Tachi Ak'õrepa Pablomaa unupida
12
1 Mùchi k'inia ne–inaa awaraa nepùrùit'ee, parãpa k'awaadamerã mùchi ituaba na mimia p'oyaa ook'aa. Jarait'ee Tachi Waibùapa unupida mùmaa k'ãimok'araa pùk'a bùde. Ne–inaa eperãarãpa waide k'awada–e p'anadap'edaa mùmaa k'awaapiji. 2-3 Mùa Cristode ijãapari k'awa bù.a Catorce año paru Tachi Ak'õrepa iru ateeji ichi eujãdee. K'awa–e bù sãgá wãji, k'ap'ùade wa jauredepai. Tachi Ak'õrépata k'awa bù. Iru mãgá ateeji ichide wãara ijãa bada perã. 4 Mama ùt'ari bùde irua ûriji ne–inaa Tachi Ak'õrepa apidaamaa jarapik'aa. 5 Pedee audua wãara jara k'inia bada paara, mùa waapùara ma ùt'aa wãdade jarak'aji. Mamîda jîp'a jara k'inia bù mùchi ituabaapa p'oyaa oo–e pada. 6 Ak'õrepa mùmaa unupida audua jarak'aji, k'îra k'awa–ee pùk'a, wãara mùa mãga unuda perã. Mamîda mùa mãga oo–e pait'ee. K'inia–e bù awaraarãpa mù pia ak'ùdamerã, Ak'õrepa ichi eujã mùmaa unupida perã. Ma k'ãyaara k'inia bù mù pia ak'ùdamerã mùa jaratee bù k'aurepa mãik'aapa mù t'ãri pia bù k'aurepa jõmaarã ome.7 Ma awara audua banaamerã ma ne–inaa pi–ia unuda k'aurepa, Tachi Ak'õrepa mù miapiji Netuara Poro Waibùa eere bù juapa. Ne–ùùrù tachi k'ap'ùade awa nâbùk'a, mãga pùk'a ma netuarapa mù miapipari. Mãgá mia nâbùde, maarepida mù pedee audua pedee–e bù, mùchi ituaba aùdeepa p'oyaa uchia–e bairã. 8 Chupùria iidida õpee enenee nâbaji Tachi Waibùamaa mù waa mãgá miapinaamerã. 9 Mamîda irua p'anauji: “Mãga–eda aji. Mùa pù k'aripait'eeda aji, choomerã. Pù chupùria nâbak'ãri mãik'aapa choo–e pak'ãri, mùa pù k'aripait'eeda aji, choomerã.” Tachi Ak'õrepa mãga jarada perã mù k'îra nejasia–e bù jarait'ee mù chupùria nâbada. Mãgá jarai Cristopa mù k'aripapari perã choomerã. 10 Wãara t'ãri o–îa bù Cristo k'aurepa mù nãgá chupùria nâbak'ãri: mùmaa awaraarãpa ik'achia jaradak'ãri; net'aa wêe bak'ãri; mù ùmùatee iru p'anadak'ãri; mù k'îsia nâbak'ãri; mãgá nâbak'ãri. Mãgá t'ãri o–îa bai k'awa bairã mùchi ituaba p'oyaa choo–e pak'ãri, Cristopa mù k'aripait'ee.
Pablopa Corintodepema ijãapataarã k'inia iru bada
11 Parã k'aurepa mù eperã k'îra k'awa–ee pùk'a pedee audua pedeemaa bù. Paråpata mù t'o p'anadaipia bù, mùchi itu t'o bai k'ãyaara. Mù maarepida ek'ariara bù–e ma Cristopa pëida apataarã k'ãyaara, ãchia mù k'awada–e p'anùda a p'anù mîda. 12 ¿Parãpa k'irãpada–e p'anùk'ã Tachi Ak'õrepa ooda mù k'ap'ùa pari parã t'ãide nipak'ãri? Ma ooda k'aurepapai parãpa ijãadaipia bù mùta wãara Cristopa pëida. Mamîda mãga ooda–e paji. Mù k'ap'ùa pari Tachi Ak'õrepa oo bù misa ne–inaa eperãarãpa p'oyaa oodak'aa ãchi juadoopa, mù choopachi parãdepema ûk'uruurãpa mùmaa ùmùateedap'edaa. 13 Jõma mùa ooda apemaarã ijãapataarã t'ãide auk'a ooji parã t'ãide. ¿K'îsia p'anùk'ã parã apemaarã ijãapataarã ek'ariara p'anù, mùa parã juadepema p'arat'a jita–e pada perã? Mãga k'îsia p'anù pùrã, ¡mù perdonáatù!
