Ûraa ùt'aa t'ânaadamerã<R>awaraa ak'õre waibùa apatamaa
10
1 Ârá âpemaarã, k'irãpapiit'ee sãga chonaarãweda Tachi Ak'õrepa tachi judiorã chonaarã ak'ùpachi. Jâararadeepa ãra jõmaweda ak'ù bapachi Egiptodeepa uchiadak'ãri. Ma awara ãra jõmaweda sîapiji Mar Rojo esajîak'a p'oodade. 2 Ma jâararadeepa Tachi Ak'õrepa o jara wãji ãramaa Moisés k'ap'ùa pari mãik'aapa iru k'ap'ùa pari ãra k'aripaji Mar Rojo sîadamerã. Mãgá Tachi Ak'õrepa ãra jõmaweda Moisés jua ek'ari bùji, tachi ijãapataarã Cristo jua ek'ari bùparik'a ijãadap'eda, poro choopidak'ãri. 3 Ma awara Tachi Ak'õrepa maná pëida ùt'ariipa jõmaarãmaa k'opipachi 4 mãik'aapa topiji pania mãudeepa uchiapida. Cristo mãgà måuk'ata baji, ichideepa uchiapachi perã Tachi Ak'õre Jaure k'aripade ãra wãrutamaa. 5 Tachi Ak'õrepa ma jõma oopachi mîda ãra k'aripait'ee, ooda–e p'anapachida irua oopi k'inia badak'a. Mapa Tachi Ak'õrepa perá jõmaweda piupiji, eujã pania wêe bùde wãyaarutade.6 Tachia mãgà chonaarãpa oodap'edaade k'îsiadak'ãri, k'awaadaipia bù ãrapa oodap'edaa k'achia baji Tachi Ak'õre k'îrapite. Mapa k'îrak'aupai mãgá oodai ãrapa oodap'edaak'a. ¡Oonaadáma tachia ne–inaa k'achia k'îra t'ãdoo oo k'inia p'anùk'a! 7 Ùt'aa t'ânáatù ne–inaa juapa ooda k'îrapite, chonaarã ûk'uruurãpa oopatap'edaak'a. Tachi Ak'õre Ûraa p'ãdade jara bù:
‘Eperãarãpa fiesta oojida ne–inaa juapa ooda k'îrapite, aù k'îrapite ùt'aa t'âpata. Ma–it'ee nek'ojida, ne–inaa tojida, maap'eda pëirajida.’ (Éxodo 32.6)
8 Ichiaba pariatua p'ek'au oonáatù, ma k'aurepa ewari abaade Tachi Ak'õrepa ãradepemaarã veintitrés mil k'iniipida perã. 9 Ichiaba Tachi Ak'õre k'îraupináatù ãradepemaarãpa oodap'edaak'a, jaradak'ãri Tachi Ak'õrepa ãra p'oyaa pia ak'ù–e paji. Maperã Tachi Ak'õrepa taamaarã pëiji k'aak'oodamerã. Mapa chok'ara piujida. 10 Ichiaba Tachi Ak'õre ãpùte ik'achia pedeenáatù ãradepemaarãpa oodap'edaak'a. Mãga oodap'edaa perã Tachi Ak'õrepa ùt'ariipa ichi ángel pëiji; mãgùpa chok'ara peemerã.
11 Tachi chonaarã mãgá p'anadap'edaa perã, pia ak'ùdaipia bù ãrapa oodap'edaa, Tachi Ak'õrepa mãgà oodap'edaa p'ãpida perã ichi ley p'ãdade, tachia k'awaadamerã mãik'aapa auk'a oonaadamerã, nù p'anù misa na p'ek'au eujã jõru. 12 Mãpai parã t'ãidepemapa k'îsia bù pùrã ichiata oopari Cristopa oopi bùk'a, k'îrak'aupai ne–inaa k'achia ooi. 13 Edaare tachi t'ãridepai k'îsia p'aneepata ne–inaa k'achia oodait'ee. Ma awara netuarapa k'îsiapipari ne–inaa k'achia oodamerã. Mãga p'asapari jõmaarã ome. Mamîda mãga p'asak'ãri parã ome, ijãadaipia bù Tachi Ak'õrepa k'aripait'ee choodamerã, k'achia ooda–ee.
14 Maperã, âpemaarã k'iniarã, parãpa k'îsiaruta pùrã wãdait'ee awaraa ak'õre waibùa apata k'îrapite ùt'aa t'âde, ¡mãgá oonáatù! 15 Parã k'îsia k'awaa p'anù. Mapa k'îsiadaipia bù mùa jara bùde k'awaadait'ee seewa maa–e pùrã wãara. 16 ¡K'îsíatù! ¿K'ãata jara k'inia bùma tachia oopata, vino todak'ãri mãik'aapa pan k'odak'ãri k'irãpadait'ee Jesucristo piuda tachi pari? Todai naaweda mãik'aapa k'odai naaweda, ùt'aa t'âpata Tachi Ak'õremaa jaradait'ee iru t'ãri pia bù Cristo tachi pari piupida perã. Ma vino todak'ãri, k'irãpa p'anù Cristo waa bat'ada k'aurepa, tachi araa p'anapata iru ome. Ichiaba ma pan k'odak'ãri, k'irãpa p'anù Cristo k'ap'ùa piuda k'aurepa tachi araa p'anapata apemaarã Cristode ijãapataarã ome. 17 Tachi chok'ara p'anù mîda, mãgà pan k'odak'ãri, eperã apai pùk'a p'anapata Cristo piuda k'aurepa, iru ome tachi chaachaa araa p'anapata perã.
