11
1 Óotù mùa ooparik'a, mùa oopari perã Cristopa jarateedak'a na p'ek'au eujãde nipak'ãri.Sãga oodaipia bù ijãapataarã ùt'aa t'âdait'ee pak'ãri
2 Ârá mùa jara k'inia bù parãpa pia oo p'anù, k'irãpa p'anadairã mù sãga bapari parã ome bak'ãri. Mù o–îa bù parã ome, at'ãri oopata perã mùa jarateedak'a. 3 Mamîda k'inia bù parãpa pipùara k'awaadamerã Tachi Ak'õre jõmaarã k'ãyaara waibùara bù. Cristo iru jua ek'ari bù mãik'aapa ùmùk'îraarã Cristo jua ek'ari p'anù mãik'aapa wêraarã ãchi ùmùk'îraarã jua ek'ari p'anù. 4 Maperã parã ijãapataarã chip'edaidak'ãri, ùmùk'îrapa ichi poro wãk'aik'araa bù ùt'aa t'âmaa bak'ãri maa–e pùrã Tachi Ak'õrepa jarapiru jaramaa bak'ãri. Ichi poro wãk'aru pùrã, ak'ùpiit'ee ichia waawee–e ichi poro waibùa Cristo. 5 Jõdee wêrapa ne–inaa ichi porode jâipia bù, ùt'aa t'âk'ãri maa–e pùrã Tachi Ak'õrepa jarapiru jarak'ãri. Ichia wãk'apari jâ–e bù pùrã, ak'ùpii ichi ùmùk'îra waawee–e bù. Ma awara awaraarãpa mãgà wêra ak'ùdak'aa pait'ee wêra piak'a, wêra poro wêpida pia ak'ùdak'aa perã. 6 Mãgà ijãapari wêrapa ichi porode ne–inaa wãk'apari jâ k'inia–e bù pùrã, ¿pipùara bak'aji–ek'ã ichi puda jida t'ùùpit'aamerã maa–e pùrã wêpit'aamerã, wêra k'achia beerã ome oopatak'a? Mamîda k'îra nejasia bù pùrã mãgá bait'ee jõmaarã k'îrapite, mãgara puda t'ùùpiik'araa bù. Ma k'ãyaara ne–inaa wãk'apari ichi porode jâipia bù.
7 Pia jarait'eera, ùmùk'îrapa ichi poro wãk'aik'araa bù ichi Tachi Ak'õre k'îrak'a bairã mãik'aapa ichi Tachi Ak'õrepa bùda perã na p'ek'au eujãde nâbù poro waibùa bamerã. Jõdee wêrapa ichi poro wãk'aipia bù ak'ùpiit'ee ùmùk'îra ichi poro waibùa. 8 Mùa mãga jara bù Tachi Ak'õrepa eperã ook'ãri, ùmùk'îra naapùara ooda perã, maap'eda wêra ooji mãgà ùmùk'îra orrodeepa. 9 Tachi Ak'õrepa mãgà ùmùk'îra oo–e paji wêra k'aripamerã; jîp'a wêrata ooji ùmùk'îra k'aripamerã. 10 Maperã wêra Cristode ijãapari pùrã, ichi poro wãk'aipia bù. Mãga ook'ãri, ak'ùpipari Tachi Ak'õre k'îrapite mãik'aapa iru angeleerã k'îrapite, ichi bapari ùmùk'îra jua ek'ari mãik'aapa Cristo jua ek'ari.
11 Mamîda Cristode ijãadak'ãri, wêra ùmùk'îra ome auk'a p'anù Tachi Ak'õre k'îrapite. Mapa chik'aripa p'anapataadaipia bù. 12 Tachia k'awa p'anù mãgá auk'a p'anù omeeweda uchiadap'edaa perã Tachi Ak'õre juadeepa. Chi naapema wêra uchiaji chi naapema ùmùk'îradeepa. Mamãik'áapata ùmùk'îraarã uchiapata wêraarãdeepa t'odak'ãri.
13 Mãpai, paråpata ak'ùdaipia bù k'awaadait'ee pia bù wa pia–e bù ijãapari wêra ne–inaa wãk'apari wêe porode ùt'aa t'âmerã Tachi Ak'õremaa. 14 Ma awara pãchia oopatade k'îsiadak'ãri, k'awa p'anù pia–e bù ùmùk'îra puda waree bamerã. 15 Jõdee wêra puda waree bak'ãri, k'îra wãree unupata. Mamîda Tachi Ak'õrepa mãgá waripi–e paji k'îra wãree aupai ak'ùdamerã; jîp'a ak'ùpiit'ee wêra ichi ùmùk'îra jua ek'ari bù. 16 Apidaapa mùa jara aupada ijãa k'iniada–e p'anù pùrã, ijãanáatù. Mamîda k'awaadaipia bù taipa jõmaarãmaa mãga jarateepata. Ma awara ijãapataarã apemaarãpa oopata ma jarateepatak'a.
