K'ãata oodaipia bù pariatua p'ek'au oopataarã ome
5
1 Ârá mùa jarait'ee mùmaa nepùrùdap'edaa. Parã t'ãide abaapa ichi nawek'aa chi wêrak'a iru bù. ¡Ijãadak'aa beerãpa pida mãgee k'achia oodak'aa! 2 Mamîda parã at'ãri audua p'anù, k'îsia p'anadairã Tachi Ak'õre Jaurepa oopi bùk'a oo p'anù. Audua p'anadai k'ãyaara, k'îsia p'ua p'anadaipia bù mãgà k'achia oomaa bairã parã ijãapataarã t'ãide. Ma eperã pãchi ik'aawaapa ãyaa pëidaipia bù. 3 Mù parã ome ba–e pait'ee mîda, mù k'îsia parã ome bait'ee. Tachi Waibùa Jesupa mùmaa k'awapiji k'ãata oodaipia bù ma eperã ome. 4 Mapa mù k'îsia aupai bait'ee mîda parã ome, irua auk'a mãga k'awapiit'ee parãmaa chip'edaidak'ãri irumaa ùt'aa t'âdait'ee. 5 Jõma ijãapataarã see nâbak'ãri, ma eperã pãchimãiipa ãyaa wãpítù, Satanapa iru k'ap'ùa k'achia ooyaa bù miapimerã maa–e pùrã piupimerã. Mãgá Tachi Ak'õrepa iru jaure ùt'aa ateei Tachi Waibùa Jesús cheit'ee ewate.6 Audua p'anadaik'araa bù ma k'achia oomaa bù misa parã t'ãide. Jõmaarãpa nãgà pedee k'awa p'anù: “Levadura ma–ãriipa pan masa jõmaweda waridaipari.” 7 Tai judiorãpa Pascua fiesta oodai naaweda, levadura jõmaweda iru p'anù tai tede bat'ak'oopata, ma fiestade pan levadura wêe k'odait'ee. Mãga pùk'a parãpa p'ek'au k'achia jõmaweda unu p'anù parã t'ãide oo amaadaipia bù, k'achia wêe p'anadait'ee Tachi Ak'õrepa k'inia bùk'a. Wãara parã p'ek'au k'achia wêe p'anù Tachi Ak'õre k'îrapite, Cristo piuda perã pãchia p'ek'au k'achia oopata wêpapiit'ee. Pascua fiestadepema oveja chak'ek'a bù piuji Tachi Ak'õrepa tachi miapinaamerã tachia p'ek'au k'achia oopata k'aurepa. 8 Cristo mãgá piuda perã, p'anadáma irua oopi bùk'a. Apidaapa k'achia oodaik'araa bù Cristode ijãadai naaweda oopatap'edaak'a. Ma k'ãyaara k'îra jîp'a p'anapataadaipia bù mãik'aapa wãarata jarapataadaipia bù.
9 Mùa naaweda k'art'a p'ãdade jaraji k'õp'ãyo meraanaadamerã wêraarã maa–e pùrã ùmùk'îraarã pariatua p'ek'au ooyaa beerã ome. 10 Mãga jarak'ãri, jara k'inia–e baji ãyaa p'aneedamerã nãgee ijãadak'aa beerã ik'aawaapa: pariatua p'ek'au oopataarã; p'arat'a waapùara iru p'ana k'inia p'anùùrã; nechùapataarã maa–e pùrã awaraa ak'õre waibùa apatade ijãapataarã. Mãgeerã ik'aawaapa ãyaa p'aneedap'edaa paara, ichita uchiadait'ee paji na p'ek'au eujãdeepa. 11 Nãgà p'ãrupa mùa jarait'ee k'ãata jara k'inia baji apema k'art'ade. K'õp'ãyo meraanáatù ijãapataarãda apata mîda, nãga oopataarã ome: pariatua p'ek'au ooyaa beerã; p'arat'a waapùara iru p'ana k'inia p'anùùrã; awaraa ak'õre waibùa apatamaa ùt'aa t'âpataarã; awaraarã ãpùte ik'achia jarapataarã; it'ua toyaa beerã maa–e pùrã nechùapataarã ome. Mãgeerãmaa p'asianáatù mãik'aapa pãchimaa chepináatù. Nek'ode paara t'îudaik'araa bù mãgeerã ome. 12-13 Mãga jara bù Tachi Ak'õrepa tachi bù–e pada perã ijãadak'aa beerãpa oo p'anù ak'ùdamerã. Ichiata mãùrãpa oopatap'edaa ak'ùit'ee mãik'aapa ãchi miapiit'ee. Mamîda tachia ak'ùdaipia bù awaraarãpa oo p'anù tachi ijãapataarã t'ãide, ijãadak'aa beerãk'a p'anaruta pùrã. Maperãpù parãpa chi k'achia ooyaa beerã ãyaa wãpidaipia bù pãchi ik'aawaapa, Tachi Ak'õre Ûraa p'ãdade jara bùk'a:
‘Jëret'áatù chi k'achia ooyaa beerã pãchi ik'aawaapa.’ (Deuteronomio 17.7)