GAL 6

Chik'aripa p'anapatáatù

1 Âpemaarã, mùa ichiaba nãga ûraait'ee. Parãdepema k'achiade baairu pùrã, parã chi oopataarãpa Tachi Ak'õre Jaurepa oopi bùk'a, t'ãri pia mãgà k'aripadaipia bù ma k'achia oo amaamerã. Mamîda k'îrak'aupai parãpa ne–inaa k'achia oodai, iru k'aripa p'anù misa. 2 Chik'aripa p'anapatáatù. Mãgá jõmaweda choodait'ee nepùrade baaidak'ãri. Mãgá chik'aripa p'anadak'ãri, oopata Cristopa oopi bùk'a.

3 Ijãaparipa k'îsia bù pùrã ichi pipùara bù awaraarã k'ãyaara, ichi itu k'ûraru, jõmaweda auk'a p'anadairã Tachi Ak'õre k'îrapite. 4 Ijãapari chaa k'îsiaipia bù ichia ooparide. Pia oo bù pùrã, t'ãride o–îa baipia bù. Mamîda awaraarãpa oopata ak'ùik'araa bù k'awaait'ee auk'a pia wa mak'ùara pia–e bù ichia oo bù jîak'a. Tachia oo p'anùdepai k'îsiadaipia bù. 5 Mùa mãga jara bù tachi chaachaa panadait'ee perã Tachi Ak'õre k'îrapite, irua tachia ne–inaa oodap'edaa ak'ùmerã.

6 Ijãapataarã jarateepari it'aideepa parãpa ûridak'ãri Cristopa ooda eperãarã k'aripait'ee, ma jarateepari pia ak'ù p'anadaipia bù mãik'aapa ne–inaa pia teedaipia bù irumaa, iru mimia pari.

7 K'ûranáatù pãchi itu. Tachi Ak'õre oo iru p'anadaik'araa bù. Ne–uuparipa ne–uuk'ãri, ma ne–uuda jîak'a ewait'ee. 8 Mãga pùk'a k'achia k'îra t'ãdoo ooparipa ichia k'iniata oop'eda, ma k'achia jîak'a atait'ee, atuait'ee perã. Jõdee Tachi Ak'õre Jaurepa oopi bùk'a ooparipa ne–inaa pia oop'eda, ma jîak'a atait'ee, ùt'aa wãit'ee perã. 9 Maperã sênaadáma ne–inaa pia oo p'anù misa. Mãgá choo p'anù pùrã, na ewari atadait'ee jõmaweda Tachi Ak'õrepa iru bù ichideerã–it'ee. 10 Maperã tachi na p'ek'au eujãde p'anù misa, eperãarã jõmaweda k'aripadáma. Mamîda naapùara tachi âpemaarã Cristo k'aurepa k'aripadaipia bù.

Pablopa ûraada mãik'aapa salude tee pëida

11 Ak'àtù mùa nãgà letra waibùapa p'ãru mùchi juadoopa. 12 Ma tauchaa bùpi k'inia p'anùùrãpa parã k'ap'ùade mãga oopi k'inia p'anù judiorãpa ãchi pia ak'ùdamerã. Jara p'anù judio–eerãpa mãga ooruta pùrã Tachi Ak'õre Ûraa chonaarãweda p'ãdade jara bùk'a, pia p'anadai judiorã k'îrapite. Mamîda wãara mãga oopi p'anù judiorã waidoopa. K'iniada–e judiorãpa ãchi jùrùdamerã miapidait'ee, Cristodepai ijãapata perã. 13 Ãrapa paara ne–inaa jõma ooda–e Tachi Ak'õre Ûraa chonaarãweda p'ãdade jara bùk'a, ãchi k'ap'ùade tauchaa iru p'anù mîda. Mãga bùta, ¿at'ãri parãmaa tauchaa bùpi k'inia p'anù–ek'ã? Mãgá awaraarãmaa audua jaradai ãchiata parã k'ap'ùade tauchaa bùpidap'edaa. 14 Taawa mùa maarepida mãga oo–e pai. Jîp'a mùa nãgà audua pedee jarai: Tachi Waibùa Jesucristo kurusode piuda k'aurepapai mù ùt'aa wãit'ee. Ma k'aurépata ârá maarepida mùa p'ua–e bù na p'ek'au eujãdepema ne–inaa tachia oo k'iniata k'îra t'ãdoo. Mãgee ne–inaa piu pùk'a bù mù–it'ee. Jõdee na p'ek'au eujãdepema ne–inaa oo k'inia p'anùùrã–it'ee mù piu pùk'a bù, mãgee ne–inaa waa oo k'inia–e bairã. 15 Ma awara Tachi Ak'õre–it'ee p'ua–e bù tachia tauchaa iru p'anù tachi k'ap'ùade wa wêe p'anù. Jîp'a irua k'inia bù Cristode ijãadamerã, mãgá eperã chiwidi pùk'a padaidamerã, araa p'anapata perã Cristo ome. 16 Mapa mùa parãmaa ûraapari ijãapataadamerã Cristodepai. Mù ùt'aa t'âpari Tachi Ak'õremaa irua parã chupùria k'awaamerã mãik'aapa k'ãiwee p'anapimerã jõmaweda nãgà ûraa jara bùk'a oopataarã, wãara ichideerã perã.

17 Mãpai na pedeepapai na k'art'a p'ã aupait'ee. Waa apidaapa mù ome nepùra jùrùdaik'araa bù. Mù k'ap'ùade jidik'ada–idaa unurutapa k'awaadai mùa oopari Jesucristopa oopi bùk'a.

18 Âpemaarã, mùa ùt'aa iidi bù Tachi Waibùa Jesucristomaa irua parã pia ak'ù bapariimerã, parã t'ãride bù misa. ¡Amén! \z