Pablo waya Corinto pidaarã ak'ùde wãit'ee bada
14 ¡Ûrítù! Na wãrupa parãmaa wãda õpee pait'ee. Et'ewa jaradak'a mùa maarepida iidi–e pait'ee parã juadepema. Parã p'arat'a k'inia–e. Jîp'a k'inia bù parãpa wãara Cristode ijãadamerã. Warrarãpa ãchi ak'õreerã ak'ùdak'aa. Ak'õreeråpata ãchi warrarã ak'ùpata. 15 Mù parã ak'õrek'a bairã, mùa iru bù jõmaweda teei, mùchi k'ap'ùa paara, t'ãripa parãpa Cristode ijãadamerã. Mùa parã mãgá audú k'inia iru bù. Jõdee parãpa mù mak'ùara k'iniada–e iru p'anù. ¿Wãara–ek'ã?
16 Wãara mùa maarepida p'arat'a iidi–e paji parã t'ãide bak'ãri. Mamîda ¿mù ãpùte pedeepataarãpa jara jõnù–ek'ã mùa parã k'ûraji? 17 ¿Parãpa k'îsia p'anù–ek'ã mùa parã k'ûraji mù k'õp'ãyoorã pëida k'aurepa? ¡Mamîda mãga–e! 18 Wãara mùa chupùria iidiji Titomaa parã ak'ùde wãmerã mãik'aapa iru ome awaraa âpema pëiji. Mamîda parãpa pia k'awa p'anù Titopa parã k'ûra–e paji, iru auk'a mùk'a t'ãri pia bapari perã parã ome. Auk'a parã k'aripa k'inia p'anapata.
19 ¿Parãpa k'îsia p'anùk'ã mùa ma jõma jara aupada jaraji p'anauit'ee mù ãpùte pedeepataarãmaa, mãgá parãpa mù pia ak'ùdamerã? Mãga–e. Tachi Ak'õrepa k'awa bù mù t'ãride iru bù, Cristo mù ome bapari perã. Iruata mùmaa mãga jarapiji. Âpemaarã k'iniarã, mùa ma jõma jaraji parã k'aripait'ee pipùara Cristode ijãadamerã. 20 Mamîda waawee bù mù jãmaa wãk'ãri, parã mãga unu–e pai jîak'aapa. Wãara parã waide pia ijãada–e p'anù pùrã, parãpa ichiaba mù unu k'iniada–e p'anadai. Mù jãma panak'ãri, unu k'inia–e parãpa nãga oomaa p'anù: nepùra jùrùmaa chîara ome; chîara k'îra unuamaa net'aa k'aurepa; k'îrau jõnù chîara ome; jõma k'âa jõnù pãchi–it'ee; ik'achia jaramaa chîaramaa maa–e pùrã chîara ãpùte pedeemaa; audua jõnù; pariatua ne–inaa oomaa p'anù. 21 Ma awara mùa waawee bù mù jãmaa wãk'ãri, Tachi Ak'õrepa mù waya k'îra nejasiapiit'ee, parãpa waide k'achia oo amaada–e p'anadairã. Wãara mù jêedariit'ee unuru pùrã parãdepemaarã ûk'uru at'ãri k'îsia k'achia nipapata, k'îra nejasia wêe. ¿Parã at'ãri wêraarã ome pariatua k'ãi jõnù–ek'ã, waide oo amaa k'iniada–e p'anadairã parãpa naawedapema k'achia k'îra t'ãdoo oopatap'edaa?