Cristodeerã Moisepa p'ãda jua ek'ari p'anadak'aa
5
1 Cristopa mãgá tachi uchia atada perã Tachi Ak'õre Ûraa Moisemaa p'ãpida jua ek'ariipa, chóotù irude ijãa p'anùde. T'îunáatù ma ley p'ãdade jara bù jua ek'ari, waya esclavoorãk'a p'anadait'ee.2 ¡Ûrítù mù, Pablopa jara bù! Parãpa pãchi k'ap'ùade tauchaa bùpiruta pùrã, k'îsia p'anadairã mãga oo p'anùùpa ùt'aa wãdai, Cristopa parã waa k'aripa–e pait'ee ùt'aa wãdamerã. 3 Ichiaba waya jarait'ee. Parãpa pãchi k'ap'ùade tauchaa bùpiruta pùrã, t'îudait'ee jõmaweda Tachi Ak'õre Ûraa p'ãdade jara bù jua ek'ari. Mãga ooruta pùrã, oodaipia bù jõma ma ûraade jara bùk'a, Tachi Ak'õrepa parã pia ak'ùmerã. 4 Parã, ma ûraade jara bùk'a oo p'anùùrã Tachi Ak'õrepa parã pia ak'ùmerã, Cristode ijãa amaadaruta mãik'aapa waa ichideerã p'anada–e pait'ee. 5 Mamîda tachi Cristode ijãapataarãpa ijãa p'anù Cristopa tachia p'ek'au k'achia oopata wêpapipari, Tachi Ak'õre Jaurepa tachimaa mãga k'awapipari perã. Maperãpù nù p'anù p'ek'au k'achia wêe p'anadait'ee Tachi Ak'õre k'îrapite iru ewari waibùa ewate. 6 Mãgá nù p'anù k'awa p'anadairã Tachi Ak'õrepa tauchaa iru beerã apemaarã k'ãyaara pipùara ak'ù–e. Ma awara pipùara ak'ù–e tauchaa bùpida–eerã. Jîp'a pipùara ak'ùpari eperã awaraarã k'inia iru bùpa, Jesucristode ijãapari perã.
7 Naaweda parãpa mãga ijãa p'anajida. ¿K'aipa ma wãara ijãa amaapijima, Cristopa oopi bù awara oo p'aneedamerã? 8 ¡Tachi Ak'õrepa–e paji! Iruata parã jùrùji ichideerã p'aneedamerã. 9 Levadura ma–ãriipa pan masa jõmaweda waridaiparida apata.a 10 Mamîda mùa ijãa bù parãpa mù ûraa ûridait'ee mãik'aapa ooda–e pait'ee seewa jarateepari apidaapa oopi k'inia bùk'a. Mãga ijãa bù Tachi Waibùa Cristo mãgeerã k'ãyaara mãik'aapa jõmaarã k'ãyaara waibùara bapari perã. Ichi k'aurépata tachi ijãapataarã araa p'anapata. Jõdee mãgeerãpa jarateepata k'aurepa Tachi Ak'õrepa ãchi k'achia ooit'ee.
11 Âpemaarã, ¿mãgee jarateepataarãpa jarada–e p'anùk'ã mùa auk'a jarateepari eperãarãpa ãchi k'ap'ùade tauchaa bùpidaipia bù, Tachi Ak'õre Ûraa p'ãdade jara bùk'a? Wãara Cristode ijãai naaweda, mùa mãga jarateepachi. Mamîda at'ãri mãga jarateeda paara, ãchia mù ichiak'au bùk'ajida, aupedeeda–ee. Mamîda mãga ooda–e p'anù. Ûridaamaa p'anù mùa jarateek'ãri Cristo kurusode piuda, ma k'aurepapai tachi ùt'aa wãdai. 12 ¿Ãrapa k'îsia p'anù–ek'ã Tachi Ak'õrepa piara ak'ùpari chi k'ap'ùa t'ùùpidap'edaarã? ¡Mãgara, ãchi k'ãratau paara t'ùap'epidaipia bù!
Cristode ijãapataarã chik'inia p'anapataadaipia bù
13 Âpemaarã, k'irãpátù Tachi Ak'õrepa parã jùrùji p'anapataadamerã Cristo jua ek'ari, ma chonaarãweda ley p'ãdade jara bù jua ek'ari p'anapataadai k'ãyaara. Mamîda k'îsiadaik'araa bù oodait'ee pãchi p'ek'au k'achia ooyaa bù k'ap'ùapa oopi k'inia bùk'a. Jîp'a k'îsiadaipia bù awaraarã k'inia iru p'anadait'ee mãik'aapa k'aripadait'ee. 14 Nãgà ûraa jara bùk'a ooruta pùrã, Tachi Ak'õre Ûraa chonaarãweda p'ãdade jara bù jõmaweda oodait'ee:
‘Awaraarã k'inia iru baparíiji pùchi k'ap'ùa k'inia iru baparik'a.’(Levítico 19.18)
15 Ma k'ãyaara, awaraarã k'îra unuamaa iru p'anaruta pùrã mãik'aapa nepùra jùrùruta pùrã ãra ome chõodarutamaa, jõpidait'ee Cristopa oomaa bù parã t'ãide mãik'aapa waa t'ãri auk'a p'anada–e pait'ee.
