Pablopa jarada ichi ãpùte pedeepataarã Cristopa pëida–e
11
1 Ârá mùa k'inia bù parãpa choodamerã mù k'îsia k'awa–ee pùk'a pedee bù misa. Mù chupùria k'awáatù. Mamîda mãgá pedeei naaweda, mùa nãga jara k'inia bù. 2 Tachi Ak'õrepa parã k'inia iru bùk'a, mùa pida parã k'inia iru bù. Ara eperãpa ichi k'au jiwaaparik'a iru araa pai naaweda chi ùmùk'îra ome, mãga pùk'a mùa parã jiwaa pùk'apari. K'inia bù Cristodepai ijãadamerã mùa parãmaa jarateedak'a. 3 Mamîda mùa waawee bù Netuara Poro Waibùapa chi naapùara wêra Eva k'ûradak'a, parã jida auk'a k'ûrai jîak'aapa. Irua imeraa pedeeji Evamaa taama it'aideepa, Evapa Tachi Ak'õrepa jarada ijãa amaamerã. Ârá auk'a parãmaa imeraa pedee bù mù ãpùte pedeepataarã it'aideepa, parã Cristode ijãa amaa wãdamerã. 4 Jarateepari tai awara parã t'ãide panak'ãri, ¿parã k'ùùrù êesaa p'anù–ek'ã ûridait'ee mãgùpa jara bù? Parã mãga p'anù, mãgùpa jaratee ni mîda Jesús awara bù taipa jarateedap'edaa k'ãyaara. Ichiaba mãgá ûri k'inia p'anù, mãgùpa jaratee bù mîda Tachi Ak'õre Jaure awara bù taipa jarateedap'edaa k'ãyaara. ¿Taipa parãmaa jarateeda–e pajik'ã Cristopa tachi o k'achiadeepa k'aripa atapari iru piuda k'aurepa? Mãga bùta, ¿sãap'eda parãpa ûri k'inia p'anùma mãgùpa jaratee bù? 5 Parãpa mãgà ‘Cristopa pëida pipùara bù’ chi k'õp'ãyoorã ome pipùara ak'ù p'anù mîda Ak'õrepa pëida k'ãyaara, mùa ãchi mãga ak'ù–e. Mù ãchi k'ãyaara ek'ariara bù–e, Ak'õrepa mù na mimia oode pëida perã. 6 Wãara, mùa pedee wêsaa pedeek'aa ãchia oopatak'a. Mamîda pia k'awa bù mùa jaratee bù. Parãpa pia k'awa p'anù taipa ichita ne–inaa jõmaweda k'îra jîp'a jarateepata.Pablopa Corinto pidaarã juadepema p'arat'a jita k'inia–e pada
7 ¿Parãpa k'îsia p'anùk'ã mùa ne–inaa k'achia ooji parã juadepema p'arat'a jita–e pak'ãri? Parã t'ãide bak'ãri, mùchi juadoopa mimia bapachi p'arat'a jitait'ee chik'o–it'ee. Jõdee mùa Tachi Ak'õre pedee pia jarateeji parãpa pipùara k'awaadamerã Cristopa parãmaa oopi k'inia bù. Jaratee–e paji parã p'arat'a jita k'iniapa. 8 Ma k'ãyaara p'arat'a jitaji awaraa ijãapataarã juadepema. Ãra p'arat'a jãri pùk'a ataji parã k'aripait'ee. 9 Ma awara parã t'ãide bak'ãri, p'arat'a wa ne–inaa wê–e pak'ãri, mùa parãmaa maarepida iidi–e paji. Macedoniadepema âpemaarã mùmaa chedak'ãri, mù k'aripajida. Mamîda mùa parãmaa iidi–e paji mãik'aapa iidi–e pait'ee waya parã ak'ùde wãk'ãri. 10 Mùa wãarata jara bù Cristopa wãarata jaradak'a. Acaya eujãdepema apidaapa mùa jarada awara mùmaa oopida–e pait'ee. 11 K'îsianáatù mùa parã p'arat'a jita k'inia–e paji, parã k'inia–e bada perã. Tachi Ak'õrépata k'awa bù mùa parã k'inia iru bù. 12 Mùa parã p'arat'a jita k'inia–e nãga perã. ¿Mù ãpùte pedeepataarãpa jara p'anù–ek'ã ãchi wãara Cristopa parãmaa pëida, parãpa p'arat'a p'aapata perã ãchi mimia pari? P'arat'a iidi wãpata ãchi wãrutamaa. Mamîda taipa mãga oodak'aa. ¿Jara p'anù–ek'ã ãchi auk'a p'anù tai ome? Mamîda taipa p'arat'a iididak'aa tai jarateepata pari.
