Tachi Ak'õrepa ûraa chiwidi Pablomaa k'awapida
3
1 Mùa jarak'ãri tai k'îra jîp'a jarateepata, jara k'inia–e bù taita pipùara ak'ùdaipia bù awaraa jarateepataarã k'ãyaara. Taipa k'art'a p'ãda iididak'aa ijãapataarãpa parãmaa jara pëidamerã táipata pia jarateepata, jarateepataarã ûk'uruurãpa oopatak'a. Ichiaba iidida–e parãpa mãgee k'art'a awaraa ijãapataarãmaa pëidamerã. 2 Awaraarãpa k'awa k'inia p'anù pùrã tai wãara Jesucristopa pëida jarateede wa mãga–e, ãchia parã ijãapataarã ak'ùdaipia bù. Parã taipa k'art'a p'ãdák'ata p'anù, Cristode ijãapata perã taipa jarateedap'edaa k'aurepa. Mùchi t'ãride k'awa bù mùa wãarata jara bù. 3 Jõmaarãpa k'awaadai Cristopa tai pëiji parã ak'ùdak'ãri, sãga p'anapata Cristode ijãadak'ãriipa. Awaraarãpa oo k'inia p'anapata Tachi Ak'õre Ûraa mãude p'ãdade jara bùk'a. Tachi Ak'õrepa k'inia–e baji mîda eperãarãpa ichita ijãadamerã ma ûraa Moisemaa p'ãpidade, ûk'uru aùde at'ãri ijãa p'anù. Mamîda parã mãga p'anadak'aa. Ma k'ãyaara pipùara parãpa oo k'inia p'anù Cristopa oopi bùk'a, Tachi Ak'õre Jaure parã t'ãride bapari perã. Ma awara Ak'õrepa mãga ichita oopiit'ee, ichita bapari perã.4 Taipa ak'ùdak'ãri parãpa oomaa p'anù Cristopa oopi bùk'a, k'awa p'anù wãara Tachi Ak'õrepa taimaa jarapi baji. 5 Tai k'îsiadoopa eperãarã p'oyaa Cristode ijãapidak'aa. Tachi Ak'õrepapai mãga ooi. Ichia aupaita tai k'aripapari iru ûraa pia jarateedamerã. 6 Ichia taimaa nãgà ûraa chiwidi k'awapiji. Cristopa p'ek'au k'achia oopataarã o k'achiadeepa k'aripa atai. Mãga k'awapiji taipa jõmaarãmaa jarateenadamerã. Na ûraa chiwidi awara bù chi naawedapema ûraa k'ãyaara. Eperãarãpa ma naawedapema ley p'ãdade ijãaruta pùrã, atuadait'ee. Jõdee na ûraa chiwidide ijãaruta pùrã, Ak'õre Jaurepa ãchi Ak'õre ode t'îupiit'ee.
Ûraa chiwidi piara bù naawedapema ûraa k'ãyaara
7 K'îsiadáma nãgùde. Chonaarãweda Tachi Ak'õrepa ichi ûraa mãude p'ãpiji Moisemaa. Na eujãde bù misa, Moisés Tachi Ak'õre ome unuk'ãri, Tachi Ak'õre k'îra wãree iru ome beeji. Mapa Moisés waya chek'ãri israelitaarãmaa, ãrapa iru k'îra p'oyaa ak'ùdak'aa paji, audú âdaa bada perã. Mãga baji mîda, taarã–e nùde ma âdaa wêpa wãji. Ak'õrepa ichi k'îra wãree mãgá ãchimaa unupiji mîda, ma ley p'ãda k'aurepa eperãarãpa k'awaa p'aneejida ãchia p'ek'au k'achia oopata k'aurepa atuadait'ee. 8 Ârá jõdee, ma k'ãyaara pipùara Tachi Ak'õrepa ûraa chiwidi jara pëida k'aurepa tachi ijãapataarãpa k'awapata Cristode ijãadak'ãri, wãdai Tachi Ak'õre truadee. Mãga k'awapata Ak'õre Jaure k'aurepa, iru tachi ome bapari perã. 9 Mãpai nãga jaradai. Pia baji Tachi Ak'õrepa eperãarãmaa k'awapik'ãri ichi ley p'ãda, mãgùde jaraji mîda ãchi atuadait'ee p'ek'au k'achia oopata perã. Mamîda ma k'ãyaara pipùara bù ichia ûraa chiwidi jara pëida. Mãgà ûraade ichi Jaurepa tachi ijãapataarãmaa k'awapipari Cristo k'aurepa tachi p'ek'au k'achia wêe p'anù Ak'õre k'îrapite. 10 Maperãpù k'awa p'anù pipùara bù ijãadait'ee Tachi Ak'õrepa ûraa chiwidi jara pëidade, ijãadai k'ãyaara mãgà chonaarãwedapema ley p'ãdade jara bùde. 11 Wãara Ak'õre Ûraa p'ãda pia baji, Ak'õrepa mãgà jarada perã. Mamîda ichia k'inia–e paji eperãarãpa ichita aùde ijãadamerã. Mapa ûraa chiwidi jara pëiji. Nãgà ûraa pipùara bù chi naawedapema k'ãyaara, jõk'aa perã.
