Tachi Ak'õrepa Pablo jùrùda judio–eerãmaa jarateenamerã
3
1 Maperã mù, Pablopa jarateepari Jesucristopa ooda, parã judio–eerã ichiaba araa p'anapataadamerã iru ome. Ma k'aurépata ârá mù carcelde bù. 2 ¿Parãpa nãga k'awa p'anù–ek'ã? Tachi Ak'õre t'ãri pia bapari perã, parã pia oo k'inia bù. Mapa mù jùrùt'eraji na mimia oomerã parã–it'ee. 3 Naaweda Tachi Ak'õrepa k'îsia iru baji mãgá parã pia ooit'ee. Mamîda mãga k'awapi–e paji naawedapemaarãmaa. Jîp'a mùmaa k'awapiji, mùa pedee chok'ara–eepa et'ewa jaradak'a na p'ãdade. 4 Ma pedee waya leedak'ãri, k'awaadai Tachi Ak'õrepa wãara mùmaa k'awaapiji ichia k'îsia iru bada ooit'ee Cristo k'ap'ùa pari. 5 Naaweda eperã apidaapa ma k'îsia iru bada k'awada–e paji. Mamîda ârá k'awaapiji ichia awara bùdaarãmaa; mãgùùrã ichia jùrùt'eradaarã mãik'aapa ichi pedee jarapataarã. Mãga k'awaapiji ichi Jaure k'ap'ùa pari. 6 Nãga k'îsia iru baji. Judio–eerãpa ijãadak'ãri Cristo piuji ãchi k'aripait'ee, auk'a p'anù judiorã ijãapataarã ome. Tachi Ak'õrepa ãchi auk'a araa p'anapipari Jesucristo ome, p'uuru apai pùk'a p'anadamerã judiorã ome. Irua ooda k'aurepa ãchi auk'a ùt'aa wãdait'ee mãik'aapa auk'a iru p'anadait'ee jõma Tachi Ak'õrepa jarada teeit'ee ichideerãmaa.7 Tachi Ak'õrepa k'inia bada perã, mù pia ooji jùrùt'erak'ãri jarateenamerã Cristopa ooda eperãarã k'aripait'ee. Iruata mùmaa mãgà jarateepipari. 8 Cristode ijãai naaweda, mù apemaarã k'ãyaara k'achiara bapachi. Mapa mù–it'ee, mù apemaarã ijãapataarã ek'ariara bù. Mamîda Tachi Ak'õrepa mù jùrùji. Irua mù pia oo k'inia bada perã, mù jùrùt'eraji judio–eerãmaa jarateenamerã Cristopa ooda eperãarã k'aripait'ee mãik'aapa irua ne–inaa pia oo k'inia bù irude ijãa p'anùùrã–it'ee. 9 Maperãpù mùa jõmaarãmaa jarai Tachi Ak'õrepa na eujã ooi naaweda, k'îsia iru bada parã judio–eerã k'aripait'ee. Awaraarãmaa mãga k'awapi–e paji mîda, Tachi Ak'õre, chi ne–inaa jõmaweda nâbù oodapa, mùmaa mãga k'awapiji. 10 Naawedapemaarãmaa k'awapi–e paji ichia k'îsia iru bada judio–eerã–it'ee. K'inia baji ârapemaarãpa mãga k'awaadamerã. Ichiaba k'inia baji ùt'aripemaarã, ichi angeleerãpa mãik'aapa netuaraarãpa paara k'awaa wãdamerã iru jõmaarã k'ãyaara k'îsia k'awaara bù eperãarã k'aripait'ee. Mãgùùrãpa mãga k'awaadait'ee unudak'ãri judiorã judio–eerã ome p'uuru apai pùk'a bù, Cristode ijãapata perã. 11 Wãara Tachi Ak'õrepa ooji ichia ichita k'îsia iru badak'a ooit'ee Tachi Waibùa Jesucristo k'ap'ùa pari. 12 Maperãpù tachi Cristode ijãajida. Iru ome araa p'anapata perã, waaweeda–e Tachi Ak'õre k'ait'a wãdait'ee ùt'aa t'âdak'ãri. 13 Tachi Ak'õrepa ma jõma jara aupada ooda perã tachi ijãapataarã k'aripait'ee, o–îa para bátù. Mù nama carcelde chupùria nâbù mîda parã judio–eerãmaa jaratee k'iniapa, parã pia–ee, k'îsia paraa p'anadaik'araa bù. Ma k'ãyaara o–îa p'anadaipia bù Tachi Ak'õrepa parã judio–eerã ichiaba pia oo k'inia bairã Cristo k'ap'ùa pari.
Cristo k'aurepa Tachi Ak'õrepa tachi k'inia iru bapari
14 Mùa made k'îsiak'ãri, Tachi Ak'õre k'îrapite bedabaipari mãik'aapa ùt'aa t'âpari irumaa. 15 Iruta na p'ek'au eujãdepema ëreerã mãik'aapa ùt'aripema ëreerã ak'õre, ichia ãra ooda perã. 16 Tachi Ak'õre jõmaarã k'ãyaara waibùara bapari perã, ne–inaa jõmaweda k'awapari. Mapa mùa ùt'aa iidi bù irua parã choopimerã pãchi t'ãride iru Jaure k'ap'ùa pari, mãgá oodamerã irua oopi bùk'a. 17 Iidi bù Cristo bamerã pãchi t'ãride, irude ijãa p'anù misa. Mãgá parãpa Tachi Ak'õre mãik'aapa awaraarã k'inia iru p'anadait'ee. 18 Ma awara mãgá parã mãik'aapa awaraa ijãapataarãpa k'awaadait'ee Cristopa tachi audú k'inia iru bapari. Ara to t'ai audú jet'ee bùk'a, audú teesoo bùk'a, audú nãpùa bùk'a, mãga pùk'a Cristopa tachi audú k'inia iru bapari. 19 P'oyaa k'awada–e p'anù mîda Cristopa tachi mãgá audupai k'inia iru bù, mùa iidi bù Tachi Ak'õrepa parãmaa mãga pipùara k'awapimerã. Parãpa wãara mãga k'awadak'ãri, ne–inaa jõmaade Tachi Ak'õrek'a p'anadait'ee.
20 ¡Wãara Tachi Ak'õre jõmaarã k'ãyaara waibùara bù! Ichi tachi ome bak'ãri, tachimaa ne–inaa piara bù oopipari, irumaa iidipata k'ãyaara mãik'aapa tachia k'îsiapata k'ãyaara. 21 Mapa tachi Jesucristode ijãapataarã, ârapemaarã mãik'aapa t'êe cherutaarã, o–îa ùt'aa t'âdáma Tachi Ak'õremaa jaradait'ee iru ichita jõmaarã k'ãyaara waibùara bù. ¡Amén!