K'îsia k'awaa bùpa ichi k'îradoopa apida Cristode ijãapi–e pai
2
1 Âpemaarã, mù parãmaa wãk'ãri, jarateeji Tachi Ak'õrepa jara pëida; irua naaweda k'îsia iru bada ooit'ee Cristo piuda k'ap'ùa. Mãga jaratee–e paji poro wêsaa bùpa jarateeparik'a maa–e pùrã k'îsia k'awaa bùpa jarateeparik'a. 2 Ma k'ãyaara jarateeji Jesucristo kurusode piuda tachi p'ek'au k'achia wêpapiit'ee. 3 Mãga jaratee bùde mù p'era baji, parãpa mùa jararu ûri k'iniada–e pai jîak'aapa. 4 Jaratee–e paji k'îsia k'awaa bùpa jarateeparik'a, ichi pedee ijãadamerã. Mãga–e. Tachi Ak'õre Jaurépata mùa jarateeda parãmaa ijãapiji, ichia jõmaweda p'oyaapari perã. 5 Ak'õre Jaurepa mãga ooji parãpa k'îsianaadamerã eperãpa jarateeda k'aurepa ijãa p'anù. Jîp'a ijãa p'anù Tachi Ak'õre Jaurépata ijãapida perã.Tachi Ak'õre Jaurépata k'awapipari ichia k'îsia iru bù
6 Taipa parãmaa jarateeda–e paji k'îsia k'awaa beerãpa jarateepatak'a. Mamîda mãgá jarateepata Tachi Ak'õre pipùara k'awa k'inia p'anùùrãmaa. Jarateedak'aa ijãadak'aa beerã k'îsia k'awaa beerãk'a maa–e pùrã ijãadak'aa beerã waibùarãk'a. Ãchi piudak'ãri, ãchia jarateedap'edaa mak'ùara k'irãpadak'aa. 7 Ãchia jarateepatak'a jarateedai k'ãyaara, taipa jarateepachida Tachi Ak'õrepa k'awapida taimaa; aù naaweda ne–inaa eperãarãmaa k'awapi–e pada. K'awapiji ichia k'îsia iru bada ooit'ee Jesucristo k'ap'ùa pari na eujã ooi naaweda. Ichiaba k'awapiji jõma ichia k'îsia iru bù tachi–it'ee, ùt'ari panadak'ãri. 8 Tachi Ak'õrepa ichia k'îsia iru bada k'awapi–e paji eperã waibùa beerãmaa, mãgùùrãpa ijãada–e pada perã. Ãchia mãga k'awadap'edaa paara, Tachi Waibùa kurusode peeda–e pak'aji. K'awak'ajida iru cheji Tachi Ak'õre k'îra wãree unupide na p'ek'au eujãdepemaarãmaa. 9 Ma awara tachia k'awa p'anù Tachi Ak'õrepa mãgùùrãmaa k'awapi–e paji ichia k'îsia iru bù ichide ijãapataarã–it'ee, iru ley p'ãdade jara bairã:
‘Tachi Ak'õrepa nãgà ne–inaa k'îsia iru bù teeit'ee ichi k'inia iru p'anùùrãmaa: ne–inaa eperãarãpa waide unudak'aa; waide ûridak'aa; mãik'aapa waide k'îsiadak'aa.’ (Isaías 64.4)
10 Chonaarãweda Tachi Ak'õre Ûraa p'ãdak'ãri, k'awada–e p'anapachida irua k'îsia iru bada. Mamîda Tachi Ak'õre Jaurepa ne–inaa jõma k'awapari perã, mãgà k'îsia paara tachimaa k'awapii.
11 Eperãpa ichi k'îsia k'awapari ichi t'ãridepai. Mãga pùk'a Tachi Ak'õre Jaurepa k'awapari Tachi Ak'õre k'îsia. 12 Mapa tachi ijãapataarãpa Ak'õrede ijãadak'aa beerãpa k'îsiapatak'a k'îsiadak'aa. Tachi Ak'õrepa ichi Jaure pëiji tachimaa k'awapimerã ne–inaa jõma irua ooit'ee bù tachi–it'ee Jesucristo k'ap'ùa pari. Ak'õrepa mãga oo–e paji tachia ne–inaa pia oopata perã. Jîp'a ooji tachi k'inia iru bapari perã. 13 Maperã taipa jarateedak'aa tachi k'îsiadoopa. Jîp'a Tachi Ak'õre Jaurepa jarateepi bùk'a jarateepata. Mãga ûridak'ãri, ijãapataarãpa k'awaa wãpata Tachi Ak'õrepa k'îsia iru bù ãchi–it'ee, ichi Jaure ãchi ome bapari perã.
14 Mamîda ijãadak'aa beerãpa mãga ûri k'iniadak'aa, ãchi–it'ee tachi k'îsiadoopa pariatua pedee p'anadairã. Ma awara ãchia Tachi Ak'õre k'îsia p'oyaa k'awadak'aa, Tachi Ak'õre Jaure wêe p'anapata perã. 15 Tachi Ak'õre Jaure iru p'anùùrãpa ne–inaa jõma ak'ùdai k'awaadait'ee pia wa k'achia Tachi Ak'õre k'îrapite. Mãga oodai Ak'õre Jaurepa ãra k'aripapari perã. Jõdee Tachi Ak'õre Jaure wêe beerãpa mãgá p'oyaa ooda–e. Ma awara ãchia p'oyaa k'awada–e p'anù Tachi Ak'õre Jaure tachi ijãapataarã ome bapari wa mãga–e, iru Jaure wêe p'anadairã. 16 Tachia k'awa p'anù ijãadak'aa beerãpa Tachi Ak'õre net'aa p'oyaa k'awadak'aa, iru Ûraa p'ãdade jara bairã:
‘¿K'aipa k'awaaima Tachi Ak'õre k'îsia mãik'aapa k'aipa iru ûraaima? Iruata ne–inaa jõma k'awapari.’ (Isaías 40.13)
Mamîda mãga–e tachi ijãapataarã ome. Tachiata k'awaadai Tachi Ak'õre k'îsia, iru Jaurepa tachi k'îsiapipari perã Cristopa k'îsia bùk'a.