12 K'awa p'anadairã Ak'õrepa ûraa chiwidi jara pëida mãgá pipùara bù chi naawedapema jarada k'ãyaara, taipa mãgà ûraa jîp'a jarateepata, waaweeda–ee. 13 Mamîda mãga–e paji Moisés ome. Moisepa ichi k'îra wãk'aji israelitaarãpa ununaadamerã Tachi Ak'õre k'îra wãree wêpa wãk'ãri. Mãgá ma âdaa Moisés k'îrade wêpa wãdak'a, ma chonaarãwedapema ûraa wêpa pùk'a wãji. 14 Mamîda ma israelitaarãpa mãga ijãa k'iniada–e paji, k'ùùrù k'isua p'anadap'edaa perã. At'ãri mãga p'anù Moisepa p'ãda leepataarã ûridak'ãri. Moisepa ichi k'îra wãk'a iru badak'a, ãchi t'ãri wãk'a pùk'a iru p'anù ûraa chiwidide ijãa k'iniada–e p'anadairã. At'ãri ãchia ijãapata Ak'õre ode t'îudai ma chonaarãwedapema ley p'ãdade jara bùk'a oo p'anùùpa. Mãga ijãapata Tachi Ak'õrepa ãchimaa ichi ûraa chiwidi k'awapi bù mîda. Nãgá k'îsia awara k'îsiadai: Cristode ijãadak'ãri mãik'aapa ichideerã padaidak'ãri. 15 Mãgá Ak'õre Ûraa Moisepa p'ãdade ijãapata perã, idi ewate at'ãri ma ûraa ûridak'ãri, ãchi t'ãri wãk'a pùk'a iru p'anù. 16 Mamîda ãchidepemapa ma ûraa chiwidi ûrik'ãri mãik'aapa Cristode ijãak'ãri, ma t'ãri wãk'a pùk'a bada wêpait'ee. 17 Mãga p'aneedait'ee Cristode ijãadak'ãri, eperãarã uchiapata perã Ak'õrepa naawedapema ley p'ãda jua ek'ariipa. Mãga oodai Cristo ãra ome bapari perã ichi Jaure k'ap'ùa pari. Cristo ichi Jaure ome apai, auk'a Tachi Waibùa perã. 18 Mãgá ma naawedapema ûraa jua ek'ariipa tachi uchiadap'edaa perã, tachi t'ãri waa wãk'a pùk'a p'anù–e. Ara espejode tachi k'îra unuparik'a, mãga pùk'a Tachi Ak'õre k'îra wãree unupata iru ûraa chiwidi jara pëidade Cristo k'ap'ùa pari. Ma awara Cristo Jaurepa oopi bùk'a oodak'ãri, t'ãri pia padaipata iruk'a. Waapùara iru Jaurepa oopi bùk'a oodai, waapùara t'ãri pia padaridai iruk'a.