Cristode ijãapataarãpa p'arat'a teedaipia bù<R>awaraarã k'aripadait'ee
8
1 Âpemaarã, parãmaa mùa nepùrù k'inia bù Tachi Ak'õrepa ne–inaa pia ooda Macedoniadepema ijãapataarã t'ãide. 2 Nepùrade p'anajida mîda, Tachi Ak'õrepa ãra o–îapipachi. Mãgá o–îa p'anapachida mak'ùara p'arat'a wêe chitoonajida mîda. Mãgá chitoonùde ãchi p'arat'a iru p'anùdepema waibùa teejida awaraarã k'aripadait'ee. 3 Teejida ãchia p'oyaarutapai mãik'aapa aù ârù waa teejida. Mùa mãga jara bù mùchi taupa mãga unuda perã ãra t'ãide nipak'ãri. Eperã apidaapa ãramaa jarada–e paji mãgá teedamerã. Teejida t'ãripa tee k'inia p'anadap'edaa perã. 4 Mãgá k'aripa k'inia p'anadap'edaa perã, taimaa enenee jõnajida ãchia p'e aneedap'edaa jitadamerã mãik'aapa ateedamerã ijãapataarã Judea eujãde chupùria beerãmaa. 5 Mamîda ma teedap'edaa k'ãyaara ne–inaa piara oojida. Taipa k'îsiada–e paji mãga oodai. Ùt'aa t'âjida Tachi Waibùamaa jaradait'ee ãchia oo k'inia p'anù irua oopi bùk'a. Mãpai jarajida taimaa ãchia oo k'inia p'anù taipa oopirutak'a. Mãga oojida ijãa p'anadap'edaa perã ãramaa Ak'õrepa mãga oopi baji.6 Macedoniadepemaarãpa oo p'anù unudap'eda, taipa Titomaa chupùria iidijida iru waya parã k'aripade wãmerã, t'ãri piapa parãpa p'arat'a ichiaba p'eruta misa tee pëidait'ee. Irua naaweda k'aripadak'a ewaa ma p'arat'a p'e wãdak'ãri, ârá auk'a k'aripait'ee jõma p'e aupadamerã. 7 Parãpa Cristode pia ijãapata. Ichiaba awaraarãmaa pia jarateepata Cristopa ooda eperãarã k'aripait'ee. Pia k'awapata Cristopa oopi k'inia bù parãmaa mãik'aapa pia k'îsiapata awaraarã k'aripadait'ee. Ma awara taimaa pia ak'ùpipata tai k'inia iru p'anù. Ma jõma ne–inaa pia oopatak'a taipa k'inia p'anù auk'a chupùria beerã pia k'aripadamerã pãchi p'arat'a tee p'anùùpa.
8 Mãga jarak'ãri, mùa jara k'inia–e: “Waibùa téetù.” Jîp'a nepùrùji Macedoniadepema ijãapataarãpa oodap'edaa parãpa auk'a teedamerã, t'ãripa mãga oo k'inia p'anadairã. Mãgá teeruta pùrã, jõmaarãmaa ak'ùpidait'ee awaraa ijãapataarã auk'a k'inia iru p'anù, ãra k'îra k'awada–e p'anù mîda. 9 Parãpa k'awa p'anù Tachi Waibùa Jesucristopa ooda ak'ùpiit'ee parã k'inia iru bù. Ùt'ari Tachi Ak'õre k'îra wãreede bapachi mîda, eperãarã chupùria k'awaa bapachi. Maperã ichia Ak'õre eujãde iru bada jõmaweda atabëiji chupùria nâba cheit'ee na p'ek'au eujãde. Mãga ooji parã o k'achiadeepa k'aripa ata k'inia bada perã, irude ijãadap'eda, Ak'õre truade iru ome p'ananadamerã.
10 Ârá mùa parã ûraait'ee apema año p'arat'a p'e wãdap'edaa p'e aupadamerã. Parãpa apemaarã ijãapataarã k'ãyaara naapùara k'îsia iru p'anajida p'arat'a p'e teedait'ee chupùria beerãmaa. O–îa p'anajida mãgá k'aripa k'inia p'anadap'edaa perã. 11 Mãgá t'ãripa tee k'inia p'anadap'edaak'a, ârá auk'a t'ãri o–îa tee k'inia p'anadaipia bù, p'arat'a mak'ùara wêe p'anù jida pëidait'ee. 12 Tachi Ak'õrepa ak'ùpari tachi t'ãride iru bù. Ichia k'inia bù t'ãripa tee k'inia p'anadamerã. Ma–ãri iru p'anù pùrã, ma–ãri teedai t'ãri piapa. Jõdee waibùa iru p'anù pùrã, waibùa teedai t'ãri piapa. Teedait'ee wêe p'anù pùrã, ¿sãga teedai?
