Ak'õrepa jùrùt'eradaarã awaraarãpa Pablo pia ak'ùpatap'edaa
2
1 Ma naa wãda t'êepai Jerusalendee, catorce año parumaa waya wãji tachi âpema Cristo k'aurepa Bernabé ome. Mùa tachi âpema Tito auk'a ateeji. 2 Wãji Tachi Ak'õrepa mùmaa k'awapida perã wãipia bù. Mama bùde ijãapataarã ak'ùpataarã taide mùa jaraji pedee pia jõma mùa Cristode jarateepari judio–eerã t'ãide nipak'ãri. Mãga ooji k'awa k'inia bada perã ãrapa pia ak'ùdai wa pia ak'ùda–e pai mùa jarateepari judio–eerãmaa. Mãga k'awa k'inia baji pariatua na mimia oo k'inia–e bada perã. 3 K'îsia nâbaji mîda ãrapa jaradait'ee, mãga uchia–e paji. Mù k'õp'ãyo, Tito, judio–ee paji mîda, maarepida jarada–e paji ichi k'ap'ùade tauchaa bùpimerã. 4 Ma–it'eeta wãjida ãramaa iidide. Ûk'uru wãara Cristode ijãada–e p'anadap'edaarã merã t'îujida judio–eerã ijãapataarã t'ãide, tachi ijãapata Cristode pia k'awaade. Jarajida tauchaa bùpidaipia bù judio–eerã ijãapataarã ùmùk'îraarã k'ap'ùade. Mãgeerãpa k'iniada–e tachi ijãadamerã Jesucristodepai, Tachi Ak'õrepa tachi pia ak'ùmerã. Tachi auk'a esclavoorãk'a p'anapi k'inia p'anù Moisepa p'ãda jua ek'ari, judiorã chonaarãweda p'anapatap'edaak'a. 5 Taipa maarepida k'îsiada–e paji oodait'ee mãgeerãpa oopi k'inia p'anadap'edaak'a. Cristopa ooda eperãarã k'aripait'ee, ma pedee wãara jâa k'inia p'anajida parã–it'ee.6 Ma awara tachi waibùarãda apataarãpa ne–inaa awara jarada–e paji mùa jarateemerã. Mùa jara bù “tachi ijãapataarã waibùarãda apata” ûk'uruurãpa at'ãri jarapata perã Cristo ome nipapatap'edaarã awaraa ijãapataarã k'ãyaara waibùara p'anù. Mamîda mùa p'ua–e bù chisãgà ijãapari waibùara bù mãik'aapa chisãgà ijãapari ek'ariara bù. Tachi Ak'õrepa ichideerã jõmaweda auk'a pia ak'ùpari. 7-8 Mãgà ijãapataarã waibùarãpa ne–inaa awara jarateepidai k'ãyaara mùmaa, mù bùjida Tachi Ak'õre juade waapùara judio–eerã t'ãide jarateenamerã Cristopa ooda eperãarã k'aripait'ee. K'awajida Tachi Ak'õrepa mù ma–it'ee jùrùt'eraji, Pedro jùrùt'eradak'a judiorãmaa jarateenamerã.
9 K'awaadak'ãri Tachi Ak'õrepa wãara mù k'aripa bù judio–eerãmaa jarateenamerã, Santiago, Pedro Juan ome, chi ijãapataarã ak'ùpataarã waibùarãda apata, ãchi jua teejida mùmaa mãik'aapa Bernabemaa. Mãga oojida ak'ùpidait'ee auk'a k'õp'ãyoorãk'a taipa Cristopa ooda eperãarã k'aripait'ee judio–eerã t'ãide jarateedaipia bù. Jõdee ãchia judiorã t'ãide jarateedai. 10 Jîp'a ãchia taimaa iidijida k'îra atuanaadamerã k'aripadait'ee chupùria chedeerã ãchi t'ãide. Mùa pida auk'a mãga oo k'inia bù.
