1 CORINTIOS
San Pablopa K'art'a Naapùara P'ãda Corinto P'uurudepema Ijãapataarãmaa
Salude pëida
1
1 Mù, Pablo, tachi âpema Cristo k'aurepa Sóstenes ome na k'art'a p'ãruta. Tachi Ak'õrepa k'inia bada perã, mù jùrùt'eraji Jesucristopa pëimerã ichi ûraa jarateede. 2 Mùa na k'art'a p'ãru parã ijãapataarãmaa Corinto p'uurude p'anù. Parãpa Jesucristode ijãa p'aneedak'ãri, Tachi Ak'õrepa parã awara bùji ichideerã p'aneedamerã. Mãga oopari jõmaweda na p'ek'au eujãdepemaarã ome, Jesucristomaa ùt'aa t'âdak'ãri. Mãgá Tachi Poro Waibùa Jesucristo ãra Poro Waibùa pai ichiaba. 3 Mùa k'inia bù Tachi Ak'õrepa mãik'aapa Tachi Waibùa Jesucristopa parã pia ak'ù p'anadamerã. Mãgá k'ãiwee p'anapataadait'ee.Tachi Ak'õrepa Cristode ijãapataarã pia ak'ù bapari
4 Ichita Tachi Ak'õremaa ùt'aa t'â bak'ãri parã pari, mùa jarapari: “Ak'õre, pù t'ãri pia bù Jesucristode ijãapataarã pia ak'ùpari perã.”
5 Cristode ijãa p'anù k'aurepa Tachi Ak'õrepa ne–inaa jõmaade parã Corinto pidaarã k'aripaji. Pia pedeepiji iru ûraa jarateedamerã. Ichiaba poro wêsaapiji k'awaadamerã irua oopi k'inia bù ichide ijãapataarãmaa. 6 Tachi Ak'õrepa mãga ooda perã, parãpa waapùara Cristode ijãajida, taipa naaweda jarateedap'edaa k'ãyaara. 7 Ma awara Tachi Ak'õrepa ma jõma ooda perã parã–it'ee, parãpa oodai ne–inaa jõmaweda iru Jaurepa oopi bùk'a ichideerãmaa, Tachi Waibùa Jesucristo cheit'ee ewari nù p'anù misa. 8 Tachi Ak'õrepa parã pia ak'ù bapariit'ee Cristo cherumaa, ma ewate iru k'aurepa parã k'achia wêe p'anadamerã. 9 Mãga ooit'ee ichia jaradak'a oopari perã. Parã jùrùji ichi Warra Jesucristo ome araa p'anapataadamerã.
Ijãapataarã k'îsia awara–awaraa p'anadap'edaa
10-11 Ma jara aupada jõmaweda wãara mîda, Cloe tedepemaarãpa mùmaa k'awapijida parã nepùrade para bù, auk'a k'îsiada–e p'anadairã. Âpemaarã, Tachi Waibùa Jesucristopa mù pëida perã, ¡ûrítù mù ûraa! T'ãri auk'a p'anapatáatù, aupedeeda–ee, Cristode ijãapata perã. Óotù irua oopi bùk'a ichideerãmaa. 12 Nãga mùmaa nepùrùjida. Ijãapataarã ûk'uruurãpa mãgapata: “Mù Pablo eere bù”; awaraarãpa: “Mù Apolo eere bù”; awaraarãpa: “Mù Pedroa eere bù”; jõdee apemaarãpa: “Mù Cristo eere bùda” apata. 13 Cristopa ichide ijãapataarãmaa mãgá awara–awaraa k'îsiapik'aa. Mù, Pablo kurusode piu–e paji parã pari, p'ek'au k'achia wêpapiit'ee. Parã poro choopidak'ãri, mù t'âde poro chooda–e paji. 14 Mù o–îa bù Tachi Ak'õre k'îrapite parãdepema Crispo mãik'aapa Gayo aupai poro chooda perã. 15 Mãgá mùa chok'ara–ee poro chooda perã, parãdepema apidaapa p'oyaa jarada–e mù t'âde poro choopiji. 16 Ichiaba Estéfanas te pidaarã poro chooji. Mãgùùrã awara mùa waa k'irãpa–e. 17 Cristopa mù pëi–e paji poro choode. Jîp'a ichia ooda mãik'aapa ûraada jarateedeta pëiji. Mãgà ûraa mùa k'îsia k'awaa pùk'a jaratee–e, ijãadamerã mù pedee wêsaa jaratee bùpa. Ma k'ãyaara t'ãri pia jarateepari k'awaadamerã Jesucristo kurusode piuji eperãarã o k'achiadeepa k'aripa atait'ee.
