2 CORINTIOS
San Pablopa K'art'a T'êepema P'ãda Corinto P'uurudepema Ijãapataarãmaa
Salude pëida
1
1 Mù, Pablopa na k'art'a p'ã pëiru Jesucristode ijãapataarãmaa, Corinto p'uurude p'anù mãik'aapa jõma Acaya eujãde p'anù. Tachi âpema Cristo k'aurepa, Timoteopa ichiaba salude pëiru parãmaa. Tachi Ak'õrepa k'inia bada perã, mù jùrùt'eraji Jesucristopa mù pëimerã jarateede ichia oopi k'inia bù eperãarãmaa. 2 Mapa mùa k'inia bù Tachi Ak'õrepa Tachi Waibùa Jesucristo ome parã pia ak'ù p'anadamerã. Mãgá parã k'ãiwee p'anapataadait'ee.Tachi Ak'õrepa Cristode ijãapataarã k'aripapari
3 ¡Wãara, Tachi Ak'õre, Tachi Waibùa Jesucristo Ak'õre, jõmaarã k'ãyaara waibùara bù! Ichia tachi chupùria k'awaapari mãik'aapa ichiata tachi t'ãri o–îapipari. 4 Mãgá oopari tai jarateepataarãmaa, chupùria jõnùde. Ichia tai mãgá k'aripapari, taipa, jõdee, awaraarã auk'a k'aripadamerã ãra chupùria jõnadak'ãri. 5 Eperãarã ûk'uruurãpa Cristo k'îra unuamaa iru p'anajida irua jarada k'aurepa. Mãgá ârá awaraarãpa tai auk'a k'îra unuamaa iru p'anù taipa jarateepata k'aurepa. Mamîda Cristopa tai k'aripapari choodamerã. Waapùara ãchia tai mãga iru p'anù pùrã, waapùara Cristopa tai t'ãri o–îapiit'ee. 6 Wãara, chupùria jõneeruta pùjida Cristopa jarada jarateepata k'aurepa parãmaa, tai o–îa p'anù. Tai mãgá p'anadai ma jarateepata k'aurepa parã o k'achiadeepa uchiadap'edaa perã. Ma awara Tachi Ak'õrepa tai t'ãri o–îapi bùk'a chupùria jõnùde, auk'a parã t'ãri o–îapiit'ee parã auk'a chupùria jõneedak'ãri. Irua mãga ooit'ee parãpa choodak'ãri taipa choopatak'a. 7 Maperã taipa k'awa p'anù Tachi Ak'õrepa tai k'aripaparik'a chupùria jõnùde, parã auk'a k'aripait'ee mãgá jõnadak'ãri.
8 Âpemaarã, parãmaa mùa k'irãpapi k'inia bù mù chupùria nâbada Ásia eujãde. Mãga nâbak'ãri, perá choo–e paji. T'ãri ma–ãri nâbaji. 9 Wãara, k'îsiaji madeepa chok'ai uchia–e pai. Mamîda ârá k'awa bù mãga paji mùa ijãanaamerã mùchi k'îradoopa chupùria nâbùdeepa uchiai. Jîp'a Tachi Ak'õrépata uchiapii. Ichia mãgá k'aripai ichi jõmaarã k'ãyaara waibùara bairã. ¡Irua aupaita piudap'edaarã chok'ai p'irabaipipari! 10 Wãara, mù piudak'a baji. Mamîda Ak'õrepa mù k'aripa ataji madeepa. Mapa mùa k'awa bù waya mãgadaru pùrã, waya mù k'aripait'ee, mù k'õp'ãyoorã jida auk'a. 11 Parãpa ichiaba tai k'aripadai, ùt'aa t'âruta pùrã tai pari. Mãga ooruta pùrã, chok'araarãpa o–îa gracias jaradait'ee Tachi Ak'õremaa, unudak'ãri irua ne–inaa pia ooru tai k'aripait'ee parãpa ùt'aa t'âpata k'aurepa.
