FILIPENSES
San Pablopa K'art'a P'ãda Filipos P'uurudepema Ijãapataarãmaa
Salude pëida
1
1 Mù, Pablo Timoteo ome oopata Jesucristopa oopi bùk'a. Mapa na k'art'a pëiruta parã Jesucristode ijãapataarãmaa, Filipos p'uurude p'anù. Ichiaba salude pëiruta parã ak'ùpataarãmaa ãra k'aripapataarã ome. 2 K'inia p'anù Tachi Ak'õrepa mãik'aapa Tachi Waibùa Jesucristopa parã pia ak'ù p'anadamerã. Mãgá k'ãiwee p'anapataadait'ee.Pablopa ùt'aa t'âda Filipodepema ijãapataarã pari
3 Mùa parã k'irãpak'ãri, ichita gracias jarapari Tachi Ak'õremaa, iru mù Ak'õre Waibùa perã. 4 Ùt'aa t'âru chaa parã jõmaarã pari, mùa t'ãri o–îa gracias jarapari Tachi Ak'õremaa 5 parãpa mù k'aripapachida perã mùa jaratee bù misa Cristopa ooda eperãarã k'aripait'ee. Mãgá oopata Cristode ijãadak'ãriipa. 6 Mãgá ijãadak'ãri, Tachi Ak'õrepa parã t'ãri pia p'anapiji ichia k'îsia iru badak'a. Mùa t'ãride k'awa bù Tachi Ak'õrepa mãgá oo wãk'ãtù wãit'ee, iruk'a t'ãri pia parutamaa Cristo waya chek'ãri. 7 Pia bù mùa mãga k'îsiait'ee, t'ãripa mùa parã k'inia iru bapari perã. Tachi Ak'õrepa parã k'aripamaa bù mù k'aripaparik'a. Maperãpù parãpa mù k'aripapata nama carcelde bù misa mãik'aapa tachi ijãapataarã ùmùatee p'anùùrãmaa p'anaumaa bù misa. Ichiaba mù k'aripapata jîp'a jarateemaa bù misa Tachi Ak'õre pedee pia jara pëida Cristode. 8 Tachi Ak'õrepa k'awa bù mùa t'ãripa parã k'inia iru bù, Jesucristopa audú k'inia iru baparik'a. Mapa parã audú unu k'inia bù.
9 Ùt'aa t'âpari parã pari, parãpa audupùara Tachi Ak'õre k'inia iru p'anadamerã mãik'aapa chik'inia p'anapataadamerã. Ichiaba ùt'aa t'âpari parãpa Tachi Ak'õre pipùara k'awa wãdamerã mãik'aapa ne–inaa jõmaade oo k'awaa wãdamerã irua oopi bùk'a. 10 Mãga k'awaadak'ãri, ichita jùrùdait'ee ne–inaa pipùara oodait'ee irua oopi bùk'a. Mãpai mãga ooruta pùrã, Cristo cheru ewate p'ek'au k'achia wêe p'anadait'ee eperãarã k'îrapite mãik'aapa Tachi Ak'õre k'îrapite. 11 Ma ewate nù p'anù misa, mùa ùt'aa iidipari, Jesucristo k'ap'ùa pari parãpa oodamerã ne–inaa pia k'îra t'ãdoo, Tachi Ak'õrepa oopi bùk'a. Mãga ooruta pùrã, awaraarãpa jaradait'ee wãara iru jõmaarã k'ãyaara waibùara bù, irua parã mãgá k'aripapari perã.
Pablo bapari ooit'ee Cristopa oopi bùk'a
12 Âpemaarã Cristo k'aurepa, mùa nãga k'awapi k'inia bù parãmaa. Mù nepùrade nâbù mîda, ma k'aurépata chok'araarãpa k'awaa wãpata Cristopa ooda ãchi k'aripait'ee atuanaadamerã. 13 Mù nama carcelde nâbairã, jõma César palacio jâapataarãpa awaraarã ome k'awa p'anù mù nama bù Cristode ijãapari perã mãik'aapa irua oopi bùk'a oopari perã. 14 Ma awara mù mãgá choo bairã nama, na p'uurudepema Cristode ijãapataarã chok'araarãpa waapùara waawee–ee jarateemaa p'anù Tachi Ak'õrepa Cristode jara pëida.
15 Wãara, ûk'uruurãpa Cristopa ooda jarateepata eperãarã k'aripait'ee, eperãarãpa mù k'ãyaara ãchi t'o p'anadamerã. Mamîda awaraarãpa mãga jarateepata t'ãri pia p'anadairã. 16 Mãgùùrãpa mù k'inia iru p'anapata perã, Cristopa ooda jarateepata. K'awa p'anù Tachi Ak'õrépata mù jùrùt'eraji jõmaarãmaa jarateenamerã irua Cristode jara pëida mãik'aapa p'anaumerã tachi ùmùateepataarãmaa. 17 Mamîda chi apemaarãpa k'îra jîp'a jarateedak'aa. Imeraa jarateepata eperãarãpa ijãadamerã ãchia jarateeruta aupai. Mãga oopata mù k'îsia p'uapidait'ee nama carcelde nâbùde. 18 Mamîda mùa p'ua–e bù. Wãara mù o–îa bù eperãarã ûk'uruurãpa Cristopa ooda eperãarã k'aripait'ee k'îra jîp'a jarateedak'ãri. Mamîda awaraarãpa k'îra jîp'a–ee jarateeruta pùjida, mù o–îa bù Cristopa oodata jaratee p'anadairã.