Tachi Ak'õre jõmaarã k'ãyaara k'îsia k'awaara bù
18 Mãgà jarateeda maarepida ûri k'iniada–e p'anù Cristode ijãadak'aa beerãpa, ãchi–it'ee mãgà jarateepataarã pariatua pedee p'anadairã. Mamîda tachi ijãapataarãpa mãgà jarateeda ûridak'ãri, p'ek'au k'achia oo k'iniada–e p'anapata, k'awa p'anadairã Cristópata tachi ma o k'achiadeepa k'aripa atapari. 19 Mãga k'awa p'anù Tachi Ak'õre Ûraa p'ãdade jara bairã:
‘Mùa ak'ùpiit'ee na p'ek'au eujãdepema k'îsia k'awaa beerãda apata wãara mãga p'anù–e, ãchia k'îsia iru p'anùk'a mùa oopi–e pak'ãri.’ (Isaías 29.14)
20 Tachi Ak'õrepa mãgà p'ãdade nãga jara k'inia bù. Eperãarã ârapemaarãk'a, poro wêsaa p'anù jida mãik'aapa pedee wêsaa pedee p'anù jida, k'îsia k'awada–ee pùk'a p'anù Tachi Ak'õre k'îrapite, iru jõmaarã k'ãyaara k'îsia k'awaara bapari perã. 21 Tachi Ak'õre mãga bapari perã, na p'ek'au eujãdepemaarãpa iru p'oyaa k'awada–e ãchi k'îsiadoopa. Maperãpù Tachi Ak'õrepa Cristopa ooda eperãarã k'aripait'ee taimaa jarateepiji, ûk'uruurãpa k'îsia p'anù mîda tai k'îsia k'awada–ee p'anù. Mamîda chi ijãarutaarã taipa jarateepatade o k'achiadeepa uchiadait'ee.
22 Judiorãpa taipa jarateepata ûri k'iniada–e p'anù, ak'ù k'inia p'anadairã ne–inaa Tachi Ak'õrepa ooru eperãarãpa p'oyaa oodak'aa. Jõdee judio–eerãpa ûri k'iniada–e p'anù, k'îsia k'awaa bùpa jarateedata jùrù p'anadairã. 23 Mamîda táipata jarateepata Cristo kurusode piuda p'ek'au k'achia wêpapiit'ee, judiorãpa ijãadaamaa p'anù pùjida mãik'aapa judio–eerãpa ichiaba ijãa k'iniada–e p'anù pùjida, tachi k'îsiadeepa pariatua jarateedai jîak'aapa. 24 Taipa mãga jarateepata k'awa p'anadairã Tachi Ak'õrepa jùrùmaa bù judiorã mãik'aapa judio–eerã paara Cristode ijãadamerã. Irude ijãadak'ãri, k'awa p'aneepata iruata k'awapipari Tachi Ak'õrepa k'îsia iru bù mãik'aapa oopipari Ak'õrepa oopi k'inia bùk'a eperãarãmaa. 25 Tachi Ak'õrepa mãga k'îsia iru baji na p'ek'au eujãdepemaarãpa k'îsia p'anù mîda irua ne–inaa pariatua ooji Cristo piupik'ãri. Tachi Ak'õrepa Cristo peedap'edaarã ome p'oyaa–e pajida apata. Mamîda irua mãga oopik'ãri, ak'ùpiji ichi wãara jõmaarã k'ãyaara k'îsia k'awaara bapari mãik'aapa ak'ùpiji ne–inaa jõma p'oyaai, mãgá tachi o k'achiadeepa k'aripa atada perã.
Tachi Ak'õrepa eperãarã jùrùt'erada
26 Âpemaarã Cristo k'aurepa, k'îsíatù parã p'anapatap'edaade, Tachi Ak'õrepa parã jùrùi naaweda. Parã t'ãide Tachi Ak'õrepa eperãarã jùrùk'ãri ichide ijãadamerã, chok'ara jùrù–e paji nãgee: k'îsia k'awaa beerã na p'ek'au eujãdepemaarãpa jùrùpatak'a; p'arat'ara beerã maa–e pùrã eperãarã poro waibùarã. 27 Mãgeerã jùrùt'erai k'ãyaara, Tachi Ak'õrepa jùrùt'eraji eperãarã mak'ùara k'îsia k'awada–ee beerã, na p'ek'au eujãdepema k'îsia k'awaa beerã k'îra nejasia p'aneedamerã ûridak'ãri irua jarapida mãùrãmaa. Ichiaba jùrùt'eraji eperã jîp'aarã, na p'ek'au eujãdepema poro waibùarã k'îra nejasia p'aneedamerã ûridak'ãri irua oopi bù mãùrãmaa. 28 Jùrùt'eraji na p'ek'au eujãdepema eperãarã chupùria beerãda apata. Mãga ooji ak'ùpiit'ee pipùara bù Cristode ijãaru, k'îsia k'awaa bai k'ãyaara, p'arat'ara bai k'ãyaara mãik'aapa eperã waibùa bai k'ãyaara. 29 Mãga ooji Tachi Ak'õrepa, apida audua p'ananaadamerã ichi k'îrapite. 30 Tachi Ak'õre jõmaarã k'ãyaara k'îsia k'awaara bapari perã, tachimaa k'awaapiji Cristopa ooda tachi k'aripait'ee atuanaadamerã. Cristopa tachi neto pùk'a ataji uchiadamerã p'ek'au k'achia jua ek'ariipa. Mãpai irude ijãadak'ãri, Tachi Ak'õrepa tachi awara bùji araa p'anapataadamerã iru ome. Mãgá p'ek'au k'achia wêe p'aneejida Tachi Ak'õre k'îrapite. Ma awara mãgá Cristopa tachimaa k'awapiji Tachi Ak'õrepa oopi k'inia bù. 31 Maperãpù Tachi Ak'õre Ûraa p'ãdade jara bù:
‘Eperãpa jara k'inia bù pùrã ichiata ne–inaa k'awaara bù awaraarã k'ãyaara, mãga jaraipia bù ichia k'awaa bairã Tachi Ak'õrepa iru pia ak'ù bapari.’ (Jeremías 9.23-24)