7
1 Âpemaarã k'iniarã, Tachi Ak'õrepa mãga jarada perã, oo amaadáma ne–inaa k'achia k'îra t'ãdoo; tachi k'ap'ùapa oopata mãik'aapa t'ãridepai k'îsiapata oodait'ee. Ma k'achia oodai k'ãyaara, ne–inaa jõmaweda oodáma Ak'õrepa oopi bùk'a. Mãga oodak'ãri, Tachi Ak'õremaa ak'ùpidai iru wãara waawee p'anù.Corinto pidaarãpa Pablo pedee ûridap'edaa
2 Taimaa k'awapítù wãara tai k'inia iru p'anù. Parã t'ãide nipadak'ãri, taipa apidaamaa ne–inaa k'achia ooda–e paji. Ichiaba apidaamaa jarateedak'aa paji Ak'õrepa jarapida awara, mãgùde ijãadamerã. Ma awara eperã apida k'ûradak'aa paji. 3 Mùa mãga jarak'ãri, jara–e bù parã k'îsia p'uapiit'ee. Mùa et'ewapai jaradak'a na k'art'a p'ã bùde, t'ãripa taipa parã k'inia iru p'anù. Tai chok'ai p'anù misa mãik'aapa piuruta pùjida, parã mãgá k'inia iru p'anadait'ee, parã tai ome auk'a Cristodeerã perã. 4 T'ãripa mùa nãga jara k'inia bù. Mù t'ãri o–îa bù parã ome, k'awa bairã parãpa oo k'inia p'anù mùa ûraa bùk'a. Tachi Ak'õrepa mù mãgá o–îapi bù, tai at'ãri chupùria chitoonù mîda.
5 Nama Macedonia eujãde pachedak'ãri, p'oyaa k'ãiwee p'anadak'aa paji. Tai wãrutamaa awaraarãpa tai ome nepùra jùrùpachida. Ma awara t'ãridepai tai k'îsia jõnapachida. 6 Mamîda Tachi Ak'õrepa chi k'îsia jõnùùrã t'ãri o–îapipari pipùara bù. Mãgá tai t'ãri o–îapiji Tito nama pachek'ãri. 7 Ichiaba tai t'ãri o–îapiji Titopa nepùrùda ûridak'ãri. Irua taimaa jaraji parãpa iru t'ãri o–îapidap'edaa parã t'ãide bak'ãri. Jaraji parãpa mù unu k'inia jõnù. Ichiaba jaraji parã k'îsia p'ua jõnù, parãdepema ûk'uruurãpa mù ãpùte pedee k'achia jaradap'edaa perã. Maap'eda Titopa jarak'ãri parãpa mùa ûraadak'a wãara oo k'inia p'anù, mù audupùara o–îa beeji.
8 Mùa k'awa bù chi awaraa k'art'a parãmaa p'ã pëidade parã k'îsia p'uapiji. Mãga ooji mîda, mù k'îsia p'ua–e. Wãara ma k'art'a pëik'ãri, mù k'îsia p'ua bak'aji, k'awada perã ma k'aurepa parã k'îsia p'ua p'anadai, taarã–e mãgá p'anajida mîda. 9 Mamîda ârá k'îsia p'ua bai k'ãyaara, mù o–îa bù. O–îa–e bù parã mãgá k'îsia p'ua p'anadap'edaa perã. Mù o–îa bù parãpa ma k'îsia k'achia mù ãpùte iru p'anadap'edaa ârá k'îra atuadap'edaa perã. Wãara mùa parã k'îsia p'uapi–e paji. Ak'õrépata mùmaa mãga p'ãpiji parãpa oodamerã irua oopi k'inia bùk'a. 10 Wãara Tachi Ak'õrepa eperãarã k'îsia p'uapik'ãri, mãga oopari ãchia ne–inaa k'achia oo amaadamerã mãik'aapa Cristode ijãadamerã. Mãgá irude ijãadak'ãri, k'îsia p'ua p'anada–e. Jõdee awaraarã, ãchia p'ek'au k'achia oopata k'aurepa k'îsia p'ua jõnù mîda, ma p'ek'au k'achia oo amaada–e. Maperãpù atuadait'ee. 11 Taipa k'awa p'anù wãara Tachi Ak'õrépata parã k'îsia p'uapi baji, parãpa tai ome isapai t'ãri auk'a bù k'inia p'anadap'edaa perã. Ichiaba jõma k'awapijida taimaa, parã pia ak'ùdamerã. Ichiaba parã k'îrau p'anajida chi nepùra jùrù p'anùùrã ome. Ma awara waawee p'anajida, mãgùùrã k'aurepa Tachi Ak'õrepa parãmaa ne–inaa k'achia ooi jîak'aapa. Ichiaba iidijida mùa waya parã ak'ùnamerã. Parãpa ne–inaa pia oo k'inia p'anù Ak'õrepa oopi bùk'a, yiaraa iru ba k'inia p'anadairã chi nepùra jùrùdap'edaarã. Ma jõma oo p'anùùpa taimaa k'awapi p'anù parã wãara ma nepùrade t'îu k'iniada–e paji. 12 Ma k'art'a parãmaa p'ãk'ãri, k'îsia–e paji chi k'achia oo badade. Ichiaba k'îsia–e paji chi apema ma k'achia oodapa t'ãri p'uapidade. Ma k'art'a p'ãk'ãri, mùa k'inia baji Tachi Ak'õre k'îrapite k'awaadamerã parãpa tai wãara pia ak'ùpata Ak'õrepa pëidak'a. 13 K'awaadak'ãri parãpa tai wãara mãgá ak'ùpata, tai t'ãri o–îa p'aneejida.
Mamîda audupùara o–îa p'anù Tito auteebaidap'edaa perã iru parãmaa wãk'ãri. Mãga oodak'ãri, iru ichiaba t'ãri o–îapijida. 14 Tito nãik'aapa parãmaa wãi naaweda, mùa irumaa jaraji parãpa mãga oodai. Wãara oojida mùa jaradak'a. Mù k'îra nejasiapida–e paji. Mùa wãarata parãmaa jaraji ma p'ãdade mãik'aapa parãpa wãara oojida mùa Titomaa jaradak'a. 15 Mãga oodap'edaa perã, Titopa parã audupùara k'inia iru bù naawedapema k'ãyaara. K'irãpa bù parãpa oojida jõmaweda irua oopidak'a. Mãga oojida waawee p'anadap'edaa perã, pãchia oo k'iniata oodait'ee. Jîp'a oo k'inia p'anajida Ak'õrepa jarapidak'a Tito it'aideepa. 16 Maperãpù mù o–îa bù. Mùa k'awa bù ne–inaa jõmaade parãpa mùa jara bùk'a oo k'inia p'anù.