Chisãgùde ijãadaipia bù; Moisepa p'ãdade wa Cristode
3
1 ¡Aai, Galacia pidaarã! ¡Parã k'îsia k'awada–ee beeråk'apù p'anù! ¿Apidaapa parã poro p'ërebaipit'aajida–ek'ã? ¿K'irãpada–e p'anùk'ã taipa jarateedap'edaa parã t'ãide nipadak'ãri? Jesucristo kurusode piuda pia jarateejida parã jõmaarãmaa. 2 Jîp'a mùa nãga k'awa k'inia bù. ¿Tachi Ak'õre Jaure ba chejik'ã parã ome, oo p'anadap'edaa perã Moisepa p'ãdade jara bùk'a maa–e pùrã ijãadap'edaa perã Tachi Ak'õrepa jara pëida Cristo k'ap'ùa pari? 3 ¿Parã wãara k'îsia k'awada–ee p'anùk'ã? Naaweda Cristopa ooda eperãarã k'aripait'ee ûridak'ãri, Cristodepai ijãajida mãik'aapa p'aneejida iru Jaure ome. ¿Ârá k'îsiapatak'ã Tachi Ak'õrepa parã pipùara ak'ùit'ee oo p'anù pùrã judiorã ley p'ãdade jara bùk'a maa–e pùrã ne–inaa oo p'anù pùrã pãchi juadoopa? 4 ¿Jõma Tachi Ak'õre Jaurepa pia ooda parã–it'ee pari oojik'ã? ¡Wãara mãga pari ook'aji, parã ijãa k'inia p'anù pùrã ma ley p'ãdade, Cristodepai ijãadai k'ãyaara! 5 Mùa waya iidiit'ee. Tachi Ak'õrepa ichi Jaure pëik'ãri parã ome bapariimerã mãik'aapa parã t'ãide ne–inaa oopimerã eperãarãpa p'oyaa oodak'aa ãchi juadoopa, ¿sãap'eda mãgá pëiparima? Pëi–e parãpa oopata perã irua Moisemaa ûraa p'ãpida jara bùk'a. Ma k'ãyaara pëipari Cristodepai ijãapata perã.Tachi Ak'õrepa Abraham pia ak'ùda
(Romanos 4.1-3)
6 K'îsiadáma judiorã chonaarãwedapema Abrahamde. Tachi Ak'õrepa ûraa p'ãpidade chonaarãmaa jara bù:
‘Abrahampa Tachi Ak'õrepa jarada ijãaji. Maperã Tachi Ak'õrepa iru pia ak'ùpachi.’ (Génesis 15.6)
7 Mapa k'awaadaipia bù eperãarãpa Tachi Ak'õrede ijãadak'ãri, ãchi wãara Abrahamdeepa uchiadak'a p'anù. Iruk'a Tachi Ak'õrepa jarada ijãapata mãik'aapa iru k'îrapite pia p'anapata. 8 Tachi Ak'õrepa naaweda k'îsia iru baji judio–eerã o k'achiadeepa k'aripa atait'ee, wãara ijãadak'ãri. Mãga k'awapiji Abrahammaa. Tachia mãga k'awa p'anù Tachi Ak'õrepa Moisemaa nãga p'ãpida perã:
‘Tachi Ak'õrepa na pedee pia Abrahammaa mãgaji: “Mùa na p'ek'au eujãdepemaarã jõmaweda k'aripait'eeda aji, pù k'ap'ùa pari.” ’ (Génesis 12.3)
9 Ak'õrepa mãga jarada perã, tachia k'awa p'anù Tachi Ak'õrepa Abraham bendiciadak'a irua ijãada perã, awaraarã auk'a bendiciait'ee irude ijãadak'ãri.
10 Jõdee eperãarã k'achia ooit'ee, ichi ley p'ãdade jara bùk'a ooruta pùrã irua ãchi pia ak'ùmerã. Ãchi atuapiit'ee p'oyaa ooda–e perã jõma ma ûraade jara bùk'a:
‘Eperãpa oo–e bù pùrã jõma Ak'õre Ûraa p'ãdade jara bùk'a, atuait'ee.’(Deuteronomio 27.26)
11 Ma jõma jara aupadade k'îsiadak'ãri, pia k'awa p'anù Tachi Ak'õrepa pia ak'ù–e chi oo k'inia bùpapai iru ley p'ãdade jara bùk'a. Jîp'a pia ak'ùpari eperã irude ijãa bùta. ¿Iru ley p'ãdade nãga jara bù–ek'ã?