Ma awara mù audupùara o–îa bait'ee nãga perã. 19 K'awa bù mù nama p'asa nâbù pia uchiait'ee, parãpa ùt'aa t'â p'anadairã mù pari mãik'aapa Jesucristo Jaurepa mù k'aripamaa bairã. 20 Mùa ne–inaa oo k'inia–epù, ma k'aurepa k'îra nejasia bait'ee. Ma awara ne–inaa jõmaade ichita waawee–ee oo k'inia bù Cristopa oopi bùk'a, naapai chupùria nâbùk'a mãik'aapa chupùria wêe nâbak'ãri. Mãga oo k'inia bù awaraarãpa k'awaadamerã Cristo mù ome bapari. Ma awara mãga oo k'inia bù, chok'ai uchiaru jida na chupùria nâbùdeepa maa–e pùrã piuru pùjida. 21 Mùa nãga ijãapari. Mù bapari ooit'ee Cristopa oopi bùk'a. Mamîda mùa k'awa bù jai–idaak'ãri pipùara bapariit'ee, ùt'ari Cristo ome ichita bapariit'ee perã. 22 Maperãpù k'awa–e chisãgùta pipùara bak'aji. Chok'ai uchiaru pùrã na carceldeepa, mùa waapùara ooi awaraarãpa Cristo k'awaadamerã. Jõdee jai–idaaru pùrã, Cristo ome ùt'ari banai. 23 K'îsia nâbù omeeweda oo k'inia bairã. Audú uchia k'inia bù na p'ek'au eujãdeepa banait'ee Cristo ome. Ma pipùara bak'aji mù–it'ee. 24 Mamîda na k'ap'ùade beeru pùrã, ma pipùara bak'aji parã–it'ee. 25 Maperã k'awa bù Tachi Ak'õrepa mù uchiapiit'ee na carceldeepa, at'ãri beemerã parã ome. Mãgá parã k'aripai pipùara ijãadamerã mãik'aapa o–îa p'anadamerã, mãgá ijãapata perã. 26 Ichiaba mùa k'îsia bù Ak'õrepa mù uchiapiit'ee nadeepa mù waya unudak'ãri, parã audupùara o–îa p'anadamerã mãik'aapa t'ãri o–îa ùt'aa t'âdamerã Jesucristomaa gracias jaradait'ee mù pari.
27 Mùa nãgapai k'inia bù: parãpa oodamerã Tachi Ak'õrepa jara pëidak'a Jesucristo k'ap'ùa pari mãik'aapa p'anapataadamerã Cristodeerãk'a. Mù na chupùria nâbùdeepa uchiaru pùrã, parã mãgá unui jãmaa wãk'ãri. Mamîda uchia–e pùjida, mùa ûri k'inia bù parã t'ãri a–ba choo p'anù Cristode ijãa p'anùde Tachi Ak'õre Jaure k'ap'ùa pari. Ichiaba ûri k'inia bù parã auk'a jùrùmaa p'anù awaraarãpa auk'a ijãadamerã Tachi Ak'õrepa wãarata jara pëida Cristode. 28 Mãga oo p'anù misa, mùa ichiaba ûri k'inia bù parã maarepida waawee–ee p'anù, Cristo k'aurepa parã k'îra unuamaa iru p'anapataarãpa parã jùrùdak'ãri miapidait'ee. Mãgá waawee–ee choodak'ãri, parã k'ap'ùa pari Tachi Ak'õrepa mãùrãmaa k'awapiit'ee ãchi atuadait'ee. Jõdee parãmaa k'awapiit'ee parã ùt'aa wãdait'ee, wãara ichideerã perã. 29 Mùa mãga jara bù Tachi Ak'õre t'ãri pia bapari perã parã ome. Parãta jùrùji Cristode ijãapataadamerã mãik'aapa oopataadamerã irua oopi k'inia bùk'a. Parã jùrù–e paji jîp'a ijãadamerã. Ichiaba jùrùji miadamerã Cristo k'aurepa. 30 Ma–it'ee Tachi Ak'õre k'îra unuamaa iru p'anùùrãpa tachi auk'a jùrùmaa p'anù miapidait'ee. Tachi chõomaa pùk'a p'anù mãgùùrã ome. Parãpa unujida mãùrãpa mùmaa oodap'edaa mù parã t'ãide nipak'ãri mãik'aapa ârá waapùara k'awaa wãda mù nama ichiaba miapi iru p'anù.