Ûraa miak'ãidait'ee k'îsia p'anùùrã–it'ee
7
1 Ârá mùa p'anauit'ee parãpa k'art'a p'ãdap'edaade iidi pëidap'edaa. Naapùara iidijida chisãgùta pipùara bù ijãapari–it'ee, miak'ãiit'ee maa–e pùrã tuu bait'ee. Mù–it'ee piara bù tuu bait'ee. 2 Mamîda ùmùk'îra tuu bak'ãri, wêraarã ome pariatua p'ek'au oo nipai. Maperã ùmùk'îrapa ichi wêra iru baipia bù; wêrapa pida ichi ùmùk'îra iru baipia bù. 3 Ùmùk'îrapa ichi k'ap'ùa wãak'aik'araa bù chi wêramaa; wêrapa pida ichiaba ichi k'ap'ùa wãak'aik'araa bù chi ùmùk'îramaa. 4 Mãgá p'anapataadaipia bù wêra k'ap'ùa chi ùmùk'îra–it'ee perã mãik'aapa ùmùk'îra k'ap'ùa chi wêra–it'ee perã. 5 Jîp'a Tachi Ak'õremaa ùt'aa t'â k'iniapa pedeeteeruta pùrã, ma ewate araa k'ãida–e pait'ee. Mãga p'anadak'ãri, ãra k'ap'ùa wãak'adai. Mamîda aù t'êepai waya k'ãidaipia bù, Satanapa k'achia oopiamaapa awaraa ome, p'oyaa chooda–e p'anadairã.6 Mùa mãga k'îsia bù. Pãchia jùrùdaipia bù Tachi Ak'õrepa oopi k'inia bù parãmaa. 7 Mù–it'ee pipùara bak'aji jõmaweda mùk'a p'anadamerã. Mamîda k'awa bù Tachi Ak'õrepa k'aripai ijãapari chaa k'awaamerã miak'ãiipia bù wa mãga–e.
8 Mùa ûraait'ee ùmùk'îra tuu beerãmaa, wêra tuu beerãmaa mãik'aapa p'êtrãa tuu beerãmaa mùk'a p'anadamerã. 9 Mamîda miak'ãi k'inia p'anù pùrã, miak'åitù, p'ek'au oo k'inia p'anadai k'ãyaara.
10-11 Ichiaba Tachi Waibùapa jarapi bùk'a mùa jara bù: wêrapa ichi ùmùk'îra amaaik'araa bù. Auk'a ùmùk'îrapa ichi wêra amaaik'araa bù. Mamîda mãga ooruta pùrã, miak'ãidaik'araa bù awaraarã ome. Ma k'ãyaara waya araa padaipia bù ãchi naaweda p'anadap'edaak'a.
12 Ârá mùa ûraait'ee ijãapataarã miak'ãi p'anadap'edaa ijãadak'aa beerã ome, Cristode ijãadai naaweda. Cristopa jaratee–e paji k'ãata oodaipia bù. Mamîda mùa nãga ûraait'ee. Eperã Cristode ijãaparipa wêra ijãak'aa bù iru bù pùrã, amaaik'araa bù, chi wêra iru ome ba k'inia bù pùrã. 13 Ichiaba wêrapa ùmùk'îra ijãak'aa bù iru bù pùrã, amaaik'araa bù, chi ùmùk'îrapa iru ome ba k'inia bù pùrã. 14 Ijãapari araa bak'ãri ijãak'aa bù ome, eperã apai pùk'a p'anù. Mãga bùta, Tachi Ak'õrepa chi ijãak'aa bù pia ak'ùpari ma ijãapari k'aurepa. Mãgá ichiaba Ak'õrepa ãchi warrarã pia ak'ùpari ma ijãapari k'aurepa. 15 Mamîda ma ijãak'aa bùpa chi Cristode ijãapari amaa k'inia bù pùrã, mãga oonaapáde adaik'araa bù, iru k'îra unuamaa iru bapiamaapa. Tachi Ak'õrepa k'inia bù ichideerã k'ãiwee p'anapataadamerã. 16 Jõdee ma ijãaparipa chi ijãak'aa bù pëi k'inia–e bù pùrã, chooipia bù. Mãga ooru pùrã, aù t'êepai iru k'aurepa mãgùpa Cristode ijãai. Parã ijãapataarãpa k'awada–e p'anù chisãgà ijãadak'aa beerãpa ijãadai parãpa k'aripapata perã. Tachi Ak'õrepapai k'awa bù.