13 Mãgee eperãarã Cristopa pëida–e. Ãchita Cristopa pëidada a p'anù mîda, mãga p'anù–e. Jîp'a k'ûrayaa p'anù. Seewata jaratee nipapata Cristopa pëida eperãarãk'a. 14 Parã p'era pùk'a p'anadaik'araa bù k'awaadait'ee ãchia mãgá k'ûra nipapata. Netuara Poro Waibùa seewata ùt'aripema ángel k'îra wãree pùk'a padaipari eperãarã k'ûrait'ee. 15 Mãgá ichi mimiapataarã auk'a seewata Cristopa pëidak'a padaipata. Mãga oopata eperãarãmaa ijãapidait'ee ãchia jara p'anùk'a oodaipia bù Ak'õre eujãdee wãdait'ee. Mamîda ma jara p'anù k'aurepa Tachi Ak'õre ewari waibùa ewate irua mãgùùrã miapiit'ee, iru k'îrapite panadak'ãri.
16 Waya chupùria iidiit'ee parãpa mù pedee ûridamerã. Parãdepema ûk'uruurãpa mù k'îsia k'awa–ee pùk'a ak'ù p'anù mîda, mù ita–aria pedeepítù. 17 Tachi Waibùapa mùmaa jarapi–e mùa ârá jarait'ee. K'îsia k'awa–ee pùk'a mùa nãgà pedee audua pedeeit'ee ma seewa jarateepataarãpa oopatak'a. 18 Mãgùùrãpa jarai awaa p'anadairã ãchia oo p'anù, mùa auk'a jarait'ee mùa ooda. 19 Mãgùùrãpa parã k'îsia k'awaa p'anùda a jõnapata. ¿Mãga–ek'ã? Mamîda parã pia choopata ûridak'ãri ma k'îsia k'awa–ee beerãpa jara jõnù. 20 Wãara pia choopata ãchia parã chok'a p'anù mîda ãchi esclavoorãk'a. Ichiaba choopata ãchia parã k'ûra p'anù mîda imeraa pedee p'anùùpa, p'arat'a teedamerã maa–e pùrã ijãadamerã ãchia jaratee p'anù. Ichiaba mãgá choopata ãchi audua nida mîda pãchi t'ãide, k'îsia p'anadairã parã k'ãyaara ne–inaa jõma pipùara k'awa p'anù. Ma awara parã mãgá choopata ãchia parãmaa ik'achia jara p'anù mîda. 21 Mù k'îra nejasia pùk'a bù taipa mãga ooda–e p'anadap'edaa perã parãmaa wãdak'ãri. Mamîda tai waawee pùk'a p'anadairã, mãga ooda–e paji. ¿Wãara–ek'ã?
Ârata mù k'îsia k'awa–ee pùk'a pedeeit'ee. Mù ãpùte pedeepataarãk'a mùa ooda jarait'ee.
