Tachi Ak'õre warrarã
4
1 Piara k'awaadait'ee mùa jara k'inia bù, k'îsíatù nãgùde. Eperã piuk'ãri warra k'aipeepai iru bù, ma–ãriweda ma warrapa atak'aa chi ak'õrepa net'aa atabëida. Awaraarã jua ek'ari chi ak'õre esclavok'a bapari, net'aa mak'ùara wêe, chonaa paru misa. 2 Mãùmisa chi ak'ùpataarãpa nùpata chi ak'õrepa año jara bëida parumaa, ma net'aa teedai naaweda mãik'aapa chi te chipari papii naaweda. 3 Mãga pùk'a tachi jida esclavoorãk'a p'anapachida, Cristo na eujãdee chei naaweda Tachi Ak'õrepa jara bëidak'a. Maapai chonaarãwedapema ûraa jua ek'ari p'anapachida mãik'aapa k'îsia p'anapachida warrarãk'a. K'îsia p'anapachida tachia ne–inaa k'awa p'anùùpa maa–e pùrã ma ûraa jara bùk'a oo p'anùùpa ùt'aa wãdai. 4 Mamîda Tachi Ak'õrepa k'iniak'ãri, ichi Warra pëiji na p'ek'au eujãdee judío wêrapa t'omerã. Mãgá chi Warra bapachi Tachi Ak'õre Ûraa p'ãdade jara bù jua ek'ari mãik'aapa jõma oopachi ma ûraade jara bùk'a. 5 Mãga ooda perã ichia aupai tai judiorã uchiapii ma ley p'ãdade jara bù jua ek'ariipa. Ma–it'eeta Tachi Ak'õrepa ichi Warra pëiji; tai judiorã uchiapimerã ma ûraa jara bù jua ek'ariipa mãik'aapa Tachi Ak'õre warrarã papimerã iruk'a. 6 Tachi Cristode ijãapataarãpa k'awaadamerã tachi wãara iru warrarã, Tachi Ak'õrepa pëiji ichi Warra Jaure tachi t'ãride bapariimerã. Mãgà Jaurepa ichita Tachi Ak'õremaa jarapari: “Abbá, Mù Ak'õre.” 7 Mapa parãpa k'awaadai ârá esclavoorã–e. Ma k'ãyaara Tachi Ak'õre warrarã. Mãgá iru warrarã perã, iru p'anadait'ee jõma irua k'îsia iru bù ichideerã–it'ee.Pablo ijãapataarã–it'ee k'îsia nâbada
8 Naaweda parãpa Tachi Ak'õre waide k'awada–e p'anùweda, Tachi Ak'õre–ee beemaa ùt'aa t'âpachida mãik'aapa ma jua ek'ari p'anapachida esclavoorãk'a. 9 Mamîda ârá parãpa Tachi Ak'õre k'awa p'anù; pia jarait'eera, Tachi Ak'õrepa parã k'awa bù. Mãga bùta, ¿sãap'eda waya t'îu k'inia p'anùma ma naawedapema ne–inaa vale–ee baibù jua ek'ari, waya esclavoorãk'a p'aneedait'ee? 10 Parãpa ùapata ewari, atane mãik'aapa año, âipata ewate pak'ãri maa–e pùrã fiesta ewate pak'ãri. ¿K'îsia p'anùk'ã mãga oo p'anùùpa Tachi Ak'õrepa parã pipùara ak'ùit'ee apemaarã ijãapataarã k'ãyaara? 11 Mù waawee bù, pari parã t'ãide jaratee nipaji jîak'aapa.
12 Âpemaarã, mùa parãmaa enenee nâbù mùk'a uchiadamerã Tachi Ak'õrepa ûraa Moisemaa p'ãpida jua ek'ariipa. Naaweda parã ma jua ek'ari p'anada–e paji. Mapa parã t'ãide nipak'ãri, mùa ma ûraa jaratee–e paji. Mama pak'ãri, parãpa mù auteebaijida mãik'aapa pia ak'ùjida. 13 Parãpa k'awa p'anù mù k'ayaa bada perã, ma naa wãyaa wãdade parã t'ãide, mama beeji jarateeit'ee Cristopa ooda eperãarã k'aripait'ee. 14 Ma k'ayaa k'aurepa parãpa mù yiaraa iru p'anak'ajida, maa–e pùrã mù ãpùte pedee k'achia jarak'ajida. Mamîda mãga ooda–e paji. Ma k'ãyaara mù pia auteebaijida, Jesucristo wa ùt'aripema ángel auteebaik'ajidak'a. 15 Maapai parã o–îa p'anajida. Mùa k'awa bù parãpa mù k'aripa k'iniapa pãchi tau paara êek'ook'ajida mù k'aripadait'ee. Mamîda ârá mãga p'anù–e. ¿Parã, sãgajidama? 16 Ârá ¿mù k'îra unuamaa iru p'aneeruta–ek'ã, mùa wãarata jara bairã parãmaa?
