Ijãapataarãpa awaraarãmaa p'arat'a teedaipia bù
9
1 Wãara na p'ãdade mùa parãmaa waa jara–e pùjida, k'awa bù parãpa ma p'arat'a p'e tee pëidait'ee ijãapataarã chupùria beerãmaa. 2 Mãga k'awa bù parãpa wãara chupùria beerã k'aripa k'inia p'anadairã. Año aba paru parã Acaya eujãdepema ijãapataarãpa ma p'arat'a p'emaa p'aneedap'edaa. Mãga oo p'aneedak'ãri, taipa o–îa nepùrùjida na Macedoniadepema ijãapataarãmaa. Mãga ûridak'ãri, ãrapa auk'a k'aripa k'inia p'aneejida. 3 Maperãpù taipa Macedoniadepema âpemaarã omé auk'a pëiruta Tito ome, parãpa ãramaa ak'ùpidamerã wãara oojida taipa jaradak'a. Mùa k'inia bù ma p'arat'a p'e iru p'anadamerã, aramãgá tee pëidait'ee. 4 Mù jãma panak'ãri, awaraa Macedoniadepema âpemaarã auk'a cheruta pùrã mù ome mãik'aapa parãpa waide ooda–e pùrã taipa jaradak'a ãchimaa, tai k'îra nejasia p'aneedai; parã jida ichiaba. 5 Mapa mùa chupùria iidiji Titomaa iru chi apema âpemaarã ome mù naa wãdamerã. Mãgá ãrapa parã k'aripadai parãpa k'îsia iru p'anadap'edaak'a; p'arat'a jõmaweda p'e iru p'anadamerã mù panaru misa. Mãgá ichiaba apidaapa jarada–e pai mùa parãmaa teepida. Mùa k'inia bù parãpa t'ãri pia teedamerã pãchia tee k'iniata.6 ¡K'irãpátù! Eperãpa eujã ma–ãriide ne–uuk'ãri, mak'ùara ewa–e. Jõdee chi eujã waibùade ne–uu bùpa waibùa ewapari.a 7 Eperã chaachaa teeipia bù ichi t'ãride k'îsia bùk'a. Teeik'araa bù teeamaa bùde wa awaraapa irumaa teepi bairã. Tachi Ak'õrepa chi t'ãri pia teepari k'inia iru bù. 8 Parãpa mãgá t'ãri piapa teeruta pùrã, Tachi Ak'õrépata parã k'aripai iru p'anadamerã te, chik'o mãik'aapa p'aru. Ma awara irua k'aripai audupùara iru p'anadamerã k'aripadait'ee awaraarã parã k'ãyaara chupùriara chedee. 9 Tachi Ak'õre chonaarãwedapema ley p'ãdade jara bù:
‘Eperã t'ãri pia bùpa ne–inaa pia oopari chupùria beerãmaa t'ãri pia bairã. Maperãpù Tachi Ak'õrepa mãgà ichita pia ak'ùpariit'ee.’ (Salmos 112.9)
10 Tachi Ak'õre, chi net'a tau oodapa ne–uu chaupipari, jõmaarãpa iru p'anadamerã k'odait'ee. ¿Audupùara teei–ek'ã chi t'ãri pia p'anùùrãmaa ãchia awaraarã k'aripadamerã? 11 Tachi Ak'õrepa mãga oopari perã, parãmaa auk'a teeit'ee, parã auk'a t'ãri pia p'anadairã. Mãgá parãpa waibùa iru p'anadait'ee tai ome tee pëidait'ee Judeadepema chupùria beerãmaa. Mãpai o–îapa ãchia gracias jaradait'ee Tachi Ak'õremaa ma p'arat'a tai juadepema jitadak'ãri. 12 Mãgá parãpa k'aripadait'ee ãrapa iru p'anadamerã k'odait'ee mãik'aapa jâdait'ee. Mamîda ichiaba k'aripadait'ee ãrapa Tachi Ak'õremaa gracias jaradamerã. 13 Ma awara nãgá pia tee p'anùùpa awaraarãmaa mãik'aapa ãramaa, k'awaadait'ee parãpa Jesucristode wãara ijãapata mãik'aapa oo k'inia p'anù irua oopi bùk'a. 14 Ichiaba ãrapa parã k'awa k'inia p'anadait'ee mãik'aapa ùt'aa t'â k'inia p'anadait'ee parã pari, Tachi Ak'õrepa parã mãgá k'aripapari perã. 15 Gracias jaradáma Tachi Ak'õremaa irua jõmaarã k'ãyaara ne–inaa pipùara bù teeda perã, ichi warra pëik'ãri tachi k'aripade. Pedee wêe pùk'a p'anù ma pari irumaa gracias jaradait'ee.