Pablo chupùria nâbada Jesucristopa pëida perã
22 Ma seewa jarateepataarãpa mãgapata: “Táipata hebreo pedee pedeepata.” Mù jida auk'a. Ichiaba mãgapata: “Taita Ak'õre eperãarã; israelitaarã.” Mù jida auk'a. Mãgapata: “Taita Abrahamdeepa uchiadap'edaarã.” Mù jida auk'a. 23 ¿Jarapata–ek'ã? “Taita Cristo–it'ee mimiapata.” Mù ãchi k'ãyaara Cristo–it'ee pipùara mimiapari. Ârata mù eperã k'îra k'awa–ee bùk'a pedeemaa bù. Ãchi k'ãyaara mù audupùara ne–inaa k'achia p'asapari: Cristode ijãadak'aa beerãpa mù carcelde t'ù nâbùjida; mù wù iru p'anajida; mù perá piuji. 24 Mù wãda joisomaa wãru chaa judiorã waibùarãpa mù wùpipachida. Wùda treinta y nueve wùjida soopa. 25 Wãda õpee wãru chaa Roma pidaarã waibùarãpa mù pak'urupa wùpijida. Wãda abaade mù perá piuji judiorãpa mãupa mùmaa bat'adak'ãri. P'usade wãda õpeede barco pirubaaidachi mãik'aapa ma wãda abaade barco pirubaaip'eda, tok'esá mù pak'uru ârù bataudachi k'ãima aba. 26 Mù ode wã nide perá nãgá piuji: to choma nâbùde sîa wãde; nechùapataarãpa mù net'aa chùa ata cherutade; mùchi auk'aarã judiorãpa mù wawamaa p'anùde; judio–eerãpa mù p'ua oomaa p'anùde. Ma awara p'uurude bùde mãik'aapa eperãarã p'anadak'aamãi ode wãde, mù jùrùjida peedait'ee. P'usade wãdade nãumiapa barco atadachi. Edaare Cristode ijãapatada apataarãpa paara pedee k'achia jarajida mù ãpùte, mùa jarateepari perã ûraa chiwidi Moisepa p'ãda k'ãyaara. 27 K'ãima chok'ara mù âik'aa paji mãik'aapa p'oyaa k'ãi–e paji mimia nâbùpa maa–e pùrã jaratee nâbùpa. Edaare jarrapisia nâbaji maa–e pùrã opisia. Ewari chok'ara mù nek'o–e paji. Ma awara jîsua nâbaji, p'aru pia wêe bada perã. 28 Ma ne–inaa k'achiade mãik'aapa awaraa ne–inaa k'achia mùa nama jara–e bùde, mù ichita k'îsia nâbaji ijãapataarã bee chaa, ãrapa ijãa amaadai jîak'aapa. 29 Ijãapari aba juatau wêedaru pùrã, mù jida mãgadaipari. Jõdee awaraapa ma ijãapari p'ek'au k'achiade baaipiru pùrã, mù k'îraudaipari mãgà ome.
30 Mù pedee audua wãara jara k'inia bù pùrã, mãgara jarai mù juatau wêe bada, ijãadak'aa beerãpa mù miapidait'ee pak'ãri. 31 Tachi Ak'õre, Tachi Waibùa Jesucristo Ak'õrepa k'awa bù mù seewa–e bù na jõma jarak'ãri. ¡Jõmaarãpa irumaa ichita o–îa ùt'aa t'âdaipia bù, irua ne–inaa jõmaweda oopari perã ichi juapa! 32 Wãara mù Cristode ewaa ijãa bak'ãri, Tachi Ak'õrepa mù uchiapiji mù miapidait'ee p'anadap'edaarã juadeepa. Mãga paji mù Damasco p'uurude bak'ãri. Rey Aretapa jaraji ma p'uuru pidaarã ak'ùparimaa p'uuru jâa paraa bùdamerã mù jita atadait'ee. 33 Mamîda mù k'õp'ãyoorãpa mù k'aripajida. K'oraa choma bùde t'ù atajida mãik'aapa chi p'uuru ik'aawa t'ùak'au jêra bù uria badadeepa mù ùrabai pëijida. Mãgá mù mãùrã juadeepa uchiaji.