Pablopa pedee pia jarateeda
4
1 Tachi Ak'õrepa tai chupùria k'awaa bairã, ichi ûraa chiwidi taimaa jarateepi bù. Maperãpù waaweeda–ee p'anapata, awaraarãpa tai ome nepùra jùrù p'anù mîda. 2 Taipa oodaamaa p'anapata ne–inaa k'achia awaraarãpa merã oopata; ne–inaa eperãarã jîp'aarã k'îra nejasia p'anapata oodait'ee. Madepema ûk'uruurãpa imeraa jarateepata chîara k'ûradait'ee. Maa–e pùrã ãchi k'îsia p'oirapata Ak'õrepa jarapi bù ome, irua jara k'inia bù awara uchiamerã. Mamîda taipa mãga ooda–e. Ak'õrepa wãarata jara pëida k'îra jîp'a jarateepata. Mãga oo p'anùùpa k'inia p'anù jõmaarãpa k'awaadamerã Tachi Ak'õre k'îrapite taipa wãarata jarateepata. 3 Wãara, Cristopa ooda eperãarã k'aripait'ee jarateedak'ãri, ûk'uru eperãarã–it'ee ma jarateepata wãk'a pùk'a bù, mãùrãpa ma wãarata k'awadaamaa p'anapata perã. Mapa o k'achiadee wãruta. 4 Ãchi mãga p'anù na p'ek'au eujãdepema ijãadak'aa beerã ak'õre, Netuara Poro Waibùapa, ãchi tau p'ãriu pùk'a iru bairã ichi jua ek'ari. Ichia k'inia–e ãchia k'awaadamerã t'îudai âdaa pùk'a bùde k'awaadak'ãri Cristopa ooda ãchi o k'achiadeepa k'aripa atait'ee. Ichia k'awa bù mãga ijãaruta pùrã, unudai Cristo k'îra wãree, iru Tachi Ak'õre k'îrak'a bairã. 5 Mapa taipa jarateedak'ãri, jarateeda–e tachi k'îsiadeepa tai ak'ùdamerã pãchi poroorãk'a. Jîp'a jarateepata Jesucristo, Tachi Waibùapa oopi k'inia bù eperãarãmaa. Taipa irua oopi bùk'a oo k'inia p'anapata perã, tai mimiapata parã–it'ee. 6 K'awa p'anù Jesucristo tachi jõmaarã waibùa nãga perã. Ewaaweda jõma p'ãriu nâbak'ãri, Tachi Ak'õrepa jaraji âdaamerã. Mãpai âdaa beeji. Mãga pùk'a ijãadai naaweda, tai p'ãriu pùk'a bùde p'anapachida, k'awada–e p'anadap'edaa perã Cristopa ooda eperãarã k'aripait'ee. Mamîda Tachi Ak'õrepa taimaa mãga k'awapik'ãri, tai t'ãride âdaa pùk'apiji. Mapa Cristode ijãa p'aneejida mãik'aapa k'awaa p'aneejida Tachi Ak'õre k'îra wãree.Tachi Ak'õrepa wãarata jarateepataarã k'aripapari
7 Tachi k'ap'ùa chok'o sorék'apù bù. Mamîda Tachi Ak'õrepa aùde nêe bùdák'apù bù ichi k'îra wãree taimaa unupik'ãri mãik'aapa tai jùrùt'erak'ãri Cristopa ooda jarateedamerã eperãarã k'aripait'ee. Mãgá eperãarãpa ijãadak'ãri taipa jarateepata k'aurepa, jõmaarãpa k'awaadai Tachi Ak'õrépata taimaa jarapi bù. ¡Iruta tai k'ãyaara waibùara bù! 8 Mãga jaratee p'anù misa iru–it'ee, tai wãrutamaa ijãadak'aa beerãpa nepùra jùrùpata tai ome. Mamîda ãramaa p'oyaapidak'aa. Mãga p'anadai Tachi Ak'õrépata tai k'aripapari perã choodamerã. Edaare k'awada–e sãgapù oodai. Mamîda ijãa p'anù Ak'õrepa taimaa ichia k'inia bù k'awapiit'ee. 9 Edaare awaraarãpa tai k'îra unuamaa iru p'anapata. Mamîda Tachi Ak'õrepa tai atabaibëik'aa. Ichiaba edaare tai p'ua oopata. Mamîda Tachi Ak'õrepa tai k'aripapari chok'ai uchiadamerã ãchi juadeepa. 10 Tai wãrutamaa jùrùpata peedait'ee Jesús peedap'edaak'a. Mamîda Tachi Ak'õrepa tai k'aripapari ãchi juadeepa, eperãarãpa k'awaadamerã irua aupaita tai k'aripapari. Mãga oopari Jesucristo Jaure tai ome bapari perã. 11 Wãara, na p'ek'au eujãde p'anù misa, tai mãgá pee k'inia p'anadait'ee taipa jarateepata perã Jesucristopa oopi k'inia bù eperãarãmaa. Mamîda mãga p'oyaa ooda–e, irua ak'ùpi k'inia bairã ichi wãara chok'ai p'irabaiji mãik'aapa at'ãri tai t'ãride chok'ai bù. 12 Mãpai tai mãgá jùrù p'anù mîda, taipa jarateepata Ak'õrepa jarapi bùk'a, parã awaraarã ome Cristode ijãadap'eda, Tachi Ak'õre truade ichita p'anapataadamerã.
13 Taipa auk'a jaradai Tachi Ak'õre chonaarãwedapema ley p'ãdade jara bùk'a:
‘Ijãaji Tachi Ak'õrepa mù k'aripai. Maperã irumaa jaraji mùchi t'ãride k'îsia bada.’(Salmos 116.10)
Taipa ichiaba mãga ijãapata. Maperãpù jarateepata Tachi Ak'õrepa jarapi bùk'a. 14 K'awa p'anù Tachi Ak'õrepa Jesucristo chok'ai p'irabaipidak'a, tai jida auk'a p'irabaipiit'ee parã ome mãik'aapa tachi ateeit'ee Jesucristo bùmaa ichi truade. Mãga ooit'ee tachi Cristodeerã perã. 15 Mãga k'awa p'anadairã, choopata parã mãik'aapa awaraarã k'aripadait'ee Cristode ijãadamerã. Mãgá chok'araarãpa k'awaadait'ee Ak'õrepa ãchi k'inia iru bù mãik'aapa o k'achiadeepa uchiapi k'inia bù. Mãpai mãùrãpa Cristode ijãadak'ãri, gracias jaradait'ee Tachi Ak'õremaa mãik'aapa ãchi ùt'aa t'â p'anùde ak'ùpidait'ee wãara irude ijãapata.
16 Maperãpù tai chupùria jõneedak'ãri, k'îsia p'ua jõnadak'aa. Tai k'ap'ùa jõdaruta pùjida, ewari chaa t'ãride audupùara Tachi Ak'õrede ijãapata. 17 Ma awara na eujãde p'anù misa, taarãdak'aa chupùria jõnùde. Tai–it'ee mak'ùara p'ua–e. Jõdee taipa ne–inaa unudait'ee Tachi Ak'õre truade p'oyaa jarada–e, audú pi–ia bairã. ¡Ichita p'anapataadait'ee iru ome! 18 Maperã tai audú k'îsia jõnada–e na p'ek'au eujãde unu p'anù k'aurepa. Jîp'a k'îsiapata ne–inaa waide unuda–e p'anùde; ùt'aripema net'aade. Na eujãdepema net'aa taarã–ee jõpari. Mamîda ùt'aripema net'aa ichita bapariit'ee.