6
1 Mapa tai Tachi Ak'õre ome mimia p'anùde, parã ûraa k'inia p'anù k'îsiadamerã Tachi Ak'õrepa parãmaa pia ooda. Parã ijãadak'ãri, Cristo piuda k'aurepa Tachi Ak'õrepa ichi t'ãri auk'a bùji parã t'ãri ome. Maperã k'îrak'aupai Tachi Ak'õre yiaraa iru p'anadai awaraarãpa jarateepata ûri k'iniapa. 2 Ma k'ãyaara óotù Tachi Ak'õre Ûraa p'ãdade jara bùk'a:‘Mùa pùde k'îsia bak'ãri, ûriji pùa mùmaa ùt'aa iidida. Pùa chupùria iidida ewate, mùa pù o k'achiadeepa k'aripa ataji.’ (Isaías 49.8)
Corinto pidaarã, ¡ûrítù! Nãgaweda Tachi Ak'õrepa ûriit'ee parãpa chupùria iidiruta. Nãgaweda parã k'aripait'ee ichide wãara ijãadamerã.
Pablopa ne–inaa k'achia chooda
3 Tai parã t'ãide jaratee nipadak'ãri, maarepida ne–inaa oo k'iniada–e paji parãpa ma jarateepata oo iru p'anadamerã, wa Cristode ijãadaamaa p'anadamerã taipa oopata k'aurepa. 4 Mãga–e. Jîp'a oo k'inia p'anapachida jõmaweda Tachi Ak'õrepa oopidak'a, parãpa tai pia ak'ùdamerã, Ak'õrepa tai pia ak'ùparik'a. Tai jõmaarã t'ãide mãgá nipapata. Mãùmisa, t'ãridepai choopata audú k'îsia jõnùde; ne–inaa wêe chitoonùde; nepùrade jõnùde; 5 awaraarãpa tai wùmaa p'anùde; carcelde chitoonùde; tai pee k'iniapa awara ãyaa jëret'aa jõnùde; mimia chaaree oo jõnùde; k'ãi–ee ewari jõnùde; jarra oo jõnùde. 6 Ichiaba ak'ùpipata tai Tachi Ak'õrepa pëida nãga oo p'anùùpa. K'îra jîp'a nipapata, ne–inaa k'achia ooda–ee. Taipa k'awa p'anù Tachi Ak'õrepa ichi ûraa wãarata jara k'inia bù tai it'aideepa. K'îrau–ee choopata awaraarãpa taimaa ik'achia jaradak'ãri maa–e pùrã tai oo iru p'anadak'ãri. T'ãri pia p'anapata awaraarã ome, Tachi Ak'õre Jaure tai ome bapari perã. Mapa t'ãripa awaraarã k'inia iru p'anù Tachi Ak'õrepa ichideerã k'inia iru baparik'a. 7 Jarateedak'ãri, chi ûri p'anùùrã maarepida k'ûradak'aa. Tachi Ak'õrepa oopi bùk'a oopata. Mapa irua tai pia ak'ùpari. Iruata tai k'aripapari waaweeda–ee jarateedamerã mãik'aapa taimaa k'îsia k'awaapipari pia p'anaudamerã awaraarãpa tai ùmùateedak'ãri. 8 Eperãarã ûk'uruurãpa tai pia ak'ùpata. Jõdee awaraarãpa tai k'îra unuamaa iru p'anapata. Ichiaba eperãarã ûk'uruurãpa tai ãpùte ik'achia pedeepata. Jõdee awaraarãpa tai ãpùte pia pedeepata. Eperãarã ûk'uruurãpa jara p'anù taipa seewa jarateepata. Mamîda mãga–e. Taipa wãarata jarateepata. 9 Eperãarã ûk'uruurãpa jara p'anù: “Jã Pablo eperã jîp'aa. ¿K'ãare–it'ee iru pedee ûridaima?” Mamîda Tachi Ak'õrepa mù k'îra Cristodeerãmaa pia k'awapipari. Taipa k'awa p'anù atu p'anùde piudai k'achia beerã juapa. Mamîda at'ãri chok'ai p'anù. Awaraarãpa tai p'ua oopata mãik'aapa miapipata. Mamîda tai peeda–e. 10 Wãara, edaare tai k'îra pia–ee p'anù. Mamîda Tachi Ak'õrepa ichita waya tai t'ãri o–îapipari. Ma awara tai net'aa mak'ùara wêe p'anù. Mamîda ne–inaa pia teepata awaraarãmaa jarateedak'ãri Cristopa ooda ãchi k'aripait'ee. Na p'ek'au eujãdepema net'aa wêe chitoonù mîda, iru p'anù jõma Tachi Ak'õrepa k'îsia iru bù ichideerã–it'ee.
11 Âpemaarã Corinto p'uurude p'anùùrã, taipa parãmaa jîp'a jaramaa p'anù jõma tai t'ãride iru p'anù. 12 At'ãri taipa parã k'inia iru p'anù. Jõdee parãpa tai k'inia iru p'anada–e naawedapemak'a. 13 Mùa parã ûraait'ee ak'õrepa ichi warra ûraaparik'a. T'ãripa tai k'inia iru p'anapatáatù taipa parã k'inia iru p'anapatak'a.
Ijãadak'aa beerã ome k'õp'ãyo meraadaik'araa bù
14 K'õp'ãyo meraanáatù Cristode ijãadak'aa beerã ome. Eperãpa Cristode ijãak'ãri, ne–inaa pia oo k'inia bapari. Mamîda Cristode ijãa–e bak'ãri, ne–inaa k'achia oo k'inia bapari. Auk'a p'anadak'aa. Chi pia oo k'inia bùpa mãga oopari k'awa bairã Cristopa mãga oopipari. Mamîda chi k'achia oo k'inia bùpa mãga oopari Tachi Ak'õre k'awa–e bairã. Âdaa pùk'a bùde p'anùùrã auk'a nipadak'aa p'ãriu pùk'a bùde p'anùùrã ome. 15 Cristo k'õp'ãyo–e Netuara Poro Waibùa Belial apata ome. P'oyaa auk'a nipadak'aa. Ichiaba Cristode ijãapari p'oyaa auk'a nipak'aa ijãadak'aa beerã ome. 16 Tachi Ak'õre ichita chok'ai bapari. Iru Cristode ijãapataarã ome bapari. Mapa tachi iru ték'apù p'anù. Iru ba k'iniak'aa ne–inaa aù k'îrapite ùt'aa t'âpata tede, ma te ijãadak'aa beerãdé perã. Ba k'iniak'aa ijãadak'aa beerã ome. Maperãpù ãra ome k'õp'ãyo meraadaik'araa bù. Tachia k'awaadai Ak'õrepa mãga k'inia bù ichi chonaarãwedapema ley p'ãdade jara bairã:
‘Mù ãra t'ãide ãra t'ãri chaa bapariit'ee. Mù ãra Ak'õre pait'ee. Jõdee ãra mùchideerã padait'ee.’ (Levítico 26.12)
17 Tachi Ak'õre wãara mãgá bapari perã ichideerã ome, ichiaba jara bù awara ãi ma ley p'ãdade:
‘Ãyaa wåtù ijãadak'aa beerã ik'aawaapa. Oonáatù ãchia ne–inaa k'achia oopatak'a. Mãpaipù mùa parã pia ak'ùpariit'ee.’ (Isaías 52.11)
18 ‘Mù parã Ak'õre pait'ee. Jõdee parã mù warrarã padait'ee.’ (2 Samuel 7.14)
Mãga jara bù Tachi Ak'õre Waibùapa.