18 ¡K'îsíatù! Israelitaarãpa ne–animalaarã ateedak'ãri paapidait'ee Tachi Ak'õre altarmãi, ak'ùpipata irude ijãa p'anù. Ma awara mãgà ne–animalaarãdepema k'odak'ãri, ak'ùpipata ãchi Tachi Ak'õredeerã. 19 Ma jaradapa mùa jara k'inia–e bù ne–inaa aù k'îrapite ùt'aa t'âpata Tachi Ak'õrek'a bù. Ichiaba jara k'inia–e bù nechiara ata bùdap'edaa ma k'îrapite pipùara bù awaraa nechiara k'ãyaara. 20 Ma k'ãyaara jara k'inia bù Tachi Ak'õrede ijãadak'aa beerãpa nechiara k'odai naaweda, bùruta pùrã ne–inaa juapa ooda k'îrapite, ak'ùpipata mãgùde ijãa p'anù, tachia Cristode ijãapatak'a. Mamîda mãga oodak'ãri, wãara ooda–e ãchi ak'õre waibùa apata–it'ee. Jîp'a oopata netuaraarã–it'ee, mãgee ne–inaa juapa ooda k'îrapite ùt'aa t'âpata netuarade perã. Maperã parã wãnáatù mãgà ne–inaa aù k'îrapite ùt'aa t'âpatamaa k'odait'ee nechiara ata bùdap'edaa ma ne–inaa k'îrapite. Mãga ooruta pùrã, ak'ùpi p'anù araa p'ana k'inia p'anù netuaraarã ome. ¡Mùa mãga k'inia–e bù! 21 ¿Parã araa p'anadaipia bùk'ã netuara ome? ¡Mãgá oodaik'araa bù, Cristo waa bat'ada k'aurepa iru ome araa p'anapata perã! ¿Netuara eere p'anùùrã ome k'odaipia bùk'ã nechiara netuaramaa teeda? Mãga oodaik'araa bù, Cristode ijãapataarã ome araa p'anapata perã iru piuda k'aurepa.
22 ¡Tachi Ak'õre k'îraupináatù omeeweda oo k'inia p'anùùpa! ¿K'îsia p'anùk'ã Tachi Ak'õre p'oyaadai, irua parã miapinaamerã?
Apemaarã ijãapataarã ijãa amaapidaik'araa bù
23 “Mùchia oo k'iniata ooit'eeda” apata. Mamîda ma ne–inaa k'achia bù pùrã, tachia apida k'aripada–e pait'ee. Tachia ne–inaa oodaipia bù jõmaarãpa Tachi Ak'õre Ûraa pipùara k'awaadamerã mãik'aapa oodamerã Cristopa oopi bùk'a. 24 Apidaapa ne–inaa oodaik'araa bù ichi–it'ee aupai. Ichiaba ooipia bù awaraarã k'aripait'ee.
25 Nechiara netodak'ãri chi netopatamãi, iidináatù mãgà nechiara ata bùjida ne–inaa k'îrapite wa mãga–e. K'awaa ataruta pùrã ma nechiara ata bùdap'edaa ne–inaa k'îrapite, k'îsia p'uadariit'ee. 26 Mãga iididaik'araa bù Tachi Ak'õre Ûraa p'ãdade jara bairã:
‘Na p'ek'au eujã mãik'aapa jõmaweda aùde nâbù Tachi Ak'õre–it'ee, ichiata ooda perã.’ (Salmos 24.1)
27 Tachi Ak'õre Ûraade mãga jara bairã, Cristode ijãak'aa bùpa parãdepema aba atee k'inia bù pùrã ichi temaa nek'ode, mãik'aapa pù wã k'inia bù pùrã, wåji mãik'aapa k'óji ãrapa teeruta. K'îsianáaji mãik'aapa iidináaji ma nechiara ata bùjida ne–inaa k'îrapite wa mãga–e. 28 Mamîda mama bùde awaraapa pùmaa jarai: “Nãgà nechiara ata bùjida ne–inaa juapa ooda k'îrapite, aù k'îrapite ùt'aa t'âpata”. Mãga jararu pùrã, pùa ma nechiara k'oik'araa bù, mãgà eperã k'îsia p'uapiamaapa. 29 Mùa mãga jara–e bù pù k'îsia p'ua bai jîak'aapa; jîp'a chi apemamaa k'îsiapiamaapa parãpa k'achia oodai mãgà nechiara k'oruta pùrã.
Mamîda pùa iidii: “¿K'ãare–it'ee mùa ooipia bùma awaraarãpa oopi k'inia p'anùk'a, ãchi k'îsia p'ua p'anadairã? 30 ¿Pia–e bùk'ã, Tachi Ak'õremaa gracias jarap'eda k'oit'ee ne–inaa k'îra t'ãdoo? Pia bù pùrã, ¿mùa, sãap'eda ooima awaraapa oopi k'inia bùk'a?” Mùa jarait'ee sãap'eda mãga oodaipia bù. 31 Tachia ne–inaa k'odak'ãri maa–e pùrã todak'ãri maa–e pùrã ne–inaa awaraa oodak'ãri, jõmaweda oodaipia bù Tachi Ak'õre–it'ee, jõmaarãpa iru waaweedamerã. 32 Mapa parãpa piata oodaipia bù judiorã k'îrapite mãik'aapa judio–eerã k'îrapite mãik'aapa awaraa ijãapataarã k'îrapite, ne–inaa k'achia oo k'inia p'ananaadamerã parã k'aurepa. 33 Mùa jùrùpari mãga ooit'ee. Ne–inaa oo–e mùchi–it'ee aupai. Jõma oopari awaraarã k'aripait'ee, ãrapa Cristode ijãadamerã. Mãgá irua ãra o k'achiadeepa k'aripa atai.