Pablopa jarada ichi wãara Cristopa pëida
10
1 Ârá mù, Pablopa parã ûraait'ee Cristopa ûraadak'a na eujãde nipak'ãri. Irua t'ãri pia, k'îrau–ee ûraaji. Mùa k'awa bù parã t'ãidepema ûk'uruurãpa jara p'anù mù waawee pùk'a bù parã k'îrapite bak'ãri;* jõdee k'art'a p'ãk'ãri, audú ùtrùa pedee jarapari. 2 ¿Mãùrãpa jara p'anù–ek'ã mùchi k'îsiadoopapai jaratee nipapari, jarateepataarã jîp'aarãpa oopatak'a? Mapa parãmaa mùa enenee nâbù mãùrã ik'aawaapa uchiadamerã mù jãma pai naaweda. Mãga jara bù mùa wãara ãchi ùtrùait'ee perã, Ak'õrepa mùmaa mãgá pedeepiru pùrã. 3 Wãara, tai na eujãde p'anapata eperãarã jîp'aarãk'a. Mamîda mãùrãk'a tai aupedeedak'aa. 4 Mãùrã pedee wêsaa, imeraa pedeepata. Mamîda tai jîp'a pedeepata Ak'õrepa pedeepi bùk'a. Mãgá jõpipata jõma ãchia k'îsia iru p'anù Cristode ijãapataarã ijãa amaapidait'ee. 5 Taipa jõpipata ãchia seewa jarapata, Ak'õrepa tai it'aideepa wãarata jarak'ãri. Ma awara Ak'õrepa tai k'aripapari p'anaudamerã jõma ãchia Cristo ãpùte seewa jarapata. Mãgá ãchia wãara k'awaadai Ak'õrepa k'îsia iru bada ooit'ee Cristo k'ap'ùa pari. Ichiaba taipa Cristopa ooda ãchi–it'ee jarapata, ãchia auk'a wãara irude ijãadamerã. 6 Mamîda mãgá ijãa k'iniada–e p'anù pùrã, ãchi t'ãri p'uapidai Ak'õrepa oopi bùk'a. Taipa mãga oodait'ee parãpa ak'ùpidak'ãri wãara oo k'inia p'anù taipa jara p'anùk'a.7 Parã Corintodepemaarãpa eperãarã ârùpai ak'ùpata. Ãchi k'îra ak'ùpata mãik'aapa ãchia audua pedee jara jõnù ûripata, ãchi t'ãride iru p'anù k'awa k'inia p'anadai k'ãyaara. ¿Mãga–ek'ã? Parã t'ãidepemapa k'îsia bù pùrã ichita wãara Cristopa pëida jarateemerã, auk'a k'awaaipia bù tai jida Cristopa pëida. 8 K'îra nejasia–ee mùa nãga jarait'ee. Tachi Waibùapa wãara jarapari tai it'aideepa mãik'aapa parã bùji tai jua ek'ari, taipa parã k'aripadamerã iru pari. Mapa taipa maarepida parãmaa ijãa amaapidak'aa. Jîp'a k'aripapata pipùara Cristode ijãadamerã. 9 Mùa parã p'erapi k'inia–e bù k'art'a p'ãdade pedee bùpa. 10 ¿Mù ãpùte pedeepataarãpa jara p'anù–ek'ã: “Pablopa k'art'a parãmaa p'ãk'ãri, audú ùtrùa pedee jarapari. Mamîda ichi parã k'îrapite bak'ãri, waawee pùk'a nâbeeparida” a jõnù–ek'ã? 11 Mãùrãpa k'awaadaipia bù ãchia jaradak'a, mùa wãara ùtrùa pedee jarait'ee, mamîda ãchi k'îrapite panak'ãri.
12 Taipa ooda–e ãchia oopatak'a. Ãchia mãgapata: “Taipa jara p'anùk'a, Cristopa pëida eperãarã mãgá p'anadaipia bùda” apata. Mãpai ãchi pitapai mãgapata: “Táipata jõmaarã k'ãyaara Ak'õre net'aa pipùara k'awa p'anùda” apata. Mãùrãpa awaraarã ak'ùda–e Tachi Ak'õrepa ak'ùparik'a. Irua k'awapari eperã t'ãride iru bù. Jõdee ãchia ârùpai ak'ùpata. Chi mãgá oo p'anùùrã k'îsia k'awada–e p'anù. 13 Tachi Ak'õrepa k'awa bù tai t'ãride iru p'anù. Taipa pida ichiaba k'awa p'anù. Iruata tai pëiji judio–eerã t'ãidee Cristopa ooda jarateede chi waide ûrida–ee p'anùùrãmaa. Maperãpù parã t'ãide jaratee nipajida. Oojida Ak'õrepa oopidak'a. 14 Ak'õrepa tai parãmaa pëi–e pada paara, maarepida jarateeda–e pak'aji. Mamîda mãga–e paji. Irua tai naapùara pëiji parã t'ãidee, jarateedamerã Cristopa ooda eperãarã k'aripait'ee. 15 Mamîda ¿mù ãpùte pedeepataarãpa jara jõnù–ek'ã ãchiata Ak'õre net'aa pia jarateepata? Mãga jarapata parãpa ãchi mù k'ãyaara pipùara ak'ùdamerã. Taipa mãgá oodak'aa. Jîp'a taipa k'inia p'anù parãpa pipùara k'awaa k'inia p'anadamerã Cristopa parãmaa oopi k'inia bù. Mãga k'awaadak'ãri mãik'aapa wãara oodak'ãri irua oopiparik'a, parãpa tai audupùara k'aripadai na mimia ome. 16 Tai mãgá k'ariparuta pùrã, parã t'ãideepa t'ùmùpùara wãdai jarateede. T'îu k'iniada–e awaraa jarateepataarã mimia p'anùmãi, tai nipada–e perã awaraa jarateepataarã nipapatak'a. Ãchia ne–inaa ooda–eeta jara nipapata ne–inaa oodak'a.
17 Tachi Ak'õre Ûraa p'ãdade jara bù:
‘Eperãpa jara k'inia bù pùrã ichiata ne–inaa k'awaara bù awaraarã k'ãyaara, mãga jaraipia bù ichia k'awaa bairã Tachi Ak'õrepa iru pia ak'ùpari.’ (Jeremías 9.23-24)
18 Parãpa chi pedee audua pedeepari pia ak'ùdaik'araa bù. Jîp'a pia ak'ùdaipia bù eperã Tachi Ak'õrepa pia ak'ùpari.