13 Mùa k'inia–e parã chupùria p'aneedamerã awaraarã k'aripa k'iniapa. 14 Nãgapai mùa k'inia bù: auk'a iru p'anadamerã te, chik'o mãik'aapa p'aru. Ârá parãpa awaraarã k'ãyaara waapùara iru p'anù pùrã, teedai ãra k'aripadait'ee. Jõdee parã chupùria jõnadak'ãri, ãrapa parãmaa teedai. 15 K'awa p'anù Tachi Ak'õrepa ichia jùrùt'erada eperãarãmaa teepari mãgá jededamerã, iru chonaarãwedapema ley p'ãdade jara bairã:
‘Chi maná waibùara p'edap'edaarãpa waibùara jitada–e paji. Jõdee ma–ãriara p'edap'edaarãpa ma–ãriara jitada–e paji. Jededak'ãri, auk'a jita wãjida.’ (Éxodo 16.18)
Pablopa Tito Corinto p'uurudee pëiit'ee bada
(1 Corintios 16.1-4)
16 Mùa gracias jara bù Tachi Ak'õremaa irua parã k'aripamaa bairã Titopa oo bù k'aurepa. Mùa ooparik'a Titopa auk'a parã k'aripa k'inia bù. 17 Mùa mãga k'awa bù iru o–îa bada perã chupùria iididak'ãri irumaa parã ak'ùde wãmerã. Audú wã k'inia nâbaji. Wãara taipa mãga iididai naaweda, k'îsia iru baji wãit'ee. Mapa wãit'ee mãga k'inia bairã.
18 Tito ome awaraa âpema auk'a pëidait'ee. Ijãapataarã bee chaa nama Macedonia eujãde jõmaarãpa mãgà k'awa p'anù, Cristopa ooda eperãarã k'aripait'ee pia jarateepari perã. 19 Ma ijãapataarãpa mãgà jùrùt'erajida auk'a tai ome nipamerã, p'arat'a p'e atee wãrutade Judeadepema chupùria beerãmaa. Ma p'arat'a tee pëi p'anùùpa tachia jõmaarãmaa ak'ùpidai oo k'inia p'anù Tachi Ak'õrepa oopi bùk'a. Irua ne–inaa tachimaa teepari, tachia jõdee teedamerã chupùria beerã k'aripadait'ee, ma awara ak'ùpidait'ee ma ijãapataarã chupùria beerãmaa tachia wãara ãra k'aripa k'inia p'anù. 20 Ma âpema mãgá Tito ome pëidait'ee irua k'aripamerã ma p'arat'a waibùa p'e ateeru misa. Mãgá tai ùmùateepataarãpa pedee p'anada–e pai tai ãpùte, p'arat'a ûk'uru chùadai jîak'aapa. 21 Ichita ne–inaa k'îra jîp'a oo k'inia p'anù Ak'õre k'îrapite mãik'aapa eperãarã k'îrapite.
22 Âpema awaraa ichiaba pëidait'ee ãra ome. Irua tai ichita k'aripa k'inia bù mãik'aapa ne–inaa pia oopari taipa oopipatak'a. Irua k'awaak'ãri Tito parãmaa wãru mãik'aapa parã t'ãri piapa auk'a p'arat'a tee pëidait'ee, o–îa auk'a wã k'inia baji. 23 Parã t'ãidepemapa Tito k'awa–e bù pùrã, jarátù iru mù k'õp'ãyo pia na mimiade. Mù ome mimiapari parã k'aripait'ee. Iidiruta pùrã apema omé nidaarã pari, jarátù nãpema ijãapataarãpa ãchi pari pëidap'edaa, ichiaba auk'a k'aripadamerã. Mãùrã wãrutamaa k'awapipata jõmaarãmaa Cristota Tachi Waibùa. 24 Mãùrã araa panadak'ãri, ak'ùpítù ãra k'inia iru p'anù tai k'inia iru p'anùk'a. Mãgá waya wãdak'ãri ãchi p'anapatamaa, nepùrùdai parãpa ãra pia ak'ù p'anadap'edaa. Mãgá ãra pëidap'edaarãpa k'awaadai wãara taipa jaradak'a parãpa wãara nejõmaata pia oo k'inia p'anù.