Sãga p'anapataadaipia bù ijãada t'êepai
17 Ârá mùa nãga ûraait'ee. Parãpa jùrùdak'ãri Cristopa oopi k'inia bù parãmaa, p'anadaipia bù parã p'anadap'edaak'a Tachi Ak'õrepa ijãapik'ãri. Mùa mãga jarateepari ijãapataarã jõmaarãmaa. 18 Tachi Ak'õrepa Cristode ijãapiru pùrã ùmùk'îra tauchaa iru bù ichi k'ap'ùade, ma eperãpa meraik'araa bù ma tauchaa iru bù. Jõdee ichi k'ap'ùade tauchaa wêe bù pùrã ijãak'ãri, tauchaa bùpiik'araa bù. 19 Mùa mãga jara bù Tachi Ak'õre–it'ee p'ua–e bairã eperãpa tauchaa iru bù wa wêe bù. Jîp'a Ak'õrepa k'inia bù tachia oodamerã ichia jara bùk'a. 20 Maperã awara baik'araa bù pùchi naaweda bada k'ãyaara, Tachi Ak'õrepa ijãapik'ãri. 21 Esclavo paji pùrã ijãa beek'ãri, k'îsianáaji pù eperã jua ek'ari bù perã. Jõdee chiparipa pù pëi k'inia bù pùrã, k'ãiwee uchíaji. 22 Esclavopa Cristode ijãak'ãri, at'ãri chipari iru bù mîda, esclavo–ee pùk'a beepari, Cristopa iru uchia atada perã p'ek'au k'achia jua ek'ariipa. Jõdee esclavo–ee bùpa Cristode ijãak'ãri, Cristo esclavok'a beepari, irua oopi bùk'a oopari perã. 23 Cristopa parã neto pùk'a ataji ichi waa kurusode bat'ak'ãri. Mãgá ichi piuji parãpa p'ek'au k'achia oopata wêpapiit'ee mãik'aapa parã o k'achiadeepa k'aripa atait'ee atuanaadamerã. Maperãpù parã ichideerã. Maperã óotù irua oopi bùk'a, oodai k'ãyaara eperãarãpa oopi k'inia p'anùk'a. 24 Mapa âpemaarã, mùa et'ewa jaradak'a p'anadaipia bù pãchi ijãadai naaweda p'anadap'edaak'a.
Tuu beerãpa iidi pëidap'edaa p'anauda
25 Ârá mùa p'anauit'ee tuu beerãpa iidi pëidap'edaa. Mùa p'oyaa jara–e Cristopa jarapida, irua nãgà jaratee–e pada perã. Mamîda Tachi Ak'õrepa mù chupùria k'awaap'eda, Cristode ijãapiji mãik'aapa iru ûraa mùmaa jarateepiji. Maperã parãpa na ûraa ûridaipia bù. 26 Ârapema ijãapataarã miapi iru p'anadairã, mù–it'ee pipùara bù tuu bait'ee. 27 Wêra iru bù pùrã, yiaraa iru baik'araa bù. Jõdee wêe bù pùrã, jùrùik'araa bù. 28 Mamîda miak'ãiru pùrã, p'ek'au k'achia oo–e bù Tachi Ak'õre k'îrapite. Ichiaba wêra tuu bùpa ùmùk'îra ataru pùrã, p'ek'au k'achia oo–e bù. Mamîda chi miak'ãirutaarã audú miadait'ee na p'ek'au eujãde p'anù misa. Mapa mùa jara bù pipùara bù tuu bait'ee.
