Tachi Ak'õre Ûraa jarateepataarã auk'a mimiapata iru–it'ee
3
1 Âpemaarã, k'irãpátù mùa jaratee nipada parã ome bak'ãri. Ara nawepa ichi warra chai ewaa t'odamaa chik'o k'opi–e bùk'a, chik'o waide p'oyaa k'o–e bairã, mãga pùk'a mùa jaratee–e paji Tachi Ak'õre Jaure taarã iru beerãmaa jarateeparik'a. Mãga oo–e paji parã at'ãri pia ijãada–e p'anadap'edaa perã. 2 Maperãpù nawepa ichi warra chai jutopiparik'a chik'o waide p'oyaa k'o–e bairã, mãga pùk'a mùa jîp'a jarateepachi Cristo piuda eperãarãpa p'ek'au k'achia oopata wêpapiit'ee. Jaratee–e paji jõma irua k'îsia iru bù tachi–it'ee, k'awa bada perã parãpa waide mãga p'oyaa k'awada–e pai. 3 Mãga p'anù pãchia oo k'iniata oo p'anadairã, Tachi Ak'õre Jaurepa oopi k'inia bù ooda–ee. Iru Jaurepa jarateepi bùk'a oodai k'ãyaara, aupedeepata, Tachi Ak'õrepa jarateepataarã pëida audú k'âa p'anadairã. 4 ¿Jara p'anù–ek'ã: “Mù Pablo eere bù” maa–e pùrã “Mù Apolo eere bù”? ¡Parã ijãadak'aaråk'apù k'îsia p'anù!5 Mù, Pablo Apolo ome eperãarã poro waibùarã–epù; jîp'a Tachi Ak'õre mimia oopataarã, parãmaa jarateedap'edaa Cristode ijãadamerã. Taipa Cristopa oopidak'a jarateejida. 6 Eperãpa ichi eujãde ne–uuparik'a, mùa naapùara parãmaa jaranaji Cristopa ooda eperãarã k'aripait'ee. Mãpai ne–uu ak'ùparipa ooparik'a, Apolopa waapùara jarateepachi k'awaadamerã Tachi Ak'õrepa parãmaa oopi k'inia bù. Mamîda Tachi Ak'õrepa ne–uu jõmaata waripiparik'a, iruata taipa jarateedap'edaa parãmaa ijãapiji. 7 Ne–uuparipa mãik'aapa ne–uu ak'ùparipa ma ne–uuda p'oyaa waripidak'aa. Maperã ma ne–uuda waripipari ãra k'ãyaara waibùara bù. Mãga pùk'a Tachi Ak'õre waibùara bù tai jarateepataarã k'ãyaara, irua aupaita eperãarãmaa ijãapipari perã. 8 Ma ne–uupari ma ne–uu ak'ùpari ome auk'a mimiapachida chaumerã. Mãga pùk'a tai mimiapataarãpa auk'a jarateepata eperãarãpa Tachi Ak'õrede ijãadamerã. Mamîda Tachi Ak'õrepa tai chaachaa p'aait'ee ichia k'inia bùk'a, taipa oodap'edaa pari. 9 Tai ma mimiapataaråk'ata p'anù. Jõdee parã ma ne–uudák'ata p'anù. Mamîda Tachi Ak'õreta ma eujã chipari. Parã ijãapataarã ichiaba te choma pùk'a bù; te Tachi Ak'õrepa oopimaa bù ichi mimiapataarãmaa. 10 Tachi Ak'õrepa k'inia bada perã, mù pëiji ma te choma ewaa oomerã. Maap'eda awaraarã mù t'êe chejida ne–inaa awaraa parãmaa jarateede. Mamîda pia jarateedaipia bù. 11 Mùa mãga jara bù Tachi Ak'õrépata ichi Warra Jesucristo bùda perã ma te choma te basak'a bamerã. Irua aupaita tachi o k'achiadeepa k'aripa atai. Mapa apidaapa awaraa basa jùrùdaik'araa bù. 12 Ma basade te oodai nãgà net'aa pi–ia bùdee: nêedee, p'arat'adee, wa mãu pi–iadee. Maa–e pùrã ma te oodai pak'urudee, p'ûajara p'oo bùdee wa siadee.a 13 Mamîda Ak'õre ewari waibùa ewate irua ma te oopataarãpa oodap'edaa ak'ùit'ee mãik'aapa jarait'ee pia wa k'achia. Pia jarait'eera, irua taipa oodap'edaa chaa mãik'aapa jarateedap'edaa chaa ak'ùit'ee. Ma ewate ma ne–inaa jõmaweda t'ùpùtaude wãyaait'ee. 14 Cristopa taimaa oopida mãik'aapa jarateepida paa–e pait'ee. Chooit'ee. Tachi Ak'õrepa mãgà pia ak'ùit'ee mãik'aapa mãgà pari teeit'ee ichia k'îsia iru bù teeit'ee Cristopa oopidak'a oodap'edaarãmaa. 15 Mamîda eperãarãpa ãchi k'îsiadoopa oodap'edaa maa–e pùrã jarateedap'edaa jõma paait'ee wêparumaa. Mamîda net'aa êt'a atadak'a t'ùpùtaudeepa, ma jarateepari atua–e pait'ee. Jîp'a beeit'ee Tachi Ak'õre ome. Mamîda Ak'õrepa ne–inaa teeit'ee pada ichimaa wêe bait'ee.
