'anùùrãpa k'awaadamerã chisãgà sirupa chaada mãik'aapa chisãgà arpapa chaada. Mamîda pia chaa k'awa–e bùpa chaak'ãri, k'achia ûridai mãik'aapa pia k'awada–e pai chisãgà siru wa chisãgà arpa. 8 Ichiaba soldaorãpa trompeta ateepata jura chõonadak'ãri. Chi chaa k'awaa bùpa chaapari soldaorã chõode uchiadamerã. Mamîda mãgùpa pia chaa–e pùrã, soldaorã chõode uchiada–e pai, k'awada–e p'anadairã ãchia ûri p'anù k'ãata jara k'inia bù. 9 Mãga pùk'a bù parã ome. K'awada–e p'anù pedeede pedee p'anadak'ãri, chi ûrirutaarãpa k'awada–e pai parãpa jaratee k'inia p'anù. Pipùara bak'aji pãchi ituaba pedeedap'edaa paara. 10 Wãara na p'ek'au eujãde eperãarã pedee chok'ara awara–awaraa pedee p'anù. Ma pedee pedeepataarãpa pia k'awapata ãchi pedee ûridak'ãri. 11 Mamîda mùa mãgà pedee ûri–e bù pùrã, k'îra tewaraak'a bai mãgà pedeepari ome, p'oyaa ûri–e bairã mãgà pedee. 12 Mãga bù parã ome ichiaba. Maperãpù iidi k'inia p'anù pùrã Tachi Ak'õre Jaurepa parãmaa ne–inaa oopimerã, iididaipia bù ne–inaa k'aripadait'ee apemaarã ijãapataarã.
13 Mamîda iidi k'inia p'anù pùrã Ak'õrepa pedeepimerã k'awada–e p'anù pedeede, mãgara ichiaba iididaipia bù k'awapimerã k'ãata jara k'inia bù mãgà pedee. Mãgá awaraarãmaa jarateedai. 14 Mùa ùt'aa t'âru pùrã k'awa–e bù pedeede, mù jaurepapai k'awa bù k'ãata jara k'inia bù, araa bapari perã Tachi Ak'õre Jaure ome. Mamîda mùchi k'îsiade k'awa–e bù. 15 Mãgara mùa ¿sãga ooima? Jaurepapai ùt'aa t'âit'ee mãik'aapa k'ariit'ee mùa k'awa–e bù pedeede. Mamîda ma k'ãyaara pipùara ùt'aa t'âpariit'ee mãik'aapa k'aripariit'ee mùa k'awa bù pedeede. 16 Pùa pida mãga ooru pùrã, eperã pù ik'aawa su–ak'ù bùpa auk'a k'awaait'ee pùa gracias jara bù mãik'aapa k'ari bù. Mãgá pù ome auk'a iru ùt'aa t'âi gracias jarait'ee Tachi Ak'õremaa. 17 Jõdee pùa ùt'aa t'âru pùrã k'awa–e bù pedeede, pia bù mîda Tachi Ak'õre k'îrapite, pù ik'aawa p'anùùrã maarepida k'aripa–e bù.
18 Tachi Ak'õre k'îrapite mù o–îa bù, mùa parã k'ãyaara pedee chok'araara pedeepari perã, mùa k'awa–e bù pedeede. Mãga ooi Tachi Ak'õre Jaurepa mãga oopipari perã. 19 Mamîda apemaarã ijãapataarã ome bak'ãri ùt'aa t'âit'ee Tachi Ak'õremaa, mù–it'ee pipùara bù pedeeit'ee pedee joisomaapai arii p'anùùrã pedeede, pedee diez mil pedeei k'ãyaara ãrapa k'awada–e p'anù pedeede.
20 Maperã âpemaarã, warra chak'eerãk'a k'îsianáatù. Ãrak'a p'ana k'inia p'anù pùrã, p'anadaipia bù warra ewaa t'odak'a; audua–ee. Pia k'îsíatù chonaarãpa k'îsiapatak'a. 21 K'irãpátù Tachi Ak'õre Ûraa p'ãdade jara bù:
‘Tachi Ak'õrepa jara bù: “Mùa israelitaarãmaa pedeeit'ee k'awada–e p'anù pedeede k'îra tewaraarã it'aideepa. Mamîda ma israelitaarãpa k'awa p'anadait'ee mîda mùa mãga oopi bù, at'ãri mù pedee ûri k'iniada–e p'anadait'ee.” ’ (Isaías 28.11-12)
22 Tachi Ak'õrepa mãga jarada perã, nãga k'awaadai. Ijãadak'aa beerãpa unuruta pùjida Tachi Ak'õre Jaurepa parãmaa pedeepimaa bù pãchia k'awada–e p'anù pedeede, ma israelitaarãk'a ãrapa ûri k'iniada–e pait'ee. Jõdee ijãapataarãpa mãga unudak'ãri, ûridait'ee, k'awada–e p'anù mîda k'ãata jara k'inia bù. Mamîda ma k'ãyaara parãpa jararuta pùrã Tachi Ak'õrepa jarapi bùk'a ãchi pedeede, audupùara ûri k'inia p'anadait'ee, ûridait'ee perã ãramaa Cristopa oopi k'inia bù. Mãga bù ijãadak'aa beerã ome ichiaba. 23 K'îsíatù nãgùde. Parã cheepurudak'ãri ùt'aa t'âdait'ee, parãdepema ûk'uru pedeemaa p'aneeruta pùrã k'awada–e p'anù pedeede mãik'aapa mãga p'anùde t'îuru pùrã eperã ijãak'aa bù maa–e pùrã Tachi Ak'õre Ûraa waide k'awa–e bù, ichia k'îsiai parã jõmaweda k'îra k'awa–ee para bù. 24 Jõdee eperã ijãak'aa bù maa–e pùrã Ak'õre Ûraa waide k'awa–e bù t'îuru pùrã Tachi Ak'õrepa jarapi bùk'a jara p'anùde, ûrii ichia p'ek'au k'achia oopari Tachi Ak'õre k'îrapite. 25 Maap'eda mãgùde k'îsiak'ãri, t'ãri p'uadarii mãik'aapa ijãai, wa ijãa–e pai. Maap'eda bedabaidarii Tachi Ak'õremaa ùt'aa t'âit'ee mãik'aapa jarait'ee: “Wãara Tachi Ak'õre nama parã ome bapari.”
