GÁLATAS
San Pablopa K'art'a P'ãda Galacia Eujãdepema Ijãapataarãmaa
Salude pëida
1
1 Mù, Pablopa na k'art'a p'ãru parã Galacia eujãdepema Cristode ijãapataarãmaa. Eperãarãpa mù jùrùt'erada–e paji. Ichiaba mù pëida–e paji. Tachi Ak'õre, Cristo chok'ai p'irabaipidápata mù jùrùt'eraji mãik'aapa Cristopa mù pëiji. 2 Jõma tachi âpemaarã Cristo k'aurepa nama mù ome auk'a p'anùùrãpa salude pëiruta parã Cristode ijãapataarã ùt'aa t'âpata chaa. 3 Taipa ùt'aa iidipata Tachi Ak'õre Tachi Waibùa Jesucristo ome parã pia ak'ù p'anadamerã. Mãgá k'ãiwee p'anapataadait'ee. 4 Tachi Ak'õrepa k'îsia iru badak'a Cristo piuji tachia p'ek'au k'achia oopata k'aurepa. Ichi ita–aria peepiji tachi k'aripa atait'ee na p'ek'au eujãdepemaarãpa k'achia oopatadeepa. 5 Maperã ichita ùt'aa t'âdáma Tachi Ak'õremaa jaradait'ee iru jõmaarã k'ãyaara t'ãri piara bapari. Amén.K'îrak'aupai ijãadai awaraarãpa jaratee p'anù
6 Mamîda mù p'era pùk'a bù taarã–eweda parãpa ijãa amaadaruta perã Tachi Ak'õrepa k'îsia iru badade ooit'ee Cristo k'ap'ùa pari. Iru k'ap'ùa pari Tachi Ak'õrepa parã chupùria k'awaaji mãik'aapa jùrùji irude ijãadamerã mãik'aapa ùt'aa wãdamerã. Mamîda parãpa mãga ijãa k'iniada–e p'anù. Ma k'ãyaara ijãa k'inia p'anù awaraa ne–inaa k'aurepa ùt'aa wãdai. 7 ¡Mamîda mãga–e! Eperãarã ûk'uruurãpa parãmaa k'îsia awara–awaraapiruta. Mãùrãpa ne–inaa awara jaratee k'inia p'anù, Tachi Ak'õre pedee pia jarateedai k'ãyaara. 8 Mapa taipa wa ùt'aripema angeleerãpa paara jarateeruta pùjida taipa naaweda jarateeda awara, Tachi Ak'õrepa mãùrã atuapiipia bù. 9 Parãpa ijãajida taipa naaweda jarateedap'edaa. Mapa mùa waya jarai ma et'ewa jarada. Abaapa jarateeru pùrã taipa Cristode jarateeda k'ãyaara awara, mãgà atuaipia bù.
10 Mùa jara k'inia–e bù eperãarãpa mù pia ak'ùdamerã mùa jaratee bù k'aurepa. Mãga ooda paara, p'oyaa oo–e pak'aji Cristopa oopi bùk'a. Cristode ijãai naaweda, mãga ooji mîda, ârá jîp'a na mimia oo k'inia bù Tachi Ak'õrepa oopi bùk'a, iruata mù pia ak'ùmerã.
Tachi Ak'õrepa Pablo jùrùt'erada Jesupa ooda jarateemerã
11 Âpemaarã Cristo k'aurepa, mùa nãga k'awapi k'inia bù parãmaa. Mùa Cristopa ooda eperãarã k'aripait'ee parã t'ãide jaratee nipak'ãri, jaratee–e paji mùchi k'îsiadoopa 12 maa–e pùrã awaraapa mùmaa jarateeda. Jara–e paji eperãpa jara pëida. Jîp'a jaraji Jesucristopa mùmaa k'awapida.
13 Parãpa k'awa p'anù mùa ooda at'ãri judiorãpa ijãapatade ijãa bak'ãri. Tachi Ak'õredeerã audú jùrù nipapachi peeit'ee, mãùrã jõpi k'inia bada perã. 14 Maapai judiorãpa ijãapata audupùara k'awaa wãji, mù ome año auk'a iru p'anadap'edaarã k'ãyaara. Jõmaarã k'ãyaara pipùara oo k'inia baji judiorãpa oopata, chonaarãweda ûraapatap'edaak'a.
15 Mãga baji mîda, ârá mùa k'awa bù Tachi Ak'õrepa k'îsia iru baji mù jùrùt'erait'ee oomerã ichia oopi bùk'a. Mãga ooji mù t'oi naaweda, ichi wãara t'ãri pia bapari perã. 16 Maperã ichi Warra k'awapiji mùmaa, judio–eerã t'ãide mùa jarateenamerã ichi Warrapa ooda eperãarã k'aripait'ee. Mamîda mãga k'awapik'ãri, mù apidaamaa wã–e paji ûraa iidide. 17 Ichiaba wã–e paji Jerusalendee Cristo ome nipapatap'edaarãmaa ne–inaa iidide, Cristopa ãra mù naa pëiji mîda jarateede. Ma k'ãyaara, ma t'êepai wãji Arabia eujãdee ùt'aa t'âde mùchi ituaba. Maap'eda waya cheji Damasco p'uurudee.
18 Wãara, Cristode ijãadak'ãriipa año õpee parumaa, mù Jerusalendee wãji Pedro ak'ùde mãik'aapa tomia omé mama beeji. 19 Mamîda mama bùde Cristopa jùrùt'eradaarã awara unu–e paji. Tachi Waibùa Jesucristo âpema, Santiago aupaita unuji. 20 Tachi Ak'õrepa k'awa bù mùa na p'ã bùde seewa jara–e bù. Wãarata jara bù.
21 Ma t'êepai Jerusalendeepa wãji Siria eujãdee mãik'aapa Cilicia eujãdee. 22 Maapai Cristode ijãapataarã Judea eujãdepemaarãpa mù waide k'awada–e p'anajida. 23 Aba na pedee ûrijida awaraarã ijãapataarã it'aideepa: “Tachi jùrù nipadapa ârá jarateemaa bù Cristopa ooda eperãarã k'aripait'ee, naaweda irude ijãa amaapi k'inia baji mîda.” 24 Mãga ûridak'ãri, ma ijãapataarã o–îa ùt'aa t'âjida gracias jaradait'ee Tachi Ak'õremaa mù pari.