Tachi Ak'õrede ijãapataarã iru ték'apù p'anù
16 Tachi Ak'õre ichi tede baparik'a, ichi Jaure bapari parã ome. Maperã parã iru ték'apù p'anù. 17 Maperã apidaapa parãmaa ijãa amaapiruta pùrã Cristode maa–e pùrã oo amaapiruta pùrã Cristopa parãmaa oopi k'inia bù, Tachi Ak'õrepa mãgà k'achia ooit'ee. Mãga ooit'ee, parã jùrùt'era atada perã ichi–it'ee, ichi tek'a p'anadamerã.
Tachi Ak'õrepa k'inia bùk'a p'anapataadaipia bù
18 Pãchi itu k'ûrapináatù. Parãdepema apidaapa k'îsiadaik'araa bù ãchi k'îsia k'awaa p'anù na p'ek'au eujãdepema k'îsia k'awaa beerãk'a. Ma k'ãyaara k'îsia k'awa–ee pùk'a p'anadaipia bù na eujãdepemaarã k'îrapite, Tachi Ak'õrepa ichi k'îsia parãmaa k'awapimerã. 19 Na p'ek'au eujãdepema k'îsia k'awaa beerãpa jaradak'ãri ãchia ne–inaa k'awa p'anù, Tachi Ak'õre–it'ee ãchi k'îsiadoopa pariatua pedeepata. Tachia mãga k'awa p'anù iru Ûraa p'ãdade jara bairã:
‘Tachi Ak'õrepa k'awa bù na p'ek'au eujãdepema k'îsia k'awaa beerãpa k'îsia iru p'anù chîara k'ûradait'ee.’ (Job 5.13)
20 Ichiaba iru Ûraa p'ãdade jara bù:
‘Na p'ek'au eujãdepema k'îsia k'awaa beerãpa jõmaweda k'awa p'anù choo–e pait'ee.’ (Salmos 94.11)
21 Tachi Ak'õrepa mãga jara bairã, apida audua p'anadaik'araa bù k'îsia p'anadairã ãchi eerepema jarateeparita pipùara bù apemaarã jarateepataarã k'ãyaara. Jõmaarãpa parã auk'a k'aripapata, ma–it'ee Ak'õrepa ãra pëida perã parãmaa. 22 Irua mù, Pablo, Apolo mãik'aapa Pedro pëiji taipa Cristopa ooda jarateedamerã. Mãga ooji parã awaraa Cristode ijãapataarã ome pipùara p'anapataadamerã Cristopa k'inia bùk'a. Tachi Ak'õrepa na p'ek'au eujã ooji tachi aùde p'anapataadamerã. Tachi o k'achiadeepa k'aripa ataji ùt'aa wãdamerã jai–idaadak'ãri mãik'aapa pipùara p'anapataadamerã na eujãde p'anù misa. 23 Ma jõma ooji tachi–it'ee, tachi Cristodeerã perã mãik'aapa Cristo iru Warra perã.