Pablo p'oyaa wã–e pada Corinto pidaarã ak'ùde
12 Parãdepema ûk'uruurãpa jara p'anù taipa eperãarã k'ûra nipapata. Mamîda mãga–e. Tai o–îa p'anù jõmaarã t'ãide jaratee nipadak'ãri, k'îra jîp'a nipapata perã. Mãgá nipajida parã t'ãide. Audua nipadak'aa paji parãpa k'îsiadamerã tai k'îsia k'awaara p'anù awaraarã k'ãyaara. Mãga–e. Parã t'ãide t'ãri pia p'anapachida, Tachi Ak'õrepa tai k'aripa bada perã. Mãga ooji ichia tai k'inia iru bapari perã. 13 Taipa parãmaa k'art'a p'ã pëidak'ãri, jîp'a p'ãpata taipa jara k'inia p'anù aupai. Mãgá p'ãpata parãpa tai k'art'a leedamerã mãik'aapa pia k'awaadamerã jõmaweda aùde jara bù. 14 Wãara parãdepema ûk'uruurãpa mãga k'awapata. Mamîda mùa k'inia bù parã jõmaarãpa k'awa k'inia p'anadamerã taipa oopata mãik'aapa jarateepata. Mãgá Tachi Waibùa Jesús waya chek'ãri, tachi jõma o–îa p'anadait'ee iru k'îrapite. Tai o–îa p'anadait'ee parãpa taipa jarateeda ijãadap'edaa perã. Jõdee parã o–îa p'anadait'ee tai it'aideepa ûridap'edaa perã Cristopa ooda eperãarã k'aripait'ee.
15 Mùa k'îsiaji parãpa leejida taipa k'art'a p'ã pëidap'edaa mãik'aapa ijãajida wãara Cristopa tai pëiji jarateedamerã irua oopi k'inia bù eperãarãmaa. Mapa wãit'ee paji parã ak'ùde. Wãda omé wãit'ee paji parã o–îa p'anadamerã mù unudak'ãri. 16 Naapùara Macedonia eujãdee wãk'ãri, mù parãmãi wiibaiit'ee paji mãik'aapa waya ãpùtee chek'ãri, auk'a parãmaa p'asianait'ee paji. Ma t'êe wãdade parãpa mù k'aripak'ajida Judea eujãdee wãit'ee. 17 Mamîda parãpa k'awa p'anù mù parãmaa wã–e paji. Mapa ¿parã t'ãidepema ûk'uruurãpa jara p'anù–ek'ã mù t'ãri auk'a bù–e parã ome? ¿K'îsia p'anù–ek'ã mùchia oo k'iniata oopari awaraarãpa oopatak'a? ¡Mùa mãga ook'aapù! 18 Tachi Ak'õrépata k'awa bù tai jarateepataarã mãgá p'anadak'aa. Ichiaba mãgá jarateedak'aa, jarateedak'ãri iru Warra, Jesucristopa ooda eperãarã k'aripait'ee. Jîp'a tai*pa jarateepata irua jarapi bùk'a. Tachi Ak'õrepa ichita oopari ichia jara bùk'a. Mãga oopata tai jida ichiaba, ichideerã perã. 19 Parã t'ãide Silvano,a Timoteo mù ome jarateedak'ãri Jesucristo Tachi Ak'õre Warra, tai k'îsiadoopapai jarateedak'aa paji. Jîp'a jarateepachida Tachi Ak'õrepa taimaa jarapidak'a. Jesucristo mãgá bapachi. Ichita ooji ichi ak'õrepa jaradak'a. 20 Chonaarãweda Tachi Ak'õrepa jaraji Jesucristopa ooit'ee bada. Mãga jaraji Cristo t'oi naaweda. Mãpai iru t'op'eda, wãara ooji jõmaweda Ak'õrepa jaradak'a. Maperã k'awa p'anù Cristo wãara Tachi Waibùa. Mãgá Cristode ijãapata perã, tachia “Amén” apata Tachi Ak'õre Ûraa ûridak'ãri. 21 Tachi Ak'õrépata tai Cristode ijãapipari, parã jida auk'a. Ichiata tachi jùrùt'eraji ichideerã papiit'ee. 22 Tachia k'awaadamerã wãara ichideerã p'anù, ichia tauchaa pùk'a bùji tachi t'ãride. Ichi Jaure pëiji tachi ijãapataarã ome bapariimerã. Mãga ook'ãri, tachimaa ak'ùpiji ichia wãara tachi pia ak'ùit'ee mãik'aapa t'êepai teeit'ee jõmaweda ichia k'îsia iru bù tachi–it'ee.
Pablopa jarada sãap'eda wã–e paji<R>Corintodepema ijãapataarã ak'ùde
23 Ak'õre k'îrapite mùa jara k'inia bù sãap'edata wã–e paji parã ak'ùde. Tachi Ak'õrepa k'awa bù mùchi t'ãride iru bù mãik'aapa mù miapii seewa jararu pùrã. Mù waa wã–e paji Corinto p'uurudee parã ùtrùade, parã t'ãri p'uapiamaapa. 24 Tai, chi jarateepataarãpa, parãmaa ijãapi k'iniada–e taipa k'inia p'anùk'a. Parãpa auk'a Cristode ijãapata. Iruata parãmaa ichia k'inia bùk'a oopii. Taipa jõdee parã k'aripa k'inia p'anù waapùara ijãapataadamerã mãik'aapa t'ãri o–îa p'anapataadamerã.