1CO 9

Pablo pedee ûripataarãpa iru k'aripadaipia bù

1 Ne–inaa jõmaweda ooi mùchia oo k'inia bùk'a. Mamîda jîp'a oo k'inia bù Cristopa oopi bùk'a, irua mù ichi ûraa jarateede pëida perã. Awaraa Cristopa jùrùt'eradaarãk'a, mùa ichiaba Tachi Waibùa Jesús unuji mùchi taupa. Parãpa pida Cristode ijãapata, mùa parãmaa jarateenada perã irua ooda parã k'aripait'ee. 2 Ûk'uruurãpa ijãada–e p'anù mù Cristopa pëida. Mãùrãpa ak'ù k'inia p'anù mùa oopata mãik'aapa jarateepata mù ùmùateedait'ee. Mamîda parã t'ãidepema mùa jarateeda ijãadap'edaarãpa k'awa p'anù Cristopa mù pëiji, mù k'aurepa Cristo ome araa p'anapata perã. 3 Chi ijãada–e p'anùùrãpa k'awa k'inia p'anù pùrã Cristopa mù pëida wa mãga–e, parã p'anapata ak'ùdaipia bù.

4 Cristopa mù wãara pëida perã, irude ijãapataarãpa chik'o mãik'aapa pania mùmaa teedaipia bù. ¿Wãara–ek'ã? 5 Awaraa Cristopa pëida eperãarã, Pedropa mãik'aapa Cristo âpemaarãpa ãchi wêraarã Cristode ijãa p'anù ateepata awara ãyaa wãdak'ãri. Mãga wãdak'ãri, ijãapataarãpa ãra k'aripapata. ¿Parãpa auk'a mù ome mãgá ook'ajida–ek'ã, wêra iru bada paara? 6 ¿Pia bùk'ã mù Bernabé ome mimiadamerã chik'o iru p'anadait'ee? ¿Pia–e bak'ajik'ã taipa jarateepata ûrirutaarãpa k'aripadamerã?

7 ¡K'îsíatù! Eperã soldao pak'ãri, chik'o mãik'aapa awaraa net'aa irumaa pari teepata. Ichiaba eperãpa ne–uuda chauk'ãri, ichia madepema pari k'opari. Ichiaba ne–animalaarã wariparipa k'opari ichia wari bùdepema. Mãgapù p'anù tai jida ichiaba. 8 Mùchi k'îsiadoopa mãga jara–e bù. Tachi Ak'õre Ûraa Moisemaa p'ãpidade ichiaba mãga jara bù:

9 ‘P'ak'a it'ai jânáatù trigo t'ùamaa bak'ãri. Ita–aria k'opítù.’ (Deuteronomio 25.4)

Tachi Ak'õrepa mãga jarak'ãri, p'ak'a aupai ichi k'îsiade iru ba–e paji. 10 Jîp'a tai, ichi mimia oopataarãta, ichi k'îsiade iru baji, k'inia bairã awaraa ijãapataarãpa tai k'aripadamerã ne–inaa wêe p'anadak'ãri. Ne–uupataarãpa ne–uu chauda p'epataarã ome auk'a jita k'inia p'anù ãchi mimia pari. 11 Mãga pùk'a taipa jarateedak'ãri Cristopa ooda parã k'aripait'ee, auk'a jita k'inia p'anù chik'o mãik'aapa pania parã juadepema. 12 Awaraarãmaa tee p'anù pùrã, ¿ichiaba taimaa teedaipia bù–ek'ã?

Mamîda tachi juadoopa mimiapata, parãmaa ne–inaa iidida–e pait'ee. Mãga oopata parãpa k'îsianaadamerã taipa jarateepata ne–inaa falta p'anù atadait'ee. 13 Parãpa k'awa p'anù Tachi Ak'õre tedepema altarmãi mimiapataarãpa mãik'aapa ne–animalaarã paapataarãpa k'opata eperãarãpa aneepatadepema paapidait'ee Tachi Ak'õre–it'ee. 14 Mãga pùk'a Cristopa jaraji ichi ûraa jarateepataarãpa ne–inaa jitadaipia bù awaraa ijãapataarã juadeepa.

15 Mamîda mùa parãmaa maarepida iidi–e paji mãik'aapa at'ãri iidi–e bù. Ma k'ãyaara piu baibeei jarrapa parãmaa k'îsiapii k'ãyaara mùa Cristo mimia oo bù ne–inaa atait'ee.

