Tachi Ak'õrepa tachi k'inia iru bapari perã,<R>atuada–e pait'ee
2
1 Cristode ijãadai naaweda, Tachi Ak'õre–it'ee parã piu pùk'a p'anajida, irua oopi bùk'a oodaamaa p'anapatap'edaa perã mãik'aapa p'ek'au k'achia ooi awaa p'anapatap'edaa perã. 2 Parãpa na p'ek'au eujãdepemaarãpa ne–inaa k'achia oopata k'îra t'ãdoo oo wãpachida. Oo k'inia p'anapachida jaure k'achia beerã poro waibùapa oopidak'a. Mãgà Netuara Poro Waibùapa k'îsiapipari Tachi Ak'õrepa oopi bùk'a oodaamaa p'anùùrãmaa, audupùara mãga p'anadamerã. 3 Wãara Cristode ijãadai naaweda, tachi jõmaweda mãgee k'achia oopataarãk'a p'anapachida. Oopachida tachia oo k'iniata, tachi p'ek'au k'achia ooyaa bù k'ap'ùapa oopidak'a mãik'aapa tachia pariatua k'îsiadap'edaak'a. Mãgá p'anadap'edaa perã, Tachi Ak'õre k'îraupi p'anapachida mãik'aapa atuadait'ee paji apemaarã p'ek'au k'achia oopataarã ome. 4 Mãgá piu pùk'a p'anajida mîda tachia p'ek'au k'achia oopata k'aurepa, Tachi Ak'õrepa tachi audú chupùria k'awaaji. Tachi k'inia iru bada perã, 5 araa p'anapiji Cristo ome, maadamãiipa ichita chok'ai p'anapataadamerã iru k'îrapite. Irua mãgá parã pia oo k'inia bada perã, parã o k'achiadeepa k'aripa ataji atuanaadamerã. Ârá tachi ichita chok'ai p'anù Tachi Ak'õre k'îrapite. 6 Tachi Ak'õrepa tachi Jesucristo ome araa p'anapida perã, jaradai irua Cristo chok'ai p'irabaipik'ãri, tachi auk'a mãgá chok'ai p'irabai pùk'apiji. Ma awara Tachi Ak'õrepa Cristo su–ak'ù beepik'ãri ichi juaraare ùt'ari, tachi auk'a mama su–ak'ù p'anee pùk'apiji, Cristo ome araa p'anapata perã. 7 Mãga ooji jõma t'êe cherutaarãmaa ak'ùpiit'ee ichia tachi Jesucristode ijãapataarã pia oopari, ichi t'ãri pia bapari perã. 8 Maperãpù parã Cristode ijãadak'ãri, Tachi Ak'õrepa parã o k'achiadeepa k'aripa ataji atuanaadamerã. Pãchi k'îradoopa ma o k'achiadeepa p'oyaa uchiada–e paji. Tachi Ak'õrepapai eperãarã madeepa uchiapii. 9 Eperãarã ãchi k'îradoopa madeepa uchiada paara, mãgak'ajida: “Tachia pia oopata k'aurepa Tachi Ak'õrepa k'aripaji.” Mamîda mãga–e. Tachi Ak'õrepapai tachi ijãapataarã mãgá o k'achiadeepa k'aripa atapari, apida pedee audua pedeenaadamerã. 10 Iruata tachi ooji Cristode ijãadamerã mãik'aapa iruata tachi araa p'anapiji Cristo ome. Mãga ooji Jesucristo k'ap'ùa pari ne–inaa pia oodamerã, irua naaweda k'îsia iru badak'a.Cristo ome araa p'anapataarã k'ãiwee p'anapata
11 K'îsíatù parã ijãadai naaweda p'anapatap'edaade. Naaweda parã Tachi Ak'õrede ijãadak'aa paji. Judio–eerã perã, k'awada–e paji Ak'õrepa jarada judiorãmaa, ùmùk'îraarã k'ap'ùade tauchaa bùdamerã. Mapa judiorã, “chi tauchaa iru beerãda” apataarãpa at'ãri parã judio–eerã k'îra unuamaa iru p'anapata mãik'aapa parã ãpùte “chi tauchaa wêe beerã” apata. 12 Ichiaba Cristode ijãadai naaweda, parãpa k'awada–e paji Tachi Ak'õrepa israelitaarã jùrùt'erada ichi eperãarã papiit'ee. Mapa maarepida k'awada–e paji Tachi Ak'õrepa jarada ãra chonaarãmaa: aba pëiit'eeda aji, eperãarã k'aripade. Mãgá Tachi Ak'õre k'awada–e p'anadap'edaa perã, ichiaba k'awada–e paji sãga o k'achiadeepa uchiadai. Mãgá p'anapachida na p'ek'au eujãde. 13 Mamîda ârá mãgá p'anada–e. Ijãapata perã Jesucristo piuji parã pari, araa p'anapata iru ome mãik'aapa Tachi Ak'õredeerã p'anù iruk'a. Naaweda t'ùmà pùk'a p'anapachida Tachi Ak'õre ik'aawaapa. Mamîda ârá Jesucristo waa bat'ada k'aurepa parã Tachi Ak'õre k'ait'a pùk'a p'anù, ichideerã perã.