Antioquía p'uurude Pablopa Pedro ùtrùada
11 Mãgá ãra t'ãideepa t'ãri o–îa uchiajida mîda, Pedro Antioquía p'uurudee chek'ãri, ijãapataarã taide mùa iru ùtrùaji judio–eerãmaa ne–inaa k'achia oo bada perã. 12 Nãga ooji. Naa pachek'ãri, iru auk'a nek'opachi judio–eerã ijãapataarã ome. Mamîda aù t'êepai ûk'uru judiorã Santiago ome p'anadap'edaarã Jerusalendeepa pachejida. Mãùrãpa ijãapata judiorã nek'odaik'araa bù judio–eerã ome. Ma awara ijãapata tauchaa bùpidaipia bù judio–eerã k'ap'ùade. Maperã awara nek'ojida. Pedropa mãga unuk'ãri, auk'a awara nek'omaa beeji, mãùrãpa k'achia pedeenaadamerã iru ãpùte. 13 Mãpai Pedropa mãga ooru unudak'ãri, awaraa judiorã ijãapataarã Antioquiadepemaarã auk'a k'îra jîp'a–eedachida. Judio–eerã p'anadap'edaamãiipa awara nek'ojida, Bernabé paara. 14 Mùa ãchi mãga unuk'ãri, k'awaaji ãchia ooda–e paji Tachi Ak'õrepa wãarata jara pëidak'a. Mapa jõmaarã ijãapataarã taide Pedromaa jaraji:
—Pùchi t'oruweda pù judío mîda, nama bùde judiorãk'a ba–e pajida aji. Mãga bùta, ¿sãap'eda pùa judiorãpa oopata oopi k'inia bùma aji, judio–eerãmaa?
Cristode ijãa p'anùùpapai ùt'aa wãdai
15 Wãara, tachi t'oruweda tai judiorãpa iru p'anapachida Tachi Ak'õrepa Moisemaa ûraa p'ãpida. Tai Tachi Ak'õrede ijãadak'aa beerã–e, judio–eerãk'a. 16 Mamîda Tachi Ak'õre Ûraa p'ãda mãgá iru p'anù mîda, taipa pida k'awa p'anù eperã apida p'ek'au k'achia wêe bait'ee Tachi Ak'õre k'îrapite mãgùpa oopari perã ma ley p'ãdade jara bùk'a. Moisepa p'ãdade jara bùk'a oo p'anùùpapai eperãarã p'oyaa wãdak'aa Tachi Ak'õre truadee. Jîp'a eperã iru truadee wãit'ee Jesucristode ijãapari perã. Maperãpù tai auk'a Cristode ijãajida, iru k'aurepa Tachi Ak'õrepa tai p'ek'au k'achia wêe ak'ùmerã.
17 Mãgá Cristode ijãajida, p'ek'au k'achia wêe p'ana k'inia p'anadap'edaa perã Tachi Ak'õre k'îrapite. Uchiajida ma ley p'ãdade jara bù jua ek'ariipa mãik'aapa judio–eerãk'a pajida. Mãga oodak'ãri, ¿ne–inaa k'achia oojidak'ã? Mãgá ne–inaa k'achia ooda paara, mãgara Cristopa taimaa ne–inaa k'achia oopik'aji. ¡Mamîda mãga–e! 18 Mùchi k'inia wãara ne–inaa k'achia ook'aji eperãarãmaa waya oopida paara Moisepa p'ãdade jara bùk'a, oopii k'ãyaara Tachi Ak'õrepa jara pëidak'a Cristo k'ap'ùa pari. 19 Mùa mãga jara bù mùa p'oyaa oo–e pada perã jõma ma p'ãdade jara bùk'a. Ma k'aurepa mù piudak'a baji, ne–inaa oo–ee Tachi Ak'õre–it'ee. Mamîda Cristode ijãak'ãri, irua mù uchiapiji ma p'ãdade jara bù jua ek'ariipa, wãara oomerã Tachi Ak'õrepa oopi k'inia bùk'a. 20 Cristopa mãga ooji, kurusode piuk'ãri. Maperã mùa jarai mù jida auk'a kurusode piu pùk'aji Cristo ome, mãgá uchiait'ee ma ley p'ãda jua ek'ariipa mãik'aapa araa bapariit'ee iru ome. Ârá iruta bapari mù ome mãik'aapa iru mù poro waibùa. Mapa mù chok'ai bù misa, ijãa bù Tachi Ak'õre Warrade mãik'aapa oo k'inia bù irua oopi bùk'a. Mãga oo k'inia bù irua mù audú k'inia iru bap'eda, piuda perã mù pari. 21 Mùa eperãarãmaa ijãapi k'inia–e bù ne–inaa awara, Tachi Ak'õrepa pedee pia Cristode jara pëida k'ãyaara. Cristo piuji tachi o k'achiadeepa k'aripa atait'ee, mãgá Tachi Ak'õrepa tachi pia ak'ùmerã. Tachi Ak'õrepa eperãarã pia ak'ùda paara oo p'anadap'edaa perã Moisepa p'ãdade jara bùk'a, Cristo pari piuk'aji.