16 Mamîda mù pipùara bù–e apemaarã pëida eperãarã k'ãyaara, ne–iidi–e bairã. Cristópata mù pëiji ichi ûraa jarateede. Maperãpù mùa jarateepari. Waawee bak'aji, jaratee–e pada paara irua oopi bùk'a, irua mù miapii jîak'aapa. 17 Ma awara mùchi k'inia jarateeda paara, ne–inaa ata k'inia bak'aji na mimia pari. Mamîda mãga–e. Mùa na mimia oopari Cristopa oopi bùk'a. Mapa maarepida mùmaa teeda–e p'anù mîda, jîp'a jarateeit'ee, ma–it'eeta Cristopa mù jùrùt'erada perã. 18 Mùa maarepida parãmaa teepi–e pait'ee. Nãgapai mùa k'inia bù. Mùchi t'ãripa na mimia oo k'inia bù Cristopa oopi bùk'a.

19 Mùa jõmaweda ooi Cristopa oopi bùk'a, eperãarã esclavo–e perã. Mamîda mù eperãarã esclavok'a padaipari nãga perã. Ba k'inia bù mùa jaratee bù ûri p'anùùrã p'anapatak'a, ma jaratee bù ûridak'ãri, Cristode ijãadamerã. 20 Judiorã t'ãide jaratee nipak'ãri, ãrapa oopatak'a oopari. Ichiaba Moisepa p'ãdade jara bùk'a oopari. Cristode ijãadak'ãriipa mù mãgà ley p'ãda jua ek'ari bù–e mîda, mãga oopari ãrapa irude ijãadamerã. 21 Jõdee judio–eerã t'ãide jaratee nipak'ãri, oopari ãrapa oopatak'a. Mamîda Cristopa oopi k'inia bùk'a oopari, ãrapa ichiaba Cristode ijãadamerã. 22 Ma awara Cristode pia ijãada–e p'anùùrã jarateek'ãri, jarateek'aa k'îsia k'awaa bùpa jarateeparik'a. Ãrapa k'îsia p'anùk'a mùa k'îsiapari mãik'aapa jîp'a jarateepari, ãrapa Tachi Ak'õre pipùara k'awaadamerã mãik'aapa waapùara Cristode ijãadamerã. Mùchi wãrumaa mãga oo bù, k'inia bairã mùa jaratee bù ûrirutaarãpa Cristode ijãadamerã. 23 Ma k'aurepa ijãa p'anù pùrã, mù ome auk'a k'awaadai jõmaweda Tachi Ak'õrepa k'îsia iru bù ichideerã–it'ee.

24 Parãpa k'awa p'anù p'irapataarã p'iradak'ãri, jõmaweda isapai p'irapata, ata k'inia p'anadairã ne–inaa teepata chi naapùara panarumaa. Mãga pùk'a parã p'anadaipia bù, ne–inaa oomaa p'anùde Cristopa oopi bùk'a. Mãgá atadai Tachi Ak'õrepa k'îsia iru bù teeit'ee Cristode ijãapataarãmaa. 25 Eperã p'irait'ee pak'ãri, ichi k'ap'ùa pia ak'ùpari. Ewari chaa p'irapari îyapaa–e pait'ee apemaarã ome p'irak'ãri. P'irapataarã jõmaarãpa mãgá oopata, naapùara pana k'inia p'anadairã atadait'ee poro jâra k'irudee ooda; taarã chook'aa bùta. Mãga pùk'a tachia oo k'inia p'anù oo amaapata mãik'aapa Cristopa oopi bùk'a oopata atadait'ee ùt'aripema poro jâra; Tachi Ak'õrepa k'îsia iru bù teeit'ee ichideerãmaa; mãgà ne–inaa jõk'aa bù. 26 Mapa mùa ook'aa p'irapari pariatua p'iraparik'a maa–e pùrã boxeo chõoparik'a nãu aupai sîk'ãri. Jîp'a t'ãripa mùa oopari Cristopa oopi bùk'a. 27 Mùchi p'ek'au k'achia ooyaa bù k'ap'ùapa ne–inaa oo k'inia bak'ãri, mãga oopik'aa nãga perã. Mùchi k'iniapai ooru pùrã, k'îra nejasia bait'ee ùt'ari panak'ãri Tachi Ak'õre k'îrapite. Ma awara mãga ooru pùrã, Cristopa ne–inaa k'îsia iru bù teeit'ee ichideerãmaa mùmaa tee–e pait'ee, mùa awaraarãmaa jaratee baji mîda na p'ek'au eujãde bù misa.