Ijãapataarã nepùrade p'anadak'ãri
6
1 Ârá mùa jarait'ee k'ãata oodaipia bù parã nepùrade p'anadak'ãri. Parãdepema nepùra iru bak'ãri awaraa ijãapari ome, ijãadak'aa beerã charraarãmaa wãik'araa bù. Ma k'ãyaara ijãapataarãmaa wãipia bù. 2 ¿Parãpa k'awada–e p'anùk'ã tachi Cristo ome araa p'anùùrãpa iru pari ak'ùdait'ee ijãadak'aa beerãpa ne–inaa oopatap'edaa jaradait'ee pia wa k'achia? Mãga bùta, ¿sãap'eda p'oyaa ak'ùda–ema ijãapataarã nepùra mak'ùara waibùa–e bùta parã t'ãide? 3 ¿K'awada–e p'anùk'ã tachia ichiaba angeleerã ak'ùdait'ee? Mãga pùrã, ¡ârapema nepùra pãchi pitapai ak'ùdai! 4 Mãgá parã awaraa ijãapataarã ome nepùrade baaidak'ãri, charraarã ijãadak'aa beerãmaa wãdai k'ãyaara, wãdaipia bù charraarã ijãapataarãmaa. 5-6 Nãgà jararupa parã k'îra nejasiapi k'inia bù. ¿Pia bùk'ã chõopik'a para bait'ee pãchi pitapai, ma awara mãgee charraarã k'îrapite wãdait'ee? ¿Apida parãdepemapa ijãapataarã nepùra p'oyaa ak'ùda–ek'ã?7 ¡Parã mãgá chõo pùk'a para bairã, k'achia oomaa p'anù! Ma k'ãyaara piara bak'aji awaraarãpa parã nepùrade baaipidamerã. Maa–e pùrã piara bak'aji awaraarãpa parã k'ûradamerã. 8 Mamîda mãga–e. ¡Paråpata nepùra jùrùpata awaraarã ome mãik'aapa awaraarã k'ûrapata, parã âpemaarã mîda Cristo k'aurepa!
9 ¿Parãpa k'awada–e p'anùk'ã k'achia oopataarã wãda–e pait'ee Ak'õre eujãdee ichideerã ome? K'îrak'aupai ijãadak'aa beerãk'a p'anadai, nãgeerã wãdak'aa perã Tachi Ak'õre eujãdee: prostitutaarã; ùt'aa t'âpataarã awaraa ak'õre waibùa apatamaa; miak'ãi p'anùùrã awaraarã ome k'ãipataarã; ùmùk'îraarã awaraa ùmùk'îraarã ome k'ãipataarã, ùmùk'îra wêra ome k'ãi bùk'a; 10 nechùapataarã; p'arat'a waapùara iru p'ana k'inia p'anùùrã; it'ua toyaa beerã; ik'achia jarapataarã awaraarã ãpùte maa–e pùrã k'ûrayaa beerã awaraarã net'aa atadait'ee. 11 Ijãadai naaweda, parã ûk'uru mãgá p'anapachida. Mamîda Tachi Waibùa Jesucristode ijãadak'ãri, iru piuda k'aurepa Tachi Ak'õrepa wêpapiji parãpa p'ek'au k'achia oopatap'edaa. Ichiaba parã awara bùji ichi–it'ee, ichi Jaure pëik'ãri parã ome bapariimerã mãik'aapa oopimerã Cristopa oopi k'inia bùk'a. Mãga ooji parã ichi k'îrapite p'ek'au k'achia wêe p'anadamerã.
Tachi Ak'õrepa ijãapataarã k'ap'ùa awara bùda ichi–it'ee
12 Eperãarãpa jarapata: “Ne–inaa jõma ooi mùchia oo k'inia bùk'a.” Mamîda ma ne–inaa k'achia bù pùrã, maarepida mù k'aripa–e pait'ee. Ne–inaa jõma ooi. Mamîda mãga oo k'inia bù k'aurepa mùa oo–e pùrã Cristopa oopi bùk'a, ma ne–inaa jua ek'ari bapariit'ee, Cristo jua ek'ari bai k'ãyaara. 13 Ichiaba jarapata: “Chik'o iru p'anù k'odait'ee mãik'aapa bi iru p'anù ma chik'o aùde banamerã.” Mamîda na ewari Tachi Ak'õrepa ma omeeweda jõpiit'ee. Wãara Tachi Ak'õrepa bi ooji chik'o aùde banamerã. Mamîda tachi k'ap'ùa oo–e paji pariatua p'ek'au oodamerã. Jîp'a ooji ichi Jaure ma k'ap'ùade bapariimerã mãik'aapa tachia oodamerã Cristopa oopi bùk'a. 14 Maperãpù Tachi Ak'õrepa tachi k'ap'ùa jõpi–e pait'ee. Ma k'ãyaara ichi ewari waibùa ewate tachi k'ap'ùa chok'ai p'irabaipiit'ee Jesucristo k'ap'ùa p'irabaipidak'a. Mãgá ooi jõmaarã k'ãyaara waibùara bapari perã.
15 ¿Parãpa k'awada–e p'anùk'ã tachi ijãapataarã araa p'aneepata Cristo ome irude ijãadak'ãri? Tachi Ak'õrepa tachi k'ap'ùa ooji ichi Jaure aùde bapariimerã. Mapa tachi k'ap'ùa araa p'anapidaik'araa bù prostitutaarã ome. 16 ¿K'awada–e p'anùk'ã eperã araa paru pùrã prostituta ome, mãgà wêra ome eperã apai pùk'a paru? Mãga k'awa p'anù Tachi Ak'õre Ûraa p'ãdade jara bairã:
‘Mãgá eperã omeeweda eperã apai pùk'a p'aneedait'ee.’ (Génesis 2.24)
17 Jõdee eperã Cristode ijãak'ãri, araa beepari iru ome mãik'aapa ma eperã jaure apai pùk'a beepari Tachi Ak'õre Jaure ome. T'ãri a–ba p'anapata.
18 Maperãpù p'ek'au oonáatù awaraarã ome. Eperãpa awaraa p'ek'au k'achia ook'ãri, ichi k'ap'ùa araa bapik'aa awaraa eperã k'ap'ùa ome. Mamîda awaraa ome p'ek'au ook'ãri, ichi k'ap'ùa k'achiade baaipipari, ichi k'ap'ùa araa bù Cristo ome bùpari perã awaraa eperã jua ek'ari, Cristo jua ek'ari bùi k'ãyaara. 19 ¿K'awada–e p'anùk'ã Cristode ijãadak'ãriipa Ak'õre Jaure tachi k'ap'ùade bapari, Tachi Ak'õre ichi tede baparik'a? Mapa Tachi Ak'õreta tachi k'ap'ùa chipari. 20 Iruata tachi neto pùk'a ataji ichi Warra apai iru bada pëik'ãri piumerã tachi pari. Mapa parã ichideerã perã, k'achia oo amáatù. Mãgá ooruta pùrã, ak'ùpidai wãara oo k'inia p'anù irua oopi bùk'a.