Cristode ijãapataarã k'ap'ùa apai pùk'a p'anù
4
1 Naaweda jaradak'a, mù carcelde bù parã judio–eerãmaa Tachi Waibùa Cristopa ooda jarateepari perã. Maperãpù mùa parã enenee nâbù p'anapataadamerã Tachi Ak'õrepa k'inia badak'a parã naa jùrùk'ãri Cristode ijãadamerã. 2 Nãga p'anapataadaipia bù: maarepida auduada–ee; t'ãri pia jõmaarã ome; choopari nepùrade bù mîda mãik'aapa k'îrau–ee choopari, awaraarãpa parã ome nepùra jùrù p'anù pùjida. Mãga p'anapataadaipia bù chik'inia p'ana k'inia p'anadairã. 3 Mãgá chik'inia p'anapataadak'ãri, Tachi Ak'õre Jaurepa parã k'ãiwee p'anapiit'ee, wãara araa p'anapataadamerã awaraa ijãapataarã ome. Mapa ne–inaa jõma pia oodaipia bù mãga p'anapataadamerã. 4 Jõma Cristode ijãapataarã k'ap'ùa apai pùk'a p'anapata mãik'aapa Tachi Ak'õre Jaure apai iru p'anapata. Tachi Ak'õrepa parã jùrùk'ãri Cristode ijãadamerã, auk'a ijãa p'aneejida Cristo k'aurepa parã wãdait'ee Ak'õre truadee. Ma–it'ee aupai Tachi Ak'õrepa parã jùrùji. 5 Cristo apai iru p'anù. Iruta Tachi Waibùa. Mapa irudepai ijãapata mãik'aapa poro choopipata ak'ùpidait'ee iru ome araa p'anù. 6 Tachi Ak'õre apai iru p'anù. Iru tachi jõmaarã Ak'õre. Iru Tachi Waibùa. Irua ne–inaa pia oopipari tachimaa, tachi ome bapari perã.7 Mamîda tachi ijãapari chaa Cristopa ne–inaa pia awara–awaraa oo k'awaapipari, mãgá awaraarã k'aripadamerã. Tachi chaachaa auk'a oo k'awaapi–e. Oo k'awaapipari ichia k'inia bùk'a. 8 Mãga ook'ãri, oopari Tachi Ak'õre Ûraa p'ãdade jara bùk'a:
‘Ùt'aa wãk'ãri, p'oyaaji ichi k'îra unuamaa iru p'anadap'edaarã mãik'aapa eperãarãmaa ne–inaa pia tee pëiji.’ (Salmos 68.18)
9 Ma ley p'ãdade “ùt'aa wãk'ãri” ak'ãri, jara k'inia bù aù naaweda edaa cheji na p'ek'au eujãdee chupùria nâbade eperã jîp'aak'a. 10 Mãgà eperã edaa cheda chi ùt'aa wãda. Ichi ùt'aa wãji Tachi Ak'õre bùmaa, jõmaarã k'ãyaara waibùara bade. Maperãpù iru k'aurepa ne–inaa jõmaweda nâbù.
11 Ichiata tee pëiji ichi Jaure, mãgùpa ichideerãmaa oo k'awaapimerã ne–inaa pia awara–awaraa. Ûk'uru jùrùt'eraji jarateenadamerã irua ooda mãik'aapa jarada. Ûk'uru bùji jarapataadamerã irua jarapi bùk'a. Ûk'uru pëiji jõmaarãmaa jarateepataadamerã irua ooda eperãarã o k'achiadeepa k'aripa atait'ee atuanaadamerã. Awaraarã bùji ichideerã ak'ùpataadamerã mãik'aapa jarateepataadamerã irua eperãarãmaa oopi k'inia bù. 12 Ma jõma oo k'awaapiji ichideerãmaa, iru mimia oo wãk'ãtù wãdamerã. Mãgá ijãapataarã jõmaweda irude pipùara ijãadait'ee mãik'aapa irua k'inia bùk'a p'anapataadait'ee. 13 Tachi jõmaarãpa mãga oo k'awaadak'ãri, wãara araa p'anapataadait'ee, auk'a Tachi Ak'õre Warrade ijãadait'ee perã mãik'aapa iru auk'a k'awadait'ee perã. Mãga p'anapataadak'ãri, ne–inaa jõma oo k'awaadait'ee Cristopa oopi bùk'a. Chonaarãpa ne–inaa pariatua ooda–e p'anùk'a warra chak'eerãk'a, mãga pùk'a tachi ijãapataarã ne–inaa pariatua waa ooda–e pait'ee. 14 Mãgá p'anapataadak'ãri, waa p'anada–e pait'ee warra chak'eerãk'a. Ma k'ãyaara ik'awaa beerãpa Tachi Ak'õre Ûraa awara jaratee chedak'ãri, tachia ijãadak'aa pait'ee ãchia jaratee p'anù. Pia k'awaa p'anadait'ee ãchia jaratee nipapata wãara–e. Mapa k'ûrapida–e pait'ee ma k'îsia k'achia iru beerãmaa. 15 Ma k'ãyaara tachia ne–inaa wãara ijãapataadait'ee. Maperã p'anapataadaipia bù Tachi Ak'õrepa wãarata jara pëidak'a. Ichita wãarata jarapataadaipia bù chik'inia p'ana k'inia p'anadairã. Mãga p'anapataadak'ãri, wãara jõma oodait'ee tachi poro Cristopa k'inia bùk'a mãik'aapa tachi jõmaweda iru k'ap'ùa apai pùk'a p'anadait'ee. 16 Tachi ijãapataarã jõma araa p'anù, Cristo k'ap'ùa ome apai pùk'a p'anadairã. Chik'aripa p'anadak'ãri mãik'aapa chik'inia p'anapataadak'ãri, oo k'awaa wãpata tachi poro Cristopa oopi k'inia bùk'a.