Sãga oodaipia bù Jesucristo piuda k'irãpadait'ee
17 Ârá ûraait'ee sãga oodaipia bù parã ijãapataarã cheepurudak'ãri Cristo piuda k'irãpadait'ee. Aù naawedapemak'a p'oyaa jara–e pãchia pia oomaa p'anù, mãgá ooda–e p'anadairã. Cristopa oopi k'inia bùk'a oodai k'ãyaara, ne–inaa k'achia oomaa p'anù. 18 Mãga jara bù mùmaa nepùrùdap'edaa perã parãdepema ûk'uru cheepurudak'ãri, ne–inaa jedek'odak'aa auk'a k'îsiada–e p'anadairã. Mapa awara–awaraa nek'opata. K'îsia bù wãara ûk'uru mùmaa nepùrùdap'edaa. 19 Mamîda mãgá parãdepema ûk'uruurãpa pãchia oo k'iniata ooda–e pada paara, k'awa–e pak'aji chisãgùùrãpa wãara oopata Cristopa oopi bùk'a, iru k'inia iru p'anapata perã. 20 Mãgá pariatua k'o p'anùk'a k'odaik'araa bù. ¡Mãgá Cristo piuda k'irãpadak'aa! 21 Mùmaa nepùrùjida parãdepemaarã ûk'uru cheepurudak'ãri ne–inaa jedek'odait'ee, apemaarã ijãapataarã nùda–ee. Maperãpù ijãapataarã ûk'uru jarra oopata. Jõdee awaraarãpa k'opata bi jãwaadarutamaa mãik'aapa vino topata piu p'aneerutamaa. 22 Chi mãga oopataarãmaa iidi k'inia bù: ¿Pãchi te wêe p'anùk'ã nek'odait'ee mãik'aapa todait'ee? ¿Waaweeda–e p'anùk'ã pãchi îgreste, chi araa che p'anùùrã jida ichiaba? ¿Chupùria chedeerã k'îra nejasiapi k'inia p'anùk'ã? ¿K'ãata parãmaa jaraima? ¿Pia oo p'anùk'ã? ¡Mãga–epù!
Jesupa ooda k'irãpapiit'ee ichide ijãapataarãmaa
(Mateo 26.26-29; Marcos 14.22-25; Lucas 22.14-20)
23 Jesucristopa mùmaa jarateeda, mùa jõdee parãmaa jarateeji. Aù ewate p'ãrik'ua Jesús traicionaadai naaweda, nek'omaa p'anùde ichia pan ataji 24 mãik'aapa ùt'aa t'âji gracias jarait'ee Tachi Ak'õremaa. Ma pan k'õrat'aaji jedeit'ee mãik'aapa mãgaji:
—Nãgà pan mù k'ap'ùa, mù peepiit'ee perã parã k'aripait'ee. Nãgá pan k'odak'ãri, k'opatáatù k'irãpadait'ee mù piuda parã pari.
25 Mãgá ichiaba, nek'o aupadap'eda, Jesupa vino copa jitaji mãik'aapa mãgaji:
—Nãgà vino mù waa, mùchi waa bat'ait'ee perã mù piuk'ãri eperãarã pari. Tachi Ak'õrepa nãgà ûraa chiwidi jara bù. Mùchi waa bat'ada k'aurepa irua wêpapiit'ee parãpa p'ek'au k'achia oopata mãik'aapa mùchideerã papiit'ee. Nãgá vino todak'ãri, topatáatù k'irãpadait'ee mùa ooit'ee bù eperãarã pari.
26 Mãga jarada perã Jesucristopa, tachia ma pan k'odak'ãri mãik'aapa ma vino todak'ãri, k'irãpapata Cristo piuda tachi pari. Mãgá oo p'anadait'ee, iru waya cheru misa.
K'îrak'aupai pan vino ome pariatua k'odai
27 Mãga jõmaarãmaa ak'ùpipata perã, eperãpa ma pan pariatua k'oru pùrã maa–e pùrã ma vino pariatua toru pùrã, k'achia oomaa bù, ichi–it'ee p'ua–e bairã Cristo piuda jõmaarã pari. 28 Maperãpù Cristode ijãapari chaa ma pan k'oi naaweda mãik'aapa ma vino toi naaweda, ichi t'ãridepai k'îsiaipia bù k'awaait'ee wãara k'oru mãik'aapa toru k'irãpait'ee Cristo piuda ichi pari wa mãga–e. 29 Mãgá ooipia bù Tachi Ak'õrepa miapiit'ee perã ma pan pariatua k'opataarã mãik'aapa ma vino pariatua topataarã, chik'o jîp'aa k'opatak'a. 30 Parãdepema chok'ara mãgá pariatua k'opata perã, k'ayaa p'anù mãik'aapa ûk'uru jai–idaa p'anù. 31 Mamîda mãgà k'odai naaweda mãik'aapa todai naaweda, k'îsiaruta pùrã oo amaadait'ee tachia p'ek'au k'achia oopata, Tachi Ak'õrepa tachi miapi–e pait'ee. 32 Mãga oodak'ãri, pariatua k'oda–e pait'ee. Tachi Ak'õrepa miapipari ma pan pariatua k'opataarã mãik'aapa ma vino pariatua topataarã, ãchia k'awaadamerã irua oopi k'inia bù. Mãga k'awaadak'ãri mãik'aapa oodak'ãri, irua ãchi k'aripait'ee atuanaadamerã ijãadak'aa beerãk'a, eperãarã jõmaweda panadak'ãri iru k'îrapite.
33 Mapa âpemaarã, cheepurudak'ãri pan k'odait'ee mãik'aapa vino todait'ee Cristo piuda k'irãpadait'ee, nùpatáatù jõmaweda cherutamaa, chik'inia ne–inaa jedek'odait'ee. 34 Apida jarrapisia bù pùrã, chei naaweda, ichi temãi nek'oipia bù. Parãpa mãga ooruta pùrã, Tachi Ak'õrepa miapi–e pait'ee pariatua k'o p'anù k'aurepa.
Mù parãmaa wãk'ãri, waapùara jarateeit'ee.