‘Eperã Tachi Ak'õrede wãara ijãapari ichita bapariit'ee iru ome, p'ek'au k'achia wêe bairã iru k'îrapite.’ (Habacuc 2.4)
12 Eperã ijãa–e bùpa ooda paara jõma Tachi Ak'õre Ûraa p'ãdade jara bùk'a, ùt'aa wãk'aji ichi k'îradoopa. Mãga k'awa p'anù Tachi Ak'õre Ûraa p'ãdade jara bairã:
‘Eperãpa ook'ãri jõmaweda Ak'õre Ûraade jara bùk'a, ichita bapariit'ee ma ûraade jara bùk'a.’ (Levítico 18.5)
13 Mamîda tai judiorãpa oodak'aa jõmaweda Tachi Ak'õre Ûraa p'ãdade jara bùk'a. Mapa o k'achiade p'anajida mãik'aapa atuadait'ee paji. Mamîda Cristopa tai uchiapiji ma ley p'ãdade jara bù jua ek'ariipa, ma k'aurepa atuanaadamerã. Mãga ooji kurusode piuk'ãri. Tachi Ak'õrepa iru k'achia ooji, tai k'achia ooi k'ãyaara. Mãgá tai k'aripaji. K'awa p'anù Cristo k'achiade baji Ak'õre Ûraa p'ãdade jara bairã:
‘Eperã pak'urude baijira bù k'achiade banait'ee.’(Deuteronomio 21.23)
14 Jesucristopa mãgá tai k'aripaji parã judio–eerã paara ijãadamerã Abrahampa ijãadak'a. Ma awara mãgá tai k'aripaji tachi jõmaweda ichiaba ijãadak'ãri, iru Jaure tachi ome iru p'anadamerã. Mãgá Tachi Ak'õrepa ooji ichia jaradak'a Abrahammaa, jarak'ãri Abraham k'ap'ùa pari ne–inaa pia ooit'ee na p'ek'au eujãdepemaarã jõmaarãmaa.
Moisepa p'ãda Tachi Ak'õrepa jarada ome
15 Âpemaarã, k'îsiadáma eperãarãpa oopatade. Eperãpa p'ãk'ãri k'airãpa ichi net'aa atadait'ee ichi piuk'ãri, chi firma p'ãp'eda, eperã awaraapa ne–inaa awaraa p'ã–e pai aù p'ãdade, chi p'ãda chiparipa jara–ee. Maa–e pùrã chipari piuk'ãri, awaraa eperãpa ne–inaa awaraa p'ã–e pai aù p'ãdade. Ichiaba ichi k'inia ma p'ãda jõpi–e pai. 16 Tachi Ak'õrepa jara bëiji Abraham ome irudeepa uchiadait'eerã k'aurepa na p'ek'au eujãdepema jõmaarãmaa ne–inaa pia ooit'ee.a Mãga jarak'ãri, jara k'inia–e baji jõmaweda Abrahamdeepa uchiadait'eerã k'ap'ùa pari ma ne–inaa pia ooit'ee. Jîp'a jara k'inia baji irudeepa uchiait'ee abaa k'ap'ùa pari mãga ooit'ee. Mãgà Jesucristo. 17 Ma jara aupadade mùa nãga jara k'inia bù: eperãpa p'ãda bëiparik'a k'awaadamerã k'aipa ichi net'aa atait'ee, mãga pùk'a Tachi Ak'õrepa ichia jarada bëiji Abraham ome, iru t'êe uchiadap'edaarãpa auk'a mãga k'awaadamerã. Jõdee, cuatrocientos treinta año wãyaada t'êepai, ichi ûraa Moisemaa p'ãpiji. Mamîda ma ûraa p'ãpik'ãri, ichia jara bëida Abraham ome at'ãri beeji. Ma ley p'ãdapa jõpi–e paji ichia naapùara jarada Abrahammaa. 18 Tachi Ak'õrepa na p'ek'au eujãdepemaarã k'aripa k'inia bada paara Moisepa ley p'ãdade jara bùk'a oopata k'aurepa, mãgara ichia jarada jara bëi–e pak'aji Abraham ome. Mamîda mãga–e paji. Ichia jarada bëiji Abraham ome, k'inia bada perã Abrahampa ma jarada ijãamerã. Ma ijãada k'aurepa na p'ek'au eujãdepemaarã auk'a ijãadak'ãri, pia p'anapataadai Ak'õre k'îrapite.