Oodaipia bù Tachi Ak'õre Jaurepa oopi bùk'a
16 Maperã oo wãk'ãtù wåtù Tachi Ak'õre Jaurepa oopi bùk'a. Mãga ooruta pùrã, ooda–e pait'ee parã p'ek'au k'achia ooyaa bù k'ap'ùapa oopi bùk'a. 17 Oodak'ãri tachi p'ek'au k'achia ooyaa bù k'ap'ùapa oopi bùk'a, p'oyaa ooda–e Tachi Ak'õre Jaurepa oopi k'inia bùk'a. Jõdee oodak'ãri Tachi Ak'õre Jaurepa oopi bùk'a, ooda–e pait'ee ne–inaa tachia oo k'iniata. Omeeweda auk'a p'oyaa oodak'aa. Mapa parãpa oodaipia bù Tachi Ak'õre Jaurepa oopi bùk'a, pãchia oo k'iniata oopiamaapa. 18 Mãga ooruta pùrã, p'anada–e pait'ee Tachi Ak'õrepa Moisemaa ûraa p'ãpida jua ek'ari. Ma k'ãyaara Ak'õre Jaurépata oopiit'ee Tachi Ak'õrepa oopi bùk'a.
19 Jõmaarãpa k'awa p'anù eperãarãpa oodak'ãri ãchi p'ek'au k'achia ooyaa bù k'ap'ùapa oopi bùk'a, nãga p'anapata: miak'ãi p'anùùrã awaraarã ome k'ãipata; k'îsiapata chîara ome k'achia oodait'ee; awaraarã jùrùpata ãchi ome k'achia oodait'ee; 20 ne–inaa juapa ooda k'îrapite ùt'aa t'âpata; petau tau k'awaa beerãmaa wa jaipanaarãmaa wãpata chîara k'achia oodamerã; awaraarã k'îra unuamaa iru p'anapata; nepùra jùrùpata chîara ome; awaraarã net'aa ata k'inia p'anapata ãchi–it'ee; k'îrauyaa p'anapata; jõma k'inia p'anù ãchi–it'ee aupai; t'ãri auk'a bùdak'aa awaraarã ome; k'îsia awarapipata eperãarãmaa ãyaa ateedait'ee awaraarã ik'aawaapa; 21 awaraarã net'aa k'inia p'anapata maa–e pùrã ãchik'a pa k'inia p'anapata, ãchimaa ne–inaa k'achia oo k'iniadarutamaa; chîara peepata; it'ua toyaa p'anapata; pariatua nek'oyaa, toyaa, k'achia oodait'ee jùrùyaa p'anapata fiestade; mãga bee. Mùa naaweda jaradak'a waya jarait'ee. K'îrak'aupai mãgá p'anadai. Mãgee ne–inaa oopataarã p'oyaa wãda–e Tachi Ak'õre truadee.
22 Jõdee chi oopataarãpa Tachi Ak'õre Jaurepa oopi bùk'a nãga p'anapata: awaraarã k'inia iru p'anapata; t'ãri o–îa p'anapata; k'ãiwee p'anapata awaraarã ome; k'îrau–ee choopata awaraarã ome, nepùrade p'anù mîda; awaraarã chupùria k'awaapata; t'ãri pia p'anapata awaraarã ome mãik'aapa awaraarã k'ûradak'aa; jîp'a oopata ãchia jara p'anùk'a; 23 audua nipadak'aa; ne–inaa pariatua oo k'iniadak'ãri, mãga oodak'aa. Ûraa wê–e jarait'ee mãgee ne–inaa oonaadamerã, pia p'anadairã. 24 Ma et'ewa jara aupadade k'îsiadak'ãri, k'awa p'anù Jesucristode ijãapataarãpa oo amaapata ãchi p'ek'au k'achia ooyaa bù k'ap'ùapa ne–inaa k'achia k'îra t'ãdoo oopata. 25 Tachi Ak'õre Jaurepa tachi Cristode ijãapataarã k'aripapari perã, ichita oodáma irua oopi k'inia bùk'a. Mãgá wãara pia p'anapataadait'ee Tachi Ak'õre k'îrapite.
26 Tachi k'inia nãga p'ananaadáma: audua; pedee–idaa; nepùra jùrùyaa; chîara k'îra unuamaa ne–inaa iru bù k'aurepa.