Chip'edaidak'ãri, ne–inaa jõma k'îra jîp'a oodaipia bù
26 Mãpai âpemaarã, nãga oodaipia bù chip'edaidak'ãri ùt'aa t'âdait'ee. Ûk'uruurãpa Ak'õre k'ari k'aridaipia bù. Awaraarãpa Cristo ûraa jarateedaipia bù maa–e pùrã Tachi Ak'õrepa jarapi bùk'a jaradaipia bù. Awaraarãpa k'awada–e p'anù pedeede pedeedaipia bù Tachi Ak'õre Jaurepa oopi bùk'a. Awaraarãpa mãgà pedee jara k'inia bù jõmaarãmaa k'awapidaipia bù Tachi Ak'õre Jaurepa oopi bùk'a. Ma jõmaweda oodaipia bù ijãapataarã chik'aripa p'anadamerã. 27 Ma k'awada–e p'anù pedeede pedeepataarã pedeedaipia bù aba–abaa, omé maa–e pùrã õpee pedee auparutamaa. Maap'eda mãgà pedee k'awapataarãpa jõmaarãmaa k'awapidaipia bù ãrapa jaradap'edaa. 28 Apida wê–e pùrã mãgà pedee k'awaapiit'ee k'ãata jara k'inia bù, mãgara chi mãgá pedee bù waa pedeeik'araa bù. Ma k'ãyaara ichi t'ãridepai pedeeipia bù ichi–it'ee mãik'aapa Tachi Ak'õre–it'ee. 29 Mãgá ichiaba Tachi Ak'õrepa jarapi bùk'a jarapataarãpa pedee k'inia p'anù pùrã, pedeedaipia bù aba–abaa, omé maa–e pùrã õpee pedee auparutamaa. Apemaarãpa ûridaipia bù ãrapa jararuta, k'awaadait'ee wãara Tachi Ak'õrepa jarapida wa mãga–e. 30 Abaapa Tachi Ak'õrepa jarapi bùk'a jara bù misa, awaraapa pedee k'inia bù pùrã jarapida awara, mãgara ma naa pedee badapa chi t'êepemamaa pedeepiipia bù. 31 Mãga oo p'anù pùrã, jõmaarã pedee k'inia p'anùùrã pedeedait'ee, apemaarã ijãapataarãpa k'awaadamerã jõmaweda Tachi Ak'õrepa ãramaa jara k'inia bù. 32 Tachi Ak'õrepa jarapi bùk'a jara bùpa pariatua pedeeik'araa bù. Jîp'a pedeeipia bù Tachi Ak'õre Jaurepa mãga oopi bak'ãri. 33 Mãga oodaipia bù Tachi Ak'õrepa ne–inaa pariatua oopik'aa perã. Oodaipia bù awaraa p'uurudepema ijãapataarãpa oopatak'a.
34 Mapa ichiaba chip'edaidak'ãri ùt'aa t'âdait'ee, wêraarã k'îup'ee p'anadaipia bù, jarateepataarã mãik'aapa Tachi Ak'õrepa jarapi bùk'a jarapataarã pedee p'anù misa, Tachi Ak'õre Ûraa p'ãdade jara bairã ãchi ùmùk'îraarã jua ek'ari p'anapataadaipia bù. 35 Mapa ãrapa ne–inaa iidi k'inia p'anù pùrã, iididaipia bù ãchi ùmùk'îramaa teeda panadak'ãri. Pia–e bù pariatua pedeedamerã, awaraarã pedee p'anù misa.
36 Auk'a k'îsiada–e p'anù pùrã, k'irãpátù parãmaa ijãapii naaweda Tachi Ak'õrepa awaraarãmaa ijãapiji mãik'aapa k'awapiji ichia oopi k'inia bù chip'edaidak'ãri. Maperã k'îrak'aupai pãchia oo k'iniata oodai, Tachi Ak'õrepa k'awapida oodai k'ãyaara. 37 Apida k'îsia bù pùrã ichiata Tachi Ak'õrepa jarapi bùk'a jarapari, maa–e pùrã ne–inaa awara oopari Tachi Ak'õre Jaurepa oopi bùk'a, k'awaaipia bù Tachi Ak'õrepa mùmaa jarapiji jõma na p'ãdade jara bù. Mapa ooipia bù na ûraade jara bùk'a. 38 Mamîda mãgà eperãpa jara bù pùrã mùa na p'ã bùde jarateemaa bù mùchi k'îsiadoopa, irua jara bù ûridaik'araa bù.