Tachi Ak'õre Jaurepa ne–inaa oopipari Cristode ijãapataarãmaa
12
1 Ârá âpemaarã, p'anauit'ee parãpa iidi pëidap'edaa. Iidijida k'ãata oopipari Tachi Ak'õre Jaurepa Cristode ijãapataarãmaa. Nãgà jarateeit'ee pia k'awaadamerã.2 K'irãpa p'anù parã p'anapatap'edaa Cristode ijãadai naaweda. Tachi Ak'õre k'îrapite k'achia oopachida ùt'aa t'âpatap'edaa perã ne–inaamaa, Tachi Ak'õre awara. Mãga oopachida mãgee ne–inaa pedeedak'aa beemaa, chok'ai–e p'anù mîda. 3 Mãga oopachida pia k'awadak'aa pada perã sãga Cristode ijãadait'ee mãik'aapa sãga oodait'ee irua parãmaa oopi k'inia bùk'a. K'awapatáatù Tachi Ak'õre Jaurepa eperãarãmaa nãga jarapik'aa: “Jesús Tachi Ak'õre Warra–e”. Jîp'a jarapipari: “Jesús Tachi Poro Waibùa.”
4 Parãpa k'awaadaipia bù Tachi Ak'õre Jaurepa Cristode ijãapataarãmaa ne–inaa k'îra t'ãdoo oopipari chik'aripa p'anapataadamerã. Mãga oopari ne–inaa pia oo k'inia bairã ijãapataarã–it'ee. 5 Ichia ma ne–inaa jõma oopipari Cristo, Tachi Poro Waibùapa oopi k'inia bùk'a. 6 Ijãapari chaa ma ne–inaa awara ooi ichi k'õp'ãyo k'ãyaara. Mamîda Tachi Ak'õrépata ma ne–inaa ichita ãramaa oopipari. 7 Mãgá Tachi Ak'õre Jaurepa ma ne–inaa awara–awaraa oopipari Cristode ijãapataarãmaa, ãchi chik'aripa p'anapataadamerã. 8 Abaamaa k'îsia k'awaapipari jarateemerã ne–inaa Tachi Ak'õrepa k'awapi k'inia bù. Awaraarãmaa pipùara k'awapipari Tachi Ak'õrepa wãarata jara pëida, mãga jarateedamerã. 9 Ichiaba Tachi Ak'õre Jaurepa waapùara ijãapipari Cristode ijãa bùmaa, k'awaamerã wãara uchiait'ee Tachi Ak'õrepa jara bùk'a, waide unu–e bù mîda. Ichiaba awaraarãmaa k'ayaa beerã jùpapipari. 10 Ma awara awaraarãmaa ne–inaa oopipari eperãarãpa p'oyaa oodak'aa ãchi juadoopa. Awaraarãmaa jarapipari Tachi Ak'õrepa jarapi bùk'a. Awaraarãmaa k'awapipari eperãpa wãara jaratee bù Cristopa oopi bùk'a wa netuarapa oopi bùk'a. Awaraarãmaa pedeepipari ãchia k'awada–e pedeede, jarateedamerã Tachi Ak'õre Ûraa mãgá pedee bùpa. Awaraarãmaa k'awapipari k'ãata jara bù ma eperãpa, pedee irua k'awa–e bùta pedeek'ãri, jõmaarãpa k'awaadamerã irua jara k'inia bù. 11 Mãgá oopari Tachi Ak'õre Jaurepa. Irua aupaita k'awapipari Cristopa oopi k'inia bù ichide ijãapataarãmaa.
Cristode ijãadak'ãri, tachi k'ap'ùa apai pùk'a p'anù
12 Ârá jarait'ee sãap'eda Tachi Ak'õre Jaurepa mãgá ne–inaa awara–awaraa oopipari Cristode ijãapataarãmaa. Tachi k'ap'ùa apai bù mîda, aùde nãgee paraa: bùùrù, poro, jua, t'ãri; jãga bee chok'ara. Mãga pùk'a Cristo apai bù mîda, irude ijãapataarã araa p'anapata iru ome. K'ap'ùa apai pùk'a p'anù, chok'ara p'anù mîda. 13 Tachi ijãapataarã mãga p'anù ijãapari chaa Cristode ijãa beek'ãri, Tachi Ak'õre Jaurepa iru araa bapipari perã apemaarã ijãapataarã ome. Auk'a oopari judiorã ome, judio–eerã ome, esclavoorã ome, esclavo–eerã ome. Mãga oopari, chok'ara p'anù mîda, apai pùk'a p'anadamerã Cristo ome. Mapa tachia poro choopipata ak'ùpidait'ee araa p'anù Cristo ome Tachi Ak'õre Jaure k'aurepa.
