Ijãapataarã ùt'aripema k'ap'ùa chiwidide<R>p'anapataadait'ee
(1 Corintios 15.35-58)
5
1 Taipa k'awa p'anù tachi eperã k'ap'ùa piuru pùjida Cristo chei naaweda, Tachi Ak'õrepa tai p'anapiit'ee ichia ooit'ee bù ùt'aripema k'ap'ùa chiwidide. Na p'ek'au eujãdepema k'ap'ùa jõpari. Mamîda chi ùt'aripema k'ap'ùa jõk'aa, Tachi Ak'õrepa mãgá oopari perã. 2 Na p'ek'au eujãdepema k'ap'ùade p'anù misa, chupùria jõnapata mãik'aapa audú k'îsia jõnapata, ma ùt'aripema k'ap'ùade p'ana k'inia p'anadairã. 3 Eperãpa p'aru jâ k'inia bùk'a, mãga pùk'a tai p'ana k'inia p'anù ma ùt'aripema k'ap'ùade. Eperã ãk'adaa ba k'inia–e bùk'a, tai k'ap'ùa wêe p'ana k'iniadak'aa. 4 Maperãpù piu k'iniada–e Cristo chei naaweda. Iru mãgá cheru misa, na p'ek'au eujãdepema k'ap'ùade p'anùde, k'îsia jõnapata ne–inaa k'achia p'asai jîak'aapa. Mãgá na p'ek'au eujãdepema k'ap'ùa chupùria nâbairã, atabëi k'inia p'anù Tachi Ak'õre ome p'ananadait'ee. 5 Ma–it'ee Tachi Ak'õrepa ùt'aripema k'ap'ùa ooit'ee ichideerã–it'ee, aùde p'anapataadamerã iru truade. Mãga k'awa p'anù irua ichi Jaure pëida perã tachi chaachaa bapariimerã. Ichi Jaurépata k'awapipari ichia k'îsia iru bù ichideerã–it'ee.6 Tachi Ak'õrepa mãgá ne–inaa k'îsia iru bapari perã ichideerã–it'ee, na p'ek'au eujãde p'anù misa, tachi k'ãiwee p'anapataadai. Wãara k'awa p'anù na p'ek'au eujãdepema k'ap'ùade p'anù misa, Tachi Waibùa ik'aawaapa t'ùmà pùk'a p'anù. 7 Tachi taupa iru unuda–e p'anù mîda, irude ijãapata. 8 Maperãpù k'ãiwee p'anapata. Piara bak'aji aweda uchiadait'ee na p'ek'au eujãdepema k'ap'ùadeepa mãik'aapa iru truade p'ananadait'ee tachi ùt'aripema k'ap'ùade. 9 Mamîda at'ãri wãda–e. Mapa nãga k'îsiapata. Na p'ek'au eujãdepema k'ap'ùade p'anù misa, oo k'inia p'anù Cristopa oopi bùk'a mãik'aapa na eujãdeepa uchiadak'ãri, auk'a oo k'inia p'anadait'ee irua oopi bùk'a nãga perã. 10 Ewari cherude tachi ijãapataarã jõmaweda iru k'îrapite panadait'ee irua ak'ùmerã tachia oopatap'edaa na p'ek'au eujãde p'anù misa. Eperã Cristopa oopi k'inia bùk'a oodapa atait'ee Tachi Ak'õrepa ne–inaa k'îsia iru bù ichideerã–it'ee. Ma awara Cristopa mãgùmaa pedee pia jarait'ee. Mamîda chi mãga oo–e badapa maarepida ata–e pait'ee mãik'aapa Cristopa irumaa pedee pia jara–e pait'ee.