14 Maperã parã k'ãiwee p'anadai judiorã ome, ãra auk'a Cristode ijãadak'ãri parãk'a. Ichi k'aurepa waa k'îrau p'anada–e. Jîp'a araa p'anapata p'uuru apai pùk'a. 15 Naaweda Tachi Ak'õrepa ichi ûraa Moisemaa p'ãpiji, judiorãpa ma ûraade jara bùk'a oodamerã. Ma ûraa k'aurepa judiorã awara p'anapachida parã judio–eerã k'ãyaara. Mamîda Tachi Ak'õrepa ûraa chiwidi jara pëiji Cristo k'ap'ùa pari. Mapa Cristo piuk'ãri, Ak'õrepa chi judiorã irude ijãa p'anadap'edaarã uchiapiji ma naawedapema ûraa jarada jua ek'ariipa. Mãga ooji Cristo k'aurepa judiorã judio–eerã ome p'uuru apai pùk'a p'anadamerã mãik'aapa oodamerã irua oopi bùk'a. Tachia mãga oodak'ãri, wãara k'ãiwee p'anapata. 16 Ma awara Cristo kurusode piuk'ãri, tachi t'ãri auk'a bùpiji Tachi Ak'õre ome. Naaweda tachia p'ek'au k'achia oopata k'aurepa Tachi Ak'õrepa tachi pia ak'ù–e paji. Mamîda Cristode ijãadak'ãri, araa p'aneejida iru ome, k'ap'ùa apai pùk'a. Mapa ârá Tachi Ak'õrepa tachi pia ak'ùpari. Ichiaba tachi k'îrau–ee para bapari.
17 Cristo cheji na pedee pia jarait'ee: ichiata eperãarã k'ãiwee p'anapipari. Mãga oopari parã Tachi Ak'õre ik'aawaapa t'ùmà pùk'a p'anadap'edaarãmaa mãik'aapa tai k'ait'a pùk'a p'anadap'edaarãmaa paara. 18 Ârá irude ijãapata perã, tachi jõmaweda Tachi Ak'õre k'ait'a p'anapataadai iru Jaure k'ap'ùa pari.
19 Maperãpù parã waa p'anadak'aa k'îra tewaraarãk'a. Ma k'ãyaara auk'a p'anapata awaraarã Cristode ijãapataarãk'a, auk'a Tachi Ak'õredeerã perã. 20 Parã te mãudee oodák'apù p'anù. Tai chi jùrùt'eradaarã Cristopa ooda jarateenadamerã basadepema måuk'apù p'anù Tachi Ak'õre pedee jarapataarã ome. Jõdee Jesucristo chi te k'idaadepema mãu pi–iara pùk'a bù, ichi k'aurepa jõma ijãapataarã araa p'anapata perã. 21 Tachi Ak'õrepa parã ijãapataarã araa p'anapipari Cristo ome mãik'aapa awaraa ijãapataarã ome. Mãgá tachi ichi tek'a oo wãpari mãik'aapa tachi awara bù wãpari ichi–it'ee, irumaa ùt'aa t'âpataadamerã. 22 Tachi mãgá araa p'anapata perã Cristo ome, tachita Tachi Ak'õre tek'a p'anù, iru Jaure tachi ome bapari perã.