EFESIOS
San Pablopa K'art'a P'ãda Éfeso P'uurudepema Ijãapataarãmaa
Salude pëida
1
1 Mù, Pablopa na k'art'a p'ãru Jesucristode wãara ijãapataarãmaa, Éfeso p'uurude p'anù. Tachi Ak'õrepa k'inia bada perã, mù jùrùt'eraji Jesucristopa pëimerã ichi ûraa jarateede. 2 Mùa k'inia bù Tachi Ak'õrepa Tachi Waibùa Jesucristo ome parã pia ak'ù p'anadamerã. Mãgá k'ãiwee p'anapataadait'ee.Cristo k'ap'ùa pari Tachi Ak'õrepa tachi k'aripapari
3 ¡T'ãri o–îa gracias jaradáma Tachi Ak'õremaa! ¡Iru Tachi Waibùa Jesucristo Ak'õre! Iruata tachi bendiciaji tachi araa p'anapik'ãri Cristo ome, irude ijãapata perã. Cristo k'ap'ùa pari irua ùt'aripema ne–inaa pia k'îra t'ãdoo ooji tachi k'aripait'ee, ùt'aa wãdamerã piudak'ãri. Nãgee ne–inaa pia ooji tachi–it'ee. 4 Na eujã ooi naaweda, Tachi Ak'õrepa tachi jùrùt'eraji Cristode ijãadamerã. Mãga ooji tachi awara bù k'inia bada perã, ichi k'îrapite p'ek'au k'achia wêe p'anadamerã. 5 Ma awara iru t'ãri pia bapari perã mãik'aapa tachi k'inia iru bapari perã, k'îsia iru baji tachi ichi warrarã papiit'ee ichi Warra Jesucristode ijãapata k'aurepa. 6 Mãgá t'ãri piara bapari perã jõmaarã k'ãyaara, t'ãri o–îa gracias jaradáma irumaa. Maperã tachia ne–inaa oo–eeta, ichideerã papiji ichi Warra k'inia iru bù k'ap'ùa pari. Mãga ooji ichi Warra pëik'ãri piumerã tachi pari. 7 Ichi warra waa bat'ada k'aurepa tachi o k'achiadeepa k'aripa ataji atuanaadamerã mãik'aapa tachia p'ek'au k'achia oopata wêpapiji. 8 ¡Mãga ook'ãri, wãara tachi pia ooji! Mamîda mãgapai–e. 9 Mãga ook'ãri, ichiaba tachi k'îsia k'awaapiji ne–inaa pia oo k'awaadamerã irua oopi bùk'a. Ichiaba k'awapiji ne–inaa awaraarãmaa waide k'awapi–e pada. K'awapiji ichia at'ãri k'îsia iru bù ooit'ee Cristo k'ap'ùa pari. 10 Nãga k'îsia iru bù. Irua k'inia bak'ãri, ewari cherude ne–inaa jõmaweda na p'ek'au eujãdepema mãik'aapa ùt'aripema bùit'ee Cristo jua ek'ari.
