Chik'inia p'anapataadaipia bù
13
1 Pipùara p'ana k'inia p'anù pùrã, chik'inia p'anapataadaipia bù. Tachia eperãarã pedee k'îra t'ãdoo pedee p'anù mîda mãik'aapa angeleerã pedee paara pedeeruta pùjida, pari mãga oopata t'ãripa awaraarã k'inia iru p'anada–e p'anù pùrã. Mãga p'anaruta pùrã, tachi ma pedeede pedeedak'ãri, awaraarãpa ûridai campana pariatua chaaparik'a. 2 Ichiaba Tachi Ak'õrepa jarapi bùk'a jara p'anù mîda mãik'aapa k'awa p'anù mîda ne–inaa k'îra t'ãdoo, Tachi Ak'õrepa waide jara–e bù paara eperãarãmaa, páripù p'anapata awaraarã k'inia iru p'anada–e p'anù pùrã. Ma awara audú ijãaruta pùjida ee ãyaa bùrutamaa tachia jararutapa; awaraarã t'ãripa k'inia iru p'anada–e p'anù pùrã, ichi k'inia mãga oo p'anù. 3 Ma awara tachia net'aa iru p'anù jõmaweda tee p'anù mîda chupùria chedeerãmaa mãik'aapa tachi k'ap'ùa paara paa peepiruta pùjida Cristode ijãa p'anù k'aurepa, t'ãripa awaraarã k'inia iru p'anada–e p'anù pùrã, tachi–it'ee wê–e pait'ee Tachi Ak'õrepa k'îsia iru bùdepema, ùt'ari panadak'ãri.4 Tachia wãara awaraarã k'inia iru p'anadak'ãri, nãga p'anapata. T'ãridepai choopata. Awaraarãmaa ne–inaa pia oopata. Awaraarã unuamaa iru p'anadak'aa, ãrapa ne–inaa iru p'anù k'aurepa. Ichiaba tachia ooda jõmaarãmaa jaradak'aa, ãrapa k'îsiadamerã tachia ne–inaa oo k'awaa p'anapata. Audua p'anadak'aa. 5 Chîara k'îraupidak'aa mãik'aapa k'îra nejasiapidak'aa. Tachi–it'ee ne–inaa pipùara jùrùdak'aa. Isapai k'îraudak'aa. K'îra p'u–ua p'anadak'aa tachimaa chîarapa ne–inaa k'achia ook'ãri. 6 O–îa p'anadak'aa unudak'ãri awaraapa ne–inaa k'achia oomaa bù. Jîp'a o–îadaipata irua ook'ãri Tachi Ak'õrepa wãarata jara pëidak'a. 7 Ma awara chîarapa tachi miapidak'ãri, choopata ijãapata perã Ak'õrepa tachi k'aripait'ee. Ijãapata k'achia p'oyaadai. T'ãride ichita choopata awaraarã k'inia iru p'anadairã.
8 Mãgá awaraarã k'inia iru p'anadak'ãri Cristopa oopi bùk'a, ichita chik'inia para bait'ee. K'awáatù na ewari Tachi Ak'õrepa jarapi bù waa wê–e pait'ee. Ma awara chi pedee bùpa k'awada–e p'anù pedee waa ûrida–e pait'ee. Ichiaba k'îsia k'awaa p'anùùrãpa jarateepata auk'a waa wê–e pait'ee. 9 Mãgà jõma na ewari wê–e pait'ee, jõdait'ee perã. Tachia waide k'awada–e p'anù jõmaweda Tachi Ak'õrepa jarapi bù mãik'aapa k'îsia k'awaa beerãpa jaratee p'anù. 10 Mamîda Tachi Ak'õrepa k'îsia iru bù jõmaweda oo aupak'ãri, waa k'awa k'iniada–e p'anadait'ee irua jarapi bù mãik'aapa k'îsia k'awaa beerãpa jaratee p'anù, jõmaweda Cristok'a k'awadait'ee perã.
11 Warraweda mù pedeeji mãik'aapa k'îsia iru baji ne–inaa ooit'ee warrarãpa oopatak'a. Mamîda chona pak'ãri, oo amaaji mãgee warraweda ne–inaa oopata. 12 Na p'ek'au eujãde p'anù misa, jîp'a espejo k'îra t'awaa bùde ak'ù p'anùk'a bù, jõmaweda Tachi Ak'õrepa k'îsia iru bù k'awada–e p'anadairã. Mamîda Cristo ome p'ananadak'ãri, jõmaweda k'awadait'ee Cristopa k'awa bùk'a, k'awadait'ee perã Tachi Ak'õrepa tachi k'awa bùk'a.
13 Maperã ichita ijãadaipia bù Tachi Ak'õrepa oopari ichia jara bùk'a. Ichita ijãadaipia bù Tachi Ak'õrepa tachimaa teeit'ee ne–inaa jõmaweda ichia k'îsia iru bù tachi–it'ee, ùt'ari panadak'ãri. Ichita awaraarã k'inia iru p'anadaipia bù Tachi Ak'õrepa k'inia iru baparik'a. Tachi Ak'õre–it'ee ma jarada õpeedepema chi t'êe jara aupadata pipùara bù jõma apema jara aupada k'ãyaara.