2
1 Naaweda mù parã ak'ùde wãk'ãri, parã t'ãri p'uapiji. Maperã waya wãit'ee pak'ãri, nãga k'îsiaji: “Mù naapai waya wã–e ãra t'ãri p'uapide.” 2 Mùa parã t'ãri p'uapiru pùrã, parãdepema apida wê–e pai mù t'ãri o–îapiit'ee. 3 Mapa wãi k'ãyaara, k'art'a p'ã pëiji parãpa aùde jara bù ûridamerã mãik'aapa oodamerã mùa ûraadak'a. Mù parãmaa wãru pùrã parãpa mãga oodai naaweda, audupùara parã t'ãri p'uapii. Waya unudak'ãri, mùa k'inia bù parãpa mù t'ãri p'uapii k'ãyaara, t'ãri o–îapidamerã. Mùa nãga k'awa bù: mù t'ãri o–îa bak'ãri, parã jida mãga p'anù. 4 Ma k'art'a p'ãk'ãri, mùchi t'ãride k'îsia nâbaji, parã mãgá ùtrùa k'inia–e pada perã. Jêedachi parã t'ãri p'uapi k'inia–e bada perã. Ma k'art'a p'ãk'ãri, mùa jîp'a ak'ùpi k'inia baji parã audú k'inia iru bù.Pablopa ûraada perdonaa k'awaadamerã
5 Wãara parã t'ãidepemapa, k'achia oo k'iniapa, mù t'ãri p'uapiji mãik'aapa parã ûk'uru audupùara mãgapiji. Ichia tachimaa mãgá ooji mîda, mùa iru waa ùmùatee k'inia–e. 6 Parã chok'araarãpa iru t'ãri p'uapimaa p'anù, iru yiaraa iru p'anadairã. Jãgapaipù. Waa mãgá yiaraa iru p'anadaik'araa bù. 7 Ma k'ãyaara, irua ooda perdonaadaipia bù mãik'aapa t'ãri o–îapidaipia bù waya t'îumerã awaraa ijãapataarã ome. Parãpa mãga ooda–e pùrã mãik'aapa iru at'ãri yiaraa iru p'anaruta pùrã, iru audupùara t'ãri p'ua bai, Ak'õrede ijãa–edarumaa. 8 Maperã ârá mùa parãmaa enenee nâbù ak'ùpidamerã wãara iru k'inia iru p'anù. 9 Ma–it'ee ma k'art'a p'ãji. K'inia baji irua ma k'achia oo amaamerã. Mamîda ma k'ãyaara waapùara mùa k'awa k'inia baji parãpa oodai wa ooda–e pai mùa jaradak'a. 10 Parãpa ma eperãpa k'achia ooda perdonaa p'anùk'a, mùa pida perdonaa bù. Wãara, Cristopa k'awa bù abaapa mù ome nepùra jùrù baji pùrã, mùa ma nepùra perdonaaji. Mùa mãga ooji parã waya t'ãri o–îa p'anadamerã. 11 Tachi jõmaarãpa chîarapa k'achia ooda mãgá perdonaaruta pùrã, Netuara Poro Waibùa juade baaida–e pait'ee ne–inaa k'achia oo k'iniapa ma eperãmaa. Ma awara ma ne–inaa k'achia ooda k'aurepa netuara juade baai–e pait'ee, audú k'îsia p'ua nâbairã. Tachia pia k'awa p'anù netuarapa oopari ichi juade baaidamerã.
Pablo Troas p'uurude nipada
12 Mùa jaradak'a mù wã–e paji parã ak'ùde. Ma k'ãyaara Troas p'uurudee wãji jarateede. Mama nipak'ãri, Tachi Waibùapa k'aripaji mãpemaarãpa ûri k'inia p'anadamerã Cristopa ooda eperãarã k'aripait'ee. 13 Mamîda, mama bùde mù k'îsia nâbeeji unu–e pada perã Tito, tachi âpema Cristo k'aurepa, mùa pëida parã ak'ùde. Iru parãmãiipa chep'eda, mama tai unudait'ee paji. Mãgá unuda–e pada perã, mùa Troadepemaarã atabëiji mãik'aapa cheji Macedonia eujãdee, nama Tito ome unui jîak'aapa.
Pablopa jarada Titopa nepùrùda ûrip'eda
14 Taipa gracias jarapata Tachi Ak'õremaa, iruata Netuara Poro Waibùa p'oyaapari perã Cristo juapa. Maperãpù netuara apidaapa tai Cristodeerã p'oyaada–e pai. Mãgá ichideerã perã irua tai k'aripapari jarateedamerã jõmaarã t'ãide. 15 Ara k'era t'ûa aubaiparik'a ewat'aak'ãri, mãga pùk'a tai ijãapataarã t'ùmà wãpata jarateede Cristopa oopi k'inia bù eperãarãmaa. Tachi Ak'õrepa unuk'ãri taipa mãga jarateemaa p'anù, o–îa beepari. Cristopa tai jarateepataarã pëipari jarateedamerã chi ûri k'inia p'anùùrãmaa mãik'aapa chi ûridaamaa p'anùùrãmaa paara. 16 Taipa jarateepata mik'ia pùk'a bù chi ûridaamaa p'anùùrã–it'ee, ma k'aurepa ãra atuadait'ee perã. Mamîda chi ûri k'inia p'anùùrã–it'ee ne–inaa t'ûa baparik'a bù, ma jarateeda k'aurepa ãra wãdait'ee perã Ak'õre truadee. Mãga bùta, ¿k'aipa jarateeima chi ûri p'anùùrãpa wãara k'awaadamerã Cristopa oopi k'inia bù eperãarãmaa? 17 Táipata mãga jarateedai. Ma–it'ee Tachi Ak'õrepa tai jùrùt'eraji. Tai k'îsiadoopa jarateedak'aa. Tachi Ak'õrepa ichi ûraa taimaa jarapipari. Tai nipadak'aa awaraarãk'a. Ãchi k'îsiadoopa Ak'õre net'aa jaratee nipapata, eperãarãpa ãchi pia ak'ùdamerã mãik'aapa ãchimaa p'arat'a teedamerã. Taipa jõdee mãga oodak'aa. Tachi Ak'õrepa tai ichita ak'ùpari perã, k'îra jîp'a jarateepata irua oopi bùk'a. Mãgá jarateedai Cristo tai ome bapari perã.