K'ãare–it'ee Moisemaa ma ûraa p'ãpida
19 ¿K'ãare–it'ee ichi ûraa Moisemaa p'ãpijima? Mãga p'ãpiji eperãarãpa k'awaadamerã ãchi p'ek'au k'achia ooyaa p'anapata iru k'îrapite. Ma ûraa pëiji ichi angeleerã ome eperãmaa, mãgùpa p'ãmerã eperãarã–it'ee. Tachi Ak'õrepa k'îsia iru baji eperãarãpa ma ley p'ãda iru p'anadamerã, ma Abrahamdeepa uchiada na eujãdee cheru misa na eujãdepemaarã k'aripait'ee, Ak'õrepa naaweda jaradak'a. 20 Mãgá tee pëiji mîda ichi ûraa Moisés k'ap'ùa pari, mãga oo–e paji jarak'ãri Abrahammaa. Ichi it'aideepa jaraji ichia ooit'ee bada Abrahamdeepa uchiada k'ap'ùa pari.
21 Maperã eperãpa k'îsiai Tachi Ak'õrepa k'îsia awara–awaraa iru baji eperãarã o k'achiadeepa k'aripa atait'ee. ¡Mamîda mãga–e! Ichi ûraa tee pëidapa eperãarã o k'achiadeepa uchiapida paara, wãara p'ek'au k'achia wêe p'anak'ajida iru k'îrapite mãik'aapa ùt'aa wãk'ajida ma ûraa k'aurepa. 22 Mamîda iru ley p'ãdade jara bù eperãarã jõmaweda p'ek'au k'achia jua ek'ari p'anapata. Ara presoorã p'oyaa uchiada–e p'anùk'a carceldeepa ãchi juadoopa, mãga pùk'a eperãarã p'oyaa uchiada–e p'ek'au k'achia jua ek'ariipa ãchi juadoopa. Aba uchiadai Jesucristode ijãadak'ãri, iru k'ap'ùa pari Tachi Ak'õrepa eperãarã k'aripapari perã, ichia jaradak'a Abrahammaa.
23 Cristo chei naaweda, tai judiorã ichiaba presoorãk'a p'anapachida Moisepa p'ãdade jara bù jua ek'ari. Ma ûraa carcel jâaparik'a baji. Tai ak'ù baji Tachi Ak'õrepa unupiru misa ichia Abrahammaa jaradak'a. 24 Mimiaparipa warra ak'ùparik'a, ma ley p'ãdapa tai ak'ù pùk'apachi Cristo cheru misa, tai jida irude ijãadamerã mãik'aapa p'ek'au k'achia wêe p'anadamerã Ak'õre k'îrapite. 25 Ârá, Cristo cheda perã, mãgá irude ijãadak'ãri, tai waa p'anadak'aa Moisepa p'ãda jua ek'ari.
26 Ma k'ãyaara pipùara, parã jõmaweda Tachi Ak'õre warrarã, Jesucristode ijãapata perã. Mãgá araa p'anapata Cristo ome. 27 Jõmaweda araa p'anapataarã Cristo ome Tachi Ak'õre warrarã iruk'a. Ma–it'ee tachia poro choopipata; ak'ùpidait'ee araa p'anapata Cristo ome. 28 Mãgá Cristo ome p'anapata perã, Tachi Ak'õrepa tachi ichi warrarãk'a auk'a unupari. Mãga unupari judiorã mîda, judio–eerã mîda, esclavoorã mîda, esclavo–eerã mîda, ùmùk'îraarã mîda, wêraarã mîda. Jõmaweda auk'a p'anù iru k'îrapite Jesucristo ome araa p'anadak'ãri. 29 Ma awara tachi Cristo ome araa p'anapataarã wãara Abrahamdeepa uchiadap'edaarã, Tachi Ak'õrepa jara pëida ijãapata perã Abrahampa ijãadak'a. Maperã iru p'anadait'ee jõma Tachi Ak'õrepa k'îsia iru bù ichideerã–it'ee.