Tachi Ak'õre Ûraa jarateepataarã ichiaba Cristo–it'ee mimiapata
4
1 Parãpa tai Cristo–it'ee mimiapataarãk'a iru p'anadaipia bù, iruata tai jarateede pëida perã Tachi Ak'õrepa k'îsia iru bada; ne–inaa eperãarãmaa naaweda jara–e pada. 2 Irua tai mãgá pëida perã, chok'ek'ee p'anadaipia bù. 3 Parã maa–e pùrã awaraarãpa mùa ooda mãik'aapa jarateeda ak'ù k'inia p'anù pùrã k'awaadait'ee pia wa k'achia, ak'ùdaipia bù. Mùa p'ua–e bù. Mamîda mùchia pida mùa ooda mãgá ak'ù–e bù. 4 Cristopa jarateepidak'a parã t'ãide jarateepachi perã, k'îsia p'ua–e bù Tachi Ak'õre k'îrapite. Mãga jarak'ãri, jara k'inia–e mùa maarepida ne–inaa k'achia ook'aa. Tachi Waibàapata mùa oopata ak'ùit'ee mãik'aapa jarait'ee pia wa k'achia. 5 Mãgá mùa ooda Cristópata ak'ùit'ee perã, ¿sãap'eda taipa oopata ak'ù k'inia p'anùma parãpa, Cristo cheit'ee ewate pai naaweda? Ma ewate ichiata k'awapiit'ee ne–inaa jõma eperãarãpa waide k'awada–e p'anù; ne–inaa eperãarãpa ãchi t'ãridepai k'îsia p'anadap'edaa paara, na p'ek'au eujãde nipadak'ãri. Maap'eda ne–inaa pia oodap'edaa pari teeit'ee ichia k'îsia iru bù.6 Âpemaarã Cristo k'aurepa, ma jara aupadade k'îsiadak'ãri, k'awa p'anù mù Apolo ome ak'ùdaipia bù Tachi Ak'õre Ûraa p'ãdade jara bùk'a, pãchi k'îradoopa ak'ùdai k'ãyaara. Mùa mãga jara bù parãpa pedee audua pedeenaadamerã pãchi jarateepari ãpùte, pedee k'achia pedee p'anù misa awaraarã jarateepari ãpùte. 7 ¿K'aipa parã bùjima chîara ak'ùpataarã? Tachi Ak'õrépata parã k'îsia k'awaapipari mãik'aapa ne–inaa oo k'awaapipari. Pãchi k'îradoopa mãga oodak'aa. Mãga bùta, ¿sãap'eda audua pedeepatama?
8 Parã audua p'anadaik'araa bù. Mamîda mãgá p'anù. Mù–it'ee parã p'arat'ara beeråk'ata p'anù, ne–inaa jõma iru p'anadairã; maarepida faltada–ee. Ma awara nãgaweda reyråk'ata p'anù Cristo ome. Mapa iru jarateepataarãpa jarateeruta waa ûri k'iniadak'aa. ¡Taawa reyrãk'a p'anak'ajida, tai jida mãga p'anadait'ee auk'a! 9 Mamîda mãga–e. Mù–it'ee Tachi Ak'õrepa tai, ichia jùrùt'eradaarã, ek'ariara papiji. Eperãarãpa awaraarã peedait'ee p'anùk'a jõmaarã taide, mãga pùk'a p'anù tai. Jõmaarãpa ak'ù k'inia p'anapata jãgà eperãarã miapiruta. Mãga pùk'a na p'ek'au eujãdepema jõmaarãpa tai chupùria jõnù ak'ùpata, angeleerãpa paara. 10 Tai k'îra k'awa–ee pùk'a p'anù, Cristo–it'ee mimiapata perã. Jõdee parã k'îsia k'awaara pùk'a p'anù Cristode ijãa p'anùda apata perã. Taipa mak'ùara k'awada–e p'anù Tachi Ak'õrepa k'îsia iru bù, tai k'îsiadoopa k'îsia p'anadairã. Mamîda parãpa jõmaweda k'awa p'anùda apata. Jõmaarãpa parã k'inia iru p'anù, t'ãri pia p'anadairã. Jõdee tai k'îra unuamaa iru p'anù, jõmaarã ek'ariara p'anadairã. 11 Taipa Tachi Ak'õre Ûraa jaratee p'aneedak'ãriipa, mata at'ãri jarra oopata mãik'aapa opisia choopata; p'aru sore jâpata. Ma awara ijãadak'aa beerãpa tai p'ua oopata. Te jida wêe p'anù, awara ãi jarateede nipapata perã. 12 Tachi juadoopa mimiapata, âida–ee. Awaraarãpa taimaa ik'achia jaradak'ãri, chõo jùrùdak'aa. Jîp'a Tachi Ak'õremaa ùt'aa t'âpata ãchi pari. Tai jùrùdak'ãri miapidait'ee, taipa choopata. 13 Tai ãpùte pedee k'achia jaradak'ãri, ãchimaa t'ãri pia pedeepata. Mamîda tai k'îra unuamaa iru p'anapata. Ãchi–it'ee tai ne–inaa mik'iak'a p'anù. Mãgá tai iru p'anajida. Mata at'ãri mãgá iru p'anù.
14 Ma et'ewa jarada p'ã–e paji parã k'îra nejasiapiit'ee. Ûraait'eeta p'ãji ak'õrepa ichi warra k'inia iru bù ûraaparik'a. 15 Mùa mãga jara bù mù–it'ee parã mù warrarãk'a p'anadairã. Jarateepataarã chok'araarãpa jarateedai Cristopa parãmaa oopi k'inia bù. Mamîda mùa naapùara jarateenaji Cristo parã pari piuda. Mãgá irude ijãajida. Maperãpù mù parã ak'õrek'a bù. 16 Maperã oodaipia bù mùa oo bùk'a.
17 Mapa Timoteo pëiru parã k'aripanamerã. Iru mù warra k'iniak'a ichiaba, mùa naapùara jarateeda perã Cristo iru pari piuda. Irua oopari Cristopa oopi bùk'a. Mapa iru parãmaa pëiru, k'irãpapimerã mù sãga bapari Cristo jua ek'ari. Mùa oopari Cristopa oopi bùk'a mãik'aapa ijãapataarã para bee chaa jarateepari jõmaarãpa mãga oodamerã.
18 Parãdepema ûk'uru audua p'anù k'îsia p'anadairã mù waa parãmaa wã–e. Mamîda mãga–e. 19 Ak'õrepa k'inia bù pùrã, mak'ùara taarã–e jãmaa wãit'ee. Pak'ãri, mùa k'awaait'ee mãgà audua beerãpa jara jõnù. Mamîda ma k'ãyaara waapùara mùa nãga k'awa k'inia bù. ¿Ãchia oo p'anùk'ã wa ooda–e p'anù Cristopa oopi bùk'a? 20 Parãpa k'awadaipia bù Cristode ijãa p'anùda apataarãpa oodaipia bù irua oopi bùk'a. Mãga oodak'ãri, ak'ùpipata pedeepapai ijãa k'iniada–e. Jîp'a p'ana k'inia p'anapata Cristo jua ek'ari. 21 Mù parãmaa wãk'ãri, ¿k'ãata k'inia p'anùma; ùtrùamerã wa pedee sia pedeemerã?