29 Âpemaarã, mùa mãga jara bù k'îsia bairã taarã–e Cristo cheit'ee. Mãga nù p'anùde miak'ãi p'anùùrã p'anadaipia bù tuu beerãk'a; chi Cristopa oopi bùk'a oo p'anùùrãk'a. 30 Ma awara t'ãri p'ua p'anùùrã maa–e pùrã o–îa p'anùùrãpa k'îsiadaipia bù Cristopa ãchimaa oopi k'inia bù, ãchi k'îsiade iru p'anù k'ãyaara. Ichiaba ne–inaa neto atapataarãpa k'irãpadaipia bù ãchia net'aa atada ateeda–e pait'ee Tachi Ak'õre eujãdee. 31 Ma awara ne–inaa netopataarãpa k'irãpadaipia bù ãchia p'arat'a jitadap'edaa ne–inaa neto pëidap'edaa pari ùt'aa ateeda–e pait'ee. Ma p'arat'a mãik'aapa net'aa jùrùdai k'ãyaara, Cristopa oopi k'inia bù jùrùdaipia bù, na p'ek'au eujã mãik'aapa jõma aùde nâbù Tachi Ak'õrepa jõpiit'ee perã.
32 Mùa nãga ûraait'ee k'îsia jõnanaadamerã. Ùmùk'îra tuu bùpa jùrùpari ooit'ee Cristopa oopi k'inia bùk'a. 33 Mamîda miak'ãi bù k'îsia nâbapari na p'ek'au eujãdepema net'aade mãik'aapa chi wêra o–îa bapiit'ee. 34 Mãgà ùmùk'îrapa auk'a oo k'inia bairã Cristopa oopi k'inia bù mãik'aapa chi wêrapa oopi k'inia bù, audú k'îsia nâbù chi tuu bù k'ãyaara. Ichiaba wêra ùmùk'îra wêe bùpa k'awa k'inia bù Tachi Ak'õrepa k'îsia iru bù ooit'ee ichi ome. Mamîda chi miak'ãi bùpa k'awa k'inia bù chi ùmùk'îrapa oopi k'inia bù, mãga ooit'ee chi k'ima o–îa bamerã.
35 Mãga jaraji parã k'aripait'ee pia p'anapataadamerã mãik'aapa pãchi t'ãripa Cristopa oopi bùk'a oodamerã.
36 Ùmùk'îra tuu bùpa pedeeru pùrã miak'ãiit'ee mãik'aapa k'ap'ùapa choo–e bù pùrã wêra wêe bait'ee maa–e pùrã ma wêra pedeeteeda t'ãri p'uapi k'inia–e bù pùrã, miak'ãiipia bù. Mãga ooru pùrã, p'ek'au k'achia oo–e bù. 37 Mamîda ichi t'ãride miak'ãi k'inia–e bù pùrã mãgà wêra ome mãik'aapa k'ap'ùapa choo bù pùrã, miak'ãik'araa bù. 38 Mãpai ma miak'ãi k'inia bùpa pia k'îsia bù. Mamîda ma miak'ãi k'inia–e bùpa pipùara k'îsia bù.
39 Tachi Ak'õre Ûraa p'ãdade jara bù wêra miak'ãi bùpa awaraa jùrùik'araa bù, ichi ùmùk'îra chok'ai bù misa. Jõdee ichi k'ima piuk'ãri, pia bù waya jùrùmerã, mamîda Cristode ijãapari jùrùipia bù. 40 Mamîda mùa k'îsia bù ma p'êtrãa t'ãri o–îara bai miak'ãi–ee beeru pùrã. Mãga k'îsia bù mùa. Mùmaa Tachi Ak'õre Jaurepa ichiaba k'îsiapipari.