17 Awaraa Ak'õre Ûraa jarateepataarãda apataarãpa ne–inaa awara ijãapi k'inia p'anù, mùa jaratee bù k'ãyaara. Mapa parã t'ãide t'ãri pia mãik'aapa iwarraa pedee nipapata. K'inia p'anù parãpa ãchi ak'ùdamerã Cristode wãara ijãapataarãk'a. Mamîda mãga p'anù–e. Mùa jaratee bùdeepa parã ãyaa atee k'inia p'anù ãchi eere t'îudamerã. 18 Mùa mãga jarak'ãri, jara k'inia–e k'achia bù awaraarã t'ãri pia nipadamerã parã t'ãide mù wê–e pak'ãri. Pia bù ne–inaa pia oo k'iniadak'ãri parã ome. 19 Mùchi warrarã, ara wêra bi p'irapa mia nâbùk'a ichi warra t'orumaa, mãga pùk'a mù k'îsia nâbùpa waya mia nâbù parãpa wãara oorutamaa Cristopa oopi k'inia bùk'a. 20 Naapai mù parã ome bada paara, k'awa bak'aji k'ãata jarait'ee parãmaa. Wãara mùa k'awa–e sãgapù ooit'ee.
Pablopa jarateeda Agarde mãik'aapa Sarade
21 ¿Parã ûk'uruurãpa Moisepa p'ãdade jara bù jua ek'ari p'ana k'inia p'anù–ek'ã? ¿K'îsia p'anù–ek'ã ma ûraa jua ek'ari p'anaruta pùrã, Tachi Ak'õrepa parã piara ak'ùit'ee? ¿Parãpa wãara k'awa p'anùk'ã ma ûraade jara bù? 22 Nãga jara bù. Abrahampa warra omé iru baji; aba chi wêra esclava Agarpa t'oda, aba chi wêra Sarapa t'oda.a 23 Chi wêra esclava Agar ome ma warra ooji eperã jîp'aapa warra ooparik'a. Mamîda mãga–e paji chi wêra Sarapa warra t'oda ome. Naaweda Tachi Ak'õrepa jaraji Abrahampa warra ooit'ee chi wêra ome. Mãgà warra t'oji Ak'õrepa jaradak'a, Abraham chi wêra ome audú chonaa p'anajida mîda warra oodait'ee. Tachi Ak'õrepa k'aripaji mãgà warra oodamerã. 24 ¡K'îsíatù nãgùde! Ma wêra chaa jara k'inia bù Tachi Ak'õrepa jara bëida aba. Irua jara bëida aba Sinaí eedepema paji, mama iru ûraa jarada perã Moisemaa, ichia ma ûraa p'ãmerã eperãarã–it'ee. Mãga jarap'eda, eperãarã esclavoorãk'a p'aneejida ma ûraa jarada jua ek'ari. Mãgà jara bëida jara k'inia bù Agar. 25 Maperã Abraham wêra esclava Agar jara k'inia bù Sinaí ee, Arabia eujãde bù. Agardeepa uchiadap'edaarã ichik'a esclavoorã p'anapachida. Mãga pùk'a ârá Jerusalén p'uurude p'anùùrã esclavoorãk'a p'anù, Tachi Ak'õre Ûraa jarada Sinaí eede, ma jua ek'ari at'ãri p'anapata perã. 26 Jõdee Abraham wêra jara k'inia bù ùt'aripema Jerusalén. Tachi Cristode ijãapataarã ùt'aripema Jerusalendepemaarã. Maperã p'anadak'aa ma Sinaí eede jarada jua ek'ari. 27 Tachi Ak'õre pedee jarapari Isaiapa ichiaba jaraji ma Jerusalén omeede, chonaarãweda nãgà pedee p'ãk'ãri:
‘Pù, chi warra t'ok'aa bùta, o–îa báji. O–îapa bíaji warra t'oru p'ua senti–e bù mîda mãik'aapa pù k'imapa pù yiaraa iru bù pùjida. Na ewari pùdeepa uchiadait'eerã chok'araara pait'ee chi warra naa t'odadeepa uchiadait'eerã k'ãyaara.’(Isaías 54.1)
28 Âpemaarã, tachi Abraham warra Isaack'a. Tachi chi naa warra t'ok'aa badadeepa uchiadak'a p'anù, wãara ijãapata perã Tachi Ak'õrepa jara bùde, Abrahampa ijãadak'a. 29 K'irãpátù chi warra naapema Agarde t'oda eperã jîp'aak'a t'oji. Jõdee chi warra t'êe t'oda Sarapa t'oji Tachi Ak'õre Jaurepa t'opidak'a. Mãga baji mîda, chi naapùara t'oda, Ismaelpa, nepùra jùrùji Isaac, chi t'êe t'oda ome. Ârá mãga pùk'a Moisepa p'ãdade #jara bùk'a oo k'inia p'anùùrãpa nepùra jùrùpata tachi Cristode ijãapataarã ome. 30 Mamîda mãga baji mîda Agar warra ome, Tachi Ak'õre Ûraa p'ãdade jara bù:
‘Ãyaa pëipáde aji, ma esclava ichi warra ome. Ma warrapa chi ak'õrepa bëida ata–e pait'ee chi wêra warrapa ataparik'a.’ (Génesis 21.10)
31 Mãpai âpemaarã, Tachi Ak'õrepa tachi jëre–e pait'ee. Tachi Cristode ijãapataarã chi esclavadeepa uchiadap'edaarãk'a–e. Jîp'a chi esclava–e badadeepa uchiadap'edaaråk'apù p'anù. Mapa tachita Tachi Ak'õre truadee wãdait'ee.