Cristo ome sãga p'anapataadaipia bù
17 Tachi Waibùapa mùmaa nãga jarapiru. Waa p'ananáatù ijãadak'aa beerãk'a. Ãchi pariatua k'îsiapata. 18 Ãchi p'ãriu pùk'a bùde p'anadairã, k'awa k'iniada–e Tachi Ak'õre net'aa. Mapa ijãadak'aa Tachi Ak'õrepa eperãarã k'aripai atuanaadamerã. Ãchi k'îsia k'awada–ee, k'ùùrù k'isua p'anadairã. 19 K'îra nejasia wêe pak'oodaida perã, ãchia k'achia oo k'iniata ooi awaa p'anapata. Nãgee ne–inaa k'achia oopata: awaraarã wêra k'âapata mãùrã ome p'ek'au oodait'ee mãik'aapa pariatua p'ek'au oo wãpata awaraarã ome.
20 Mamîda taipa parãmaa mãga jarateedak'aa paji, jarateedak'ãri Cristopa oopi k'inia bù eperãarãmaa. 21 Parãpa mãgà jarateeda ûrijida. ¿Wãara–ek'ã? Ma awara irude ijãajida mãik'aapa k'awaajida Tachi Ak'õrepa wãarata jara pëida irudé. 22 Ma k'aurépata k'awaajida parãpa naaweda oopatap'edaa k'achia baji Ak'õre k'îrapite. Mapa waa mãga p'anapataadaik'araa bù. Oo amáatù parã p'ek'au k'achia ooyaa bù k'ap'ùapa oo k'inia bùk'a. Ma k'aurepa k'achiade p'anapachida mãik'aapa pãchi itu k'ûrapipachida k'achia oo k'iniapa. 23 Ma k'ãyaara pãchi t'ãri chiwidi pùk'a papítù Tachi Ak'õremaa mãik'aapa k'îsíatù irua k'îsiapi k'inia bùk'a. 24 P'anapatáatù k'ap'ùa chiwidi iru p'anùk'a, Tachi Ak'õrepa ichideerã mãga p'anapi k'inia bairã. Tachi ooi naaweda, Tachi Ak'õrepa k'îsia iru baji tachi ichik'a p'anadamerã, p'ek'au k'achia wêe. Mãga p'anadai, jõma oodak'ãri irua wãarata jara pëida jara bùk'a.
25 Mãga p'anadait'ee waa seewa jaranáatù. Ichita wãarata jarapatáatù awaraarãmaa, tachi jõmaweda k'ap'ùa apai pùk'a araa p'anadairã tachi poro Cristo jua ek'ari.
26 ‘K'îraudaruta pùrã, ne–inaa k'achia oonáatù.’ (Salmos 4.4)
K'îrau p'ananáatù ak'õrejîru baairumaa, 27 Netuara Poro Waibùapa eperã taarã k'îrau bù k'achiade baaipipari perã.
28 Ichiaba mùa jara bù chi nechùayaa bùmaa waa nechùanaamerã. Ma k'ãyaara mimia piata ooipia bù, ne–inaa iru bamerã pùchi juadoopa. Mãgá pùa chupùria chedeerãmaa teei.
29 Ik'achia pedee p'ananáatù. Ma k'ãyaara pedee pia aupai jarapatáatù, chi ûrirutaarãpa pia k'îsiadamerã mãik'aapa pia oodamerã. Mãgá parãpa ãchi k'aripadait'ee. 30 Tachi Ak'õre Jaure t'ãri p'uapináatù, parãpa mãgee ne–inaa k'achia oo p'anùùpa. K'irãpátù iru k'aurépata k'awa p'anù tachi Tachi Ak'õredeerã. Iruta tachi ome bapariit'ee na eujãdepema k'ap'ùadeepa uchiarutamaa Cristo cheru ewate.
31 Mapa parãdepema apida nãgá baik'araa bù: t'ãri ãrii; k'îrauyaa; t'ãri k'achia; chõoyaa; ik'achia pedeeyaa maa–e pùrã awaraarã ãpùte pedee k'achia jarayaa; awaraarã k'îra unuamaa iru p'anapata. 32 Ma k'ãyaara, t'ãri pia para bátù mãik'aapa chupùria k'awaa para bátù. Apemaarãpa ne–inaa k'achia oodak'ãri, perdonaapatáatù, Tachi Ak'õrepa tachia k'achia oopata perdonaaparik'a Cristo piuda k'aurepa tachi pari.