Cristo k'aurepa Tachi Ak'õre k'awadai
(Romanos 5.9-11; Colosenses 1.19-22)
11 Cristopa tachia oopata mãgá ak'ùit'ee perã, iru waawee p'anapata. Mapa taipa eperãarãmaa jarateepata Cristode ijãadamerã mãik'aapa tai p'anapata k'awaadamerã. Taipa ne–inaa oodak'ãri wa ne–inaa jaradak'ãri, mãga oopata eperãarã k'aripadait'ee. Tachi Ak'õrepa k'awa bù tai t'ãride iru p'anù. Mùa k'inia bù parãpa tai ichiaba mãgá k'awaadamerã. 12 Mùa mãga jarak'ãri, jara k'inia–e bù tai pipùara ak'ùdamerã awaraarã k'ãyaara. Jîp'a k'inia bù parã o–îa p'anadamerã taipa ne–inaa pia oopata k'aurepa. Mãgá o–îa p'anaruta pùrã, parãpa p'anaudai chi audua beerãpa tai ãpùte jara jõnù. Ma jarateepataarãpa k'îsiapata ãchia aupaita pia jarateepata. 13 ¿Mãùrãpa jara p'anù–ek'ã tai parã t'ãide nipadak'ãri, oojida k'îra k'awa–ee p'anùùrãpa oopatak'a? Mamîda mãga–e paji. Taipa mãga oojida awaraarãpa unudak'ãri, k'awaadamerã Tachi Ak'õre jõmaarã waibùa. Ma awara tai k'îra jîp'a nipadak'ãri, mãga oopata parã k'aripadait'ee, auk'a Tachi Ak'õre pipùara k'awaadamerã. 14 Jesucristopa tai k'inia iru bapari. Maperãpù tai jaratee nipapata irua oopi k'inia bùk'a. Wãara na p'ek'au eujãdepemaarã jõmaweda k'inia iru bapari perã, kurusode piuji tachia p'ek'au k'achia oopata k'aurepa. Mãgá piuji jõmaarã k'ap'ùa pari. Ara Cristo piudak'a jõmaarã pari, iru k'ap'ùa pari eperã chaachaa piu pùk'aji. 15 Cristo piuji eperãarã pari mãik'aapa chok'ai p'irabaiji, k'inia bada perã ichide ijãa p'anùùrã p'anapataadamerã irua k'inia bùk'a. Tachi mãga p'anadak'ãri, oodait'ee irua oopi k'inia bùk'a, tachia oo k'iniata oodai k'ãyaara.
16 Mãga k'awaadak'ãriipa, taipa eperãarã unudak'aa, Cristode ijãadai naaweda unupatap'edaak'a. Maapai Cristo jida eperã jîp'aak'a unupachida. ¡Mamîda ârá iru mãgá unuda–e p'anù! Ichideerã ichiaba mãgá unuda–e nãga perã. 17 Eperã araa bak'ãri Cristo ome ijãapari perã irude, mãgà eperã t'ãri awaradaipari. ¡Pia k'îsíatù! Cristode ijãai naaweda, ma eperã k'achiade nipapachi. Mamîda irude ijãadak'ãriipa waa mãgá nipa k'inia–e. Jîp'a nipa k'inia bù Cristopa oopi bùk'a.
18 Mãgá nipai Tachi Ak'õrepa mãga oopipari perã. Tachi auk'a p'anapachida ma eperãk'a. Cristode ijãadai naaweda, taipa Tachi Ak'õre pia k'awa k'iniada–e p'anapachida. Ichiaba maapai Tachi Ak'õrepa tachi pia–ee ak'ùpachi. Mamîda ijãadak'ãri, Cristo piuda k'aurepa Tachi Ak'õrepa ichi t'ãri auk'a bùji tachi t'ãri ome. Maperãpù tai jùrùt'eraji jõmaarãmaa jarateenadamerã. Mãgá taipa jarateepata ûrirutaarãpa Cristode ijãadak'ãri, Tachi Ak'õrepa ichi t'ãri auk'a bùpari ãchi t'ãri ome ichiaba. 19 Pia jarait'eera, Cristo piuda k'aurepa eperãarã pari, Tachi Ak'õrepa ichi t'ãri auk'a bù k'inia bù ãchi t'ãri ome. Ma awara ãchia p'ek'au k'achia oopata wêpapi k'inia bù. Ma pedeeta Tachi Ak'õrepa taimaa jarapi bù. 20 Ma–it'ee Cristopa tai pëiji, ichi k'ap'ùa pari taipa jaradamerã irua jara k'inia bù. Mapa taipa parã jõmaarãmaa enenee jõnù: Ijåatù Jesucristode, Tachi Ak'õrepa ichi t'ãri auk'a bùmerã parã t'ãri ome. 21 Cristopa p'ek'au k'achia maarepida ook'aa paji. Mamîda kurusode bak'ãri tachi p'ek'au k'achia oopataarã pari, Tachi Ak'õrepa iru pia–ee unuji. P'ek'au k'achia oopataarã unuparik'a unuji. Ârá jõdee, ma piuda k'aurepa Tachi Ak'õrepa tachi pia unupari.