14 Tachi eperã k'ap'ùade bù poro, jua, bùùrù mãik'aapa t'ãri. Jãgee jõmaarãpa k'aripapata tachia ne–inaa oodamerã. Mãga pùk'a tachi ijãapataarã chok'ara p'anù mîda, chik'aripa p'anapata Cristo–it'ee ne–inaa oodait'ee. 15 K'îsiadáma nãgùde. Tachi bùùrù pedeeda paara, jarak'aji: “Juapa mù k'ãyaara ne–inaa chok'araara oopari perã, mù mak'ùara servi–e bù na k'ap'ùade.” Mãga jarak'aji mîda, at'ãri tachi k'ap'ùade bù. 16 Maa–e pùrã tachi k'ùùrù pedeeda paara, jarak'aji: “Tau mù k'ãyaara pipùara bairã, mù mak'ùara servi–e bù na k'ap'ùade.” Mãga jarak'aji mîda, at'ãri tachi k'ap'ùade bù. 17 Tachi k'ap'ùa jõma tau pada paara, k'ùùrù wê–e pak'aji ûridait'ee mãik'aapa jõma k'ùùrù pada paara, k'â wê–e pak'aji âdait'ee. 18 Mamîda mãga–e. Tachi Ak'õrepa tachi k'ap'ùade nâbù jõmaweda bùji mãgà bùmãi, ichia k'îsia iru badak'a. 19 Tachi k'ap'ùa jõmaweda bùùrù maa–e pùrã jua maa–e pùrã tau pada paara, k'ap'ùa wêe p'anak'ajida. 20 Mamîda mãga–e. Ne–inaa k'îra t'ãdoo paraa mîda, ichita k'ap'ùa apai bù.
21 Tachi k'ap'ùa mãga bù perã, tachi tau pedee k'awaa bada paara, p'oyaa jara–e pak'aji juamaa: “Mùa pù k'inia–e”. Poropa pida p'oyaa jara–e pak'aji bùùrùmaa: “Mùa pù k'inia–e.” 22 Ma k'ãyaara ne–inaa jõma tachi k'ap'ùade, mak'ùara p'oyaa ooda–e pùk'a k'edee paara, auk'a k'aripapata tachi k'ap'ùa chok'ai bamerã mãik'aapa k'ap'ùa pia bamerã. 23 Ma awara tachi k'ap'ùade nâbù ûk'uru pia chi–oopata tachi piara unudamerã. Mamîda ûk'uru awaraarãmaa unupi k'iniadak'aa. Mapa wãk'apata p'arupa. 24 Jõdee chi unupi k'inia bùta taawa iru p'anapata. Mãga oopata Tachi Ak'õrépata tachi k'ap'ùa mãga ooda perã, pipùara ùadamerã aùde nâbù mak'ùara p'oyaa oo–e pùk'a k'edee mãik'aapa pia–e pùk'a k'edee. 25 Mãga ooji tachi k'ap'ùade nâbù jõma chik'aripa p'anadamerã. 26 Tachi k'ap'ùade bù apida p'ua nâbeeru pùrã, k'ap'ùa jõmaweda miapari ma k'aurepa. Jõdee tachi k'ap'ùade nâbù apida pi–ia unuruta pùrã, k'ap'ùa jõmaweda o–îadaipari.
27 Ma jõma jara aupadade k'îsiadak'ãri, k'awa p'anù tachi ijãapataarã Cristo k'ap'ùak'a p'anù, iru ome araa p'anapata perã. 28 Tachi Ak'õrepa tachi k'ap'ùade nâbù chaa mimia awara–awaraa bùji tachi k'aripamerã mãik'aapa k'ap'ùa pia p'anadamerã. Mãga pùk'a ichi Jaurepa Cristode ijãapataarãmaa mimia awara–awaraa bùpari, ma mimia oo p'anùde chik'aripa p'anapataadamerã. Naapùara bùpari Jesucristopa jùrùt'eradaarã pëiit'ee ichi ûraa jarateede; aù eere bùpari Tachi Ak'õrepa jarapi bùk'a jarapataarã; mãgà t'êe bùpari Tachi Ak'õre Ûraa jarateepataarã; maap'eda ne–inaa oopataarã eperãarãpa p'oyaa oodak'aa ãchi juadoopa; k'ayaa beerã jùpapataarã; ijãapataarã k'aripapataarã; ijãapataarã ak'ùpataarã; pedeepataarã ãchia k'awada–e p'anù pedeede. 29 Tachi Ak'õrepa ijãapataarã jõmaweda jùrùt'era–e Cristopa pëimerã ichi ûraa jarateede. Ichiaba jõmaarãmaa ichia jarapi bùk'a jarapi–e; jõmaarãpa iru ûraa jarateeda–e; jõmaarãpa ne–inaa ooda–e eperãarãpa p'oyaa oodak'aa ãchi juadoopa; 30 jõmaarãpa k'ayaa beerã jùpada–e; jõmaarãpa pedeeda–e ãchia k'awada–e p'anù pedeede; jõmaarãpa k'awada–e chi pedeerupa jara k'inia bù ma k'awada–e p'anù pedeede. 31 Maperã parãpa iididaipia bù Tachi Ak'õre Jaurepa parãmaa madepema pipùara bùta bùmerã. Mãgá pipùara p'anapataadait'ee.
Mãgá oo p'anù mîda, mùa ak'ùpiit'ee sãga wãara pipùara p'anapataadai.