11 Tachi Ak'õrepa ne–inaa jõmaweda oopari ichia k'inia bùk'a. Mapa ichia k'îsia iru badak'a, tai judiorã naapùara jùrùt'eraji ichideerã papiit'ee. Mãga ooji Cristode ijãadak'ãri. Tai mãgá ichideerã p'anadairã, iru p'anadait'ee jõmaweda irua k'îsia iru bù ichideerã–it'ee. 12 Tai judiorã mãgá naapùara jùrùt'eraji, nù p'anadap'edaa perã Cristo waya cheit'ee na eujãdee. Tachi Ak'õrepa k'inia baji taipa jõmaarãmaa jaranadamerã iru jõmaarã k'ãyaara waibùara bù. 13 Mãpai taipa mãga oodak'ãri, parãpa ûrijida Tachi Ak'õrepa wãarata jara pëida Cristode. Mãgá k'awaadak'ãri Cristopa eperãarã o k'achiadeepa k'aripa atai, parãpa ichiaba irude ijãajida. Mapa Tachi Ak'õrepa parã auk'a ichideerã papiji mãik'aapa parã k'ap'ùade ichi Jaure ba chepiji, irua ooit'eeda adak'a. Eperãpa tauchaa bùparik'a ichi net'aade jõmaarãpa k'awaadamerã ichi ma net'aa chipari, mãga pùk'a Tachi Ak'õrepa ichi Jaure ba chepiji ichideerã k'ap'ùade, jõmaarãpa k'awaadamerã ichita ãchi chipari. 14 Ma Jaure k'aurépata tachia k'awa p'anù wãara iru p'anadait'ee jõmaweda irua k'îsia iru bù ichideerã–it'ee. Ma awara k'awa p'anù ichideerã perã ewari cherude tachi p'ek'au k'achia ooyaa bù k'ap'ùadeepa aweda uchiadait'ee, wãdak'ãri iru truadee. Mãga pak'ãripù, wãara t'ãri o–îa gracias jaradait'ee irumaa, iru k'îra wãree pia k'awadait'ee perã.
Pablopa ùt'aa iidida Cristode ijãapataarã pari
15 Tachi Ak'õrepa ma jõma ooda perã tachi–it'ee, mùa k'awaadak'ãriipa parã wãara ijãa p'anù Tachi Waibùa Jesude mãik'aapa parãpa jõma Tachi Ak'õredeerã k'inia iru p'anù, mùa nãga oopari. 16 Ùt'aa t'âk'ãri Tachi Ak'õremaa, ichita gracias jarapari parã pari. 17 Iidipari Tachi Waibùa Jesucristo Ak'õre k'îra wãree bùmaa, irua parã k'îsia k'awaapimerã ichi Jaure k'ap'ùa pari. Mãgá iru wãara pipùara k'awadait'ee. 18 Parãpa mãgá iru pipùara k'awa wãdak'ãri, t'ãride k'awadait'ee Tachi Ak'õrepa parã jùrùji ichideerã papiit'ee. Mãga ooji, jai–idaadak'ãri iru trua k'îra wãreedee wãdamerã mãik'aapa iru p'anadamerã jõmaweda irua k'îsia iru bù ichideerã–it'ee. 19 Ichiaba parãpa k'awaadait'ee Tachi Ak'õrepa ne–inaa jõmaweda oopari. Iru jõmaarã k'ãyaara waibùara bapari perã, tachi ijãapataarã k'aripai Cristo k'aripadak'a. 20 Cristo piup'eda, chok'ai p'irabaipiji mãik'aapa su–ak'ù beepiji ùt'ari ichi juaraare. 21 Mama bùji ak'ùpi k'inia bada perã Cristo jõmaarã k'ãyaara waibùara bù. Jõmaweda iru jua ek'ari ichita p'anapataadait'ee, na p'ek'au eujã jõru pùjida. Na p'ek'au eujãdepema poro waibùarã jõmaweda iru jua ek'ari p'anadait'ee, jõmaweda charraarã mãik'aapa reyrã paara. Ichiaba na p'ek'au eujãdepema–eerã iru jua ek'ari p'anadait'ee, angeleerã mãik'aapa netuara eere p'anùùrã paara. 22 Tachi Ak'õrepa ma jõmaweda Cristo jua ek'ari mãgá bùda perã, iru ne–inaa jõma poro waibùa; tachi ijãapataarã poro waibùa ichiaba. 23 Iru tachi porok'a bù; jõdee tachi ijãapataarã iru k'ap'ùa apai pùk'a p'anù, chok'ara p'anù mîda. Tachi ijãapataarã wêe, Cristopa oo–e pai Tachi Ak'õrepa oopi k'inia bùk'a na p'ek'au eujãde. Jõdee tachia pida p'oyaa ooda–e pai Tachi Ak'õrepa oopi k'inia bùk'a, Tachi Poro Waibùa Cristo wêe. Cristo k'aurépata ne–inaa jõmaweda nâbù.